96 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने चिन्तामणिगृहान्तरकथनं नाम षट्त्रिंशो ऽध्यायः हयग्रीव उवाच सर्वज्ञद्यन्तरालस्योपरिष्टात्कलशोद्भव । हस्तविंशतिरुन्नम्रं चतुर्नल्वप्रविस्तरम्
96 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne cintāmaṇigṛhāntarakathanaṃ nāma ṣaṭtriṃśo 'dhyāyaḥ hayagrīva uvāca sarvajñadyantarālasyopariṣṭātkalaśodbhava / hastaviṃśatirunnamraṃ caturnalvapravistaram
1 ॥ वशिन्याद्यन्तरं ज्ञेयं प्राग्वत्सोपानमन्दिरम् । सर्वरोगहरं नाम्ना तच्चक्रमिति विश्रुतम्
1 // vaśinyādyantaraṃ jñeyaṃ prāgvatsopānamandiram / sarvarogaharaṃ nāmnā taccakramiti viśrutam
2 ॥ वशिन्याद्यास्तत्र देव्यः पूर्वादिदिगनुक्रमात् । स्वरैस्तु रहितास्तत्र प्रथमा वशिनीश्वरी
2 // vaśinyādyāstatra devyaḥ pūrvādidiganukramāt / svaraistu rahitāstatra prathamā vaśinīśvarī
3 ॥ कवर्गसहिता पश्चात्कामेश्वर्याख्यवाह्मयी । चवर्गजुष्टा वागीशी मोदिनी स्यात्तृतीयका
3 // kavargasahitā paścātkāmeśvaryākhyavāhmayī / cavargajuṣṭā vāgīśī modinī syāttṛtīyakā
4 ॥ टवर्गमण्डिताकारा विमलाख्या सरस्वती । तवर्गेण तथोपेता पञ्चमी वाक्प्रधारणा
4 // ṭavargamaṇḍitākārā vimalākhyā sarasvatī / tavargeṇa tathopetā pañcamī vākpradhāraṇā
5 ॥ पवर्गेण परिस्फीता षष्ठी तु जयिनी मता । यादिवर्णचतुष्कोणे सर्वैश्वर्यादिवाङ्मयी
5 // pavargeṇa parisphītā ṣaṣṭhī tu jayinī matā / yādivarṇacatuṣkoṇe sarvaiśvaryādivāṅmayī
6 ॥ साधिकाक्षरषट्केन कौलिनी त्वष्टमी मता । एता देव्यो जपरता मुक्ताभरणमण्डिताः
6 // sādhikākṣaraṣaṭkena kaulinī tvaṣṭamī matā / etā devyo japaratā muktābharaṇamaṇḍitāḥ
7 ॥ सदा स्फुरद्गद्यपद्यलहरीलालिता मताः । काव्यैश्च नाटकैश्चैव मधुरैः कर्णहारिभिः । विनोदयन्त्यः श्रीदेवीं वर्तन्ते कुम्भसम्भवः
7 // sadā sphuradgadyapadyalaharīlālitā matāḥ / kāvyaiśca nāṭakaiścaiva madhuraiḥ karṇahāribhiḥ / vinodayantyaḥ śrīdevīṃ vartante kumbhasambhavaḥ
8 ॥ एता रहस्यनाम्नैव ख्याता वातापितापन । नायिका स्वस्य चक्रस्य सिद्धानाम्ना प्रकीर्तिता
8 // etā rahasyanāmnaiva khyātā vātāpitāpana / nāyikā svasya cakrasya siddhānāmnā prakīrtitā
9 ॥ अस्य चक्रस्य संरक्षाकारिणी खेचरी मता । वशिन्याद्यन्तरालस्योपरिष्टाद्विन्ध्यमर्दन
9 // asya cakrasya saṃrakṣākāriṇī khecarī matā / vaśinyādyantarālasyopariṣṭādvindhyamardana
10 ॥ हस्तविंशतिरुन्नम्रं चतुर्नल्वप्रविस्तरम् । अस्त्रं चक्रमितिज्ञेयं तत्र बाणादिदेवताः
10 // hastaviṃśatirunnamraṃ caturnalvapravistaram / astraṃ cakramitijñeyaṃ tatra bāṇādidevatāḥ
11 ॥ पञ्च बाणेश्वरीदेव्यः पञ्च कामेश्वराशुगाः । अङ्कुशद्वितयं दीप्तमादिस्त्रीपुंसयोर्द्वयोः
