99 ॥ इति ब्रह्माण्डमहापुराणे उत्तरभागे ललितोपाख्याने करङ्कादिपञ्चसेनापतिवधो नाम त्रयोविंशो ऽध्यायः हतेषु तेषु रोषान्धो निश्वसञ्छून्यकेश्वरः । कुजलाशमिति प्रोचे युयुत्साव्याकुलाशयः
99 // iti brahmāṇḍamahāpurāṇe uttarabhāge lalitopākhyāne karaṅkādipañcasenāpativadho nāma trayoviṃśo 'dhyāyaḥ hateṣu teṣu roṣāndho niśvasañchūnyakeśvaraḥ / kujalāśamiti proce yuyutsāvyākulāśayaḥ
1 ॥ भद्र सेनापते ऽस्माकमभद्रं समुपागतम् । करङ्काद्यश्चमूनाथाः कन्दलद्भुजविक्रमाः
1 // bhadra senāpate 'smākamabhadraṃ samupāgatam / karaṅkādyaścamūnāthāḥ kandaladbhujavikramāḥ
2 ॥ सर्पिणीमायया सर्वगीर्वाणमदभञ्जनाः । पापीयस्या तया गूढमायया विनिपातिताः
2 // sarpiṇīmāyayā sarvagīrvāṇamadabhañjanāḥ / pāpīyasyā tayā gūḍhamāyayā vinipātitāḥ
3 ॥ बलाहकप्रभृतयः सप्त ये सैनिकाधिपाः । तानुदग्रभुजासत्त्वान्प्राहिणु प्रधनं प्रति
3 // balāhakaprabhṛtayaḥ sapta ye sainikādhipāḥ / tānudagrabhujāsattvānprāhiṇu pradhanaṃ prati
4 ॥ त्रिशतं चाक्षौहिणीनां प्रस्थापय सहैव तैः । ते मर्दयित्वा ललितासैन्यं मायापरायणाः
4 // triśataṃ cākṣauhiṇīnāṃ prasthāpaya sahaiva taiḥ / te mardayitvā lalitāsainyaṃ māyāparāyaṇāḥ
5 ॥ अये विजयमाहार्य संप्राप्स्यन्ति ममान्तिकम् । कीकसगर्भसंजातास्ते प्रचण्डपराक्रमाः
5 // aye vijayamāhārya saṃprāpsyanti mamāntikam / kīkasagarbhasaṃjātāste pracaṇḍaparākramāḥ
6 ॥ बलाहकमुखाः सप्त भ्रातरो जयिनः सदा । तेषामवश्यं विजयो भविष्यति रणाङ्गणे
6 // balāhakamukhāḥ sapta bhrātaro jayinaḥ sadā / teṣāmavaśyaṃ vijayo bhaviṣyati raṇāṅgaṇe
7 ॥ इति भण्डासुरेणोक्तः कुटिलाक्षः समाह्वयत् । बलाहकमुखान्सप्त सेनानाथान्मदोत्कटान्
7 // iti bhaṇḍāsureṇoktaḥ kuṭilākṣaḥ samāhvayat / balāhakamukhānsapta senānāthānmadotkaṭān
8 ॥ बलाहकः प्रथमतस्तस्मा त्सूचीमुखो ऽपरः । अन्यः फालमुखश्चैव विकर्णो विकटाननः
8 // balāhakaḥ prathamatastasmā tsūcīmukho 'paraḥ / anyaḥ phālamukhaścaiva vikarṇo vikaṭānanaḥ
9 ॥ करालायुः करटकः सप्तैते वीर्यशालिनः । भण्डासुरं नमस्कृत्य युद्धकौतूहलोल्वणाः
9 // karālāyuḥ karaṭakaḥ saptaite vīryaśālinaḥ / bhaṇḍāsuraṃ namaskṛtya yuddhakautūhalolvaṇāḥ
10 ॥ कीकसासूनवः सर्वे भ्रातरो ऽन्योन्यमावृताः । अन्योन्यसुसहायाश्च निर्जगमुर्नगरान्तरात्
10 // kīkasāsūnavaḥ sarve bhrātaro 'nyonyamāvṛtāḥ / anyonyasusahāyāśca nirjagamurnagarāntarāt
11 ॥ त्रिशाताक्षौहिणीसेनासेनान्यो ऽन्वगमंस्तदा । उल्लिखन्ति केतुजालैरंबरे घनमण्डलम्
11 // triśātākṣauhiṇīsenāsenānyo 'nvagamaṃstadā / ullikhanti ketujālairaṃbare ghanamaṇḍalam
12 ॥ घोरसंग्रामिणीपादा घातैर्मर्दितभूतला । पिबन्ति धूलिकाजालैरशेषानपि सागरान्
