102 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने गृहराजान्तरकथनं नाम सप्तत्रिंशो ऽध्यायः अगस्त्य उवाच श्रुतमेतन्महावृत्तमाविर्भावादिकं महत् । भण्डासुरवधश्चैव देव्याः श्रीनगरस्थितिः
102 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne gṛharājāntarakathanaṃ nāma saptatriṃśo 'dhyāyaḥ agastya uvāca śrutametanmahāvṛttamāvirbhāvādikaṃ mahat / bhaṇḍāsuravadhaścaiva devyāḥ śrīnagarasthitiḥ
1 ॥ इदानीं श्रोतुमिच्छामि तस्या मत्रस्य साधनम् । तन्मन्त्राणां लक्षणं च सर्वमेतन्निवेदय
1 // idānīṃ śrotumicchāmi tasyā matrasya sādhanam / tanmantrāṇāṃ lakṣaṇaṃ ca sarvametannivedaya
2 ॥ हयग्रीव उवाच सर्वेभ्यो ऽपि पदार्थेभ्यः शाब्दं वस्तु महत्तरम् । सर्वेभ्यो ऽपि हि शब्देभ्यो वेदराशिर्महान्मुने
2 // hayagrīva uvāca sarvebhyo 'pi padārthebhyaḥ śābdaṃ vastu mahattaram / sarvebhyo 'pi hi śabdebhyo vedarāśirmahānmune
3 ॥ सर्वेभ्यो ऽपि हि वेदेभ्यो वेदमन्त्रा महत्तराः । सर्वेभ्यो वेदमन्त्रेभ्यो विष्णुमन्त्रा महत्तराः
3 // sarvebhyo 'pi hi vedebhyo vedamantrā mahattarāḥ / sarvebhyo vedamantrebhyo viṣṇumantrā mahattarāḥ
4 ॥ तेभ्यो ऽपि दौर्गमन्त्रास्तु महान्तो मुनिपुङ्गव । तेभ्यो गाणपता मन्त्रा मुने वीर्य महत्तराः
4 // tebhyo 'pi daurgamantrāstu mahānto munipuṅgava / tebhyo gāṇapatā mantrā mune vīrya mahattarāḥ
5 ॥ तेभ्यो ऽप्यर्कस्य मन्त्रास्तु तेभ्यः शैवा महत्तराः । तेभ्यो ऽपि लक्ष्मीमन्त्रास्तु तेभ्यः सारस्वता वराः
5 // tebhyo 'pyarkasya mantrāstu tebhyaḥ śaivā mahattarāḥ / tebhyo 'pi lakṣmīmantrāstu tebhyaḥ sārasvatā varāḥ
6 ॥ तेभ्यो ऽपि गिरिजामन्त्रास्तेभ्यश्चाम्नायभेदजाः । सर्वाम्नायमनुभ्यो ऽपि वाराहा मनवो वराः
6 // tebhyo 'pi girijāmantrāstebhyaścāmnāyabhedajāḥ / sarvāmnāyamanubhyo 'pi vārāhā manavo varāḥ
7 ॥ तेभ्यः श्यामामनुवरा विशिष्टा इल्वलान्तक । तेभ्यो ऽपि ललितामन्त्रा दशभेदविभेदिताः
7 // tebhyaḥ śyāmāmanuvarā viśiṣṭā ilvalāntaka / tebhyo 'pi lalitāmantrā daśabhedavibheditāḥ
8 ॥ तेषु द्वौ मनुराजौ तु वरिष्ठौ विन्ध्यमर्दन । लोपामुद्रा कामराज इति ख्यातिमुपागतौ
8 // teṣu dvau manurājau tu variṣṭhau vindhyamardana / lopāmudrā kāmarāja iti khyātimupāgatau