11 // pañca bāṇeśvarīdevyaḥ pañca kāmeśvarāśugāḥ / aṅkuśadvitayaṃ dīptamādistrīpuṃsayordvayoḥ
12 ॥ धनुर्द्वयं च विन्ध्यारे नव पुण्ड्रेषु कल्पितम् । पाशद्वयं च दीप्ताभं चत्वार्यस्त्राणि कुम्भज
12 // dhanurdvayaṃ ca vindhyāre nava puṇḍreṣu kalpitam / pāśadvayaṃ ca dīptābhaṃ catvāryastrāṇi kumbhaja
13 ॥ कामेश्वर्यास्तु चत्वारि चत्वारि श्रीमहेशितुः । आहत्याष्टायुधानीति प्रज्वलन्ति विभान्ति च
13 // kāmeśvaryāstu catvāri catvāri śrīmaheśituḥ / āhatyāṣṭāyudhānīti prajvalanti vibhānti ca
14 ॥ भण्डासुरमहायुद्धे दुष्टदानवशोणितैः । पीतैरतीव तृप्तानिदिव्यास्त्राण्यति जाग्रति
14 // bhaṇḍāsuramahāyuddhe duṣṭadānavaśoṇitaiḥ / pītairatīva tṛptānidivyāstrāṇyati jāgrati
15 ॥ एतेषामायुधानां तु परिवारायुधान्यलम् । वर्तन्ते ऽस्त्रान्तरे तत्र तेषां संख्या तु कोटिशः
15 // eteṣāmāyudhānāṃ tu parivārāyudhānyalam / vartante 'strāntare tatra teṣāṃ saṃkhyā tu koṭiśaḥ
16 ॥ वज्रशक्तिः शतघ्नी च भुशुण्डी मुसलं तथा । कृपाणः पट्टिशं चैव मुद्गरं भिन्दिपालकम्
16 // vajraśaktiḥ śataghnī ca bhuśuṇḍī musalaṃ tathā / kṛpāṇaḥ paṭṭiśaṃ caiva mudgaraṃ bhindipālakam
17 ॥ एवमादीनि शस्त्राणि सहस्राणां सहस्रशः । अष्टायुधमहाशक्तीः सेवन्ते मदविह्वलाः
17 // evamādīni śastrāṇi sahasrāṇāṃ sahasraśaḥ / aṣṭāyudhamahāśaktīḥ sevante madavihvalāḥ
18 ॥ अथ शस्त्रान्तरालस्योपरि वातापितापन । हस्तविंशतिरुन्नम्रं चतुर्नल्वप्रविस्तरम् । धिष्ण्यं तु समयेशीनां स्थानं च तिसृणां मतम्
18 // atha śastrāntarālasyopari vātāpitāpana / hastaviṃśatirunnamraṃ caturnalvapravistaram / dhiṣṇyaṃ tu samayeśīnāṃ sthānaṃ ca tisṛṇāṃ matam
19 ॥ कामेशाद्यास्तत्र देव्यस्तिस्रो ऽन्या तु चतुर्थिका । सैव निःशेषविश्वानां सवित्री ललितेश्वरी
19 // kāmeśādyāstatra devyastisro 'nyā tu caturthikā / saiva niḥśeṣaviśvānāṃ savitrī laliteśvarī
20 ॥ तिसृणां शृणु नामानि कामेशी प्रथमा मता । वज्रेशी भगमाला च ताः सेवन्ते सहस्रशः
20 // tisṛṇāṃ śṛṇu nāmāni kāmeśī prathamā matā / vajreśī bhagamālā ca tāḥ sevante sahasraśaḥ
21 ॥ सर्वेषां दर्शनानां च या देव्यो विविधाः स्मृताः । ताः सर्वास्तत्र सेवन्ते कामेशादिमहोदयाः
21 // sarveṣāṃ darśanānāṃ ca yā devyo vividhāḥ smṛtāḥ / tāḥ sarvāstatra sevante kāmeśādimahodayāḥ
22 ॥ एतासांच प्रसंगेषु नित्यानां च प्रसञ्जने । चक्रिणीनां योगिनीनां श्रीदेवी पूरणात्मिका
22 // etāsāṃca prasaṃgeṣu nityānāṃ ca prasañjane / cakriṇīnāṃ yoginīnāṃ śrīdevī pūraṇātmikā
23 ॥ या कामेश्वरदेवाङ्कशायिनी ललितांबिका । कामेश्यादिचतुर्थी सा नित्यानां षोडशी मता
