Chapter 196

नक्षत्रव्रतकं वक्ष्ये भे हरिः पूजितो ऽर्थदः

nakṣatravratakaṃ vakṣye bhe hariḥ pūjito 'rthadaḥ

नक्षत्रपुरुषं चादौ चैत्रमासे हरिं यजेत्

nakṣatrapuruṣaṃ cādau caitramāse hariṃ yajet

मूले पादौ यजेज्जङ्घे रोहिणीस्वर्चयेद्धरिं

mūle pādau yajejjaṅghe rohiṇīsvarcayeddhariṃ

जानुनी चाश्विनीयोगे आषाढासूरुसञ्ज्ञके

jānunī cāśvinīyoge āṣāḍhāsūrusañjñake

मेढ्रं पूर्वोत्तरास्वेव कटिं वै कृत्तिकासु च

meḍhraṃ pūrvottarāsveva kaṭiṃ vai kṛttikāsu ca

पार्श्वे भाद्रपदाभ्यान्तु कुक्षिं वै रेवतीषु च

pārśve bhādrapadābhyāntu kukṣiṃ vai revatīṣu ca

स्तनौ चैवानुराधासु धनिष्ठासु च पृष्ठकं

stanau caivānurādhāsu dhaniṣṭhāsu ca pṛṣṭhakaṃ

भुजौ पूज्यौ विशाखासु पुनर्वस्वङ्गुलीर्यजेत्

bhujau pūjyau viśākhāsu punarvasvaṅgulīryajet

अश्लेषासु नखान् पूज्य कण्ठं ज्येष्ठासु पूजयेत्

aśleṣāsu nakhān pūjya kaṇṭhaṃ jyeṣṭhāsu pūjayet

श्रोत्रे विष्णोश् च श्रवणे मुखं पुष्ये हरेर्यजेत्

śrotre viṣṇoś ca śravaṇe mukhaṃ puṣye hareryajet

यजेत् स्वातिषु दन्ताग्रमास्यं वारुणतो ऽर्चयेत्

yajet svātiṣu dantāgramāsyaṃ vāruṇato 'rcayet

मघासु नसां नयने मृगशीर्षे ललाटकं

maghāsu nasāṃ nayane mṛgaśīrṣe lalāṭakaṃ

चित्रासु चार्द्रासु कचानब्दान्ते स्वर्णकं हरिं

citrāsu cārdrāsu kacānabdānte svarṇakaṃ hariṃ

गुडपूर्णे घटे ऽभ्यर्च्य शय्यागोर्थादि दक्षिणा

guḍapūrṇe ghaṭe 'bhyarcya śayyāgorthādi dakṣiṇā

नक्षत्रपुरुषो विष्णुः पूजनीयः शिवात्मकः

nakṣatrapuruṣo viṣṇuḥ pūjanīyaḥ śivātmakaḥ

शाम्भवायनीयव्रतकृन्मासभे पूजयेद्धरिं

śāmbhavāyanīyavratakṛnmāsabhe pūjayeddhariṃ

कार्त्तिके कृत्तिकायां च मृगशीर्षे मृगास्यके

kārttike kṛttikāyāṃ ca mṛgaśīrṣe mṛgāsyake

नामभिः केशवाद्यैस्तु अच्युताय नमो ऽपि वा

nāmabhiḥ keśavādyaistu acyutāya namo 'pi vā

कार्त्तिके कृत्तिकाभे ऽह्नि मासनक्षत्रगं हरिं

kārttike kṛttikābhe 'hni māsanakṣatragaṃ hariṃ

शाम्भवायनीयव्रतकं करिष्ये भुक्तिमुक्तिदं

śāmbhavāyanīyavratakaṃ kariṣye bhuktimuktidaṃ

केशवादि महामूर्तिमच्युतं सर्वदायकं

keśavādi mahāmūrtimacyutaṃ sarvadāyakaṃ

आवाहयाम्यहन्देवमायुरारोग्यवृद्धिदं

āvāhayāmyahandevamāyurārogyavṛddhidaṃ

कार्त्तिकादौ सकासारमन्नं मासचतुष्टयं