9 ॥ ह्रादिस्तु लोपामुद्रा स्यात्कामराजस्तु कादिकाः । हंसादेर्वाच्यतां याताः कामराजो महेस्वरः
9 // hrādistu lopāmudrā syātkāmarājastu kādikāḥ / haṃsādervācyatāṃ yātāḥ kāmarājo mahesvaraḥ
10 ॥ स्मरादेर्वाच्यतां याता देवी श्रीललितांबिका । हादिकाद्योर्मन्त्रयोस्तु भेदो वर्णत्रयोद्भवः
10 // smarādervācyatāṃ yātā devī śrīlalitāṃbikā / hādikādyormantrayostu bhedo varṇatrayodbhavaḥ
11 ॥ त्योश्च कामराजो ऽयं सिद्धिदो भक्तिशालिनाम् । शिवेन शक्त्या कामेन क्षित्या चैव तु मायया
11 // tyośca kāmarājo 'yaṃ siddhido bhaktiśālinām / śivena śaktyā kāmena kṣityā caiva tu māyayā
12 ॥ हंसेन भृगुणा चैव कामेन शशिमौलिना । शक्रेण भुवनेशेन चन्द्रेण च मनोभुवा
12 // haṃsena bhṛguṇā caiva kāmena śaśimaulinā / śakreṇa bhuvaneśena candreṇa ca manobhuvā
13 ॥ क्षित्या हृल्लेखया चैव प्रोक्तो हंसादिमन्त्रराट् । कामादिमन्त्रराजस्तु स्मरयोनिः श्रियो मुखे
13 // kṣityā hṛllekhayā caiva prokto haṃsādimantrarāṭ / kāmādimantrarājastu smarayoniḥ śriyo mukhe
14 ॥ पञ्चत्रिकमहाविद्या ललितांबा प्रवाचिकाम् । ये यजन्ति महाभागास्तेषां सर्वत्र सिद्धये
14 // pañcatrikamahāvidyā lalitāṃbā pravācikām / ye yajanti mahābhāgāsteṣāṃ sarvatra siddhaye
15 ॥ सद्गुरोस्तु मनुं प्राप्य त्रिपञ्चार्णपरिष्कृतम् । सम्यक्संसाधयेद्विद्वान्वक्ष्यमाणप्रकारतः
15 // sadgurostu manuṃ prāpya tripañcārṇapariṣkṛtam / samyaksaṃsādhayedvidvānvakṣyamāṇaprakārataḥ
16 ॥ तत्क्रमेण प्रवक्ष्यामि सावधानो मुने शृणु । प्रातरुत्थाय शिरसिस्मृत्वा कमलमुज्ज्वलम्
16 // tatkrameṇa pravakṣyāmi sāvadhāno mune śṛṇu / prātarutthāya śirasismṛtvā kamalamujjvalam
17 ॥ सहस्रपत्रशोभाढ्यं सकेशरसुकर्णिकम् । तत्र श्रीमद्गुरुं ध्वात्वा प्रसन्नं करुणामयम्
17 // sahasrapatraśobhāḍhyaṃ sakeśarasukarṇikam / tatra śrīmadguruṃ dhvātvā prasannaṃ karuṇāmayam
18 ॥ ततोबहिर्विनिर्गत्य कुर्याच्छौचादिकाः क्रियाः । अथागत्य च तैलेन सामोदेन विलेपितः
18 // tatobahirvinirgatya kuryācchaucādikāḥ kriyāḥ / athāgatya ca tailena sāmodena vilepitaḥ
19 ॥ उद्वर्तितश्च सुस्नातः शुद्धेनोष्णेन वारिणा । आपो निसर्गतः पूताः किं पुनर्वह्निसंयुताः । तस्मादुष्णोदके स्नायात्तदभावे यथोदकम्
19 // udvartitaśca susnātaḥ śuddhenoṣṇena vāriṇā / āpo nisargataḥ pūtāḥ kiṃ punarvahnisaṃyutāḥ / tasmāduṣṇodake snāyāttadabhāve yathodakam
