मैत्रेय उवाच मनोस् तु शतरूपायां तिस्रः कन्याश् च जज्ञिरे । आकूतिर् देवहूतिश् च प्रसूतिर् इति विश्रुताः ॥
maitreya uvāca manos tu śatarūpāyāṃ tisraḥ kanyāś ca jajñire / ākūtir devahūtiś ca prasūtir iti viśrutāḥ //
आकूतिं रुचये प्रादाद् अपि भ्रातृमतीं नृपः । पुत्रिका-धर्मम् आश्रित्य शतरूपानुमोदितः ॥
ākūtiṃ rucaye prādād api bhrātṛmatīṃ nṛpaḥ / putrikā-dharmam āśritya śatarūpānumoditaḥ //
प्रजापतिः स भगवान् रुचिस् तस्याम् अजीजनत् । मिथुनं ब्रह्म-वर्चस्वी परमेण समाधिना ॥
prajāpatiḥ sa bhagavān rucis tasyām ajījanat / mithunaṃ brahma-varcasvī parameṇa samādhinā //
यस् तयोः पुरुषः साक्षाद् विष्णुर् यज्ञ-स्वरूप-धृक् । या स्त्री सा दक्षिणा भूतेर् अंश-भूतानपायिनी ॥
yas tayoḥ puruṣaḥ sākṣād viṣṇur yajña-svarūpa-dhṛk / yā strī sā dakṣiṇā bhūter aṃśa-bhūtānapāyinī //
आनिन्ये स्व-गृहं पुत्र्याः पुत्रं वितत-रोचिषम् । स्वायम्भुवो मुदा युक्तो रुचिर् जग्राह दक्षिणाम् ॥
āninye sva-gṛhaṃ putryāḥ putraṃ vitata-rociṣam / svāyambhuvo mudā yukto rucir jagrāha dakṣiṇām //
तां कामयानां भगवान् उवाह यजुषां पतिः । तुष्टायां तोषम् आपन्नो ऽ जनयद् द्वादशात्मजान् ॥
tāṃ kāmayānāṃ bhagavān uvāha yajuṣāṃ patiḥ / tuṣṭāyāṃ toṣam āpanno ' janayad dvādaśātmajān //
तोषः प्रतोषः सन्तोषो भद्रः शान्तिर् इडस्पतिः । इध्मः कविर् विभुः स्वह्नः सुदेवो रोचनो द्वि-षट् ॥
toṣaḥ pratoṣaḥ santoṣo bhadraḥ śāntir iḍaspatiḥ / idhmaḥ kavir vibhuḥ svahnaḥ sudevo rocano dvi-ṣaṭ //
तुषिता नाम ते देवा आसन् स्वायम्भुवान्तरे । मरीचि-मिश्रा ऋषयो यज्ञः सुर-गणेश्वरः ॥
tuṣitā nāma te devā āsan svāyambhuvāntare / marīci-miśrā ṛṣayo yajñaḥ sura-gaṇeśvaraḥ //
प्रियव्रतोत्तानपादौ मनु-पुत्रौ महौजसौ । तत्-पुत्र-पौत्र-नप्तॄणाम् अनुवृत्तं तद्-अन्तरम् ॥
priyavratottānapādau manu-putrau mahaujasau / tat-putra-pautra-naptṝṇām anuvṛttaṃ tad-antaram //
देवहूतिम् अदात् तात कर्दमायात्मजां मनुः । तत्-सम्बन्धि श्रुत-प्रायं भवता गदतो मम ॥
devahūtim adāt tāta kardamāyātmajāṃ manuḥ / tat-sambandhi śruta-prāyaṃ bhavatā gadato mama //
दक्षाय ब्रह्म-पुत्राय प्रसूतिं भगवान् मनुः । प्रायच्छद् यत्-कृतः सर्गस् त्रि-लोक्यां विततो महान् ॥
dakṣāya brahma-putrāya prasūtiṃ bhagavān manuḥ / prāyacchad yat-kṛtaḥ sargas tri-lokyāṃ vitato mahān //
याः कर्दम-सुताः प्रोक्ता नव ब्रह्मर्षि-पत्नयः । तासां प्रसूति-प्रसवं प्रोच्यमानं निबोध मे ॥
yāḥ kardama-sutāḥ proktā nava brahmarṣi-patnayaḥ / tāsāṃ prasūti-prasavaṃ procyamānaṃ nibodha me //
