105 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने महापद्माटव्यार्घ्यस्थापनकथनं नाम पञ्चत्रिंशो ऽध्यायः हयग्रीव उवाच चिन्तामणिगृहस्याग्निदिग्भागे कुन्दमानकम् । योजनायामविस्तारं योजनोच्छासचातकम्
105 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne mahāpadmāṭavyārghyasthāpanakathanaṃ nāma pañcatriṃśo 'dhyāyaḥ hayagrīva uvāca cintāmaṇigṛhasyāgnidigbhāge kundamānakam / yojanāyāmavistāraṃ yojanocchāsacātakam
1 ॥ तत्र ज्वलति चिद्वह्निः सुधाधाराशतार्चितः । परमैश्वर्यजनकः पावनो ललिताज्ञया
1 // tatra jvalati cidvahniḥ sudhādhārāśatārcitaḥ / paramaiśvaryajanakaḥ pāvano lalitājñayā
2 ॥ अनिन्धनो महाज्वालः सुधया तर्पिताकृतिः । कङ्कोलीपल्लवच्छायस्तत्र ज्वलति चिच्छिखी
2 // anindhano mahājvālaḥ sudhayā tarpitākṛtiḥ / kaṅkolīpallavacchāyastatra jvalati cicchikhī
3 ॥ तत्र होत्री महादेवी होता कामेश्वरः परः । उभौ तौ नित्यहोतारौ रक्षतः सकलं जगत्
3 // tatra hotrī mahādevī hotā kāmeśvaraḥ paraḥ / ubhau tau nityahotārau rakṣataḥ sakalaṃ jagat
4 ॥ अनुत्तरपराधीना ललिता संप्रवर्तिता । ललिताचोदितः कामः शङ्करेण प्रवर्तितः
4 // anuttaraparādhīnā lalitā saṃpravartitā / lalitācoditaḥ kāmaḥ śaṅkareṇa pravartitaḥ
5 ॥ चिन्तामणिगृहेन्द्रस्य रक्षोभागेम्बुजाटवौ
5 // cintāmaṇigṛhendrasya rakṣobhāgembujāṭavau
6 ॥ चक्रराजरथश्रेष्ठस्तिष्ठत्युन्नतविग्रहः । नवभिः पर्वभिर्युक्तः सर्वरत्नमयाकृतिः
6 // cakrarājarathaśreṣṭhastiṣṭhatyunnatavigrahaḥ / navabhiḥ parvabhiryuktaḥ sarvaratnamayākṛtiḥ
7 ॥ चतुर्योजनविस्तारो दशयोजनमुन्नतः । यथोत्तरे ह्रासयुक्तः स्थूलतः कूबरोज्ज्वलः
7 // caturyojanavistāro daśayojanamunnataḥ / yathottare hrāsayuktaḥ sthūlataḥ kūbarojjvalaḥ
8 ॥ चतुर्वेदमहाचक्रः पुरुषार्थमहाहयः । तत्त्वैरु पचरद्भिश्च चामरैरभिमण्डितः
8 // caturvedamahācakraḥ puruṣārthamahāhayaḥ / tattvairu pacaradbhiśca cāmarairabhimaṇḍitaḥ
9 ॥ पूर्वोक्तलक्षणैर्युक्तो मुक्ताच्छत्रेण शोभितः । भण्डासुरमहायुद्धे कृतसाहसिकक्रियः
9 // pūrvoktalakṣaṇairyukto muktācchatreṇa śobhitaḥ / bhaṇḍāsuramahāyuddhe kṛtasāhasikakriyaḥ
10 ॥ वर्तते रथमूर्धन्यः श्रीदेव्यासनपाटितः । चिन्तामणिगृहेन्द्रस्य वायुभागेम्बुजाटवौ
10 // vartate rathamūrdhanyaḥ śrīdevyāsanapāṭitaḥ / cintāmaṇigṛhendrasya vāyubhāgembujāṭavau
11 ॥ गेयचक्ररथेन्द्रस्तु मन्त्रिण्याः प्रान्ततिष्ठति । चिन्तामणिगृहेन्द्रस्य रुद्रभागेम्बुजाटवौ
11 // geyacakrarathendrastu mantriṇyāḥ prāntatiṣṭhati / cintāmaṇigṛhendrasya rudrabhāgembujāṭavau