12 // ghorasaṃgrāmiṇīpādā ghātairmarditabhūtalā / pibanti dhūlikājālairaśeṣānapi sāgarān
13 ॥ भेरीनिः साणतंपोट्टपणवानकनिस्वनैः । नभोगुणमयं विश्वमादधानाः पदेपदे
13 // bherīniḥ sāṇataṃpoṭṭapaṇavānakanisvanaiḥ / nabhoguṇamayaṃ viśvamādadhānāḥ padepade
14 ॥ त्रिशताक्षौहिणीसेनां तां गृहीत्वा मदेद्धताः । प्रवेष्टुमिव विश्वस्मिन्कैकसेयाः प्रतस्थिरे
14 // triśatākṣauhiṇīsenāṃ tāṃ gṛhītvā madeddhatāḥ / praveṣṭumiva viśvasminkaikaseyāḥ pratasthire
15 ॥ धृतरोषारुणाः सूर्यमण्डलो द्दीप्तकङ्कटाः । उद्दीप्तशस्त्रभरणाश्चेलुर्द्दीप्तोर्ध्वकेशिनः
15 // dhṛtaroṣāruṇāḥ sūryamaṇḍalo ddīptakaṅkaṭāḥ / uddīptaśastrabharaṇāścelurddīptordhvakeśinaḥ
16 ॥ सप्त लोकान्प्रमथितुं प्रोषिताः पूर्वमुद्धताः । भण्डासुरेण महता जगद्विजयकारिणा
16 // sapta lokānpramathituṃ proṣitāḥ pūrvamuddhatāḥ / bhaṇḍāsureṇa mahatā jagadvijayakāriṇā
17 ॥ सप्तलोकविमर्देन तेन दृष्ट्वा महाबलाः । प्रोषिता ललितासैन्यं जेतुकामेन दुर्धिया
17 // saptalokavimardena tena dṛṣṭvā mahābalāḥ / proṣitā lalitāsainyaṃ jetukāmena durdhiyā
18 ॥ ते पतन्तो रणतलमुच्चलच्छत्रपाणयः । शक्तिसेनामभिमुखं सक्रोधमभिदुद्रुवुः
18 // te patanto raṇatalamuccalacchatrapāṇayaḥ / śaktisenāmabhimukhaṃ sakrodhamabhidudruvuḥ
19 ॥ मुहुः किलकिलाराबैर्घोषयन्तो दिशो दश । देव्यास्तु सैनिकं यत्र तत्र ते जगमुरुद्धताः
19 // muhuḥ kilakilārābairghoṣayanto diśo daśa / devyāstu sainikaṃ yatra tatra te jagamuruddhatāḥ
20 ॥ सैन्यं च ललितादेव्याः सन्नद्धं शास्त्रभीषणम् । अभ्यमित्रीणमभवद्बद्धभ्रुकुटिनिष्ठुरम्
20 // sainyaṃ ca lalitādevyāḥ sannaddhaṃ śāstrabhīṣaṇam / abhyamitrīṇamabhavadbaddhabhrukuṭiniṣṭhuram
21 ॥ पाशिन्यो मुसलिन्यश्च चक्रिण्यश्चापरा मुने । मुद्गरिण्यः पट्टिशिन्यः कोदण्डिन्यस्तथापराः
21 // pāśinyo musalinyaśca cakriṇyaścāparā mune / mudgariṇyaḥ paṭṭiśinyaḥ kodaṇḍinyastathāparāḥ
22 ॥ अनेकाःशक्तयस्तीव्रा ललितासैन्यसंगताः । पिबन्त्य इव दैत्याब्धिं सान्निपेतुः सहस्रशः
22 // anekāḥśaktayastīvrā lalitāsainyasaṃgatāḥ / pibantya iva daityābdhiṃ sānnipetuḥ sahasraśaḥ
23 ॥ आयातायात हे दुष्टाः पापिन्यो वनिताधमाः । मायापरिग्रहैर्दूरं मोहयन्त्यो जडाशयान्
23 // āyātāyāta he duṣṭāḥ pāpinyo vanitādhamāḥ / māyāparigrahairdūraṃ mohayantyo jaḍāśayān
24 ॥ नेष्यामो भवतीरद्य प्रेतनाथनिकेतनम् । श्वसद्भुजगसंकाशैर्बाणैर त्यन्तभीषणैः । इति शक्तीर्भर्त्सयन्तो दानवाश्चक्रुराहवम्
24 // neṣyāmo bhavatīradya pretanāthaniketanam / śvasadbhujagasaṃkāśairbāṇaira tyantabhīṣaṇaiḥ / iti śaktīrbhartsayanto dānavāścakrurāhavam
25 ॥ काचिच्चिच्छेद दैत्येन्द्रं कण्ठे पट्टिशपातनात् । तद्गलोद्गलितो रक्तपूर ऊर्ध्वमुखो ऽभवत्