पत्नी मरीचेस् तु कला सुषुवे कर्दमात्मजा । कश्यपं पूर्णिमानं च ययोर् आपूरितं जगत् ॥
patnī marīces tu kalā suṣuve kardamātmajā / kaśyapaṃ pūrṇimānaṃ ca yayor āpūritaṃ jagat //
पूर्णिमासूत विरजं विश्वगं च परन्तप । देवकुल्यां हरेः पाद- शौचाद् याभूत् सरिद् दिवः ॥
pūrṇimāsūta virajaṃ viśvagaṃ ca parantapa / devakulyāṃ hareḥ pāda- śaucād yābhūt sarid divaḥ //
अत्रेः पत्न्य् अनसूया त्रीञ् जज्ञे सुयशसः सुतान् । दत्तं दुर्वाससं सोमम् आत्मेश-ब्रह्म-सम्भवान् ॥
atreḥ patny anasūyā trīñ jajñe suyaśasaḥ sutān / dattaṃ durvāsasaṃ somam ātmeśa-brahma-sambhavān //
विदुर उवाच अत्रेर् गृहे सुर-श्रेष्ठाः स्थित्य्-उत्पत्त्य्-अन्त-हेतवः । किञ्चिच् चिकीर्षवो जाता एतद् आख्याहि मे गुरो ॥
vidura uvāca atrer gṛhe sura-śreṣṭhāḥ sthity-utpatty-anta-hetavaḥ / kiñcic cikīrṣavo jātā etad ākhyāhi me guro //
मैत्रेय उवाच ब्रह्मणा चोदितः सृष्टाव् अत्रिर् ब्रह्म-विदां वरः । सह पत्न्या ययाव् ऋक्षं कुलाद्रिं तपसि स्थितः ॥
maitreya uvāca brahmaṇā coditaḥ sṛṣṭāv atrir brahma-vidāṃ varaḥ / saha patnyā yayāv ṛkṣaṃ kulādriṃ tapasi sthitaḥ //
तस्मिन् प्रसून-स्तबक- पलाशाशोक-कानने । वार्भिः स्रवद्भिर् उद्घुष्टे निर्विन्ध्यायाः समन्ततः ॥
tasmin prasūna-stabaka- palāśāśoka-kānane / vārbhiḥ sravadbhir udghuṣṭe nirvindhyāyāḥ samantataḥ //
प्राणायामेन संयम्य मनो वर्ष-शतं मुनिः । अतिष्ठद् एक-पादेन निर्द्वन्द्वो ऽनिल-भोजनः ॥
prāṇāyāmena saṃyamya mano varṣa-śataṃ muniḥ / atiṣṭhad eka-pādena nirdvandvo 'nila-bhojanaḥ //
शरणं तं प्रपद्ये ऽहं य एव जगद्-ईश्वरः । प्रजाम् आत्म-समां मह्यं प्रयच्छत्व् इति चिन्तयन् ॥
śaraṇaṃ taṃ prapadye 'haṃ ya eva jagad-īśvaraḥ / prajām ātma-samāṃ mahyaṃ prayacchatv iti cintayan //
तप्यमानं त्रि-भुवनं प्राणायामैधसाग्निना । निर्गतेन मुनेर् मूर्ध्नः समीक्ष्य प्रभवस् त्रयः ॥
tapyamānaṃ tri-bhuvanaṃ prāṇāyāmaidhasāgninā / nirgatena muner mūrdhnaḥ samīkṣya prabhavas trayaḥ //
अप्सरो-मुनि-गन्धर्व- सिद्ध-विद्याधरोरगैः । वितायमान-यशसस् तद्-आश्रम-पदं ययुः ॥
apsaro-muni-gandharva- siddha-vidyādharoragaiḥ / vitāyamāna-yaśasas tad-āśrama-padaṃ yayuḥ //
तत्-प्रादुर्भाव-संयोग- विद्योतित-मना मुनिः । उत्तिष्ठन्न् एक-पादेन ददर्श विबुधर्षभान् ॥
tat-prādurbhāva-saṃyoga- vidyotita-manā muniḥ / uttiṣṭhann eka-pādena dadarśa vibudharṣabhān //
प्रणम्य दण्डवद् भूमाव् उपतस्थे ऽर्हणाञ्जलिः । वृष-हंस-सुपर्ण-स्थान् स्वैः स्वैश् चिह्नैश् च चिह्नितान् ॥
praṇamya daṇḍavad bhūmāv upatasthe 'rhaṇāñjaliḥ / vṛṣa-haṃsa-suparṇa-sthān svaiḥ svaiś cihnaiś ca cihnitān //