23 // yā kāmeśvaradevāṅkaśāyinī lalitāṃbikā / kāmeśyādicaturthī sā nityānāṃ ṣoḍaśī matā
24 ॥ योगिनी चक्रदेवीनां नवमी परिकीर्तिता । समयेश्यन्तरालस्योपरिष्टादिल्वलान्तक
24 // yoginī cakradevīnāṃ navamī parikīrtitā / samayeśyantarālasyopariṣṭādilvalāntaka
25 ॥ नाथान्तरमिति प्रोक्तं हस्तविंशतिरुन्नतम् । चतुर्नल्वप्रविस्तारं प्राग्वत्सोपानमण्डितम्
25 // nāthāntaramiti proktaṃ hastaviṃśatirunnatam / caturnalvapravistāraṃ prāgvatsopānamaṇḍitam
26 ॥ तत्र नाथामहादेव्या योगशास्त्रप्रवर्त्तकाः । सर्वेषां मन्त्रगुरवः सर्वविद्यामहार्णवाः
26 // tatra nāthāmahādevyā yogaśāstrapravarttakāḥ / sarveṣāṃ mantraguravaḥ sarvavidyāmahārṇavāḥ
27 ॥ चत्वारो यागनाथाश्च लोकानामिह गुप्तये । सृष्टाः कामंशदेवेन तेषां नामानि मे शृणु
27 // catvāro yāganāthāśca lokānāmiha guptaye / sṛṣṭāḥ kāmaṃśadevena teṣāṃ nāmāni me śṛṇu
28 ॥ मित्री च शोडिशश्चैव चर्याख्यः कुम्भसम्भव । तैः सृष्टा बहवो लोकारक्षार्थं पादुकात्मकाः
28 // mitrī ca śoḍiśaścaiva caryākhyaḥ kumbhasambhava / taiḥ sṛṣṭā bahavo lokārakṣārthaṃ pādukātmakāḥ
29 ॥ दिव्यविद्या मानवौघसिद्धौघाः सुरतापसाः । प्राप्तसालोक्यसारूप्यसायुज्यादिकसिद्धयः
29 // divyavidyā mānavaughasiddhaughāḥ suratāpasāḥ / prāptasālokyasārūpyasāyujyādikasiddhayaḥ
30 ॥ महान्तो गुरवस्तांस्तु सेवन्ते प्रचुरा गुरून् । अथ नाथान्तरालस्योपरिष्टाद्धिष्ण्यमुत्तमम्
30 // mahānto guravastāṃstu sevante pracurā gurūn / atha nāthāntarālasyopariṣṭāddhiṣṇyamuttamam
31 ॥ हस्तविंशतिरुन्नमं चतुर्नल्वप्रविस्तरम् । नित्यान्तरमिति प्रोक्तं नित्याः पञ्चदशात्र वै
31 // hastaviṃśatirunnamaṃ caturnalvapravistaram / nityāntaramiti proktaṃ nityāḥ pañcadaśātra vai
32 ॥ अथ कामेश्वरी नित्या नित्या च भगमालिनी । नित्यक्लिन्ना अपि तथा भेरुण्डा वह्निवासिनी
32 // atha kāmeśvarī nityā nityā ca bhagamālinī / nityaklinnā api tathā bheruṇḍā vahnivāsinī
33 ॥ महावज्रेश्वरी दूती त्वरिता कुलसुन्दरी । नित्या नीलपताका च विजया सर्वमङ्गला
33 // mahāvajreśvarī dūtī tvaritā kulasundarī / nityā nīlapatākā ca vijayā sarvamaṅgalā
34 ॥ ज्वालामालिनिका चित्रेत्येताः पञ्चदशोदिताः । एता देवीस्वरूपाः स्युर्महाबलपराक्रमाः
34 // jvālāmālinikā citretyetāḥ pañcadaśoditāḥ / etā devīsvarūpāḥ syurmahābalaparākramāḥ
35 ॥ प्रथमा मुख्यतिथितां प्राप्ता व्याप्य जगत्त्रयाः । कालत्रितयरूपाश्च कालग्रासविचक्षणाः
35 // prathamā mukhyatithitāṃ prāptā vyāpya jagattrayāḥ / kālatritayarūpāśca kālagrāsavicakṣaṇāḥ
36 ॥ ब्रह्मादीनामशेषाणां चिरकालमुपेयुषाम् । तत्तत्कालशतायुष्यरूपा देव्याज्ञया स्थिताः