25 // kācicciccheda daityendraṃ kaṇṭhe paṭṭiśapātanāt / tadgalodgalito raktapūra ūrdhvamukho 'bhavat
26 ॥ तत्र लग्ना बहुतरा गृध्रा मण्डलतां गताः । तैरेव प्रेतनाथस्य च्छत्रच्छविरुदञ्चिता
26 // tatra lagnā bahutarā gṛdhrā maṇḍalatāṃ gatāḥ / taireva pretanāthasya cchatracchavirudañcitā
27 ॥ काचिच्छक्तिः मुरारातिं मुक्तशक्त्यायुधं रणे । लूनतच्छक्तिनैकेन बाणेन व्यलुनीत च
27 // kācicchaktiḥ murārātiṃ muktaśaktyāyudhaṃ raṇe / lūnatacchaktinaikena bāṇena vyalunīta ca
28 ॥ एका तु गजमारूढा कस्यचिद्दैत्यदुर्मतेः । उरःस्थले स्वकरिणा वप्राघातमशिक्षयत्
28 // ekā tu gajamārūḍhā kasyaciddaityadurmateḥ / uraḥsthale svakariṇā vaprāghātamaśikṣayat
29 ॥ काचित्प्रतिभटारूढं दन्तिनं कुंभसीमनि । खड्गेन सहसा हत्वा गजस्य स्वप्रियं व्यधात्
29 // kācitpratibhaṭārūḍhaṃ dantinaṃ kuṃbhasīmani / khaḍgena sahasā hatvā gajasya svapriyaṃ vyadhāt
30 ॥ करमुक्तेन चक्रेण कस्यचिद्देववैरिणः । धनुर्दण्डं द्विधा कृत्वा स्वभ्रुवोः प्रतिमां तनेत्
30 // karamuktena cakreṇa kasyaciddevavairiṇaḥ / dhanurdaṇḍaṃ dvidhā kṛtvā svabhruvoḥ pratimāṃ tanet
31 ॥ शक्तिरन्या शरैः शातैः शातयित्वा विरोधिनः । कृपाणपद्मा रोमाल्यां स्वकीयायां मुदं व्यधात्
31 // śaktiranyā śaraiḥ śātaiḥ śātayitvā virodhinaḥ / kṛpāṇapadmā romālyāṃ svakīyāyāṃ mudaṃ vyadhāt
32 ॥ काचिन्मुद्गरपातेन चूर्णयित्वा विरोधिनः । रथ्यक्रनितंबस्य स्वस्य तेनातनोन्मुदम्
32 // kācinmudgarapātena cūrṇayitvā virodhinaḥ / rathyakranitaṃbasya svasya tenātanonmudam
33 ॥ रथकूबरमुग्रेण कस्यचिद्दानवप्रभोः । खड्गेन छिन्दती स्वस्य प्रियमुव्यास्ततान ह
33 // rathakūbaramugreṇa kasyaciddānavaprabhoḥ / khaḍgena chindatī svasya priyamuvyāstatāna ha
34 ॥ अभ्यन्तरं शक्तिसेना दैत्यानां प्रविवेश ह । प्रविवेश च दैत्यानां सेना शक्तिबलान्तरम्
34 // abhyantaraṃ śaktisenā daityānāṃ praviveśa ha / praviveśa ca daityānāṃ senā śaktibalāntaram
35 ॥ नीरक्षीरवदत्यन्ताश्लेषं शक्तिसुरद्विषाम् । संकुलाकारतां प्राप्तो युद्धकाले ऽभवत्तदा
35 // nīrakṣīravadatyantāśleṣaṃ śaktisuradviṣām / saṃkulākāratāṃ prāpto yuddhakāle 'bhavattadā
36 ॥ शक्तीनां खड्गपातेन लूनशुण्डारदद्वयाः । दैत्यानां करिणो मत्ता महाक्रोडा इवाभवन्
36 // śaktīnāṃ khaḍgapātena lūnaśuṇḍāradadvayāḥ / daityānāṃ kariṇo mattā mahākroḍā ivābhavan
37 ॥ एवं प्रवृत्ते समरे वीराणां च भयङ्करे । अशक्ये स्मर्तुमप्यन्तं कातरत्ववतां नृणाम् । भीषणानां भीषणे च शस्त्रव्यापारदुर्गमे
37 // evaṃ pravṛtte samare vīrāṇāṃ ca bhayaṅkare / aśakye smartumapyantaṃ kātaratvavatāṃ nṛṇām / bhīṣaṇānāṃ bhīṣaṇe ca śastravyāpāradurgame
