अथाष्टाशीत्यधिकशततमो ऽध्यायः
athāṣṭāśītyadhikaśatatamo 'dhyāyaḥ
द्वादशीव्रतानि
dvādaśīvratāni
अग्निर् उवाच
agnir uvāca
द्वादशीव्रतकं वक्ष्ये भुक्तिमुक्तिप्रदायकं
dvādaśīvratakaṃ vakṣye bhuktimuktipradāyakaṃ
एकभक्तेन भक्तेन तथैवायाचितेन च
ekabhaktena bhaktena tathaivāyācitena ca
उपवासेन भैक्ष्येण चैवं द्वादशिकव्रती
upavāsena bhaikṣyeṇa caivaṃ dvādaśikavratī
चैत्रे मासि सिते पक्षे द्वादश्यां मदनं हरिं
caitre māsi site pakṣe dvādaśyāṃ madanaṃ hariṃ
पूजयेद्भुक्तिमुक्त्यर्थी मदनद्वादशईव्रती
pūjayedbhuktimuktyarthī madanadvādaśaīvratī
माघशुक्ले तु द्वादश्यां भीमद्वादशिकव्रती
māghaśukle tu dvādaśyāṃ bhīmadvādaśikavratī
नमो नारायणायेति यजेद्विष्णुं स सर्वभाक्
namo nārāyaṇāyeti yajedviṣṇuṃ sa sarvabhāk
फाल्गुने च सिते पक्षे गोविन्दद्वादशीव्रती
phālgune ca site pakṣe govindadvādaśīvratī
विशोकद्वादशीकारी यजेदाश्वयुजे हरिं
viśokadvādaśīkārī yajedāśvayuje hariṃ
लवणं मार्गशीर्षे तु कृष्णमभ्यर्च्य यो नरः
lavaṇaṃ mārgaśīrṣe tu kṛṣṇamabhyarcya yo naraḥ
ददाति शुक्लद्वादश्यां स सर्वरसदायकः
dadāti śukladvādaśyāṃ sa sarvarasadāyakaḥ
गोवत्सं पूजयेद् भाद्रे गोवत्सद्वादशीव्रती
govatsaṃ pūjayed bhādre govatsadvādaśīvratī
माध्यान्तु समतीतायां श्रवणेन तु संयुता
mādhyāntu samatītāyāṃ śravaṇena tu saṃyutā
द्वादशी या भवेत् कृष्णा प्रोक्ता सा तिलद्वादशी
dvādaśī yā bhavet kṛṣṇā proktā sā tiladvādaśī
तिलैः स्नानन्तिलैर् होमो नैवेद्यन्तिलमोदकं
tilaiḥ snānantilair homo naivedyantilamodakaṃ
दीपश् च तिलतैलेन तथा देयं तिलोदकं
dīpaś ca tilatailena tathā deyaṃ tilodakaṃ
तिलाश् च देया विप्रेभ्यः फलं होमोपवासतः
tilāś ca deyā viprebhyaḥ phalaṃ homopavāsataḥ
ओं नमो भगवते ऽथो वासुदेवाय वै यजेत्
oṃ namo bhagavate 'tho vāsudevāya vai yajet
सुकलः स्वर्गमाप्नोति षट्तिलद्वादशीव्रती
sukalaḥ svargamāpnoti ṣaṭtiladvādaśīvratī
मनोरथद्वादशीकृत् फाल्गुने तु सिते ऽर्चयेत्
manorathadvādaśīkṛt phālgune tu site 'rcayet
नामद्वादशीव्रतकृत् केशवाद्यैश् च नामभिः
nāmadvādaśīvratakṛt keśavādyaiś ca nāmabhiḥ
वर्षं यजेद्धरिं स्वर्गी न भवेन् नारकी नरः
varṣaṃ yajeddhariṃ svargī na bhaven nārakī naraḥ
फाल्गुनस्य सिते ऽभ्यर्च्य सुमतिद्वादशीव्रती
phālgunasya site 'bhyarcya sumatidvādaśīvratī
मासि भाद्रपदे शुक्ते अनन्तद्वादशीव्रती
māsi bhādrapade śukte anantadvādaśīvratī
अश्लेषर्क्षे तु मूले वा माघे कृष्णाय वै नमः
aśleṣarkṣe tu mūle vā māghe kṛṣṇāya vai namaḥ
यजेत्तिलांश् च जुहुयात्तिलद्वादशीकृन्नरः
yajettilāṃś ca juhuyāttiladvādaśīkṛnnaraḥ
सुगतिद्वादशीकारी फाल्गुने तु सिते यजेत्
sugatidvādaśīkārī phālgune tu site yajet
जय कृष्ण नमस्तुभ्यं वर्षं स्याद् भुक्तिमुक्तिगः
jaya kṛṣṇa namastubhyaṃ varṣaṃ syād bhuktimuktigaḥ
पौषशुक्ले तु द्वादश्यां सम्प्राप्तिद्वादशीव्रती
pauṣaśukle tu dvādaśyāṃ samprāptidvādaśīvratī
इत्य् आग्नेये महापुराणे नानाद्वादशीव्रतानि नामाष्टाशीत्यधिकशततमो ऽध्यायः ॥
ity āgneye mahāpurāṇe nānādvādaśīvratāni nāmāṣṭāśītyadhikaśatatamo 'dhyāyaḥ ||