36 // brahmādīnāmaśeṣāṇāṃ cirakālamupeyuṣām / tattatkālaśatāyuṣyarūpā devyājñayā sthitāḥ
37 ॥ नित्योद्यता निरान्तकाः श्रीपराङ्गसमुद्भवाः । सेवन्ते जगतामृद्ध्यै ललितां चित्स्वरूपिणीम्
37 // nityodyatā nirāntakāḥ śrīparāṅgasamudbhavāḥ / sevante jagatāmṛddhyai lalitāṃ citsvarūpiṇīm
38 ॥ तासां भवनतां प्राप्ता दीप्ताः पञ्चदशेश्वराः । विसृष्टिबिन्दुचक्रे तु षोडश्या भवनं मतम्
38 // tāsāṃ bhavanatāṃ prāptā dīptāḥ pañcadaśeśvarāḥ / visṛṣṭibinducakre tu ṣoḍaśyā bhavanaṃ matam
39 ॥ अथ नित्यान्तरालस्योपरिष्टात्कुम्भसम्भव । अङ्गदेव्यन्तरं प्रोक्तं हस्तविंशातिरुन्नतम्
39 // atha nityāntarālasyopariṣṭātkumbhasambhava / aṅgadevyantaraṃ proktaṃ hastaviṃśātirunnatam
40 ॥ चतुर्नल्वप्रविस्तारं प्राग्वत्सोपानमन्दिरम् । तस्मिन्हृदयदेव्याद्याः शक्तयः संति वै मुने
40 // caturnalvapravistāraṃ prāgvatsopānamandiram / tasminhṛdayadevyādyāḥ śaktayaḥ saṃti vai mune
41 ॥ हृद्देवी च शिरोदेवी शिखादेवी तथैव च । वर्मदेवी दृष्टिदेवी शस्त्रदेवी षडीरिताः
41 // hṛddevī ca śirodevī śikhādevī tathaiva ca / varmadevī dṛṣṭidevī śastradevī ṣaḍīritāḥ
42 ॥ अत्यन्तसन्निकृष्टास्ताः श्रीकामेश्वरसुभ्रुवः । नवलावण्यपूर्णाङ्ग्यः सावधाना धृतायुधाः
42 // atyantasannikṛṣṭāstāḥ śrīkāmeśvarasubhruvaḥ / navalāvaṇyapūrṇāṅgyaḥ sāvadhānā dhṛtāyudhāḥ
43 ॥ परितो बिन्दुपीठे च भ्राम्यन्तो दृप्तमूर्तयः । ललिताज्ञाप्रवर्तिन्यो वशीनां पीठवर्तिकाः
43 // parito bindupīṭhe ca bhrāmyanto dṛptamūrtayaḥ / lalitājñāpravartinyo vaśīnāṃ pīṭhavartikāḥ
44 ॥ अथाङ्गदेव्यन्तरस्योपरिष्टान्मण्डलाकृति । बिन्दुनाद महापीठं दशहस्तसमुन्नतम्
44 // athāṅgadevyantarasyopariṣṭānmaṇḍalākṛti / bindunāda mahāpīṭhaṃ daśahastasamunnatam
45 ॥ नल्वाष्टकप्रविस्तारमुद्यदादित्यसंनिभम् । बिन्दुपीठमिदं ज्ञेयं श्रीपीठमपि चेष्यते
45 // nalvāṣṭakapravistāramudyadādityasaṃnibham / bindupīṭhamidaṃ jñeyaṃ śrīpīṭhamapi ceṣyate
46 ॥ महापीठमिति ज्ञेयं विद्यापीठमपीष्यते । आनन्दपीठमपि च पञ्चाशत्पीठरूपधृक्
46 // mahāpīṭhamiti jñeyaṃ vidyāpīṭhamapīṣyate / ānandapīṭhamapi ca pañcāśatpīṭharūpadhṛk
47 ॥ तत्र श्रीललितादेव्याः पञ्चब्रह्ममये महत् । जागर्ति मञ्चरत्नं तु प्रपञ्चत्रयमूलकम्
47 // tatra śrīlalitādevyāḥ pañcabrahmamaye mahat / jāgarti mañcaratnaṃ tu prapañcatrayamūlakam
48 ॥ तस्य मञ्चस्य पादास्तु चत्वारः परिकीर्तिताः । दशहस्तसमुन्नम्रा हस्तत्रितयविष्ठिताः
48 // tasya mañcasya pādāstu catvāraḥ parikīrtitāḥ / daśahastasamunnamrā hastatritayaviṣṭhitāḥ
49 ॥ ब्रह्मविष्णुमहेशानेश्वररूपत्वमागताः । शक्तिभावमनुप्राप्ताः सदा श्रीध्यानयोगतः
