अथैकविंशाधिकशततमो ऽध्यायः
athaikaviṃśādhikaśatatamo 'dhyāyaḥ
ज्योतिःशास्त्रं
jyotiḥśāstraṃ
अग्निर् उवाच
agnir uvāca
ज्योतिःशास्त्रं प्रवक्ष्यामि शुभाशुभविवेकदं
jyotiḥśāstraṃ pravakṣyāmi śubhāśubhavivekadaṃ
चातुर्लक्षस्य सारं यत् तज् ज्ञात्वा सर्वविद्भवेत्
cāturlakṣasya sāraṃ yat taj jñātvā sarvavidbhavet
षडष्टके विवाहो न न च द्विद्वादशे स्त्रियाः
ṣaḍaṣṭake vivāho na na ca dvidvādaśe striyāḥ
न त्रिकोणे ह्य् अथ प्रीतिः शेषे च समसप्तके
na trikoṇe hy atha prītiḥ śeṣe ca samasaptake
द्विद्वादशे त्रिकोणे च मैत्रीक्षेत्रपयोर्यदि
dvidvādaśe trikoṇe ca maitrīkṣetrapayoryadi
भवेदेकाधिपत्यञ्च ताराप्रीतिरथापि वा
bhavedekādhipatyañca tārāprītirathāpi vā
तथापि कार्यः संयोगो न तु षट्काष्टके पुनः
tathāpi kāryaḥ saṃyogo na tu ṣaṭkāṣṭake punaḥ
जीवे भृगौ चास्तमिते म्रियते च पुमान् स्त्रिया
jīve bhṛgau cāstamite mriyate ca pumān striyā
गुरुक्षेत्रगते सूर्ये सूर्यक्षेत्रगते गुरौ
gurukṣetragate sūrye sūryakṣetragate gurau
विवाहं न प्रशंसन्ति कन्यावैधव्यकृद्भवेत्
vivāhaṃ na praśaṃsanti kanyāvaidhavyakṛdbhavet
अतिचारे त्रिपक्षं स्याद्वक्रे मासचतुष्टयं
aticāre tripakṣaṃ syādvakre māsacatuṣṭayaṃ
व्रतोद्वाहौ न कुर्वीत गुरोर्वक्रातिचारयोः
vratodvāhau na kurvīta gurorvakrāticārayoḥ
चैत्रे पौषे न रिक्तासु हरौ सुप्ते कुजे रवौ
caitre pauṣe na riktāsu harau supte kuje ravau
चन्द्रक्षये चाशुभं स्यात् सन्ध्याकालः शुभावहः
candrakṣaye cāśubhaṃ syāt sandhyākālaḥ śubhāvahaḥ
रोहिणी चोत्तरा मूलं स्वाती हस्तो ऽथ रेवती
rohiṇī cottarā mūlaṃ svātī hasto 'tha revatī
तुले न मिथुने शस्तो विवाहः परिकीर्तितः
tule na mithune śasto vivāhaḥ parikīrtitaḥ
विवाहे कर्णबेधे च व्रते पुंसवने तथा
vivāhe karṇabedhe ca vrate puṃsavane tathā
प्राशने चाद्यचूडायां बिद्धर्क्षञ्च विवर्जयेत्
prāśane cādyacūḍāyāṃ biddharkṣañca vivarjayet
श्रवणे मूलपुष्ये च सूर्यमङ्गलजीवके
śravaṇe mūlapuṣye ca sūryamaṅgalajīvake
कुम्भे सिंहे च मिथुने कर्म पुंसवनं स्मृतं
kumbhe siṃhe ca mithune karma puṃsavanaṃ smṛtaṃ
हस्ते मूले मृगे पौष्णे बुधे शुक्रे च निष्कृतिः
haste mūle mṛge pauṣṇe budhe śukre ca niṣkṛtiḥ
अर्केन्दुजीवभृगुजे मूले ताम्बूलभक्षणं
arkendujīvabhṛguje mūle tāmbūlabhakṣaṇaṃ
अन्नस्य प्राशनं शुक्रे जीवे मृगे च मौनके
annasya prāśanaṃ śukre jīve mṛge ca maunake
हस्तादिपञ्चके पुष्पे कृत्तिकादित्रये तथा
hastādipañcake puṣpe kṛttikāditraye tathā
अश्विन्यामथ रेवत्यां नवान्नफलभक्षणं
aśvinyāmatha revatyāṃ navānnaphalabhakṣaṇaṃ
पुष्पा हस्ता तथा ज्येष्ठा रोहिणी श्रवणाश्विनौ
puṣpā hastā tathā jyeṣṭhā rohiṇī śravaṇāśvinau
स्वातिसौम्ये च भैषज्यं कुर्यादन्यत्र वर्जयेत्
svātisaumye ca bhaiṣajyaṃ kuryādanyatra varjayet
पूर्वात्रयं मघा याम्यं पावनं श्रवणत्रयं
pūrvātrayaṃ maghā yāmyaṃ pāvanaṃ śravaṇatrayaṃ
भौमादित्यशनेर्वारे स्नातव्यं रोगमुक्तितः