12 ॥ वल्लभो दण्डनाथायाः किरिचक्रे महारथः । एतद्रथत्रयं सर्वक्षेत्रश्रीपुरपक्तिषु । समानमेव विज्ञेयमङ्गस्था देवता यथा
12 // vallabho daṇḍanāthāyāḥ kiricakre mahārathaḥ / etadrathatrayaṃ sarvakṣetraśrīpurapaktiṣu / samānameva vijñeyamaṅgasthā devatā yathā
13 ॥ आनलं कुण्डमाग्नेये यत्तिष्ठति सदा ज्वलत् । तप्तमेतत्तु गायत्री तप्तं स्याद भयङ्करम्
13 // ānalaṃ kuṇḍamāgneye yattiṣṭhati sadā jvalat / taptametattu gāyatrī taptaṃ syāda bhayaṅkaram
14 ॥ घृणिसूर्यस्तु तत्पश्चाद् ओंकारस्य च मन्दिरम् । देवी तुरीयगायत्री चक्षुष्मत्यपि तापस
14 // ghṛṇisūryastu tatpaścād oṃkārasya ca mandiram / devī turīyagāyatrī cakṣuṣmatyapi tāpasa
15 ॥ अथ गन्धर्वराजश्च परिषद्रुद्र एव च । तारांबिका भगवती तत्पश्चाद्भागतः स्थिताः
15 // atha gandharvarājaśca pariṣadrudra eva ca / tārāṃbikā bhagavatī tatpaścādbhāgataḥ sthitāḥ
16 ॥ चिन्तामणिगृहेन्द्रस्य रक्षोभागं समाश्रितः । नामत्रय पहामन्त्रवाच्यो ऽस्ति भगवान्हरिः
16 // cintāmaṇigṛhendrasya rakṣobhāgaṃ samāśritaḥ / nāmatraya pahāmantravācyo 'sti bhagavānhariḥ
17 ॥ महागणपतिस्तस्योत्तरसंश्रितकेतनः । पञ्चाक्षरीमन्त्रवाच्यस्तस्य चाप्युत्तरे शिवः
17 // mahāgaṇapatistasyottarasaṃśritaketanaḥ / pañcākṣarīmantravācyastasya cāpyuttare śivaḥ
18 ॥ अथ मृत्युञ्जयेशश्च वाच्यर्त्र्यक्षरमात्रतः । सरस्वती धारणाख्या ह्यस्य चोत्तरवासिनी
18 // atha mṛtyuñjayeśaśca vācyartryakṣaramātrataḥ / sarasvatī dhāraṇākhyā hyasya cottaravāsinī
19 ॥ अकारादिक्षकारान्तवर्णमूर्तेस्तु मन्दिरम् । मातृकाया उत्तरतस्तस्यां विन्ध्यनिषूदन
19 // akārādikṣakārāntavarṇamūrtestu mandiram / mātṛkāyā uttaratastasyāṃ vindhyaniṣūdana
20 ॥ उत्तरे सम्पदेशी वै कालसंकर्षणी तथा । श्रीमहाशम्भुनाथा च देव्याविर्भावकारणम्
20 // uttare sampadeśī vai kālasaṃkarṣaṇī tathā / śrīmahāśambhunāthā ca devyāvirbhāvakāraṇam
21 ॥ श्रीः परांबा च विशदज्योत्स्ना निर्मलविग्रहा । उत्तरोत्तरमेतास्तु देवताः कृतमन्दिराः
21 // śrīḥ parāṃbā ca viśadajyotsnā nirmalavigrahā / uttarottarametāstu devatāḥ kṛtamandirāḥ
22 ॥ बालाचैवान्नपूर्णा च हयारूढा तथैव च । श्रीपादुकाचतस्रस्तदुत्तरोत्तरमन्दिराः
22 // bālācaivānnapūrṇā ca hayārūḍhā tathaiva ca / śrīpādukācatasrastaduttarottaramandirāḥ
23 ॥ चिन्तामणिगृहेन्द्रस्य वायव्यवसुधादितः । महापद्माटवौ त्वन्या देवताः कृतमन्दिराः
23 // cintāmaṇigṛhendrasya vāyavyavasudhāditaḥ / mahāpadmāṭavau tvanyā devatāḥ kṛtamandirāḥ
24 ॥ उन्मत्तभैरवी चैव स्वप्नवाराहिका परा । तिरस्करणिकांबा च तथान्या पञ्चमी परा
24 // unmattabhairavī caiva svapnavārāhikā parā / tiraskaraṇikāṃbā ca tathānyā pañcamī parā