20 ॥ परिधाय पटौ शुद्धे कौसुम्भौ वाथ वारुणौ । आचम्य प्रयतो विद्वान्हृदि ध्यायन्परांबिकाम्
20 // paridhāya paṭau śuddhe kausumbhau vātha vāruṇau / ācamya prayato vidvānhṛdi dhyāyanparāṃbikām
21 ॥ ऊर्ध्वपुण्ड्रं त्रिपुण्डं वा पट्टवर्धनमेव वा । अगस्त्यपत्राकारं वा धृत्वा भाले निजोचितम् । अन्तर्हितश्च शुद्धात्मा सन्ध्यावन्दनमाचरेत्
21 // ūrdhvapuṇḍraṃ tripuṇḍaṃ vā paṭṭavardhanameva vā / agastyapatrākāraṃ vā dhṛtvā bhāle nijocitam / antarhitaśca śuddhātmā sandhyāvandanamācaret
22 ॥ अश्वत्थपत्राकारेण पात्रेण सकुशाक्षतम् । सपुष्पचन्दनं चार्ध्यं मार्तण्डाय समुत्क्षिपेत्
22 // aśvatthapatrākāreṇa pātreṇa sakuśākṣatam / sapuṣpacandanaṃ cārdhyaṃ mārtaṇḍāya samutkṣipet
23 ॥ तथार्ध्यभावदेवत्वाल्ललितायै त्रिरर्ध्यकम् । तर्प्पयित्वा यथाशक्ति मूलेन ललितेश्वरीम्
23 // tathārdhyabhāvadevatvāllalitāyai trirardhyakam / tarppayitvā yathāśakti mūlena laliteśvarīm
24 ॥ देवर्षिपितृवर्गांश्च तर्पयित्वा विधानतः । दिवाकरमुपास्थाय देवीं च रविबिम्बगाम्
24 // devarṣipitṛvargāṃśca tarpayitvā vidhānataḥ / divākaramupāsthāya devīṃ ca ravibimbagām
25 ॥ मौनी विशुद्धहृदयः प्रविश्य मखमन्दिरम् । चारुकर्पूरकस्तूरीचन्दनादिविलेपितः
25 // maunī viśuddhahṛdayaḥ praviśya makhamandiram / cārukarpūrakastūrīcandanādivilepitaḥ
26 ॥ भूषणैर्भूषिताङ्गश्च चारुशृङ्गारवेषधृक् । आमोदिकुसुमस्रग्भिरवतंसितकुन्तलः
26 // bhūṣaṇairbhūṣitāṅgaśca cāruśṛṅgāraveṣadhṛk / āmodikusumasragbhiravataṃsitakuntalaḥ
27 ॥ संकल्पभूषणो वाथ यथाविभवभूषणः । पूजाखण्डे वक्ष्यमाणान्कृत्वा न्यासाननुक्रमात्
27 // saṃkalpabhūṣaṇo vātha yathāvibhavabhūṣaṇaḥ / pūjākhaṇḍe vakṣyamāṇānkṛtvā nyāsānanukramāt
28 ॥ मृद्वासने समासीनो ध्यायेच्छ्रीनगरं महत् । नानावृक्षमहोद्यानमारभ्य ललितावधि
28 // mṛdvāsane samāsīno dhyāyecchrīnagaraṃ mahat / nānāvṛkṣamahodyānamārabhya lalitāvadhi
29 ॥ ध्यायेच्छ्रीनगरं दिव्यं बहिरन्तरतः शुचिः । पूजाखण्डोक्तमार्गेम पूजां कृत्वा विलक्षणः
29 // dhyāyecchrīnagaraṃ divyaṃ bahirantarataḥ śuciḥ / pūjākhaṇḍoktamārgema pūjāṃ kṛtvā vilakṣaṇaḥ
30 ॥ अक्षमालां समादाय चन्द्रकस्तूरिवासिताम् । उदङ्मुखः प्राङ्खो वा जपेत्सिंहासनेश्वरीम् । षट्त्रिंशल्लक्षसंख्यां तु जपेद्विद्या प्रसीदति
