Chapter 126

वक्ष्याम्यृक्षात्मकं पिण्डं शुभाशुभविबुद्धये

vakṣyāmyṛkṣātmakaṃ piṇḍaṃ śubhāśubhavibuddhaye

यस्मिन्नृक्षे भवेत् सूर्यस्तदादौ त्रीणि मूर्धनि

yasminnṛkṣe bhavet sūryastadādau trīṇi mūrdhani

एकम्मुखे द्वयन्नेत्रे हस्तपादे चतुष्टयं

ekammukhe dvayannetre hastapāde catuṣṭayaṃ

हृदि पञ्च सुते जानौ आयुर्बुद्धिं विचिन्तयेत्

hṛdi pañca sute jānau āyurbuddhiṃ vicintayet

शिरस्थे तु भवेद्राज्यं पिण्डतो वक्त्रयोगतः

śirasthe tu bhavedrājyaṃ piṇḍato vaktrayogataḥ

नेत्रयोः कान्तसौभाग्यं हृदये द्रव्यसङ्ग्रहः

netrayoḥ kāntasaubhāgyaṃ hṛdaye dravyasaṅgrahaḥ

हस्ते धृतं तस्करत्वङ्गतासुरध्वगः पदे

haste dhṛtaṃ taskaratvaṅgatāsuradhvagaḥ pade

कुम्भाष्तके भानि लिख्य सूर्यकुम्भस्तु रिक्तकः

kumbhāṣtake bhāni likhya sūryakumbhastu riktakaḥ

अशुभः सूर्यकुम्भः स्याच्छुभः पूर्वादिसंस्थितः

aśubhaḥ sūryakumbhaḥ syācchubhaḥ pūrvādisaṃsthitaḥ

फणिराहुं प्रवक्ष्यामि जयाजयविवेकदं

phaṇirāhuṃ pravakṣyāmi jayājayavivekadaṃ

अष्टाविंशांल्लिखेद्विन्दून् पुनर्भाज्यस्त्रिभ्स्त्रिभिः

aṣṭāviṃśāṃllikhedvindūn punarbhājyastribhstribhiḥ

अथ ऋक्षाणि चत्वारि रेखास्तत्रैव दापयेत्

atha ṛkṣāṇi catvāri rekhāstatraiva dāpayet

यस्मिन्नृक्षे स्थितो राहुस्तदृक्षं फणिमूर्धनि

yasminnṛkṣe sthito rāhustadṛkṣaṃ phaṇimūrdhani

तदादि विन्यसेद् भानि सप्तविंशक्रमेण तु

tadādi vinyased bhāni saptaviṃśakrameṇa tu

वक्त्रे सप्तगते ऋक्षे म्रियते सर्व आहवे

vaktre saptagate ṛkṣe mriyate sarva āhave

स्कन्धे भङ्गं विजानीयात्सप्तमेषु च मध्यतः

skandhe bhaṅgaṃ vijānīyātsaptameṣu ca madhyataḥ

उदरस्थेन पूजा च जयश् चैवात्मनस् तथा

udarasthena pūjā ca jayaś caivātmanas tathā

कटिदेशे स्थिते योधे आहवे हरते परान्

kaṭideśe sthite yodhe āhave harate parān

पुच्छस्थितेन कीर्तिः स्याद्राहुदृष्टे च भे मृतिः

pucchasthitena kīrtiḥ syādrāhudṛṣṭe ca bhe mṛtiḥ

पुनरन्यं प्रवक्ष्यामि रविराहुबलन्तव

punaranyaṃ pravakṣyāmi ravirāhubalantava

रविः शुक्रो बुधश् चैव सोमः सौरिर्गुरुस् तथा

raviḥ śukro budhaś caiva somaḥ saurirgurus tathā

लोहितः संहिकश् चैव एते यामार्धभागिनः

lohitaḥ saṃhikaś caiva ete yāmārdhabhāginaḥ

सौरिं रविञ्च राहुञ्च कृत्वा यत्नेन पृष्ठतः

sauriṃ raviñca rāhuñca kṛtvā yatnena pṛṣṭhataḥ

