अथ सप्तनवत्यधिकशततमो ऽध्यायः
atha saptanavatyadhikaśatatamo 'dhyāyaḥ
दिवसव्रतानि
divasavratāni
अग्निर् उवाच
agnir uvāca
दिवसव्रतकं वक्ष्ये ह्य् आदौ धेनुव्रतं वदे
divasavratakaṃ vakṣye hy ādau dhenuvrataṃ vade
यश्चोभयमुखीन्दद्यात् प्रभूतकनकान्वितां
yaścobhayamukhīndadyāt prabhūtakanakānvitāṃ
दिनं पयोव्रतस्तिष्ठेत् स याति परसम्पदं
dinaṃ payovratastiṣṭhet sa yāti parasampadaṃ
त्र्यहं पयोव्रतं कृत्वा काञ्चनं कल्पपादपं
tryahaṃ payovrataṃ kṛtvā kāñcanaṃ kalpapādapaṃ
दत्वा ब्रह्मपदं याति कल्पवृक्षप्रदं स्मृतं
datvā brahmapadaṃ yāti kalpavṛkṣapradaṃ smṛtaṃ
दद्याद्विंशत् पलादूर्ध्वं महीङ्कृत्वा तु काञ्चनीं
dadyādviṃśat palādūrdhvaṃ mahīṅkṛtvā tu kāñcanīṃ
दिनं पयोव्रतस्तिष्ठेद्रुद्रगः स्याद्दिवाव्रती
dinaṃ payovratastiṣṭhedrudragaḥ syāddivāvratī
पक्षे पक्षे त्रिरात्रन्तु भक्तेनैकेन यः क्षपेत्
pakṣe pakṣe trirātrantu bhaktenaikena yaḥ kṣapet
विपुलं धनमाप्नोति त्रिरात्रव्रतकृद्दिनं
vipulaṃ dhanamāpnoti trirātravratakṛddinaṃ
मासे मासे त्रिरात्राशी एकभक्ती गणेशतां
māse māse trirātrāśī ekabhaktī gaṇeśatāṃ
यस्त्रिरात्रव्रतं कुर्यात् समुहिश्य जनार्दनं
yastrirātravrataṃ kuryāt samuhiśya janārdanaṃ
कुलानां शतमादाय स याति भवनं हरेः
kulānāṃ śatamādāya sa yāti bhavanaṃ hareḥ
नवम्याञ्च सिते पक्षे नरो मार्गशिरस्यथ
navamyāñca site pakṣe naro mārgaśirasyatha
प्रारभेत त्रिरात्राणां व्रतन्तु विधिवद् व्रती
prārabheta trirātrāṇāṃ vratantu vidhivad vratī
ओं नमो वासुदेवाय सहस्रं वा शतं जपेत्
oṃ namo vāsudevāya sahasraṃ vā śataṃ japet
अष्टम्यामेकभक्ताशी दिनत्रयमुपावसेत्
aṣṭamyāmekabhaktāśī dinatrayamupāvaset
द्वादश्यां पूजयेद् विष्णुं कार्त्तिके कारयेद् व्रतं
dvādaśyāṃ pūjayed viṣṇuṃ kārttike kārayed vrataṃ
विप्रान् सम्भोज्य वस्त्राणि शयनान्यासनानि च
viprān sambhojya vastrāṇi śayanānyāsanāni ca
छत्रोपवीतपात्राणि ददेत् सम्प्रार्थयेद्द्विजान्
chatropavītapātrāṇi dadet samprārthayeddvijān
व्रतो ऽस्मिन् दुष्करे चापि विकलं यदभून्मम
vrato 'smin duṣkare cāpi vikalaṃ yadabhūnmama
भवद्भिस्तदनुज्ञातं परिपूर्णं भवत्विति
bhavadbhistadanujñātaṃ paripūrṇaṃ bhavatviti
भुक्तभोगो व्रजेद् विष्णुं त्रिरात्रव्रतकत्रती
bhuktabhogo vrajed viṣṇuṃ trirātravratakatratī
कार्त्तिकव्रतकं वक्ष्ये भुक्तिमुक्तिप्रदायकं
kārttikavratakaṃ vakṣye bhuktimuktipradāyakaṃ
दशम्यां पञ्चगव्याशो एकादश्यामुपोषितः
daśamyāṃ pañcagavyāśo ekādaśyāmupoṣitaḥ
कार्त्तिकस्य सिते ऽभ्यर्च्य विष्णुं देवविमानगः
kārttikasya site 'bhyarcya viṣṇuṃ devavimānagaḥ
चैत्रे त्रिरात्रं नक्ताशी अजापञ्चप्रदः सुखी
caitre trirātraṃ naktāśī ajāpañcapradaḥ sukhī
त्रिरात्रं पयसः पानमुपवासपरस्त्र्यहं
trirātraṃ payasaḥ pānamupavāsaparastryahaṃ
षष्ठ्यादि कार्त्तिके शुक्रे कृच्छ्रो माहेन्द्र उच्यते
ṣaṣṭhyādi kārttike śukre kṛcchro māhendra ucyate
पञ्चरात्रं पयः पीत्वा दध्याहारो ह्य् उपोषितः
pañcarātraṃ payaḥ pītvā dadhyāhāro hy upoṣitaḥ
एकादश्यां कार्त्तिके तु कृच्छ्रो ऽयं भास्करोर्थदः
ekādaśyāṃ kārttike tu kṛcchro 'yaṃ bhāskarorthadaḥ
यवागूं यावकं शाकं दधि क्षीरं घृतं जलं
yavāgūṃ yāvakaṃ śākaṃ dadhi kṣīraṃ ghṛtaṃ jalaṃ
पञ्चम्यादि सिते पक्षे कृच्छ्रः शान्तपनः स्मृतः
pañcamyādi site pakṣe kṛcchraḥ śāntapanaḥ smṛtaḥ
इत्य् आग्नेये महपुराणे दिवसव्रतानि नाम सप्तनवत्यधिकशततमो ऽध्यायः ॥
ity āgneye mahapurāṇe divasavratāni nāma saptanavatyadhikaśatatamo 'dhyāyaḥ ||