30 // akṣamālāṃ samādāya candrakastūrivāsitām / udaṅmukhaḥ prāṅkho vā japetsiṃhāsaneśvarīm / ṣaṭtriṃśallakṣasaṃkhyāṃ tu japedvidyā prasīdati
31 ॥ तद्दशांशस्तु होमः स्यात्तद्दशांशं च तर्पणम् । तद्दशांशं ब्राह्मणानां भोजनं समुदीरितम्
31 // taddaśāṃśastu homaḥ syāttaddaśāṃśaṃ ca tarpaṇam / taddaśāṃśaṃ brāhmaṇānāṃ bhojanaṃ samudīritam
32 ॥ एवं स सिद्धमन्त्रस्तु कुर्यात्काम्यजपं पुनः । लक्षमात्रं जपित्वा तु मनुष्यान्वशमानयेत्
32 // evaṃ sa siddhamantrastu kuryātkāmyajapaṃ punaḥ / lakṣamātraṃ japitvā tu manuṣyānvaśamānayet
33 ॥ लक्षद्वितयजाप्येन नारीः सर्वा वशं नयेत् । लक्षत्रितयजापेन सर्वान्वशयते नृपान्
33 // lakṣadvitayajāpyena nārīḥ sarvā vaśaṃ nayet / lakṣatritayajāpena sarvānvaśayate nṛpān
34 ॥ चतुर्लक्षजपे जाते क्षुभ्यन्ति फणिकन्यकाः । पञ्चलक्षजपे जाते सर्वाः पातालयोषितः
34 // caturlakṣajape jāte kṣubhyanti phaṇikanyakāḥ / pañcalakṣajape jāte sarvāḥ pātālayoṣitaḥ
35 ॥ भूलोकसुन्दरीवर्गो वश्यःषड्लक्षजापतः । क्षुभ्यन्ति सप्त लक्षेण स्वर्गलोकमृगीदृशः
35 // bhūlokasundarīvargo vaśyaḥṣaḍlakṣajāpataḥ / kṣubhyanti sapta lakṣeṇa svargalokamṛgīdṛśaḥ
36 ॥ देवयोनिभवाः सर्वे ऽप्यष्टलक्षजपाद्वशाः । नवलक्षेण गीर्वाणा नखिलान्वशमानयेत्
36 // devayonibhavāḥ sarve 'pyaṣṭalakṣajapādvaśāḥ / navalakṣeṇa gīrvāṇā nakhilānvaśamānayet
37 ॥ लक्षैकादशजाप्येन ब्रह्मविष्णुमहेश्वरान् । लक्षद्वादशजापेन सिद्धीरष्टौ वशं नयेत्
37 // lakṣaikādaśajāpyena brahmaviṣṇumaheśvarān / lakṣadvādaśajāpena siddhīraṣṭau vaśaṃ nayet
38 ॥ इन्द्रस्येन्द्रत्वमेतेन मन्त्रेण ह्यभवत्पुरा । विष्णोर्विष्णुत्वमेतेन शिवस्य शिवतामुना
38 // indrasyendratvametena mantreṇa hyabhavatpurā / viṣṇorviṣṇutvametena śivasya śivatāmunā
39 ॥ इन्दोश्चन्द्रत्वमेतेन भानोर्भास्करतामुना । सर्वासां देवतानां च तास्ताः सिद्धय उज्ज्वलाः । अनेन मन्त्रराजेन जाता इत्यवधारय
39 // indoścandratvametena bhānorbhāskaratāmunā / sarvāsāṃ devatānāṃ ca tāstāḥ siddhaya ujjvalāḥ / anena mantrarājena jātā ityavadhāraya
40 ॥ एतन्मन्त्रस्य जापी तु सर्वपापविवर्जितः । त्रैलोक्यसुन्दराकारो मन्मथस्यापि मोहकृत्