49 // brahmaviṣṇumaheśāneśvararūpatvamāgatāḥ / śaktibhāvamanuprāptāḥ sadā śrīdhyānayogataḥ
50 ॥ एकस्तु पञ्चपादः स्याज्जपाकुसुमसन्निभः । ब्रह्मात्मकः स विज्ञेयो वह्निदिग्भागमाश्रितः
50 // ekastu pañcapādaḥ syājjapākusumasannibhaḥ / brahmātmakaḥ sa vijñeyo vahnidigbhāgamāśritaḥ
51 ॥ चतुर्थो मञ्चपादस्तु कर्णिकारकसाररुक् । ईश्वरात्मा स विज्ञेय ईशदिग्भागमाश्रितः
51 // caturtho mañcapādastu karṇikārakasāraruk / īśvarātmā sa vijñeya īśadigbhāgamāśritaḥ
52 ॥ एते सर्वे सायुधाश्च सर्वालङ्कारभूषिताः । उपर्यधःस्तंभरूपा मध्ये पुरुषरूपिणः
52 // ete sarve sāyudhāśca sarvālaṅkārabhūṣitāḥ / uparyadhaḥstaṃbharūpā madhye puruṣarūpiṇaḥ
53 ॥ श्रीध्यानमीलिताक्षाश्च श्रीध्यानान्निश्चलाङ्गकाः । तेषामुपरि मञ्चस्य फलकस्तु सदाशिवः
53 // śrīdhyānamīlitākṣāśca śrīdhyānānniścalāṅgakāḥ / teṣāmupari mañcasya phalakastu sadāśivaḥ
54 ॥ विकासिदाडिमच्छायश्चतुर्नल्वप्रविस्तरः । नल्वषट्कायामवांश्च सदाभास्वरमूर्तिमान्
54 // vikāsidāḍimacchāyaścaturnalvapravistaraḥ / nalvaṣaṭkāyāmavāṃśca sadābhāsvaramūrtimān
55 ॥ अङ्गदेव्यन्तरारंभान्मञ्चस्य फलकावधि । चिन्तामणिमयाङ्गानि तत्त्वरूपाणि तापस
55 // aṅgadevyantarāraṃbhānmañcasya phalakāvadhi / cintāmaṇimayāṅgāni tattvarūpāṇi tāpasa
56 ॥ सोपानानि विभासंते षट्त्रिंशद्वै निवेशनैः । आरोहस्य क्रमेणैव सोपानान्यभिदध्महे
56 // sopānāni vibhāsaṃte ṣaṭtriṃśadvai niveśanaiḥ / ārohasya krameṇaiva sopānānyabhidadhmahe
57 ॥ भूमिरापो ऽनलो वायुराकाशो गन्ध एव च । रसो रूपं स्पर्शसंब्दोपस्थपायुपदानि च
57 // bhūmirāpo 'nalo vāyurākāśo gandha eva ca / raso rūpaṃ sparśasaṃbdopasthapāyupadāni ca
58 ॥ पाणिवाग्घ्राणजिह्वाश्चत्वक् चक्षुः श्रोत्रमेव च । अहङ्कारश्च बुद्धिश्च मनः प्रकृतिपूरुषौ
58 // pāṇivāgghrāṇajihvāścatvak cakṣuḥ śrotrameva ca / ahaṅkāraśca buddhiśca manaḥ prakṛtipūruṣau
59 ॥ नियतिः कालरागौ च कला विद्ये च मायया । शुद्धाविद्येश्वरसदाशिवशक्तिः शिवा इति
59 // niyatiḥ kālarāgau ca kalā vidye ca māyayā / śuddhāvidyeśvarasadāśivaśaktiḥ śivā iti
60 ॥ एताः षट्त्रिंशदाख्यातास्तत्त्वसोपानपङ्क्तयः । पूषा सोपानपङ्क्तिश्च मञ्चपूर्वदिशंश्रिताः
60 // etāḥ ṣaṭtriṃśadākhyātāstattvasopānapaṅktayaḥ / pūṣā sopānapaṅktiśca mañcapūrvadiśaṃśritāḥ
61 ॥ अथ मञ्चस्योपरिष्टाद्धंसतूलिकतल्पकः । हस्तमात्रं समुन्नम्रं चतुर्नल्वप्रविस्तरम्
61 // atha mañcasyopariṣṭāddhaṃsatūlikatalpakaḥ / hastamātraṃ samunnamraṃ caturnalvapravistaram
62 ॥ पादोपधानमूर्धोपधान दन्द्वविराजितम् । गड्डकानां चतुः षष्टिशोभितं पाटलत्विषा
62 // pādopadhānamūrdhopadhāna dandvavirājitam / gaḍḍakānāṃ catuḥ ṣaṣṭiśobhitaṃ pāṭalatviṣā