25 ॥ यथापूर्वं कृतगृहा एता देव्यो महोदयाः । श्रीपूर्तिश्च महादेवी श्रीमहापादुकापि च
25 // yathāpūrvaṃ kṛtagṛhā etā devyo mahodayāḥ / śrīpūrtiśca mahādevī śrīmahāpādukāpi ca
26 ॥ यथापूर्वं कृतगृहे द्वे एते देवतोत्तमे । शङ्करेण षडाम्नायसागरे प्रतिपादिताः । या विद्यास्ताः समस्ताश्च महापद्माटवीस्थले
26 // yathāpūrvaṃ kṛtagṛhe dve ete devatottame / śaṅkareṇa ṣaḍāmnāyasāgare pratipāditāḥ / yā vidyāstāḥ samastāśca mahāpadmāṭavīsthale
27 ॥ इत्थं श्रीरश्मिमालाया मणिकॢप्ता गहागृहाः । उच्चध्वजा उच्चशालास्ससोपानास्तपोधन
27 // itthaṃ śrīraśmimālāyā maṇikḷptā gahāgṛhāḥ / uccadhvajā uccaśālāssasopānāstapodhana
28 ॥ चिन्तामणिगृहेन्द्रस्य पूर्वद्वारे समुद्रप । दक्षिणे पार्श्वभागेतु मन्त्रिनाथागृहं महत्
28 // cintāmaṇigṛhendrasya pūrvadvāre samudrapa / dakṣiṇe pārśvabhāgetu mantrināthāgṛhaṃ mahat
29 ॥ वामभागे दण्डनाथाभवनं रत्ननिर्मितम् । ब्रह्मविष्णुमहेशानामर्ध्यस्थानम्य पूर्वतः
29 // vāmabhāge daṇḍanāthābhavanaṃ ratnanirmitam / brahmaviṣṇumaheśānāmardhyasthānamya pūrvataḥ
30 ॥ भवनं दीपिताशेषदिक्चक्रं रत्नरश्मिभिः । समस्ता देवता एता ललिताभक्तिनिर्भराः । ललितामन्त्रजाप्याश्च श्रीदेवीं समुपासते
30 // bhavanaṃ dīpitāśeṣadikcakraṃ ratnaraśmibhiḥ / samastā devatā etā lalitābhaktinirbharāḥ / lalitāmantrajāpyāśca śrīdevīṃ samupāsate
31 ॥ पूर्वोक्त मर्ध्यस्थानं च पूर्वोक्तं चार्ध्यकल्पनम् । याम्यद्वारप्रभृतिषु सर्वेष्वपि समं स्मृतम्
31 // pūrvokta mardhyasthānaṃ ca pūrvoktaṃ cārdhyakalpanam / yāmyadvāraprabhṛtiṣu sarveṣvapi samaṃ smṛtam
32 ॥ अथ चिन्तामणिगृहं वक्ष्ये शृणु महामुने । तच्छ्रीपट्टनमध्यस्थं योजनद्वयविस्मृतम्
32 // atha cintāmaṇigṛhaṃ vakṣye śṛṇu mahāmune / tacchrīpaṭṭanamadhyasthaṃ yojanadvayavismṛtam
33 ॥ तस्य चिन्तामणिभयी भित्तिः कोशसुविस्तृता । चिन्तामणिशिलाभिश्च च्छादिनीभिस्तथोपरि
33 // tasya cintāmaṇibhayī bhittiḥ kośasuvistṛtā / cintāmaṇiśilābhiśca cchādinībhistathopari
34 ॥ संवृता कूटरूपेण तत्रतत्र समुन्नता । गृहभित्तिस्तथोन्नम्रा चतुर्योजनमानतः
34 // saṃvṛtā kūṭarūpeṇa tatratatra samunnatā / gṛhabhittistathonnamrā caturyojanamānataḥ
35 ॥ विंशतिर्योजनं तस्याश्चोन्नम्रा भूमिरुच्यते । ततोर्ध्वं ह्राससंयुक्तं स्थौल्यत्रिमुकुटोज्ज्वला
35 // viṃśatiryojanaṃ tasyāśconnamrā bhūmirucyate / tatordhvaṃ hrāsasaṃyuktaṃ sthaulyatrimukuṭojjvalā
36 ॥ तानि चेच्छाक्रियाज्ञानरूपाणि मुकुटान्यृषे । सदा देदीप्यमानानि चिन्तामणिमयान्यपि
36 // tāni cecchākriyājñānarūpāṇi mukuṭānyṛṣe / sadā dedīpyamānāni cintāmaṇimayānyapi