40 // etanmantrasya jāpī tu sarvapāpavivarjitaḥ / trailokyasundarākāro manmathasyāpi mohakṛt
41 ॥ सर्वाभिः सिद्धिभिर्युक्तः सर्वज्ञः सर्वपूजितः । दर्शनादेव सर्वषामन्तरालस्य पूरकः
41 // sarvābhiḥ siddhibhiryuktaḥ sarvajñaḥ sarvapūjitaḥ / darśanādeva sarvaṣāmantarālasya pūrakaḥ
42 ॥ वाचा वाचस्पतिसमः श्रिया श्रीपतिसानभः । बले मरुत्समानः स्यात्स्थिरत्वे हिमवानिव
42 // vācā vācaspatisamaḥ śriyā śrīpatisānabhaḥ / bale marutsamānaḥ syātsthiratve himavāniva
43 ॥ औन्नत्ये मेरुतुल्यः स्याद्गांभीर्येण महार्णवः । क्षणात्क्षोभकरो मूर्त्या ग्रामपल्लीपुरादिषु
43 // aunnatye merutulyaḥ syādgāṃbhīryeṇa mahārṇavaḥ / kṣaṇātkṣobhakaro mūrtyā grāmapallīpurādiṣu
44 ॥ ईषद्भूभङ्गमात्रेण स्तम्भको जृंभकस्तथा । उच्चाटको मोहकश्च मारको दुष्टचेतसाम्
44 // īṣadbhūbhaṅgamātreṇa stambhako jṛṃbhakastathā / uccāṭako mohakaśca mārako duṣṭacetasām
45 ॥ क्रुद्धः प्रसीदति हठात्तस्य दर्शनहर्षितः । अष्टादशसु विद्यासु निरूढिमभिगच्छति
45 // kruddhaḥ prasīdati haṭhāttasya darśanaharṣitaḥ / aṣṭādaśasu vidyāsu nirūḍhimabhigacchati
46 ॥ मन्दाकिनीपूरसमा मधुरा तस्य भारती । न तस्याविदितं किञ्चित्सर्वशास्त्रेषु कुम्भज
46 // mandākinīpūrasamā madhurā tasya bhāratī / na tasyāviditaṃ kiñcitsarvaśāstreṣu kumbhaja
47 ॥ दर्शनानि च सर्वाणि कर्तु खण्डयितुं पटुः । तत्त्वञ्जानाति निखिलं सर्वज्ञत्वं च गच्छति
47 // darśanāni ca sarvāṇi kartu khaṇḍayituṃ paṭuḥ / tattvañjānāti nikhilaṃ sarvajñatvaṃ ca gacchati
48 ॥ सदा दयार्द्रहृदयं तस्य सर्वेषु जन्तुषु । तत्कोपाग्नेर्विषयतां गन्तुं नालं जगत्त्रयी
48 // sadā dayārdrahṛdayaṃ tasya sarveṣu jantuṣu / tatkopāgnerviṣayatāṃ gantuṃ nālaṃ jagattrayī
49 ॥ तस्य दर्शनवेलायां श्लथन्नीवीनिबन्धनाः । विश्रस्तरशनाबन्धा गलत्कुण्डलसञ्चयाः
49 // tasya darśanavelāyāṃ ślathannīvīnibandhanāḥ / viśrastaraśanābandhā galatkuṇḍalasañcayāḥ
50 ॥ घर्मवारिकणश्रेणीमुक्ताभूषितमूर्तयः । अत्यन्तरागतरलव्यापारनयनाञ्चलाः
50 // gharmavārikaṇaśreṇīmuktābhūṣitamūrtayaḥ / atyantarāgataralavyāpāranayanāñcalāḥ
51 ॥ स्रंसमानकरांभोजमणिकङ्कणपङ्क्तयः । ऊरुस्तम्भेन निष्पन्दा नमितास्याश्च लज्जया
51 // sraṃsamānakarāṃbhojamaṇikaṅkaṇapaṅktayaḥ / ūrustambhena niṣpandā namitāsyāśca lajjayā