कृपावलोकेन हसद्- वदनेनोपलम्भितान् । तद्-रोचिषा प्रतिहते निमील्य मुनिर् अक्षिणी ॥
kṛpāvalokena hasad- vadanenopalambhitān / tad-rociṣā pratihate nimīlya munir akṣiṇī //
चेतस् तत्-प्रवणं युञ्जन्न् अस्तावीत् संहताञ्जलिः । श्लक्ष्णया सूक्तया वाचा सर्व-लोक-गरीयसः ॥
cetas tat-pravaṇaṃ yuñjann astāvīt saṃhatāñjaliḥ / ślakṣṇayā sūktayā vācā sarva-loka-garīyasaḥ //
अत्रिर् उवाच विश्वोद्भव-स्थिति-लयेषु विभज्यमानैर् माया-गुणैर् अनुयुगं विगृहीत-देहाः विश्वोद्भव-स्थिति-लयेषु विभज्यमानैर् माया-गुणैर् अनुयुगं विगृहीत-देहाः ते ब्रह्म-विष्णु-गिरिशाः प्रणतो ऽस्म्य् अहं वस् तेभ्यः क एव भवतां म इहोपहूतः ॥
atrir uvāca viśvodbhava-sthiti-layeṣu vibhajyamānair māyā-guṇair anuyugaṃ vigṛhīta-dehāḥ viśvodbhava-sthiti-layeṣu vibhajyamānair māyā-guṇair anuyugaṃ vigṛhīta-dehāḥ te brahma-viṣṇu-giriśāḥ praṇato 'smy ahaṃ vas tebhyaḥ ka eva bhavatāṃ ma ihopahūtaḥ //
एको मयेह भगवान् विविध-प्रधानैश् चित्ती-कृतः प्रजननाय कथं नु यूयम् एको मयेह भगवान् विविध-प्रधानैश् चित्ती-कृतः प्रजननाय कथं नु यूयम् अत्रागतास् तनु-भृतां मनसो ऽपि दूराद् ब्रूत प्रसीदत महान् इह विस्मयो मे ॥
eko mayeha bhagavān vividha-pradhānaiś cittī-kṛtaḥ prajananāya kathaṃ nu yūyam eko mayeha bhagavān vividha-pradhānaiś cittī-kṛtaḥ prajananāya kathaṃ nu yūyam atrāgatās tanu-bhṛtāṃ manaso 'pi dūrād brūta prasīdata mahān iha vismayo me //
मैत्रेय उवाच इति तस्य वचः श्रुत्वा त्रयस् ते विबुधर्षभाः । प्रत्याहुः श्लक्ष्णया वाचा प्रहस्य तम् ऋषिं प्रभो ॥
maitreya uvāca iti tasya vacaḥ śrutvā trayas te vibudharṣabhāḥ / pratyāhuḥ ślakṣṇayā vācā prahasya tam ṛṣiṃ prabho //
देवा ऊचुः यथा कृतस् ते सङ्कल्पो भाव्यं तेनैव नान्यथा । सत्-सङ्कल्पस्य ते ब्रह्मन् यद् वै ध्यायति ते वयम् ॥
devā ūcuḥ yathā kṛtas te saṅkalpo bhāvyaṃ tenaiva nānyathā / sat-saṅkalpasya te brahman yad vai dhyāyati te vayam //
अथास्मद्-अंश-भूतास् ते आत्मजा लोक-विश्रुताः । भवितारो ऽङ्ग भद्रं ते विस्रप्स्यन्ति च ते यशः ॥
athāsmad-aṃśa-bhūtās te ātmajā loka-viśrutāḥ / bhavitāro 'ṅga bhadraṃ te visrapsyanti ca te yaśaḥ //
एवं काम-वरं दत्त्वा प्रतिजग्मुः सुरेश्वराः । सभाजितास् तयोः सम्यग् दम्पत्योर् मिषतोस् ततः ॥
evaṃ kāma-varaṃ dattvā pratijagmuḥ sureśvarāḥ / sabhājitās tayoḥ samyag dampatyor miṣatos tataḥ //
सोमो ऽभूद् ब्रह्मणो ऽंशेन दत्तो विष्णोस् तु योगवित् । दुर्वासाः शङ्करस्यांशो निबोधाङ्गिरसः प्रजाः ॥