38 ॥ बलाहको महागृध्रं वज्रतीक्ष्णमुखादिकम् । कालदण्डोपमं जङ्घाकाण्डे चण्डपराक्रमम्
38 // balāhako mahāgṛdhraṃ vajratīkṣṇamukhādikam / kāladaṇḍopamaṃ jaṅghākāṇḍe caṇḍaparākramam
39 ॥ संहारगुप्तनामानं पूर्वमग्रे समुत्थितम् । धूमवद्धूसराकारं पक्षक्षेपभयङ्करम्
39 // saṃhāraguptanāmānaṃ pūrvamagre samutthitam / dhūmavaddhūsarākāraṃ pakṣakṣepabhayaṅkaram
40 ॥ आरुह्य विविधंयुद्धं कृतवान्युद्धदुर्मदः । पक्षौ वितत्य क्रोशार्धं स स्थितो भीमनिःस्वनैः । अङ्गारकुण्डवच्चञ्चुं विदार्याभक्षयच्चमूम्
40 // āruhya vividhaṃyuddhaṃ kṛtavānyuddhadurmadaḥ / pakṣau vitatya krośārdhaṃ sa sthito bhīmaniḥsvanaiḥ / aṅgārakuṇḍavaccañcuṃ vidāryābhakṣayaccamūm
41 ॥ संहारगुप्तं स महागृध्रः क्रूरविलोचनः । बलाहकमुवाहोच्चैराकृष्टधनुषं रणे
41 // saṃhāraguptaṃ sa mahāgṛdhraḥ krūravilocanaḥ / balāhakamuvāhoccairākṛṣṭadhanuṣaṃ raṇe
42 ॥ बलाहको वपुर्धुन्वन्गृध्रपृष्ठकृतस्थितिः । सपक्षकूटशैलस्थो बलाहक इवाभवत्
42 // balāhako vapurdhunvangṛdhrapṛṣṭhakṛtasthitiḥ / sapakṣakūṭaśailastho balāhaka ivābhavat
43 ॥ सूचीमुखश्च दैत्येन्द्रः सूचीनिष्ठुरपक्षतिम् । काकवाहनमारुह्य कठिनं समरं व्यधात्
43 // sūcīmukhaśca daityendraḥ sūcīniṣṭhurapakṣatim / kākavāhanamāruhya kaṭhinaṃ samaraṃ vyadhāt
44 ॥ मत्तः पर्वतशृङ्गाभश्चञ्चूदण्डं समुद्वहन् । कालदण्डप्रमाणेन जङ्घाकाण्डेन भीषणः
44 // mattaḥ parvataśṛṅgābhaścañcūdaṇḍaṃ samudvahan / kāladaṇḍapramāṇena jaṅghākāṇḍena bhīṣaṇaḥ
45 ॥ पुष्कलावर्तकसमा जंबालसदृशद्यतिः । क्रोशमात्रायतौ पक्षावुभावपि समुद्वहन्
45 // puṣkalāvartakasamā jaṃbālasadṛśadyatiḥ / krośamātrāyatau pakṣāvubhāvapi samudvahan
46 ॥ सूचीमुखाधिष्ठितो ऽसौ करटः कटुवासितः । मर्दयञ्चञ्चुघातेन शक्तीनां मण्डलं महत्
46 // sūcīmukhādhiṣṭhito 'sau karaṭaḥ kaṭuvāsitaḥ / mardayañcañcughātena śaktīnāṃ maṇḍalaṃ mahat
47 ॥ अथो फलमुखः फालं गृहीत्वा निजमायुधम् । कङ्कमारुह्य समरे चकाशे गिरिसन्निभम्
47 // atho phalamukhaḥ phālaṃ gṛhītvā nijamāyudham / kaṅkamāruhya samare cakāśe girisannibham
48 ॥ विकर्णाख्यश्च दैत्येन्द्रश्चमूभर्ता महाबलः । भेरुण्डपतनारूढः प्रचण्डयुद्धमातनोत्
48 // vikarṇākhyaśca daityendraścamūbhartā mahābalaḥ / bheruṇḍapatanārūḍhaḥ pracaṇḍayuddhamātanot
49 ॥ विकटानननामानं विलसत्पट्टिशायुधम् । उवाह समरे चण्डः कुक्कुटो ऽतिभयङ्करः
49 // vikaṭānananāmānaṃ vilasatpaṭṭiśāyudham / uvāha samare caṇḍaḥ kukkuṭo 'tibhayaṅkaraḥ
50 ॥ गर्जन्कण्ठस्थरोमाणि हर्षयञ्ज्वलदीक्षणः । पश्यन्पुरः शक्तिसैन्यं चचाल चरणायुधः
50 // garjankaṇṭhastharomāṇi harṣayañjvaladīkṣaṇaḥ / paśyanpuraḥ śaktisainyaṃ cacāla caraṇāyudhaḥ