37 ॥ चिन्तामणिगृहे सर्वं चिन्तामणिमयं स्मृतम् । यस्य द्वाराणि चत्वारि क्रोशार्धायामभाञ्जि च
37 // cintāmaṇigṛhe sarvaṃ cintāmaṇimayaṃ smṛtam / yasya dvārāṇi catvāri krośārdhāyāmabhāñji ca
38 ॥ क्रोशार्द्धार्द्धं च विस्तारो द्वाराणां कथितो मुने । द्वारेषु सर्वेषु पुनश्चिन्तामणिगृहान्तरे
38 // krośārddhārddhaṃ ca vistāro dvārāṇāṃ kathito mune / dvāreṣu sarveṣu punaścintāmaṇigṛhāntare
39 ॥ पिहिता ललिता देव्या मूतर्लोहितसिन्धुवत् । तरुणार्कसहस्राभा चन्द्रवच्छीतला ह्यपि । मुहुः प्रवाहरूपेण प्रसरन्ती महामुने
39 // pihitā lalitā devyā mūtarlohitasindhuvat / taruṇārkasahasrābhā candravacchītalā hyapi / muhuḥ pravāharūpeṇa prasarantī mahāmune
40 ॥ पूर्वाम्नाय मयं चैव पूर्वद्वारं प्रकीर्तितम् । दक्षिणद्वारदेशस्तु दक्षिणाम्नायलक्षणः
40 // pūrvāmnāya mayaṃ caiva pūrvadvāraṃ prakīrtitam / dakṣiṇadvāradeśastu dakṣiṇāmnāyalakṣaṇaḥ
41 ॥ पश्चिमद्वारदेशस्तु पश्चिमाम्नायलक्षणः । उत्तरद्वारदेशः स्यादुत्तराम्नायलक्षणः
41 // paścimadvāradeśastu paścimāmnāyalakṣaṇaḥ / uttaradvāradeśaḥ syāduttarāmnāyalakṣaṇaḥ
42 ॥ गृहराजस्यान्तराले भित्तौ खचितदण्डकाः । रत्नप्रदीपा भास्वन्तः कोट्यर्कसदृशत्विषः । परितस्तत्र वर्तन्ते भासयन्तो गृहान्तरम्
42 // gṛharājasyāntarāle bhittau khacitadaṇḍakāḥ / ratnapradīpā bhāsvantaḥ koṭyarkasadṛśatviṣaḥ / paritastatra vartante bhāsayanto gṛhāntaram
43 ॥ चिन्तामणिगृहस्यास्य मध्यस्थाने महीयसि । अत्युच्चैर्वेदिकाभागे बिन्दुचक्रं महात्तरम्
43 // cintāmaṇigṛhasyāsya madhyasthāne mahīyasi / atyuccairvedikābhāge binducakraṃ mahāttaram
44 ॥ चिन्तारत्नगृहोत्तुङ्गभिन्त्तेर्बिन्दोश्च मध्यभूः । भित्तिः क्रोशं परित्यज्य क्रोशत्रयमुदाहृतम्
44 // cintāratnagṛhottuṅgabhintterbindośca madhyabhūḥ / bhittiḥ krośaṃ parityajya krośatrayamudāhṛtam
45 ॥ तत्र क्रोशत्रयस्थाने ह्यणिमाद्यात्मरोचिषा । क्रोशत्रयं समस्तं तद्धस्तसंख्याप्रकारतः । चतुर्विंशतिसाहस्रहस्तैः संमितमुच्यते
45 // tatra krośatrayasthāne hyaṇimādyātmarociṣā / krośatrayaṃ samastaṃ taddhastasaṃkhyāprakārataḥ / caturviṃśatisāhasrahastaiḥ saṃmitamucyate
46 ॥ बिन्दुपीठेशपर्यम्तं चतुर्दशविभेदतः । अन्तरे भेदिते जाते हस्तसंख्या मयोच्यते
46 // bindupīṭheśaparyamtaṃ caturdaśavibhedataḥ / antare bhedite jāte hastasaṃkhyā mayocyate
47 ॥ पद्माटवीस्थलाच्चिन्तामणिवेश्मान्तरं मुने । हस्तविंशतिरुन्नम्रं तत्र स्युरणिमादयः
47 // padmāṭavīsthalāccintāmaṇiveśmāntaraṃ mune / hastaviṃśatirunnamraṃ tatra syuraṇimādayaḥ