somo 'bhūd brahmaṇo 'ṃśena datto viṣṇos tu yogavit / durvāsāḥ śaṅkarasyāṃśo nibodhāṅgirasaḥ prajāḥ //
श्रद्धा त्व् अङ्गिरसः पत्नी चतस्रो ऽसूत कन्यकाः । सिनीवाली कुहू राका चतुर्थ्य् अनुमतिस् तथा ॥
śraddhā tv aṅgirasaḥ patnī catasro 'sūta kanyakāḥ / sinīvālī kuhū rākā caturthy anumatis tathā //
तत्-पुत्राव् अपराव् आस्तां ख्यातौ स्वारोचिषे ऽन्तरे । उतथ्यो भगवान् साक्षाद् ब्रह्मिष्ठश् च बृहस्पतिः ॥
tat-putrāv aparāv āstāṃ khyātau svārociṣe 'ntare / utathyo bhagavān sākṣād brahmiṣṭhaś ca bṛhaspatiḥ //
पुलस्त्यो ऽजनयत् पत्न्याम् अगस्त्यं च हविर्भुवि । सो ऽन्य-जन्मनि दह्राग्निर् विश्रवाश् च महा-तपाः ॥
pulastyo 'janayat patnyām agastyaṃ ca havirbhuvi / so 'nya-janmani dahrāgnir viśravāś ca mahā-tapāḥ //
तस्य यक्ष-पतिर् देवः कुबेरस् त्व् इडविडा-सुतः । रावणः कुम्भकर्णश् च तथान्यस्यां विभीषणः ॥
tasya yakṣa-patir devaḥ kuberas tv iḍaviḍā-sutaḥ / rāvaṇaḥ kumbhakarṇaś ca tathānyasyāṃ vibhīṣaṇaḥ //
पुलहस्य गतिर् भार्या त्रीन् असूत सती सुतान् । कर्मश्रेष्ठं वरीयांसं सहिष्णुं च महा-मते ॥
pulahasya gatir bhāryā trīn asūta satī sutān / karmaśreṣṭhaṃ varīyāṃsaṃ sahiṣṇuṃ ca mahā-mate //
क्रतोर् अपि क्रिया भार्या वालखिल्यान् असूयत । ऋषीन् षष्टि-सहस्राणि ज्वलतो ब्रह्म-तेजसा ॥
krator api kriyā bhāryā vālakhilyān asūyata / ṛṣīn ṣaṣṭi-sahasrāṇi jvalato brahma-tejasā //
ऊर्जायां जज्ञिरे पुत्रा वसिष्ठस्य परन्तप । चित्रकेतु-प्रधानास् ते सप्त ब्रह्मर्षयो ऽमलाः ॥
ūrjāyāṃ jajñire putrā vasiṣṭhasya parantapa / citraketu-pradhānās te sapta brahmarṣayo 'malāḥ //
चित्रकेतुः सुरोचिश् च विरजा मित्र एव च । उल्बणो वसुभृद्यानो द्युमान् शक्त्य्-आदयो ऽपरे ॥
citraketuḥ surociś ca virajā mitra eva ca / ulbaṇo vasubhṛdyāno dyumān śakty-ādayo 'pare //
चित्तिस् त्व् अथर्वणः पत्नी लेभे पुत्रं धृत-व्रतम् । दध्यञ्चम् अश्वशिरसं भृगोर् वंशं निबोध मे ॥
cittis tv atharvaṇaḥ patnī lebhe putraṃ dhṛta-vratam / dadhyañcam aśvaśirasaṃ bhṛgor vaṃśaṃ nibodha me //
भृगुः ख्यात्यां महा-भागः पत्न्यां पुत्रान् अजीजनत् । धातारं च विधातारं श्रियं च भगवत्-पराम् ॥
bhṛguḥ khyātyāṃ mahā-bhāgaḥ patnyāṃ putrān ajījanat / dhātāraṃ ca vidhātāraṃ śriyaṃ ca bhagavat-parām //
आयतिं नियतिं चैव सुते मेरुस् तयोर् अदात् । ताभ्यां तयोर् अभवतां मृकण्डः प्राण एव च ॥
āyatiṃ niyatiṃ caiva sute merus tayor adāt / tābhyāṃ tayor abhavatāṃ mṛkaṇḍaḥ prāṇa eva ca //
मार्कण्डेयो मृकण्डस्य प्राणाद् वेदशिरा मुनिः । कविश् च भार्गवो यस्य भगवान् उशना सुतः ॥