52 ॥ द्रवत्कन्दर्पसदनाः पुलकाङ्कुरभूषणाः । अन्यमाकारमिव च प्राप्ता मानसजन्मना
52 // dravatkandarpasadanāḥ pulakāṅkurabhūṣaṇāḥ / anyamākāramiva ca prāptā mānasajanmanā
53 ॥ दीप्यमाना इवोद्दामरागज्वालाकदंबकैः । वीक्ष्यमाणा इवानङ्गशरपावकवृष्टिभिः
53 // dīpyamānā ivoddāmarāgajvālākadaṃbakaiḥ / vīkṣyamāṇā ivānaṅgaśarapāvakavṛṣṭibhiḥ
54 ॥ उत्कण्ठया तुद्यमानाः खिद्यमाना तनूष्मणा । सिच्यमानाः श्रमजलैः शुच्यमानाश्च लज्जया
54 // utkaṇṭhayā tudyamānāḥ khidyamānā tanūṣmaṇā / sicyamānāḥ śramajalaiḥ śucyamānāśca lajjayā
55 ॥ कुलं जातिं च शीलं च लज्जां च परिवारकम् । लोकाद्भयं बन्धुभयं परलोकभये तथा
55 // kulaṃ jātiṃ ca śīlaṃ ca lajjāṃ ca parivārakam / lokādbhayaṃ bandhubhayaṃ paralokabhaye tathā
56 ॥ मुञ्चन्त्यो हृदि याचन्त्यो भवन्ति हरिणीदृशः । अरण्ये पत्तने वापि देवालयमठेषु वा । यत्र कुत्रापि तिष्ठन्तं तं धावन्ति मृगीदृशः
56 // muñcantyo hṛdi yācantyo bhavanti hariṇīdṛśaḥ / araṇye pattane vāpi devālayamaṭheṣu vā / yatra kutrāpi tiṣṭhantaṃ taṃ dhāvanti mṛgīdṛśaḥ
57 ॥ अत्याहतो यथैवांभोबिन्दुर्भ्रमति पुष्करे । तद्वद्भ्रमन्ति चित्तानि दर्शने तस्य सुभ्रुवाम्
57 // atyāhato yathaivāṃbhobindurbhramati puṣkare / tadvadbhramanti cittāni darśane tasya subhruvām
58 ॥ विनीतानवनीतानां विद्रावणमहाफलम् । तं सेवन्ते समस्तानां विद्यानामपि पङ्क्तयः
58 // vinītānavanītānāṃ vidrāvaṇamahāphalam / taṃ sevante samastānāṃ vidyānāmapi paṅktayaḥ
59 ॥ चन्द्रार्कमण्डलद्वन्द्वकुचमण्डलशोभिनी । त्रिलोके ललना तस्य दर्शनादनुरज्यति । अन्यासां तु वराकीणां वक्तव्यं किं तपोधन
59 // candrārkamaṇḍaladvandvakucamaṇḍalaśobhinī / triloke lalanā tasya darśanādanurajyati / anyāsāṃ tu varākīṇāṃ vaktavyaṃ kiṃ tapodhana
60 ॥ पत्तनेषु च वीथीषु चत्वरेषु वनेषु च । तत्कीर्तिघोषणा पुण्या सदा द्युसद्द्रुमायते
60 // pattaneṣu ca vīthīṣu catvareṣu vaneṣu ca / tatkīrtighoṣaṇā puṇyā sadā dyusaddrumāyate
61 ॥ तस्य दर्शनतः पाप जालं नश्यति पापिनाम् । तद्गुणा एव घोक्ष्यन्ते सर्वत्र कविपुङ्गवैः
61 // tasya darśanataḥ pāpa jālaṃ naśyati pāpinām / tadguṇā eva ghokṣyante sarvatra kavipuṅgavaiḥ
62 ॥ भिन्नैर्वर्णैरायुधैश्च भिन्नैर्वाहनभूषणैः । ये ध्यायन्ति महादेवीं तास्ताः सिद्धीर्भञ्जति ते