48 ॥ अणिमान्तरविस्तारश्चतुर्नल्वसमन्वितः । किष्कुश्चतुःशती नल्वकिष्कुर्हस्त उदीर्यते
48 // aṇimāntaravistāraścaturnalvasamanvitaḥ / kiṣkuścatuḥśatī nalvakiṣkurhasta udīryate
49 ॥ तत्रान्तरे ऽणिमाद्यास्तु पूर्वादिकृतमन्दिराः । अणिमा महिमा चैव लघिमा गरिमा तथा
49 // tatrāntare 'ṇimādyāstu pūrvādikṛtamandirāḥ / aṇimā mahimā caiva laghimā garimā tathā
50 ॥ ईशित्वं च वशित्वं च प्राकाम्यं मुक्तिरेव च । इच्छा प्राप्तिः सर्वकामेत्येताः सिद्धय उत्तमाः
50 // īśitvaṃ ca vaśitvaṃ ca prākāmyaṃ muktireva ca / icchā prāptiḥ sarvakāmetyetāḥ siddhaya uttamāḥ
51 ॥ रससिद्धिर्मोक्षसिद्धिर्बलसिद्धिस्तथैव च । खड्गसिद्धिः पादुकाया सिद्धिरञ्जनसिद्धिकः
51 // rasasiddhirmokṣasiddhirbalasiddhistathaiva ca / khaḍgasiddhiḥ pādukāyā siddhirañjanasiddhikaḥ
52 ॥ वाक्सिद्धिर्लोकसिद्धिश्च देहसिद्धिरनन्तरम् । एता अष्टौ सिद्धयस्तु बह्व्यो ऽन्या योगिसंमताः
52 // vāksiddhirlokasiddhiśca dehasiddhiranantaram / etā aṣṭau siddhayastu bahvyo 'nyā yogisaṃmatāḥ
53 ॥ तत्रान्तरे तु परितः सेवते परमेश्वरीम् । कोटिशः सिद्धयस्तस्मिन्नणिमाद्यन्तरे मुने
53 // tatrāntare tu paritaḥ sevate parameśvarīm / koṭiśaḥ siddhayastasminnaṇimādyantare mune
54 ॥ नवलावण्यसंपूर्णाः स्मयमानमुखांबुजाः । ज्वलच्चिन्तामणि कराः मदा षोडशवर्षिकाः । अत्युदारप्रकृतयः खेलन्ति मदविह्वलाः
54 // navalāvaṇyasaṃpūrṇāḥ smayamānamukhāṃbujāḥ / jvalaccintāmaṇi karāḥ madā ṣoḍaśavarṣikāḥ / atyudāraprakṛtayaḥ khelanti madavihvalāḥ
55 ॥ तस्याणिमाद्यन्तरस्योपरिष्टात्सुमनोहरम् । हस्तविंशतिरुन्नम्रं चतुर्नल्वप्रविस्तरम्
55 // tasyāṇimādyantarasyopariṣṭātsumanoharam / hastaviṃśatirunnamraṃ caturnalvapravistaram
56 ॥ चतुर्दिक्षु च सोपानपङ्क्तिभिः सुमनोहरम् । ब्रह्माद्यंबरधिष्ण्यं स्यात्तत्रदेवीः स्थिताः शृणु
56 // caturdikṣu ca sopānapaṅktibhiḥ sumanoharam / brahmādyaṃbaradhiṣṇyaṃ syāttatradevīḥ sthitāḥ śṛṇu
57 ॥ ब्राह्मी माहेश्वरी चैव कौमारी वैष्णवी तथा । वाराही चैव माहेन्द्री चामुण्डाप्यथ सप्तमी । महालक्ष्मीरष्टमी तु तत्रैताः कृतमन्दिराः
57 // brāhmī māheśvarī caiva kaumārī vaiṣṇavī tathā / vārāhī caiva māhendrī cāmuṇḍāpyatha saptamī / mahālakṣmīraṣṭamī tu tatraitāḥ kṛtamandirāḥ
58 ॥ नानाविधायुधाढ्याश्च नानाशक्तिपरिच्छदाः । पूर्वादिदिशमारभ्य प्रादक्षिण्यकृतालयाः
58 // nānāvidhāyudhāḍhyāśca nānāśaktiparicchadāḥ / pūrvādidiśamārabhya prādakṣiṇyakṛtālayāḥ
59 ॥ अथ ब्राह्यन्तरा तस्योपरिष्टात्कुम्भसंभव । हस्तविंशतिरुन्नम्रं चतुर्नल्वप्रविस्तरम् । मुद्रान्तरमिति त्रैधं तत्र मुद्राः कृतालयाः