mārkaṇḍeyo mṛkaṇḍasya prāṇād vedaśirā muniḥ / kaviś ca bhārgavo yasya bhagavān uśanā sutaḥ //
त एते मुनयः क्षत्तर् लोकान् सर्गैर् अभावयन् । एष कर्दम-दौहित्र- सन्तानः कथितस् तव । शृण्वतः श्रद्दधानस्य सद्यः पाप-हरः परः ॥
ta ete munayaḥ kṣattar lokān sargair abhāvayan / eṣa kardama-dauhitra- santānaḥ kathitas tava / śṛṇvataḥ śraddadhānasya sadyaḥ pāpa-haraḥ paraḥ //
प्रसूतिं मानवीं दक्ष उपयेमे ह्य् अजात्मजः । तस्यां ससर्ज दुहितॄः षोडशामल-लोचनाः ॥
prasūtiṃ mānavīṃ dakṣa upayeme hy ajātmajaḥ / tasyāṃ sasarja duhitṝḥ ṣoḍaśāmala-locanāḥ //
त्रयोदशादाद् धर्माय तथैकाम् अग्नये विभुः । पितृभ्य एकां युक्तेभ्यो भवायैकां भव-च्छिदे ॥
trayodaśādād dharmāya tathaikām agnaye vibhuḥ / pitṛbhya ekāṃ yuktebhyo bhavāyaikāṃ bhava-cchide //
श्रद्धा मैत्री दया शान्तिस् तुष्टिः पुष्टिः क्रियोन्नतिः । बुद्धिर् मेधा तितिक्षा ह्रीर् मूर्तिर् धर्मस्य पत्नयः ॥
śraddhā maitrī dayā śāntis tuṣṭiḥ puṣṭiḥ kriyonnatiḥ / buddhir medhā titikṣā hrīr mūrtir dharmasya patnayaḥ //
श्रद्धासूत शुभं मैत्री प्रसादम् अभयं दया । शान्तिः सुखं मुदं तुष्टिः स्मयं पुष्टिर् असूयत ॥
śraddhāsūta śubhaṃ maitrī prasādam abhayaṃ dayā / śāntiḥ sukhaṃ mudaṃ tuṣṭiḥ smayaṃ puṣṭir asūyata //
योगं क्रियोन्नतिर् दर्पम् अर्थं बुद्धिर् असूयत । मेधा स्मृतिं तितिक्षा तु क्षेमं ह्रीः प्रश्रयं सुतम् ॥
yogaṃ kriyonnatir darpam arthaṃ buddhir asūyata / medhā smṛtiṃ titikṣā tu kṣemaṃ hrīḥ praśrayaṃ sutam //
मूर्तिः सर्व-गुणोत्पत्तिर् नर-नारायणाव् ऋषी ॥
mūrtiḥ sarva-guṇotpattir nara-nārāyaṇāv ṛṣī //
ययोर् जन्मन्य् अदो विश्वम् अभ्यनन्दत् सुनिर्वृतम् । मनांसि ककुभो वाताः प्रसेदुः सरितो ऽद्रयः ॥
yayor janmany ado viśvam abhyanandat sunirvṛtam / manāṃsi kakubho vātāḥ praseduḥ sarito 'drayaḥ //
दिव्य् अवाद्यन्त तूर्याणि पेतुः कुसुम-वृष्टयः । मुनयस् तुष्टुवुस् तुष्टा जगुर् गन्धर्व-किन्नराः ॥
divy avādyanta tūryāṇi petuḥ kusuma-vṛṣṭayaḥ / munayas tuṣṭuvus tuṣṭā jagur gandharva-kinnarāḥ //
नृत्यन्ति स्म स्त्रियो देव्य आसीत् परम-मङ्गलम् । देवा ब्रह्मादयः सर्वे उपतस्थुर् अभिष्टवैः ॥
nṛtyanti sma striyo devya āsīt parama-maṅgalam / devā brahmādayaḥ sarve upatasthur abhiṣṭavaiḥ //
देवा ऊचुः यो मायया विरचितं निजयात्मनीदं खे रूप-भेदम् इव तत्-प्रतिचक्षणाय यो मायया विरचितं निजयात्मनीदं खे रूप-भेदम् इव तत्-प्रतिचक्षणाय एतेन धर्म-सदने ऋषि-मूर्तिनाद्य प्रादुश्चकार पुरुषाय नमः परस्मै ॥