62 // bhinnairvarṇairāyudhaiśca bhinnairvāhanabhūṣaṇaiḥ / ye dhyāyanti mahādevīṃ tāstāḥ siddhīrbhañjati te
63 ॥ मनोरादिमखण्डस्तु कुन्देन्दुधवलद्युतिः । अहश्चक्रे ज्वलज्ज्वालश्चिन्तनीयस्तु मूलके
63 // manorādimakhaṇḍastu kundendudhavaladyutiḥ / ahaścakre jvalajjvālaścintanīyastu mūlake
64 ॥ इन्द्रगोपक संकाशो द्वितीयो मनुखण्डकः । नीभालनीये ऽहश्चक्रे आबालान्तज्वलच्छिखः
64 // indragopaka saṃkāśo dvitīyo manukhaṇḍakaḥ / nībhālanīye 'haścakre ābālāntajvalacchikhaḥ
65 ॥ अथ बालादिपद्मस्थद्विदलांबुजकोटरे । नीभालनीयस्तार्तीयखण्डो दुरितखण्डकः
65 // atha bālādipadmasthadvidalāṃbujakoṭare / nībhālanīyastārtīyakhaṇḍo duritakhaṇḍakaḥ
66 ॥ मुक्ता ध्येया शशिजोत्स्ना धवलाकृतिरंबिका । रक्तसंध्यकरोचिः स्याद्वशीकरणकर्मणि
66 // muktā dhyeyā śaśijotsnā dhavalākṛtiraṃbikā / raktasaṃdhyakarociḥ syādvaśīkaraṇakarmaṇi
67 ॥ सर्वसंपत्तिलाभे तु श्यामलाङ्गी विचिन्त्यते । नीला च मूकीकरणे पीता स्तंभनकर्मणि
67 // sarvasaṃpattilābhe tu śyāmalāṅgī vicintyate / nīlā ca mūkīkaraṇe pītā staṃbhanakarmaṇi
68 ॥ कवित्वे विशदाकारा स्फटिकोपलनिर्मला । धनलाभे सुवर्णाभा चिन्त्यते ललितांबिका
68 // kavitve viśadākārā sphaṭikopalanirmalā / dhanalābhe suvarṇābhā cintyate lalitāṃbikā
69 ॥ आमूलमाब्रह्मबिलं ज्वलन्माणिक्यदीपवत् । ये ध्यायन्ति महापुञ्जं ते स्युः संसिद्धसिद्धयः
69 // āmūlamābrahmabilaṃ jvalanmāṇikyadīpavat / ye dhyāyanti mahāpuñjaṃ te syuḥ saṃsiddhasiddhayaḥ
70 ॥ एवं बहुप्रकारेण ध्यानभेदेन कुम्भज । निभालयन्तः श्रीदेवीं भजन्ति महतीं श्रियम् । प्राप्यते सद्भिरेवैषा नासद्भिस्तु कदाचन
70 // evaṃ bahuprakāreṇa dhyānabhedena kumbhaja / nibhālayantaḥ śrīdevīṃ bhajanti mahatīṃ śriyam / prāpyate sadbhirevaiṣā nāsadbhistu kadācana
71 ॥ यैस्तु तप्तं तपस्तीव्रं तैरेवात्मनि ध्यायते । तस्य नो पश्चिमं जन्म स्वयं यो वा न शङ्करः । न तेन लभ्यते विद्या ललिता परमेश्वरी
71 // yaistu taptaṃ tapastīvraṃ tairevātmani dhyāyate / tasya no paścimaṃ janma svayaṃ yo vā na śaṅkaraḥ / na tena labhyate vidyā lalitā parameśvarī
72 ॥ वंशे तु यस्य कस्यापि भवेदेष मनुर्यदि । तद्वंश्याः सर्व एव स्युर्मुक्तास्तृप्ता न संशयः
