Chapter 127

विष्कुम्भे घटिकास्तिस्रः शूले पञ्च विवर्जयेत्

viṣkumbhe ghaṭikāstisraḥ śūle pañca vivarjayet

षट् षट् गण्डे ऽनिगण्डे च नव व्याद्यातवज्रयोः

ṣaṭ ṣaṭ gaṇḍe 'nigaṇḍe ca nava vyādyātavajrayoḥ

परिघे च व्यतीपाते उभयोरपि तद्दिनम्

parighe ca vyatīpāte ubhayorapi taddinam

वैधृते तद्दिनञ्चैव यात्रायुद्धादिकन्त्यजेत्

vaidhṛte taddinañcaiva yātrāyuddhādikantyajet

ग्रहैः शुभाशुभं वक्ष्ये देवि मेषादिराशितः

grahaiḥ śubhāśubhaṃ vakṣye devi meṣādirāśitaḥ

चन्द्रशुक्रौ च जन्मस्थ्यौ वर्जितौ शुभदायकौ

candraśukrau ca janmasthyau varjitau śubhadāyakau

द्वितीयो मङ्गलो ऽथार्कः सौरिश् चैव तु सैंहिकः

dvitīyo maṅgalo 'thārkaḥ sauriś caiva tu saiṃhikaḥ

द्रव्यनाशमलाभञ्च आहवे भङ्गमादिशेत्

dravyanāśamalābhañca āhave bhaṅgamādiśet

सोमो बुधो भृगुर्जीमो द्वितीयस्थाः शुभावहाः

somo budho bhṛgurjīmo dvitīyasthāḥ śubhāvahāḥ

तृतीयस्थो यदा भानुः शनिर्भौमो भृगुस् तथा

tṛtīyastho yadā bhānuḥ śanirbhaumo bhṛgus tathā

बुधश् चैवेन्दू राहुश् च सर्वे ते फलदा ग्रहाः

budhaś caivendū rāhuś ca sarve te phaladā grahāḥ

बुधशुक्रौ चतुर्थौ तु शेषाश् चैव भयावहाः

budhaśukrau caturthau tu śeṣāś caiva bhayāvahāḥ

पञ्चमस्थो यदा जीवः शुक्रः सौम्यश् च चन्द्रमाः

pañcamastho yadā jīvaḥ śukraḥ saumyaś ca candramāḥ

ददेत चेप्सितं लाभं षष्ठे स्थाने शुभो रविः

dadeta cepsitaṃ lābhaṃ ṣaṣṭhe sthāne śubho raviḥ

चन्द्रः सौरिर्मङ्गलश् च ग्रहा देवि स्वराशितः

candraḥ saurirmaṅgalaś ca grahā devi svarāśitaḥ

बुधश् च शुभदः षष्ठे त्यजेत् षष्ठं गुरुंभृगुं

budhaś ca śubhadaḥ ṣaṣṭhe tyajet ṣaṣṭhaṃ guruṃbhṛguṃ

सप्तमो ऽर्कः शनिर्भौमो राहुर्हान्यै सुखाय च

saptamo 'rkaḥ śanirbhaumo rāhurhānyai sukhāya ca

जीवो भृगुश् च सौम्यश् च ज्ञशुक्रो चाष्टमौ शुभौ

jīvo bhṛguś ca saumyaś ca jñaśukro cāṣṭamau śubhau

शेषा ग्रहास् तथा हान्यै ज्ञभृगू नवमौ शुभौ

śeṣā grahās tathā hānyai jñabhṛgū navamau śubhau

शेषा हान्यै च लाभाय दशमौ भृगुभास्करौ

śeṣā hānyai ca lābhāya daśamau bhṛgubhāskarau

शनिर्भौमश् च राहुश् च चन्द्रः सौम्यः शुभावहः

śanirbhaumaś ca rāhuś ca candraḥ saumyaḥ śubhāvahaḥ

शुभाश् चैकादशे सर्वे वर्जयेद्दशमे गुरुम्

śubhāś caikādaśe sarve varjayeddaśame gurum

बुधशुक्रौ द्वादशस्थौ शेषान् द्वादशगांस्त्यजेत्

budhaśukrau dvādaśasthau śeṣān dvādaśagāṃstyajet

अहोरात्रे द्वादश स्यू राशयस्तान् वदाम्यहम्

ahorātre dvādaśa syū rāśayastān vadāmyaham

मीनो मेषो ऽथ मिथुनञ्चतस्रो नाडयो वृषः

mīno meṣo 'tha mithunañcatasro nāḍayo vṛṣaḥ

षट् कर्कसिंहकन्याश् च तुला पञ्च च वृश्चिकः

ṣaṭ karkasiṃhakanyāś ca tulā pañca ca vṛścikaḥ

धनुर्नक्रो घटश् चैव सूर्यगो राशिराद्यकः

dhanurnakro ghaṭaś caiva sūryago rāśirādyakaḥ

चरस्थिरद्विःस्वभावा मेषाद्याः स्युर्यथाक्रमम्

carasthiradviḥsvabhāvā meṣādyāḥ syuryathākramam

कुलीरो मकरश् चैव तुलामेषादयश् चराः

kulīro makaraś caiva tulāmeṣādayaś carāḥ

चरकार्यं जयं काममाचरेच्च शुभशुभम्

carakāryaṃ jayaṃ kāmamācarecca śubhaśubham

स्थिरो वृषो हरिः कुम्भो वृश्चिकः स्थिरकार्यके

sthiro vṛṣo hariḥ kumbho vṛścikaḥ sthirakāryake

शीघ्रः समागमो नास्ति रोगार्तो नौव मुच्यते

śīghraḥ samāgamo nāsti rogārto nauva mucyate

मिथुनं कन्यका मौनी धनुश् च द्विःस्वभावकः

mithunaṃ kanyakā maunī dhanuś ca dviḥsvabhāvakaḥ

द्विःस्वभावाः शुभाश् चैते सर्वकार्येषु नित्यशः

dviḥsvabhāvāḥ śubhāś caite sarvakāryeṣu nityaśaḥ

यात्रावाणिज्यसङ्ग्रामे विवाहे राजदर्शने

yātrāvāṇijyasaṅgrāme vivāhe rājadarśane

वृद्धिं जयन्तथा लाभं युद्धे जयमवाप्नुयात्

vṛddhiṃ jayantathā lābhaṃ yuddhe jayamavāpnuyāt

अश्विनी विंशताराश् च तुरगस्याकृतिर्यथा

aśvinī viṃśatārāś ca turagasyākṛtiryathā

यद्यत्र कुरुते वृष्टिमेकरात्रं प्रवर्षति

yadyatra kurute vṛṣṭimekarātraṃ pravarṣati

यमभे तु यदा वृष्टिः पक्षमेकन्तु वर्षति

yamabhe tu yadā vṛṣṭiḥ pakṣamekantu varṣati