63 ॥ तस्योपरिष्टात्कौसुंभवसनेनोत्तरच्छदः । शुचिना मृदुना कॢप्तः पद्मरागमणित्विषा
63 // tasyopariṣṭātkausuṃbhavasanenottaracchadaḥ / śucinā mṛdunā kḷptaḥ padmarāgamaṇitviṣā
64 ॥ तस्योपरि वसन्पूर्वदिङ्मुखो दययान्वितः । शृङ्गारवेषरुचिरस्सदा षोडशवार्षिकः
64 // tasyopari vasanpūrvadiṅmukho dayayānvitaḥ / śṛṅgāraveṣarucirassadā ṣoḍaśavārṣikaḥ
65 ॥ उद्यद्भास्करबिंबाभश्चतुर्हस्तस्त्रिलोचनः । हारकेयूरमुकुटकटकाद्यैरलङ्कृतः
65 // udyadbhāskarabiṃbābhaścaturhastastrilocanaḥ / hārakeyūramukuṭakaṭakādyairalaṅkṛtaḥ
66 ॥ कमनीयस्मितज्योत्स्नामरिपूर्णकपोलभूः । जागर्ति भगवानादिदेवः कामेश्वरः शिवः
66 // kamanīyasmitajyotsnāmaripūrṇakapolabhūḥ / jāgarti bhagavānādidevaḥ kāmeśvaraḥ śivaḥ
67 ॥ तस्योत्संगे समासीना तरुणादित्यपाटला । सदा षोडशवर्षा च नवयौवनदर्पिता
67 // tasyotsaṃge samāsīnā taruṇādityapāṭalā / sadā ṣoḍaśavarṣā ca navayauvanadarpitā
68 ॥ अमृष्टपद्मरागाभा चन्दनाब्जनखच्छटा । यावकश्रीर्निर्व्यपेक्षा पादलौहित्यवाहिनी
68 // amṛṣṭapadmarāgābhā candanābjanakhacchaṭā / yāvakaśrīrnirvyapekṣā pādalauhityavāhinī
69 ॥ कलनिस्वानमञ्जीरपतत्कङ्कणमोहना । अनङ्गवरतूणीरदर्पोन्मथनजङ्घिका
69 // kalanisvānamañjīrapatatkaṅkaṇamohanā / anaṅgavaratūṇīradarponmathanajaṅghikā
70 ॥ करिशुण्डदोः कदलिकाकान्तितुल्योरुशोभिनी । अरुणेन दुकूलेन सुस्पर्शेन तनीयसा । अलङ्कृतनितंबाढ्या जघनाभोगभासुरा
70 // kariśuṇḍadoḥ kadalikākāntitulyoruśobhinī / aruṇena dukūlena susparśena tanīyasā / alaṅkṛtanitaṃbāḍhyā jaghanābhogabhāsurā
71 ॥ अर्धोरुकग्रन्थिमती रत्नकाञ्चीविराजिता । नतनाभिमहावर्तत्रि वल्यूर्मिप्रभासरित्
71 // ardhorukagranthimatī ratnakāñcīvirājitā / natanābhimahāvartatri valyūrmiprabhāsarit
72 ॥ स्तनकुड्मलहिन्दोलमुक्तादामशतावृता । अतिपीवरवक्षोजभारभङ्गुरमध्यभूः
72 // stanakuḍmalahindolamuktādāmaśatāvṛtā / atipīvaravakṣojabhārabhaṅguramadhyabhūḥ
73 ॥ शिरीषदाममृदुलच्छदाभांश्चतुरो भुजान्
73 // śirīṣadāmamṛdulacchadābhāṃścaturo bhujān
74 ॥ केयूरकङ्कणश्रेणीमण्डितान्सोर्मिकाङ्गुलीन् । वहन्ती पतिसंसृष्टशङ्खसुन्दरकन्धरा
74 // keyūrakaṅkaṇaśreṇīmaṇḍitānsormikāṅgulīn / vahantī patisaṃsṛṣṭaśaṅkhasundarakandharā
75 ॥ मुखदर्पण वृत्ताभचिबुका पाटलाधरा । शुचिभिः पङ्क्तिशुद्धैस्च विद्यारूपैर्विभास्वरैः । कुन्दकुड्मललक्ष्मीकैर्दन्तैर्दर्शितचन्द्रिका
75 // mukhadarpaṇa vṛttābhacibukā pāṭalādharā / śucibhiḥ paṅktiśuddhaisca vidyārūpairvibhāsvaraiḥ / kundakuḍmalalakṣmīkairdantairdarśitacandrikā
76 ॥ स्थूलमौक्तिकसनद्धनानाभरणभासुरा । केतकान्तर्दलश्रोणी दीर्घदीर्घविलोचना
