अथ सप्ताशीत्यधिकशततमो ऽध्यायः
atha saptāśītyadhikaśatatamo 'dhyāyaḥ
एकादशीव्रतं
ekādaśīvrataṃ
अग्निर् उवाच
agnir uvāca
एकादशीव्रतं वक्ष्ये भुक्तिमुक्तिप्रदायाकं
ekādaśīvrataṃ vakṣye bhuktimuktipradāyākaṃ
दशम्यान्नियताहारो मांसमैथुनवर्जितः
daśamyānniyatāhāro māṃsamaithunavarjitaḥ
एकदश्यां न भुञ्जीत पक्षयोरुभयोरपि
ekadaśyāṃ na bhuñjīta pakṣayorubhayorapi
द्वादश्येकादशी यत्र तत्र सन्निहितो हरिः
dvādaśyekādaśī yatra tatra sannihito hariḥ
तत्र क्रतुशतं पुण्यं त्रयोदश्यां तु पारणे
tatra kratuśataṃ puṇyaṃ trayodaśyāṃ tu pāraṇe
एकादशी कला यत्र परतो द्वादशो गता
ekādaśī kalā yatra parato dvādaśo gatā
तत्र क्रतुशतं पुण्यन्त्रयोदश्यान्तु पारणे
tatra kratuśataṃ puṇyantrayodaśyāntu pāraṇe
दशम्येकादशीमिश्रा नोपोष्या नरकप्रदा
daśamyekādaśīmiśrā nopoṣyā narakapradā
एकादश्यान्निराहारो भुक्त्वा चैवापरे ऽहनि
ekādaśyānnirāhāro bhuktvā caivāpare 'hani
भोक्ष्ये ऽहं पुण्डरीकाक्ष शरणं मे भवाच्युत
bhokṣye 'haṃ puṇḍarīkākṣa śaraṇaṃ me bhavācyuta
एकादश्यां सिते पक्षे पुष्यर्क्षन्तु यदा भवेत्
ekādaśyāṃ site pakṣe puṣyarkṣantu yadā bhavet
सोपोष्पाक्षय्यफलदा प्रोक्ता सा पापनाशिनी
sopoṣpākṣayyaphaladā proktā sā pāpanāśinī
एकादशी द्वादशी या श्रवणेन च संयुता
ekādaśī dvādaśī yā śravaṇena ca saṃyutā
विजया सा तिथिः प्रोक्ता भक्तानां विजयप्रदा
vijayā sā tithiḥ proktā bhaktānāṃ vijayapradā
एषैव फाल्गुने मासि पुष्यर्क्षेण च संयुता
eṣaiva phālgune māsi puṣyarkṣeṇa ca saṃyutā
विजया प्रोच्यते सद्भिः कोटिकोटिगुणोत्तरा
vijayā procyate sadbhiḥ koṭikoṭiguṇottarā
एकादश्यां विष्णुपूजा कार्या सर्वोपकारिणी
ekādaśyāṃ viṣṇupūjā kāryā sarvopakāriṇī
धनवान् पुत्रवान् लोके विष्णुलोके महीयते
dhanavān putravān loke viṣṇuloke mahīyate
इत्य् आग्न्येये महापुराणे एकादशीव्रतं नाम सप्ताशीत्यधिकशततमो ऽध्यायः ॥
ity āgnyeye mahāpurāṇe ekādaśīvrataṃ nāma saptāśītyadhikaśatatamo 'dhyāyaḥ ||