शृणुध्वं मुनयः सर्वे बलस्य बलशालिनः कृतं यद् अन्यद् एवाभूत् तद् अपि श्रूयतां द्विजाः ॥
śṛṇudhvaṃ munayaḥ sarve balasya balaśālinaḥ kṛtaṃ yad anyad evābhūt tad api śrūyatāṃ dvijāḥ //
नरकस्यासुरेन्द्रस्य देवपक्षविरोधिनः सखाभवन् महावीर्यो द्विविदो नाम वानरः ॥
narakasyāsurendrasya devapakṣavirodhinaḥ sakhābhavan mahāvīryo dvivido nāma vānaraḥ //
वैरानुबन्धं बलवान् स चकार सुरान् प्रति ॥
vairānubandhaṃ balavān sa cakāra surān prati //
नरकं हतवान् कृष्णो बलदर्पसमन्वितम् करिष्ये सर्वदेवानां तस्माद् एष प्रतिक्रियाम् ॥
narakaṃ hatavān kṛṣṇo baladarpasamanvitam kariṣye sarvadevānāṃ tasmād eṣa pratikriyām //
यज्ञविध्वंसनं कुर्वन् मर्त्यलोकक्षयं तथा ततो विध्वंसयाम् आस यज्ञान् अज्ञानमोहितः ॥
yajñavidhvaṃsanaṃ kurvan martyalokakṣayaṃ tathā tato vidhvaṃsayām āsa yajñān ajñānamohitaḥ //
बिभेद साधुमर्यादां क्षयं चक्रे च देहिनाम् ददाह चपलो देशं पुरग्रामान्तराणि च ॥
bibheda sādhumaryādāṃ kṣayaṃ cakre ca dehinām dadāha capalo deśaṃ puragrāmāntarāṇi ca //
क्वचिच् च पर्वतक्षेपाद् ग्रामादीन् समचूर्णयत् शैलान् उत्पाट्य तोयेषु मुमोचाम्बुनिधौ तथा ॥
kvacic ca parvatakṣepād grāmādīn samacūrṇayat śailān utpāṭya toyeṣu mumocāmbunidhau tathā //
पुनश् चार्णवमध्यस्थः क्षोभयाम् आस सागरम् तेनातिक्षोभितश् चाब्धिर् उद्वेलो जायते द्विजाः ॥
punaś cārṇavamadhyasthaḥ kṣobhayām āsa sāgaram tenātikṣobhitaś cābdhir udvelo jāyate dvijāḥ //
प्लावयंस् तीरजान् ग्रामान् पुरादीन् अतिवेगवान् कामरूपं महारूपं कृत्वा सस्यान्य् अनेकशः ॥
plāvayaṃs tīrajān grāmān purādīn ativegavān kāmarūpaṃ mahārūpaṃ kṛtvā sasyāny anekaśaḥ //
लुठन् भ्रमणसंमर्दैः संचूर्णयति वानरः तेन विप्रकृतं सर्वं जगद् एतद् दुरात्मना ॥
luṭhan bhramaṇasaṃmardaiḥ saṃcūrṇayati vānaraḥ tena viprakṛtaṃ sarvaṃ jagad etad durātmanā //
निःस्वाध्यायवषट्कारं द्विजाश् चासीत् सुदुःखितम् कदाचिद् रैवतोद्याने पपौ पानं हलायुधः ॥
niḥsvādhyāyavaṣaṭkāraṃ dvijāś cāsīt suduḥkhitam kadācid raivatodyāne papau pānaṃ halāyudhaḥ //
रेवती च महाभागा तथैवान्या वरस्त्रियः उद्गीयमानो विलसल्ललनामौलिमध्यगः ॥
revatī ca mahābhāgā tathaivānyā varastriyaḥ udgīyamāno vilasallalanāmaulimadhyagaḥ //
रेमे यदुवरश्रेष्ठः कुबेर इव मन्दरे ततः स वानरो ऽभ्येत्य गृहीत्वा सीरिणो हलम् ॥
reme yaduvaraśreṣṭhaḥ kubera iva mandare tataḥ sa vānaro 'bhyetya gṛhītvā sīriṇo halam //
मुशलं च चकारास्य संमुखः स विडम्बनाम् तथैव योषितां तासां जहासाभिमुखं कपिः ॥
muśalaṃ ca cakārāsya saṃmukhaḥ sa viḍambanām tathaiva yoṣitāṃ tāsāṃ jahāsābhimukhaṃ kapiḥ //
पानपूर्णांश् च करकांश् चिक्षेपाहत्य वै तदा ततः कोपपरीतात्मा भर्त्सयाम् आस तं बलम् ॥
pānapūrṇāṃś ca karakāṃś cikṣepāhatya vai tadā tataḥ kopaparītātmā bhartsayām āsa taṃ balam //
तथापि तम् अवज्ञाय चक्रे किलकिलाध्वनिम् ततः समुत्थाय बलो जगृहे मुशलं रुषा ॥
tathāpi tam avajñāya cakre kilakilādhvanim tataḥ samutthāya balo jagṛhe muśalaṃ ruṣā //
सो ऽपि शैलशिलां भीमां जग्राह प्लवगोत्तमः चिक्षेप च स तां क्षिप्तां मुशलेन सहस्रधा ॥
so 'pi śailaśilāṃ bhīmāṃ jagrāha plavagottamaḥ cikṣepa ca sa tāṃ kṣiptāṃ muśalena sahasradhā //
बिभेद यादवश्रेष्ठः सा पपात महीतले अपतन् मुशलं चासौ समुल्लङ्घ्य प्लवंगमः ॥
bibheda yādavaśreṣṭhaḥ sā papāta mahītale apatan muśalaṃ cāsau samullaṅghya plavaṃgamaḥ //
वेगेनायम्य रोषेण बलेनोरस्य् अताडयत् ततो बलेन कोपेन मुष्टिना मूर्ध्नि ताडितः ॥
vegenāyamya roṣeṇa balenorasy atāḍayat tato balena kopena muṣṭinā mūrdhni tāḍitaḥ //
पपात रुधिरोद्गारी द्विविदः क्षीणजीवितः पतता तच्छरीरेण गिरेः शृङ्गम् अशीर्यत ॥
papāta rudhirodgārī dvividaḥ kṣīṇajīvitaḥ patatā taccharīreṇa gireḥ śṛṅgam aśīryata //
मुनयः शतधा वज्रिवज्रेणेव हि ताडितम् पुष्पवृष्टिं ततो देवा रामस्योपरि चिक्षिपुः ॥
munayaḥ śatadhā vajrivajreṇeva hi tāḍitam puṣpavṛṣṭiṃ tato devā rāmasyopari cikṣipuḥ //
प्रशशंसुस् तदाभ्येत्य साध्व् एतत् ते महत् कृतम् अनेन दुष्टकपिना दैत्यपक्षोपकारिणा जगन् निराकृतं वीर दिष्ट्या स क्षयम् आगतः ॥
praśaśaṃsus tadābhyetya sādhv etat te mahat kṛtam anena duṣṭakapinā daityapakṣopakāriṇā jagan nirākṛtaṃ vīra diṣṭyā sa kṣayam āgataḥ //
एवंविधान्य् अनेकानि बलदेवस्य धीमतः कर्माण्य् अपरिमेयानि शेषस्य धरणीभृतः ॥
evaṃvidhāny anekāni baladevasya dhīmataḥ karmāṇy aparimeyāni śeṣasya dharaṇībhṛtaḥ //