51 ॥ करालाक्षश्च भूभर्ता षष्ठो ऽत्यन्तगरिष्ठदः । वज्रनिष्ठुरघोषश्च प्राचलत्प्रेतवाहनः
51 // karālākṣaśca bhūbhartā ṣaṣṭho 'tyantagariṣṭhadaḥ / vajraniṣṭhuraghoṣaśca prācalatpretavāhanaḥ
52 ॥ श्मशानमन्त्रशूरेणतेन संसाधितः पुरा । प्रेतो भूतसमाविष्टस्तमुवाह रणाजिरे
52 // śmaśānamantraśūreṇatena saṃsādhitaḥ purā / preto bhūtasamāviṣṭastamuvāha raṇājire
53 ॥ अवाङ्मुखो दीर्घबाहुः प्रसारितपदद्वयः । प्रोतो वाहनतां प्राप्तःकरालाक्षमथावहत्
53 // avāṅmukho dīrghabāhuḥ prasāritapadadvayaḥ / proto vāhanatāṃ prāptaḥkarālākṣamathāvahat
54 ॥ अन्यः करटको नाम दैत्यसेनाशिखामणिः । सर्दयामास शक्तीनां सैन्यं वेतालवाहनः
54 // anyaḥ karaṭako nāma daityasenāśikhāmaṇiḥ / sardayāmāsa śaktīnāṃ sainyaṃ vetālavāhanaḥ
55 ॥ योजनायतमूर्तिः सन्वेतालः क्रूरलोचनः । श्मशानभूमौ वेतालो मन्त्रेणानेन साधितः
55 // yojanāyatamūrtiḥ sanvetālaḥ krūralocanaḥ / śmaśānabhūmau vetālo mantreṇānena sādhitaḥ
56 ॥ मर्दयामास पृतनां शक्तीनां तेन देशितः । तस्य वेतालवर्यस्य वर्तमानोंससीमनि । बहुधायुध्यत तदा शक्तिभिः सह दानवः
56 // mardayāmāsa pṛtanāṃ śaktīnāṃ tena deśitaḥ / tasya vetālavaryasya vartamānoṃsasīmani / bahudhāyudhyata tadā śaktibhiḥ saha dānavaḥ
57 ॥ एवमेते खलात्मानः सप्त सप्तार्णवोपमाः । शक्तीनां सैनिकं तत्र व्याकुलीचक्रुरुद्धताः
57 // evamete khalātmānaḥ sapta saptārṇavopamāḥ / śaktīnāṃ sainikaṃ tatra vyākulīcakruruddhatāḥ
58 ॥ ते सप्त पूर्वं तपसा सवितारमतोषयन् । तेन दत्तो वरस्तेषां तपस्तुष्टेन भास्वता
58 // te sapta pūrvaṃ tapasā savitāramatoṣayan / tena datto varasteṣāṃ tapastuṣṭena bhāsvatā
59 ॥ कैकसेया महाभागा भवतां तपसाधुना । परितुष्टो ऽस्मि भद्रं वो भवन्तो वृणतां वरम्
59 // kaikaseyā mahābhāgā bhavatāṃ tapasādhunā / parituṣṭo 'smi bhadraṃ vo bhavanto vṛṇatāṃ varam
60 ॥ इत्युक्ते दिननाथेन कैकसेयास्तपः कृशाः । प्रार्थयामासुरत्यर्थं दुर्दान्तं वरमीदृशम्
60 // ityukte dinanāthena kaikaseyāstapaḥ kṛśāḥ / prārthayāmāsuratyarthaṃ durdāntaṃ varamīdṛśam
61 ॥ रणेषु सन्निधातव्यमस्माकं नेत्रकुक्षिषु । भवता घोरतेजोभिर्दहता प्रतिरोधिनः
61 // raṇeṣu sannidhātavyamasmākaṃ netrakukṣiṣu / bhavatā ghoratejobhirdahatā pratirodhinaḥ
62 ॥ त्वया यदा सन्निहितं तपनास्माकमक्षिषु । तदाक्षिविषयः सर्वो निश्चेष्टो भवतात्प्रभो
62 // tvayā yadā sannihitaṃ tapanāsmākamakṣiṣu / tadākṣiviṣayaḥ sarvo niśceṣṭo bhavatātprabho
63 ॥ त्वत्सान्निध्यसमिद्धेन नेत्रेणास्माकमीक्षिताः । स्तब्धशस्त्रा भविष्यन्ति प्रतिरोधकसैनिकाः
63 // tvatsānnidhyasamiddhena netreṇāsmākamīkṣitāḥ / stabdhaśastrā bhaviṣyanti pratirodhakasainikāḥ
