Chapter 364

वंशो ऽन्ववायो गोत्रं स्यात् कुलान्यभिजनान्वयौ

vaṃśo 'nvavāyo gotraṃ syāt kulānyabhijanānvayau

मन्त्रव्याख्याकृदाचार्य आदेष्टा त्वध्वरे व्रती

mantravyākhyākṛdācārya ādeṣṭā tvadhvare vratī

यष्टा च यजमानः स्यात् ज्ञात्वारम्भ उपक्रमः

yaṣṭā ca yajamānaḥ syāt jñātvārambha upakramaḥ

सतीर्थ्याश् चैकगुरवः सभ्याः सामाजिकास् तथा

satīrthyāś caikaguravaḥ sabhyāḥ sāmājikās tathā

सभासदः सभास्तारा ऋत्विजो याजकाश् च ते

sabhāsadaḥ sabhāstārā ṛtvijo yājakāś ca te

अध्वर्यूद्गातृहोतारो यजुःसामर्ग्विदः क्रमात्

adhvaryūdgātṛhotāro yajuḥsāmargvidaḥ kramāt

चषालो यूपकटकः समे स्थण्डिलचत्वरे

caṣālo yūpakaṭakaḥ same sthaṇḍilacatvare

आमिक्षा सा शृतोष्णे या क्षीरे स्याद्दधियोगतः

āmikṣā sā śṛtoṣṇe yā kṣīre syāddadhiyogataḥ

पृषदाज्यं सदध्याज्ये परमान्नन्तु पायसम्

pṛṣadājyaṃ sadadhyājye paramānnantu pāyasam

उपाकृतः पशुरसौ यो ऽभिमन्त्र्य क्रतौ हतः

upākṛtaḥ paśurasau yo 'bhimantrya kratau hataḥ

परम्पराकं समनं प्रोक्षणञ्च बधार्थकम्

paramparākaṃ samanaṃ prokṣaṇañca badhārthakam

पूजा नमस्यापिचितिः सपर्यार्चार्हणाः समाः

pūjā namasyāpicitiḥ saparyārcārhaṇāḥ samāḥ

वरिवस्या तु शुश्रूषा परिचर्याप्युपासनम्

varivasyā tu śuśrūṣā paricaryāpyupāsanam

नियमो ब्रतमस्त्री तच्चोपवासादि पुण्यकम्

niyamo bratamastrī taccopavāsādi puṇyakam

मुख्यः स्यात् प्रथमः कल्पो ऽनुकल्पस्तु ततो ऽधमः

mukhyaḥ syāt prathamaḥ kalpo 'nukalpastu tato 'dhamaḥ

कल्पे विधिक्रमौ ज्ञेयौ विवेकः पृथगात्मता

kalpe vidhikramau jñeyau vivekaḥ pṛthagātmatā

संस्कारपूर्वं ग्रहणं स्यादुपाकरणं श्रुतेः

saṃskārapūrvaṃ grahaṇaṃ syādupākaraṇaṃ śruteḥ

भिक्षुः परिव्राट् कर्मन्दी पाराशर्यपि मस्करी

bhikṣuḥ parivrāṭ karmandī pārāśaryapi maskarī

ऋषयः सत्यवचसःस्नातकश्चाप्लुतव्रती

ṛṣayaḥ satyavacasaḥsnātakaścāplutavratī

ये निर्जितेन्द्रियग्रामा यतिनो यतयश् च ते

ye nirjitendriyagrāmā yatino yatayaś ca te

शरीरसाधनापेक्षं नित्यं यत् कर्म तद्यमः

śarīrasādhanāpekṣaṃ nityaṃ yat karma tadyamaḥ

नियमस्तु स यत् कर्मानित्यमागन्तुसाधनम्

niyamastu sa yat karmānityamāgantusādhanam

स्याद् ब्रह्मभूयं ब्रह्मत्वं ब्रह्मसायुज्यमित्यपि

syād brahmabhūyaṃ brahmatvaṃ brahmasāyujyamityapi