59 // atha brāhyantarā tasyopariṣṭātkumbhasaṃbhava / hastaviṃśatirunnamraṃ caturnalvapravistaram / mudrāntaramiti traidhaṃ tatra mudrāḥ kṛtālayāḥ
60 ॥ संक्षोभद्रावणाकर्षवश्योन्मादमहाङ्कुशाः । खेचरी बीजयोन्याख्या त्रिखण्डा दशमी पुनः
60 // saṃkṣobhadrāvaṇākarṣavaśyonmādamahāṅkuśāḥ / khecarī bījayonyākhyā trikhaṇḍā daśamī punaḥ
61 ॥ पूर्वादिदिशमारभ्य मुद्रा एताः प्रतिष्ठिताः । अत्यन्तसुन्दराकारा नवयौवनविह्वलाः
61 // pūrvādidiśamārabhya mudrā etāḥ pratiṣṭhitāḥ / atyantasundarākārā navayauvanavihvalāḥ
62 ॥ कान्तिभिः कमनीयाभिः पूरयन्त्यो गृहान्तरम् । सेवन्ते मुनिशार्दूल ललितापरमेश्वरीम्
62 // kāntibhiḥ kamanīyābhiḥ pūrayantyo gṛhāntaram / sevante muniśārdūla lalitāparameśvarīm
63 ॥ अन्तरं त्रयमेतत्तु चक्रं त्रैलोक्यमोहनम् । एतस्मिञ्छक्तयो यासु ता उक्ताः प्रकटाभिधाः
63 // antaraṃ trayametattu cakraṃ trailokyamohanam / etasmiñchaktayo yāsu tā uktāḥ prakaṭābhidhāḥ
64 ॥ एतसां समधिष्ठात्री त्रिपुरा चक्रनायिका । तच्चक्रपालनकरी मुद्रासंक्षोभणात्मिका
64 // etasāṃ samadhiṣṭhātrī tripurā cakranāyikā / taccakrapālanakarī mudrāsaṃkṣobhaṇātmikā
65 ॥ अथ मुद्रान्तरस्योर्ध्वं प्रोक्ता नित्याकलां तरम् । हस्तविंशतिरुन्नम्रं चतुर्नल्वप्रविस्तरम् । पर्वतश्चैव सोपानमुत्तरोत्तरमिष्यते
65 // atha mudrāntarasyordhvaṃ proktā nityākalāṃ taram / hastaviṃśatirunnamraṃ caturnalvapravistaram / parvataścaiva sopānamuttarottaramiṣyate
66 ॥ नित्याकलान्तरे तस्मिन्कामाकर्षणिकासुखाः । परितः कृतसंस्थानाः षोडशेन्दुकलात्मिकाः
66 // nityākalāntare tasminkāmākarṣaṇikāsukhāḥ / paritaḥ kṛtasaṃsthānāḥ ṣoḍaśendukalātmikāḥ
67 ॥ तर्पयन्त्यो दिशां चक्रं सुधास्यन्दैः सुशीतलैः । तासां नामानि मत्तस्त्वमवधारय कुम्भज
67 // tarpayantyo diśāṃ cakraṃ sudhāsyandaiḥ suśītalaiḥ / tāsāṃ nāmāni mattastvamavadhāraya kumbhaja
68 ॥ कामाकर्षिणिका नित्या बुद्ध्याकर्षणिकापरा । रसाकर्षणिका नित्या गन्धाकर्षणिका कला
68 // kāmākarṣiṇikā nityā buddhyākarṣaṇikāparā / rasākarṣaṇikā nityā gandhākarṣaṇikā kalā
69 ॥ चित्ताकर्षणिका नित्या धैर्याकर्षणिका कला । स्मृत्याकर्षणिका नित्या नामाकर्षणिका कला
69 // cittākarṣaṇikā nityā dhairyākarṣaṇikā kalā / smṛtyākarṣaṇikā nityā nāmākarṣaṇikā kalā
70 ॥ बीजाकर्षणिका नित्या चार्थाकर्षणिका कला । अमृताकर्षणी चान्या शरीराकर्षणी कला
70 // bījākarṣaṇikā nityā cārthākarṣaṇikā kalā / amṛtākarṣaṇī cānyā śarīrākarṣaṇī kalā
71 ॥ एतास्तु गुप्तयोगिन्यस्त्रिपुरेशी तु चक्रिणी । सर्वाशापूरिकाभिख्या चक्राधिष्ठानदेवता