76 // sthūlamauktikasanaddhanānābharaṇabhāsurā / ketakāntardalaśroṇī dīrghadīrghavilocanā
77 ॥ अर्धेन्दुललिते भाले सम्यक्कॢप्तालकच्छटा । पालीवतं समाणिक्यकुण्डलामण्डितश्रुतिः
77 // ardhendulalite bhāle samyakkḷptālakacchaṭā / pālīvataṃ samāṇikyakuṇḍalāmaṇḍitaśrutiḥ
78 ॥ नवकर्पूरकस्तूरीसदामोदितवीटिका । शरच्चञ्चन्निशानाथमण्डलीमधुरानना
78 // navakarpūrakastūrīsadāmoditavīṭikā / śaraccañcanniśānāthamaṇḍalīmadhurānanā
79 ॥ चिन्तामणीनां सारेण कॢप्तचारुकिरीटिका । स्फुरत्तिलकरत्नाभभालनेत्रविराजिता
79 // cintāmaṇīnāṃ sāreṇa kḷptacārukirīṭikā / sphurattilakaratnābhabhālanetravirājitā
80 ॥ गाढान्धकारनिबिडक्षामकुन्तलसंहतिः । सीमन्तरेशाविन्यस्तकिन्दूरश्रेणिभासुरा
80 // gāḍhāndhakāranibiḍakṣāmakuntalasaṃhatiḥ / sīmantareśāvinyastakindūraśreṇibhāsurā
81 ॥ स्फुरच्चन्द्रकलोत्तंसमदलोलविलोचना । सर्वशृङ्गारवेषाढ्या सर्वाभरणभूषिता
81 // sphuraccandrakalottaṃsamadalolavilocanā / sarvaśṛṅgāraveṣāḍhyā sarvābharaṇabhūṣitā
82 ॥ समस्तलोकमाता च सदानन्दविवर्धिनी । ब्रह्मविष्णुगिरीशेशसदाशिवनिदानभूः
82 // samastalokamātā ca sadānandavivardhinī / brahmaviṣṇugirīśeśasadāśivanidānabhūḥ
83 ॥ अपाङ्गरिङ्खत्करुणानिर्झरीतर्पिताखिला । भासते सा भगवती पापघ्नी ललितांबिका
83 // apāṅgariṅkhatkaruṇānirjharītarpitākhilā / bhāsate sā bhagavatī pāpaghnī lalitāṃbikā
84 ॥ अन्यदैवतपूजानां यस्याः पूजाफलं विदुः । यस्याः पूजाफलं प्राहुयस्या एव हि पूजनम्
84 // anyadaivatapūjānāṃ yasyāḥ pūjāphalaṃ viduḥ / yasyāḥ pūjāphalaṃ prāhuyasyā eva hi pūjanam
85 ॥ तस्याश्च ललितादेव्या वर्णयामि कथं पुनः । वर्षकोटिसहस्रेणाप्येकांशो वर्ण्यते न हि
85 // tasyāśca lalitādevyā varṇayāmi kathaṃ punaḥ / varṣakoṭisahasreṇāpyekāṃśo varṇyate na hi
86 ॥ वर्ण्यमाना ह्यवाग्रूपा वाचस्तस्यां कुतो गतिः । यतो वाचो निवर्तन्ते अप्राप्य मनसा सह
86 // varṇyamānā hyavāgrūpā vācastasyāṃ kuto gatiḥ / yato vāco nivartante aprāpya manasā saha
87 ॥ बहुना किमिहोक्तेन तत्त्वभूतमिदं शृणु । न पक्षपातान्न स्नेहान्न मोहाद्वा मयोच्यते
87 // bahunā kimihoktena tattvabhūtamidaṃ śṛṇu / na pakṣapātānna snehānna mohādvā mayocyate
88 ॥ संतु कल्पतरोः शाखा लेखिन्यस्तपसां निधे । मषीपात्राणि सर्वे ऽपि सप्त संतु महार्णवाः
88 // saṃtu kalpataroḥ śākhā lekhinyastapasāṃ nidhe / maṣīpātrāṇi sarve 'pi sapta saṃtu mahārṇavāḥ
89 ॥ पञ्चाशत्कोटिविस्तीर्णा भूमिः पत्रत्वमृच्छतु । तस्य लेखनकालो ऽस्तु परार्ध्याधिकवत्सरैः
89 // pañcāśatkoṭivistīrṇā bhūmiḥ patratvamṛcchatu / tasya lekhanakālo 'stu parārdhyādhikavatsaraiḥ