64 ॥ ततः स्तब्धेषु शस्त्रेषु वीक्षणादेव नः प्रभो । निश्चेष्टा रिपवो ऽस्माभिर्हन्तव्याः सुकरत्वतः
64 // tataḥ stabdheṣu śastreṣu vīkṣaṇādeva naḥ prabho / niśceṣṭā ripavo 'smābhirhantavyāḥ sukaratvataḥ
65 ॥ इति पूर्वं वरः प्राप्तः कैकसेयौर्दिवाकरात् । वरदानेन ते तत्र युद्धे चेरुर्मधोद्धताः
65 // iti pūrvaṃ varaḥ prāptaḥ kaikaseyaurdivākarāt / varadānena te tatra yuddhe cerurmadhoddhatāḥ
66 ॥ अथ सूर्यसमाविष्टनेत्रैस्तेस्तु निरीक्षिताः । शक्तयः स्तब्धशस्त्रौघा विफलोत्सा हतां गताः
66 // atha sūryasamāviṣṭanetraistestu nirīkṣitāḥ / śaktayaḥ stabdhaśastraughā viphalotsā hatāṃ gatāḥ
67 ॥ कीकसातनयैस्तैस्तु सप्तभिः सत्त्वशालिभिः । विष्टंभितास्त्रशस्त्राणां शक्तीनां नोद्यमो ऽभवत्
67 // kīkasātanayaistaistu saptabhiḥ sattvaśālibhiḥ / viṣṭaṃbhitāstraśastrāṇāṃ śaktīnāṃ nodyamo 'bhavat
68 ॥ उद्यमे क्रियभाणे ऽपि शस्त्रस्तम्भेन भूयसा । अभिभूताः सनिश्वासं शक्तयो जोषमासत
68 // udyame kriyabhāṇe 'pi śastrastambhena bhūyasā / abhibhūtāḥ saniśvāsaṃ śaktayo joṣamāsata
69 ॥ अथ ते वासरं प्राप्य नानाप्रहरणोद्यताः । व्यमर्दयञ्छक्तिसैन्यं दैत्याः स्वस्वामिदेशिताः
69 // atha te vāsaraṃ prāpya nānāpraharaṇodyatāḥ / vyamardayañchaktisainyaṃ daityāḥ svasvāmideśitāḥ
70 ॥ शक्तयस्तास्तु सैन्येन निर्व्यापारा निरायुधाः । अक्षुभ्यन्त शरैस्तेषां वज्रकङ्कटभोदिभिः
70 // śaktayastāstu sainyena nirvyāpārā nirāyudhāḥ / akṣubhyanta śaraisteṣāṃ vajrakaṅkaṭabhodibhiḥ
71 ॥ शक्तयो दैत्यशस्त्रौधैर्विद्धगात्राः सृतामृजः । सुपल्लवा रणे रेजुः कङ्कोललतिका इव
71 // śaktayo daityaśastraudhairviddhagātrāḥ sṛtāmṛjaḥ / supallavā raṇe rejuḥ kaṅkolalatikā iva
72 ॥ हाहाकारं वितन्वत्यः प्रपन्ना ललितेश्वरीम् । चुक्रुशुः शक्तयः सर्वास्तैः स्तंभितनिजायुधाः
72 // hāhākāraṃ vitanvatyaḥ prapannā laliteśvarīm / cukruśuḥ śaktayaḥ sarvāstaiḥ staṃbhitanijāyudhāḥ
73 ॥ अथ देव्याज्ञया दण्डनाथा प्रत्यङ्गरक्षिणी । तिरस्करणिका देवी समुत्तस्थौ रणाजिरे
73 // atha devyājñayā daṇḍanāthā pratyaṅgarakṣiṇī / tiraskaraṇikā devī samuttasthau raṇājire
74 ॥ तमोलिप्ताह्वयं नाम विमानं सर्वतोमुखम् । महामाया समारुह्य शक्तीनामभयं व्यधात्
74 // tamoliptāhvayaṃ nāma vimānaṃ sarvatomukham / mahāmāyā samāruhya śaktīnāmabhayaṃ vyadhāt
75 ॥ तमालश्यामलाकारा श्यामकञ्चुकधारिणी । श्यामच्छाये तमोलिप्ते श्यामयुक्ततुरङ्गमे
75 // tamālaśyāmalākārā śyāmakañcukadhāriṇī / śyāmacchāye tamolipte śyāmayuktaturaṅgame
76 ॥ वासन्ती मोहनाभिख्यं धनुरादाय सस्वनम् । सिंहनादं विनद्येषूनवर्षत्सर्पसन्निभान्
76 // vāsantī mohanābhikhyaṃ dhanurādāya sasvanam / siṃhanādaṃ vinadyeṣūnavarṣatsarpasannibhān