स जयेत् सैन्यसङ्घातं द्यूतमध्वानमाहवं

sa jayet sainyasaṅghātaṃ dyūtamadhvānamāhavaṃ

रोहिणी चोत्तरास्तिस्रो मृगः पञ्च स्थिराणि हि

rohiṇī cottarāstisro mṛgaḥ pañca sthirāṇi hi

अश्विनी रेवती स्वाती धनिष्ठा शततारका

aśvinī revatī svātī dhaniṣṭhā śatatārakā

क्षिप्राणि पञ्चभान्येव यात्रार्थी चैव योजयेत्

kṣiprāṇi pañcabhānyeva yātrārthī caiva yojayet

अनुराधाहस्तमूलं मृगः पुष्यं पुनर्वसुः

anurādhāhastamūlaṃ mṛgaḥ puṣyaṃ punarvasuḥ

सर्वकार्येषु चैतानि ज्येष्ठा चित्रा विशाखया

sarvakāryeṣu caitāni jyeṣṭhā citrā viśākhayā

पुर्वास्तिस्रो ऽग्निर्भरणी मघार्द्राश्लेषादारुणाः

purvāstisro 'gnirbharaṇī maghārdrāśleṣādāruṇāḥ

स्थावरेषु स्थिरं ह्य् ऋक्षं यात्रायां क्षिप्रमुत्तमं

sthāvareṣu sthiraṃ hy ṛkṣaṃ yātrāyāṃ kṣipramuttamaṃ

सौभाग्यार्थे मृदून्येव उग्रेषूग्रन्तु कारयेत्

saubhāgyārthe mṛdūnyeva ugreṣūgrantu kārayet

दारुणे दारुणं कुर्याद्वक्ष्ये चाधोमुखादिकं

dāruṇe dāruṇaṃ kuryādvakṣye cādhomukhādikaṃ

कृत्रिका भरण्यश्लेषा विशाखा पितृनैरृतम्

kṛtrikā bharaṇyaśleṣā viśākhā pitṛnairṛtam

पूर्वात्रयमधोवक्त्रं कर्म चाधोमुखञ्चरेत्

pūrvātrayamadhovaktraṃ karma cādhomukhañcaret

एषु कूपतडागादि विद्याकर्म भिषक्क्रिया

eṣu kūpataḍāgādi vidyākarma bhiṣakkriyā

स्थापनन्नौकाभूपादिविधानं खननन्तथा

sthāpanannaukābhūpādividhānaṃ khananantathā

रेवती चाश्विनी चित्रा हस्ता स्वाती पुनर्वसुः

revatī cāśvinī citrā hastā svātī punarvasuḥ

अनुराधा मृगो ज्येष्ठा नव वै पार्श्वतोमुखाः

anurādhā mṛgo jyeṣṭhā nava vai pārśvatomukhāḥ

एषु राज्याभिषेकञ्च पट्टबन्धङ्गजाश्वयोः

eṣu rājyābhiṣekañca paṭṭabandhaṅgajāśvayoḥ

आरामगृहप्रासादं प्राकारं क्षेत्रतोरणं

ārāmagṛhaprāsādaṃ prākāraṃ kṣetratoraṇaṃ

ध्वजचिह्नपताकाश् च सर्वानेतांश् च कारयेत्

dhvajacihnapatākāś ca sarvānetāṃś ca kārayet

द्वादशी सूर्यदग्धा तु चन्द्रेणैकदशी तथा

dvādaśī sūryadagdhā tu candreṇaikadaśī tathā

भौमेन दशमी दग्धा तृतीया वै बुधेन च

bhaumena daśamī dagdhā tṛtīyā vai budhena ca

षष्टी च गुरुणा दग्धा द्वितीया भृगुणा तथा

ṣaṣṭī ca guruṇā dagdhā dvitīyā bhṛguṇā tathā

सप्तमी सूर्यपुत्रेण त्रिपुष्करमथो वदे

saptamī sūryaputreṇa tripuṣkaramatho vade

द्वितीया द्वादशी चैव सप्तमी वै तृतीयया

dvitīyā dvādaśī caiva saptamī vai tṛtīyayā