71 // etāstu guptayoginyastripureśī tu cakriṇī / sarvāśāpūrikābhikhyā cakrādhiṣṭhānadevatā
72 ॥ एतच्चक्रे पालिका तु मुद्रा द्राविणिकाभिधा । नित्या कलान्तरादूर्ध्वं धिष्ण्य मत्यन्तसुन्दरम्
72 // etaccakre pālikā tu mudrā drāviṇikābhidhā / nityā kalāntarādūrdhvaṃ dhiṣṇya matyantasundaram
73 ॥ हस्तविंशतिरुन्नम्रं चतुर्नल्वप्रविस्तरम् । प्राग्वत्सोपानसंयुक्तं सर्वसंक्षोभणाभिधम्
73 // hastaviṃśatirunnamraṃ caturnalvapravistaram / prāgvatsopānasaṃyuktaṃ sarvasaṃkṣobhaṇābhidham
74 ॥ तत्राष्टौ शक्तयस्तीव्रा मदारुणविलोचनाः । नवतारुण्यमच्चाश्च सेवन्ते परमेश्वरीम्
74 // tatrāṣṭau śaktayastīvrā madāruṇavilocanāḥ / navatāruṇyamaccāśca sevante parameśvarīm
75 ॥ कुसुमा मेखला चैव मदना मदनातुरा । रेखा वेगिन्यङ्कुशा च मालिन्यष्टौ च शक्तयः
75 // kusumā mekhalā caiva madanā madanāturā / rekhā veginyaṅkuśā ca mālinyaṣṭau ca śaktayaḥ
76 ॥ कोटिशस्तत्परीवारः शक्तयो ऽनङ्गपूर्विकाः । सर्वसंक्षोभमिदं चक्रं तदधिदेवता
76 // koṭiśastatparīvāraḥ śaktayo 'naṅgapūrvikāḥ / sarvasaṃkṣobhamidaṃ cakraṃ tadadhidevatā
77 ॥ सुंदरी नाम विज्ञेया नाम्ना गुप्ततरापि सा । तच्चक्रपालनकरी मुद्राकर्षणिका स्मृता
77 // suṃdarī nāma vijñeyā nāmnā guptatarāpi sā / taccakrapālanakarī mudrākarṣaṇikā smṛtā
78 ॥ अनङ्गशक्त्यन्तरस्योपरिष्टात्कुंभसंभव । हस्तविंशतिरुन्नम्रं चतुर्नल्वप्रविस्तरम् । संक्षोभिण्याद्यन्तरं स्यात्सर्वसौभाग्यदायकम्
78 // anaṅgaśaktyantarasyopariṣṭātkuṃbhasaṃbhava / hastaviṃśatirunnamraṃ caturnalvapravistaram / saṃkṣobhiṇyādyantaraṃ syātsarvasaubhāgyadāyakam
79 ॥ सर्वसंक्षोभिणीमुख्यास्तत्र शक्तय उद्धताः । चतुर्दश वसंत्येव तासां नामानि मच्छृणु
79 // sarvasaṃkṣobhiṇīmukhyāstatra śaktaya uddhatāḥ / caturdaśa vasaṃtyeva tāsāṃ nāmāni macchṛṇu
80 ॥ सर्वसंक्षोभिणी शक्तिः सर्वविद्राविणी तथा । सर्वाकर्षणिका शाक्तिः सर्वाह्लादनिका तथा
80 // sarvasaṃkṣobhiṇī śaktiḥ sarvavidrāviṇī tathā / sarvākarṣaṇikā śāktiḥ sarvāhlādanikā tathā
81 ॥ सर्वसंमोहिनी शक्तिः सर्वस्तंभनशक्तिका । सर्वजृंभिणिका शक्तिस्तथा सर्ववशङ्करी
81 // sarvasaṃmohinī śaktiḥ sarvastaṃbhanaśaktikā / sarvajṛṃbhiṇikā śaktistathā sarvavaśaṅkarī
82 ॥ सर्वरञ्जनशक्तिश्च सर्वोन्मादनिशक्तिका । सर्वार्थसाधिका शक्तिः सर्वसंपत्तिपूरिणी
82 // sarvarañjanaśaktiśca sarvonmādaniśaktikā / sarvārthasādhikā śaktiḥ sarvasaṃpattipūriṇī
83 ॥ सर्वमन्त्रमयी शक्तिः सर्वद्वन्द्वक्षयङ्करी । एताश्च संप्रदायाख्याश्चक्रिणीपुरवासिनीः
83 // sarvamantramayī śaktiḥ sarvadvandvakṣayaṅkarī / etāśca saṃpradāyākhyāścakriṇīpuravāsinīḥ