77 ॥ कृष्णरूपभुजङ्ग भानधोमुसलसंनिभान् । मोहनास्त्रविनिष्ठ्यूतान्बाणान्दैत्या न सेहिरे
77 // kṛṣṇarūpabhujaṅga bhānadhomusalasaṃnibhān / mohanāstraviniṣṭhyūtānbāṇāndaityā na sehire
78 ॥ इतस्ततो मर्द्यमाना महामायाशिलीमुखैः । प्रकोपं परमं प्राप्ता बलाहकमुखाः खलाः
78 // itastato mardyamānā mahāmāyāśilīmukhaiḥ / prakopaṃ paramaṃ prāptā balāhakamukhāḥ khalāḥ
79 ॥ अथो तिरस्करण्यंबा दण्डनाथानिदेशतः । अन्धाभिधं महास्त्रं सा मुमोच द्विषतां गणे
79 // atho tiraskaraṇyaṃbā daṇḍanāthānideśataḥ / andhābhidhaṃ mahāstraṃ sā mumoca dviṣatāṃ gaṇe
80 ॥ बलाहकाद्यास्ते सप्त दिननाथवरोद्धताः । अन्धास्त्रेण निजं नेत्रं दधिरे च्छादितं यथा
80 // balāhakādyāste sapta dinanāthavaroddhatāḥ / andhāstreṇa nijaṃ netraṃ dadhire cchāditaṃ yathā
81 ॥ तिरस्करणिकादेव्या महामोहनधन्वनः । उद्गतेनान्धबाणेन चक्षुस्तेषां व्यधीयत
81 // tiraskaraṇikādevyā mahāmohanadhanvanaḥ / udgatenāndhabāṇena cakṣusteṣāṃ vyadhīyata
82 ॥ अन्धीकृताश्च ते सप्त न तु प्रैक्षन्त किञ्चन । तद्वीक्षणस्य विरहाच्छस्त्रस्तम्भः क्षयं गतः
82 // andhīkṛtāśca te sapta na tu praikṣanta kiñcana / tadvīkṣaṇasya virahācchastrastambhaḥ kṣayaṃ gataḥ
83 ॥ पुनः ससिंहनादं ताः प्रोद्यतायुधपाणयः । चक्रुः समरसन्नाहं दैत्यानां प्रजिघांसया
83 // punaḥ sasiṃhanādaṃ tāḥ prodyatāyudhapāṇayaḥ / cakruḥ samarasannāhaṃ daityānāṃ prajighāṃsayā
84 ॥ तिरस्करणिकां देवीमग्रे कृत्वा महाबलाम् । सदुपायप्रसङ्गेन भृशं तुष्टा रणं व्यधुः
84 // tiraskaraṇikāṃ devīmagre kṛtvā mahābalām / sadupāyaprasaṅgena bhṛśaṃ tuṣṭā raṇaṃ vyadhuḥ
85 ॥ साधुसाधु महाभागे तिरस्करणिकांबिके । स्थाने कृततिरस्कारा द्विपामेषां दुरात्मनाम्
85 // sādhusādhu mahābhāge tiraskaraṇikāṃbike / sthāne kṛtatiraskārā dvipāmeṣāṃ durātmanām
86 ॥ त्वं हि दुर्जननेत्राणां तिरस्कारमहौषधी । त्वया बद्धदृशानेन दैत्यचक्रेण भूयते
86 // tvaṃ hi durjananetrāṇāṃ tiraskāramahauṣadhī / tvayā baddhadṛśānena daityacakreṇa bhūyate
87 ॥ देवकार्यमिदं देवि त्वया सम्यगनुष्टितम् । अस्मादृशामजय्येषु यदेषु व्यसनं कृतम्
87 // devakāryamidaṃ devi tvayā samyaganuṣṭitam / asmādṛśāmajayyeṣu yadeṣu vyasanaṃ kṛtam
88 ॥ तत्त्वयैव दुराचारानेतान्सप्त महासुरान् । निहतांल्ललिता श्रुत्वा सन्तोषं परमाप्स्यति
88 // tattvayaiva durācārānetānsapta mahāsurān / nihatāṃllalitā śrutvā santoṣaṃ paramāpsyati
89 ॥ एवं त्वया विरचिते दण्डिनीप्रीति माप्स्यति । मन्त्रिण्यपि महाभागायास्यत्येव परां मुदम्
89 // evaṃ tvayā viracite daṇḍinīprīti māpsyati / mantriṇyapi mahābhāgāyāsyatyeva parāṃ mudam