रविर्भौमस् तथा शौरिः षडेतास्तु त्रिपुष्कराः

ravirbhaumas tathā śauriḥ ṣaḍetāstu tripuṣkarāḥ

विशाखा कृत्तिका चैव उत्तरे द्वे पुनर्वसुः

viśākhā kṛttikā caiva uttare dve punarvasuḥ

पूर्वभाद्रपदा चैव षडेते तु त्रिपुष्कराः

pūrvabhādrapadā caiva ṣaḍete tu tripuṣkarāḥ

लाभो हानिर्जयो वृद्धिः पुत्रजन्म तथैव च

lābho hānirjayo vṛddhiḥ putrajanma tathaiva ca

नष्टं भ्रष्टं विनष्टं वा तत्सर्वन्त्रिगुणं भवेत्

naṣṭaṃ bhraṣṭaṃ vinaṣṭaṃ vā tatsarvantriguṇaṃ bhavet

अश्विनी भरणी चैव अश्लेषा पुष्यमेव च

aśvinī bharaṇī caiva aśleṣā puṣyameva ca

खातिश् चैव विशाखा च श्रवणं सप्तमं पुनः

khātiś caiva viśākhā ca śravaṇaṃ saptamaṃ punaḥ

एतानि दृढचक्षूंषि पश्यनति च दिशो दश

etāni dṛḍhacakṣūṃṣi paśyanati ca diśo daśa

यात्रासु दूरगस्यापि आगमः पुण्यगोचरे

yātrāsu dūragasyāpi āgamaḥ puṇyagocare

आषाढे रेवती चित्रा केकराणि पुनर्वसुः

āṣāḍhe revatī citrā kekarāṇi punarvasuḥ

एषु पञ्चसु ऋक्षेषु निर्गतस्यागमो भवेत्

eṣu pañcasu ṛkṣeṣu nirgatasyāgamo bhavet

कृत्तिका रोहिणी सौम्यं फल्गुनी च मघा तथा

kṛttikā rohiṇī saumyaṃ phalgunī ca maghā tathā

मूलं ज्येष्ठानुराधा च धनिष्ठा शततारकाः

mūlaṃ jyeṣṭhānurādhā ca dhaniṣṭhā śatatārakāḥ

पूर्वभाद्रपदा चैव चिपिटानि च तानि हि

pūrvabhādrapadā caiva cipiṭāni ca tāni hi

अध्वानं व्रजमानस्य पुनरेवागमो भवेत्

adhvānaṃ vrajamānasya punarevāgamo bhavet

हस्त उत्तरभाद्रश् च आर्द्राषाढा तथैव च

hasta uttarabhādraś ca ārdrāṣāḍhā tathaiva ca

नष्टार्थाश् चैव दृश्यन्ते सङ्ग्रामो नैव विद्यते

naṣṭārthāś caiva dṛśyante saṅgrāmo naiva vidyate

पुनर्वक्ष्यामि गण्डान्तमृक्षमध्ये यथा स्थितम्

punarvakṣyāmi gaṇḍāntamṛkṣamadhye yathā sthitam

रेवत्यन्ते चतुर्नाडी अश्विन्यादिचतुष्टयम्

revatyante caturnāḍī aśvinyādicatuṣṭayam

उभयोर्याममात्रन्तु वर्जयेत्तत् प्रयत्नतः

ubhayoryāmamātrantu varjayettat prayatnataḥ

अश्लेषान्ते मघादौ तु घटिकानां चतुष्टयम्

aśleṣānte maghādau tu ghaṭikānāṃ catuṣṭayam

द्वितीयं गण्डमाख्यातं तृतीयं भैरवि शृणु

dvitīyaṃ gaṇḍamākhyātaṃ tṛtīyaṃ bhairavi śṛṇu

ज्येष्ठाभमूलयोर्मध्ये उग्ररूपन्तु यामकम्

jyeṣṭhābhamūlayormadhye ugrarūpantu yāmakam

न कुर्याच्छुभकर्माणि यदीच्छेदात्मजीवितं

na kuryācchubhakarmāṇi yadīcchedātmajīvitaṃ