84 ॥ मुद्राश्च सर्ववश्याख्यास्तच्चक्रे रक्षिका मताः । कोटिशः शक्तयस्तत्र तासां किङ्कर्य्य उद्धृताः
84 // mudrāśca sarvavaśyākhyāstaccakre rakṣikā matāḥ / koṭiśaḥ śaktayastatra tāsāṃ kiṅkaryya uddhṛtāḥ
85 ॥ संक्षोभिण्याद्यन्तरस्योपरिष्टात्कुंभसंभव । हस्तविंशतिरुन्नम्रं चतुर्नल्वप्रविस्तरम् । सर्वसिद्धादिकानां तु मन्दिरं विष्ट्यमुच्यते
85 // saṃkṣobhiṇyādyantarasyopariṣṭātkuṃbhasaṃbhava / hastaviṃśatirunnamraṃ caturnalvapravistaram / sarvasiddhādikānāṃ tu mandiraṃ viṣṭyamucyate
86 ॥ सर्वसिद्धिप्रदा चैव सर्वसंपत्प्रदा तथा । सर्वप्रियङ्करी देवी सर्वमङ्गलकारिणी
86 // sarvasiddhipradā caiva sarvasaṃpatpradā tathā / sarvapriyaṅkarī devī sarvamaṅgalakāriṇī
87 ॥ सर्वकामप्रदा देवी सर्वदुःखविमोचनी । सर्वमृत्युप्रशमिनी सर्वविघ्ननिवारिणी
87 // sarvakāmapradā devī sarvaduḥkhavimocanī / sarvamṛtyupraśaminī sarvavighnanivāriṇī
88 ॥ सर्वाङ्गसुन्दरी देवी सर्वसौभाग्यदायिनी । एता देव्यः कलोत्कीर्णा योगिन्यो नामतः स्मृताः
88 // sarvāṅgasundarī devī sarvasaubhāgyadāyinī / etā devyaḥ kalotkīrṇā yoginyo nāmataḥ smṛtāḥ
89 ॥ चक्रिणी श्रीश्च विज्ञेया चक्रं सर्वार्थसाधकम् । सर्वोन्मादनमुद्राश्च चक्रस्य परिपालिकाः
89 // cakriṇī śrīśca vijñeyā cakraṃ sarvārthasādhakam / sarvonmādanamudrāśca cakrasya paripālikāḥ
90 ॥ सर्वसिद्ध्याद्यन्तरस्योपरिष्टात्कुम्भसम्भव । हस्तविंशतिरुन्नम्रं चतुर्नल्वप्रविस्तरम्
90 // sarvasiddhyādyantarasyopariṣṭātkumbhasambhava / hastaviṃśatirunnamraṃ caturnalvapravistaram
91 ॥ सर्वज्ञाद्यन्तरं नाम्ना सर्वरक्षाकरं स्मृतम् । चक्रं महत्तरं दिव्यं सर्वज्ञाद्याः प्रकीर्तिताः
91 // sarvajñādyantaraṃ nāmnā sarvarakṣākaraṃ smṛtam / cakraṃ mahattaraṃ divyaṃ sarvajñādyāḥ prakīrtitāḥ
92 ॥ सर्वज्ञा सर्वशक्तिश्च सर्वैश्वर्यप्रदायिनी । सर्वज्ञानमयी देवी सर्वव्याधिविनाशिनी
92 // sarvajñā sarvaśaktiśca sarvaiśvaryapradāyinī / sarvajñānamayī devī sarvavyādhivināśinī
93 ॥ सर्वाधारस्वरूपा च सर्वपापहरी तथा । सर्वानन्दमयी देवी सर्वरक्षास्वरूपिणी
93 // sarvādhārasvarūpā ca sarvapāpaharī tathā / sarvānandamayī devī sarvarakṣāsvarūpiṇī
94 ॥ सर्वेप्सितप्रदा चैता निर्गर्वा योगिनीश्वराः
94 // sarvepsitapradā caitā nirgarvā yoginīśvarāḥ
95 ॥ मालिनी चक्रिणी प्रोक्ता मुद्रा सर्वमहाङ्कुशा । इति चिन्तामणि गृहे सर्वज्ञाद्यन्तरावधि । चक्राणि कानिचित्प्रोक्तान्यन्यान्यपि मुने शृणु
95 // mālinī cakriṇī proktā mudrā sarvamahāṅkuśā / iti cintāmaṇi gṛhe sarvajñādyantarāvadhi / cakrāṇi kānicitproktānyanyānyapi mune śṛṇu