90 ॥ तस्मात्त्वमेव सप्तैतान्निगृहण रणाजिरे । एषां सैन्यं तु निखिलं नाशयाम उदायुधाः
90 // tasmāttvameva saptaitānnigṛhaṇa raṇājire / eṣāṃ sainyaṃ tu nikhilaṃ nāśayāma udāyudhāḥ
91 ॥ इत्युक्त्वा प्रेरिता ताभिः शक्तिभियुर्द्धकौतुकान् । तमोलिप्तेन यानेन बलाहकबलं ययौ
91 // ityuktvā preritā tābhiḥ śaktibhiyurddhakautukān / tamoliptena yānena balāhakabalaṃ yayau
92 ॥ तामायान्तीं समावेक्ष्य ते सप्ताथ सुराधमाः । पुनरेव च सावित्रं वरं सस्मरुरञ्जसा
92 // tāmāyāntīṃ samāvekṣya te saptātha surādhamāḥ / punareva ca sāvitraṃ varaṃ sasmarurañjasā
93 ॥ प्रविष्टमपि सावित्रं नाशकं तन्निरोधने । तिरस्कृतं तु नेत्रस्थं तिरस्करणितेजसा
93 // praviṣṭamapi sāvitraṃ nāśakaṃ tannirodhane / tiraskṛtaṃ tu netrasthaṃ tiraskaraṇitejasā
94 ॥ वरदानास्त्ररोषान्धं महाबलपराक्रमम् । अस्त्रेण च रुषा चान्धं बलाहकमहासुरम् । आकृष्य केशेष्वसिना चकर्तान्तर्धिदेवता
94 // varadānāstraroṣāndhaṃ mahābalaparākramam / astreṇa ca ruṣā cāndhaṃ balāhakamahāsuram / ākṛṣya keśeṣvasinā cakartāntardhidevatā
95 ॥ तस्य वाहनगृध्रस्य लुनाना पत्रिणा शिरः । सूचीमुखस्याभिमुखं तिरस्करणिका व्रजत्
95 // tasya vāhanagṛdhrasya lunānā patriṇā śiraḥ / sūcīmukhasyābhimukhaṃ tiraskaraṇikā vrajat
96 ॥ तस्य पट्टिशपातेन विलूय कठिनं शिरः । अन्येषामपि पञ्चानां पञ्चत्वमकरोच्छनैः
96 // tasya paṭṭiśapātena vilūya kaṭhinaṃ śiraḥ / anyeṣāmapi pañcānāṃ pañcatvamakarocchanaiḥ
97 ॥ तैः सप्तदैत्यमुण्डैश्चग्रथितान्योन्यकेशकैः । हारदाम गले कृत्वा ननादान्तर्धिदेवता
97 // taiḥ saptadaityamuṇḍaiścagrathitānyonyakeśakaiḥ / hāradāma gale kṛtvā nanādāntardhidevatā
98 ॥ समस्तमपि तत्सैन्यं शक्तयः क्रोधसूर्च्छिताः । हत्वा तद्रक्तसलिलैर्बह्वीः प्रावाहयन्नदीः
98 // samastamapi tatsainyaṃ śaktayaḥ krodhasūrcchitāḥ / hatvā tadraktasalilairbahvīḥ prāvāhayannadīḥ
99 ॥ तत्राश्चर्यमभूद्भूरि माहामायांबिकाकृतम् । बलाहकादिसेनान्यां दृष्टिरोधनवैभवात्
99 // tatrāścaryamabhūdbhūri māhāmāyāṃbikākṛtam / balāhakādisenānyāṃ dṛṣṭirodhanavaibhavāt
100 ॥ हतशिष्टाः कतिपया बहुवित्राससङ्कुलाः । शरणं जग्मुरत्यार्त्ताः क्रन्दन्तं शून्यकेश्वरम्
100 // hataśiṣṭāḥ katipayā bahuvitrāsasaṅkulāḥ / śaraṇaṃ jagmuratyārttāḥ krandantaṃ śūnyakeśvaram
101 ॥ दण्डिनीं च महामायां प्रशंसन्ति मुहुर्मुहुः । प्रसादमपरं चक्षुस्तस्या आदायपिप्रियुः
101 // daṇḍinīṃ ca mahāmāyāṃ praśaṃsanti muhurmuhuḥ / prasādamaparaṃ cakṣustasyā ādāyapipriyuḥ
102 ॥ साधुसाध्विति तत्रस्थाः शक्तयः कम्पमौलयः । तिरस्करणिकां देवीमश्लाघन्त पदेपदे
102 // sādhusādhviti tatrasthāḥ śaktayaḥ kampamaulayaḥ / tiraskaraṇikāṃ devīmaślāghanta padepade