devā ūcuḥ yo māyayā viracitaṃ nijayātmanīdaṃ khe rūpa-bhedam iva tat-praticakṣaṇāya yo māyayā viracitaṃ nijayātmanīdaṃ khe rūpa-bhedam iva tat-praticakṣaṇāya etena dharma-sadane ṛṣi-mūrtinādya prāduścakāra puruṣāya namaḥ parasmai //
सो ऽयं स्थिति-व्यतिकरोपशमाय सृष्टान् सत्त्वेन नः सुर-गणान् अनुमेय-तत्त्वः सो ऽयं स्थिति-व्यतिकरोपशमाय सृष्टान् सत्त्वेन नः सुर-गणान् अनुमेय-तत्त्वः दृश्याद् अदभ्र-करुणेन विलोकनेन यच् छ्री-निकेतम् अमलं क्षिपतारविन्दम् ॥
so 'yaṃ sthiti-vyatikaropaśamāya sṛṣṭān sattvena naḥ sura-gaṇān anumeya-tattvaḥ so 'yaṃ sthiti-vyatikaropaśamāya sṛṣṭān sattvena naḥ sura-gaṇān anumeya-tattvaḥ dṛśyād adabhra-karuṇena vilokanena yac chrī-niketam amalaṃ kṣipatāravindam //
एवं सुर-गणैस् तात भगवन्ताव् अभिष्टुतौ । लब्धावलोकैर् ययतुर् अर्चितौ गन्धमादनम् ॥
evaṃ sura-gaṇais tāta bhagavantāv abhiṣṭutau / labdhāvalokair yayatur arcitau gandhamādanam //
ताव् इमौ वै भगवतो हरेर् अंशाव् इहागतौ । भार-व्ययाय च भुवः कृष्णौ यदु-कुरूद्वहौ ॥
tāv imau vai bhagavato harer aṃśāv ihāgatau / bhāra-vyayāya ca bhuvaḥ kṛṣṇau yadu-kurūdvahau //
स्वाहाभिमानिनश् चाग्नेर् आत्मजांस् त्रीन् अजीजनत् । पावकं पवमानं च शुचिं च हुत-भोजनम् ॥
svāhābhimāninaś cāgner ātmajāṃs trīn ajījanat / pāvakaṃ pavamānaṃ ca śuciṃ ca huta-bhojanam //
तेभ्यो ऽग्नयः समभवन् चत्वारिंशच् च पञ्च च । त एवैकोनपञ्चाशत् साकं पितृ-पितामहैः ॥
tebhyo 'gnayaḥ samabhavan catvāriṃśac ca pañca ca / ta evaikonapañcāśat sākaṃ pitṛ-pitāmahaiḥ //
वैतानिके कर्मणि यन्- नामभिर् ब्रह्म-वादिभिः । आग्नेय्य इष्टयो यज्ञे निरूप्यन्ते ऽग्नयस् तु ते ॥
vaitānike karmaṇi yan- nāmabhir brahma-vādibhiḥ / āgneyya iṣṭayo yajñe nirūpyante 'gnayas tu te //
अग्निष्वात्ता बर्हिषदः सौम्याः पितर आज्यपाः । साग्नयो ऽनग्नयस् तेषां पत्नी दाक्षायणी स्वधा ॥
agniṣvāttā barhiṣadaḥ saumyāḥ pitara ājyapāḥ / sāgnayo 'nagnayas teṣāṃ patnī dākṣāyaṇī svadhā //
तेभ्यो दधार कन्ये द्वे वयुनां धारिणीं स्वधा । उभे ते ब्रह्म-वादिन्यौ ज्ञान-विज्ञान-पारगे ॥
tebhyo dadhāra kanye dve vayunāṃ dhāriṇīṃ svadhā / ubhe te brahma-vādinyau jñāna-vijñāna-pārage //
भवस्य पत्नी तु सती भवं देवम् अनुव्रता । आत्मनः सदृशं पुत्रं न लेभे गुण-शीलतः ॥
bhavasya patnī tu satī bhavaṃ devam anuvratā / ātmanaḥ sadṛśaṃ putraṃ na lebhe guṇa-śīlataḥ //
पितर्य् अप्रतिरूपे स्वे भवायानागसे रुषा । अप्रौढैवात्मनात्मानम् अजहाद् योग-संयुता ॥
pitary apratirūpe sve bhavāyānāgase ruṣā / aprauḍhaivātmanātmānam ajahād yoga-saṃyutā //