kārttikādau sakāsāramannaṃ māsacatuṣṭayaṃ

फाल्गुनादौ च कुशरमाषाढादौ च पायसं

phālgunādau ca kuśaramāṣāḍhādau ca pāyasaṃ

देवाय ब्राह्मणेभ्यश् च नक्तन्नैवेद्यमाशयेत्

devāya brāhmaṇebhyaś ca naktannaivedyamāśayet

पञ्चगव्यजलेस्नातस्तस्यैव प्राशनाच्छुचिः

pañcagavyajalesnātastasyaiva prāśanācchuciḥ

अर्वाग्विसर्जनाद् द्रव्यं नैवेद्यं सर्वमुच्यते

arvāgvisarjanād dravyaṃ naivedyaṃ sarvamucyate

विसर्जिते जगन्नाथे निर्माल्यन्भवति क्षणात्

visarjite jagannāthe nirmālyanbhavati kṣaṇāt

नमो नमस्ते ऽच्युत मे क्षयोस्तु पापस्य वृद्धिं समुपैतु पुण्यं

namo namaste 'cyuta me kṣayostu pāpasya vṛddhiṃ samupaitu puṇyaṃ

ऐश्वर्यवित्तादि सदाक्षयं मे क्षयञ्च मा सन्ततिरभ्यपैतु

aiśvaryavittādi sadākṣayaṃ me kṣayañca mā santatirabhyapaitu

यथाच्युतस्त्वम्परतः परस्तात् स ब्रह्मभूतः परतः परात्मन्

yathācyutastvamparataḥ parastāt sa brahmabhūtaḥ parataḥ parātman

तथाच्युतं त्वं कुरु वाञ्छितं मे मया कृतम्पापहराप्रमेय

tathācyutaṃ tvaṃ kuru vāñchitaṃ me mayā kṛtampāpaharāprameya

अच्युतानन्द गोविन्द प्रसीद यदभीप्सितं

acyutānanda govinda prasīda yadabhīpsitaṃ

अक्षयं माममेयात्मन् कुरुष्व पुरुषोत्तम

akṣayaṃ māmameyātman kuruṣva puruṣottama

सप्त वर्षाणि सम्पूज्य भुक्तिमुक्तिमवापुनुयात्

sapta varṣāṇi sampūjya bhuktimuktimavāpunuyāt

अनन्तव्रतमाख्यास्ये नक्षत्रव्रतकेर्थदं

anantavratamākhyāsye nakṣatravratakerthadaṃ

मार्गशीर्षे मृगशिरे गोमूत्राशो यजेद्धरिं

mārgaśīrṣe mṛgaśire gomūtrāśo yajeddhariṃ

अनन्तं सर्वकामानामनन्तो भगवान् फलं

anantaṃ sarvakāmānāmananto bhagavān phalaṃ

ददात्यनन्तञ्च पुनस्तदेवान्यत्र जन्मनि

dadātyanantañca punastadevānyatra janmani

अनन्तपुन्योपचयङ्करोत्येतन्महाव्रतं

anantapunyopacayaṅkarotyetanmahāvrataṃ

यथाभिलषितप्राप्तिं करोत्यक्षयमेव च

yathābhilaṣitaprāptiṃ karotyakṣayameva ca

पादादि पूज्य नक्ते तु भुञ्जीयात्तैलवर्जितं

pādādi pūjya nakte tu bhuñjīyāttailavarjitaṃ

घृतेनानन्तमुद्दिश्य होमो मासचतुष्टयं

ghṛtenānantamuddiśya homo māsacatuṣṭayaṃ

चैत्रादौ शालिना होमः पयसा श्रावणादिषु

caitrādau śālinā homaḥ payasā śrāvaṇādiṣu

मान्धाताभूद् युवनाश्वादनन्तव्रतकात् सुतः

māndhātābhūd yuvanāśvādanantavratakāt sutaḥ