72 // vaṃśe tu yasya kasyāpi bhavedeṣa manuryadi / tadvaṃśyāḥ sarva eva syurmuktāstṛptā na saṃśayaḥ
73 ॥ गुप्ताद्गुप्ततरैवैषा सर्वशास्त्रेषु निश्चिता । वेदाः समस्तशास्त्राणि स्तुवन्ति ललितेश्वरीम्
73 // guptādguptataraivaiṣā sarvaśāstreṣu niścitā / vedāḥ samastaśāstrāṇi stuvanti laliteśvarīm
74 ॥ परमात्मेयमेव स्यादियमेव परा गतिः । इयमेव महत्तीर्थमियमेव महत्फलम्
74 // paramātmeyameva syādiyameva parā gatiḥ / iyameva mahattīrthamiyameva mahatphalam
75 ॥ इमां गायन्ति मुनयो ध्यायन्ति सनकादयः । अर्चन्तीमां सुरश्रेष्ठा ब्रह्माद्याः पञ्चसिद्धिदाम्
75 // imāṃ gāyanti munayo dhyāyanti sanakādayaḥ / arcantīmāṃ suraśreṣṭhā brahmādyāḥ pañcasiddhidām
76 ॥ न प्राप्यते कुचारित्रैः कुत्सितैः कुटिलाशयैः । दैवबाह्यैर्वृथातर्कैर्वृथा विभ्रान्त बुद्धिभिः
76 // na prāpyate kucāritraiḥ kutsitaiḥ kuṭilāśayaiḥ / daivabāhyairvṛthātarkairvṛthā vibhrānta buddhibhiḥ
77 ॥ नष्टैरशीलैरुच्छिष्टैः कुलभ्रष्टैश्च निष्ठुरैः । दर्शनद्वेषिभिः पापशीलैराचारनिन्दकैः
77 // naṣṭairaśīlairucchiṣṭaiḥ kulabhraṣṭaiśca niṣṭhuraiḥ / darśanadveṣibhiḥ pāpaśīlairācāranindakaiḥ
78 ॥ उद्धतैरुद्धतालापैर्दांभिकैरतिमानिभिः । एतादृशानां मर्त्यानां देवानां चातिदुर्लभा
78 // uddhatairuddhatālāpairdāṃbhikairatimānibhiḥ / etādṛśānāṃ martyānāṃ devānāṃ cātidurlabhā
79 ॥ देवतानां च पूज्यत्वमस्याः प्रोक्तं घटोद्भव । भण्डासुर वधायैषा प्रादुर्भूता चिदग्नितः
79 // devatānāṃ ca pūjyatvamasyāḥ proktaṃ ghaṭodbhava / bhaṇḍāsura vadhāyaiṣā prādurbhūtā cidagnitaḥ
80 ॥ महात्रिपुरसुन्दर्या सूर्तिस्तेजोविजृंभिता । कामाक्षीति विधात्रा तु प्रस्तुता ललितेश्वरी
80 // mahātripurasundaryā sūrtistejovijṛṃbhitā / kāmākṣīti vidhātrā tu prastutā laliteśvarī
81 ॥ ध्यायतः परया भक्त्या तां परां ललितांबिकाम् । सदाशिवस्य मनसो लालनाल्ललिताभिधा
81 // dhyāyataḥ parayā bhaktyā tāṃ parāṃ lalitāṃbikām / sadāśivasya manaso lālanāllalitābhidhā
82 ॥ यद्यत्कृतवती कृत्यं तत्सर्वं विनिवेदितम् । पूजाविधानमखिलं शास्त्रोक्तेनैव वर्त्मना । खण्डान्तरे वदिष्यामि तद्विलासं महाद्भुतम्
82 // yadyatkṛtavatī kṛtyaṃ tatsarvaṃ viniveditam / pūjāvidhānamakhilaṃ śāstroktenaiva vartmanā / khaṇḍāntare vadiṣyāmi tadvilāsaṃ mahādbhutam