Chapter 189

श्रवणादशीं वक्ष्ये मासि भाद्रपदे सिते

śravaṇādaśīṃ vakṣye māsi bhādrapade site

श्रवणेन युता श्रेष्ठा महती सा ह्य् उपोषिता

śravaṇena yutā śreṣṭhā mahatī sā hy upoṣitā

सङ्गमे सरितां स्नानाच्छ्रवणद्वादशोफलं

saṅgame saritāṃ snānācchravaṇadvādaśophalaṃ

बुधश्रवणसंयुक्ता दानादौ सुमहाफला

budhaśravaṇasaṃyuktā dānādau sumahāphalā

निषिद्धमपि कर्तव्यन्त्रयोदश्यान्तु पारणं

niṣiddhamapi kartavyantrayodaśyāntu pāraṇaṃ

द्वादृश्याञ्च निराहारो वामनं पूजयाम्यहं

dvādṛśyāñca nirāhāro vāmanaṃ pūjayāmyahaṃ

उदकुम्भे स्वर्णमयन्त्रयोदश्यान्तु पारणं

udakumbhe svarṇamayantrayodaśyāntu pāraṇaṃ

आवाहयाम्यहं विष्णुं वामनं शङ्खचक्रिणं

āvāhayāmyahaṃ viṣṇuṃ vāmanaṃ śaṅkhacakriṇaṃ

सितवस्त्रयुगच्छन्ने घटे सच्छत्रपादुके

sitavastrayugacchanne ghaṭe sacchatrapāduke

स्नापयामि जलैः शुद्धैर् विष्णुं पञ्चामृतादिभिः

snāpayāmi jalaiḥ śuddhair viṣṇuṃ pañcāmṛtādibhiḥ

छत्रदण्डधरं विष्णुं वामनाय नमो नमः

chatradaṇḍadharaṃ viṣṇuṃ vāmanāya namo namaḥ

अर्घ्यं ददामि देवेश अर्घ्यार्हाद्यैः सदार्चितः

arghyaṃ dadāmi deveśa arghyārhādyaiḥ sadārcitaḥ

भुक्तिमुक्तिप्रजाकीर्तिसर्वैश्वर्ययुतं कुरु

bhuktimuktiprajākīrtisarvaiśvaryayutaṃ kuru

वामनाय नमो गन्धं होमो ऽनेनाष्टकं शतं

vāmanāya namo gandhaṃ homo 'nenāṣṭakaṃ śataṃ

ओं नमो वासुदेवाय शिरः सम्पूजयेद्धरेः

oṃ namo vāsudevāya śiraḥ sampūjayeddhareḥ

श्रीधराय मुखं तद्वत् कण्ठे कृष्णाय वै नमः

śrīdharāya mukhaṃ tadvat kaṇṭhe kṛṣṇāya vai namaḥ

नमः श्रीपतये वक्षो भुजो सर्वास्त्रधारिणे

namaḥ śrīpataye vakṣo bhujo sarvāstradhāriṇe

व्यापकाय नमो नाभिं वामनाय नमः कटिं

vyāpakāya namo nābhiṃ vāmanāya namaḥ kaṭiṃ

त्रैलोक्यजयकायेति मेढ्रं जङ्घे यजेद्धरेः

trailokyajayakāyeti meḍhraṃ jaṅghe yajeddhareḥ

सर्वाधिपतये पादौ विष्णोः सर्वात्मने नमः

sarvādhipataye pādau viṣṇoḥ sarvātmane namaḥ

घृतपक्वञ्च नैवेद्यन्दद्याद् दध्योदनैर् घटान्

ghṛtapakvañca naivedyandadyād dadhyodanair ghaṭān

रात्रौ च जागरं कृत्वा प्रातः स्नात्वा च सङ्गमे

rātrau ca jāgaraṃ kṛtvā prātaḥ snātvā ca saṅgame

गन्धपुष्पादिभिः पूज्य वदेत् पुष्पाञ्जलिस्त्विदं

gandhapuṣpādibhiḥ pūjya vadet puṣpāñjalistvidaṃ

नमो नमस्ते गोविन्द बुधश्रवणसञ्ज्ञित

namo namaste govinda budhaśravaṇasañjñita

अघौघसङ्क्षयं कृत्वा सर्वसौख्यप्रदो भव

aghaughasaṅkṣayaṃ kṛtvā sarvasaukhyaprado bhava

प्रीयतान्देव देवेश मम नित्यञ्जनार्दन

prīyatāndeva deveśa mama nityañjanārdana

वामनो बुद्धिदो दाता द्रव्यस्थो वामनः स्वयं

vāmano buddhido dātā dravyastho vāmanaḥ svayaṃ

वामनः प्रतिगृह्णाति वामनो मे ददाति च

vāmanaḥ pratigṛhṇāti vāmano me dadāti ca

द्रव्यस्थो वामनो नित्यं वामनाय नमो नमः

dravyastho vāmano nityaṃ vāmanāya namo namaḥ

प्रदत्तदक्षिणो विप्रान् सम्भोज्यान्नं स्वयञ्चरेत्

pradattadakṣiṇo viprān sambhojyānnaṃ svayañcaret