90 ॥ लिखन्तु सर्वे लोकाश्च प्रत्येकं कोटिबाहवः । सर्वे बृहस्पतिसमा वक्तारो यदि कुंभज
90 // likhantu sarve lokāśca pratyekaṃ koṭibāhavaḥ / sarve bṛhaspatisamā vaktāro yadi kuṃbhaja
91 ॥ अथापि तस्याः श्रीदेव्याः पादाब्जैकाङ्गुलिद्युतेः । सहस्रांशेष्वेकैकांशवर्णना न हि जायते । अथ वा वृत्तिरखिला निष्फला तद्गुणस्तुतौ
91 // athāpi tasyāḥ śrīdevyāḥ pādābjaikāṅgulidyuteḥ / sahasrāṃśeṣvekaikāṃśavarṇanā na hi jāyate / atha vā vṛttirakhilā niṣphalā tadguṇastutau
92 ॥ बिन्दुपीठस्य परितश्चतुरस्रवया स्थिता । महामायाजवनिका लंबते मेचकप्रभा
92 // bindupīṭhasya paritaścaturasravayā sthitā / mahāmāyājavanikā laṃbate mecakaprabhā
93 ॥ देव्या उपरि हस्तानां विंशतिद्वितयोर्ध्वतः । इन्द्रगोपवितानं तु बद्धं त्रैलोक्यदुर्लभम्
93 // devyā upari hastānāṃ viṃśatidvitayordhvataḥ / indragopavitānaṃ tu baddhaṃ trailokyadurlabham
94 ॥ तत्रालङ्कारजालं तु वर्तमानं सुदुर्लभम् । मद्वाणी वर्णयिष्यन्ती कण्ठ एव ह्रिया हता
94 // tatrālaṅkārajālaṃ tu vartamānaṃ sudurlabham / madvāṇī varṇayiṣyantī kaṇṭha eva hriyā hatā
95 ॥ सैव जानाति तत्सर्वं तत्रत्यमखिलं गुणम् । मनसो ऽपि हि दूरे तत्सौभाग्यं केनवर्ण्यते
95 // saiva jānāti tatsarvaṃ tatratyamakhilaṃ guṇam / manaso 'pi hi dūre tatsaubhāgyaṃ kenavarṇyate
96 ॥ इत्थं भण्डमहादैत्यवधाय ललितांबिका । प्रादुर्भुता चिदनलाद्दग्धनिःशेषदानवा
96 // itthaṃ bhaṇḍamahādaityavadhāya lalitāṃbikā / prādurbhutā cidanalāddagdhaniḥśeṣadānavā
97 ॥ दिव्यशिल्पिजनैः कॢप्तं षोडशक्षेत्रवेशनम् । अधिष्ठाय श्रीनगरं सदा रक्षति विष्टपम्
97 // divyaśilpijanaiḥ kḷptaṃ ṣoḍaśakṣetraveśanam / adhiṣṭhāya śrīnagaraṃ sadā rakṣati viṣṭapam
98 ॥ इत्थमेव प्रकारेण श्रीपुराण्यन्यकान्यपि । न भेदको ऽपि विन्यासो नाममात्रं पुरां भिदा
98 // itthameva prakāreṇa śrīpurāṇyanyakānyapi / na bhedako 'pi vinyāso nāmamātraṃ purāṃ bhidā
99 ॥ नानावृक्षमहोद्यानमारभ्येतिक्रमेण ये । वदन्ति श्रीपुरकथां ते यान्ति परमां गतिम्
99 // nānāvṛkṣamahodyānamārabhyetikrameṇa ye / vadanti śrīpurakathāṃ te yānti paramāṃ gatim
100 ॥ आकर्णयन्ति पृच्छन्ति विचिन्वन्ति च ये नराः । ये पुस्तके धारयन्ति ते यान्ति परमां गतिम्
100 // ākarṇayanti pṛcchanti vicinvanti ca ye narāḥ / ye pustake dhārayanti te yānti paramāṃ gatim
101 ॥ ये श्रीपुरप्रकारेण तत्तत्स्थानविभेदतः । कृत्वा शिल्पिजनैः सर्वं श्रीदेव्यायतनं महत् । संपादयन्ति ये भक्तास्ते यान्ति परमां गतिम्
101 // ye śrīpuraprakāreṇa tattatsthānavibhedataḥ / kṛtvā śilpijanaiḥ sarvaṃ śrīdevyāyatanaṃ mahat / saṃpādayanti ye bhaktāste yānti paramāṃ gatim