bhaumādityaśanervāre snātavyaṃ rogamuktitaḥ
पार्थिवे चाष्टह्रींकारं मध्ये नाम च दिक्षु च
pārthive cāṣṭahrīṃkāraṃ madhye nāma ca dikṣu ca
ह्रीं पुटं पार्थिवे दिक्षु ह्रीं विदिक्षु लिखेद्वसून्
hrīṃ puṭaṃ pārthive dikṣu hrīṃ vidikṣu likhedvasūn
गोरोचनाकुङ्कुमेन भूर्जे वस्त्रे गले धृतं
gorocanākuṅkumena bhūrje vastre gale dhṛtaṃ
शत्रवो वशमायान्ति मन्त्रेणानेन निश्चितं
śatravo vaśamāyānti mantreṇānena niścitaṃ
श्रीं ह्रीं सम्पुटं नाम श्रीं ह्रीं पत्राष्टकेक्रमात्
śrīṃ hrīṃ sampuṭaṃ nāma śrīṃ hrīṃ patrāṣṭakekramāt
गोरोचनाकुङ्कुमेन भुर्जे ऽथ सुभगावृते
gorocanākuṅkumena bhurje 'tha subhagāvṛte
गोमध्यवागमः पत्रे हरिद्राया रसेन च
gomadhyavāgamaḥ patre haridrāyā rasena ca
शिलापट्टे ऽरीन् स्तम्भयति भूमावधोमुखीकृटं
śilāpaṭṭe 'rīn stambhayati bhūmāvadhomukhīkṛṭaṃ
ओं हूं सः सम्पुटन्नाम ओं हूं सः पत्राष्टकेक्रमात्
oṃ hūṃ saḥ sampuṭannāma oṃ hūṃ saḥ patrāṣṭakekramāt
गोरोचनाकुङ्कुमेन भूर्जे मृत्युनिवारणं
gorocanākuṅkumena bhūrje mṛtyunivāraṇaṃ
एकपञ्चनवप्रीत्यै द्विषत्द्वादशयोगकाः
ekapañcanavaprītyai dviṣatdvādaśayogakāḥ
त्रिसप्तैकादशे लाभो वेदाष्टद्वादशे रिपुः
trisaptaikādaśe lābho vedāṣṭadvādaśe ripuḥ
तनुर्धनञ्च सहजः सुहृत् सुतो रिपुस् तथा
tanurdhanañca sahajaḥ suhṛt suto ripus tathā
जाया निधनधर्मौ च कर्मायव्ययकं क्रमात्
jāyā nidhanadharmau ca karmāyavyayakaṃ kramāt
स्फुटं मेसादिलग्नेषु नवताराबलं वदेत्
sphuṭaṃ mesādilagneṣu navatārābalaṃ vadet
जन्म सम्पद्विपत् क्षेमं प्रत्यरिः साधकः क्रमात्
janma sampadvipat kṣemaṃ pratyariḥ sādhakaḥ kramāt
निधनं मित्रप्रममित्रं ताराबलं विदुः
nidhanaṃ mitrapramamitraṃ tārābalaṃ viduḥ
धारे ज्ञगुरुशुक्राणां सूर्याचन्द्रमसोस् तथा
dhāre jñaguruśukrāṇāṃ sūryācandramasos tathā
माघादिमसाषट्के तु क्षीरमाद्यं प्रशस्यते
māghādimasāṣaṭke tu kṣīramādyaṃ praśasyate
कर्णबेधो बुधे जीवे पुष्ये श्रवणचित्रयोः
karṇabedho budhe jīve puṣye śravaṇacitrayoḥ
पञ्चमे ऽब्दे चाध्ययनं षष्ठीं प्रतिपदन्त्यजेत्
pañcame 'bde cādhyayanaṃ ṣaṣṭhīṃ pratipadantyajet
रिक्तां पञ्चदशीं भौमं प्रार्च्य वाणीं हरिं श्रियं
riktāṃ pañcadaśīṃ bhaumaṃ prārcya vāṇīṃ hariṃ śriyaṃ
माघादिमासषत्के तु मखलाबन्धनं शुभं
māghādimāsaṣatke tu makhalābandhanaṃ śubhaṃ
चूडाकरणकाद्यञ्च श्रवणादौ न शस्यते
cūḍākaraṇakādyañca śravaṇādau na śasyate
अस्तं याते गुरो शुक्रे क्षीणे च शशलाञ्छने
astaṃ yāte guro śukre kṣīṇe ca śaśalāñchane
उपनीतस्य विप्रस्य मृत्युं जाड्यं विनिर्दिशेत्
upanītasya viprasya mṛtyuṃ jāḍyaṃ vinirdiśet
क्षौरर्क्षे शुभवारे च समावर्तनमिष्यते
kṣaurarkṣe śubhavāre ca samāvartanamiṣyate
शुभक्षेत्रे विलग्नेषु शुभयुक्तेक्षितेषु च
śubhakṣetre vilagneṣu śubhayuktekṣiteṣu ca
अश्विनीमघाचित्रासु स्वातीयाम्योत्तरासु च
aśvinīmaghācitrāsu svātīyāmyottarāsu ca
पुनर्वसौ तथा पुष्ये धनुर्वेदः प्रशस्यते
punarvasau tathā puṣye dhanurvedaḥ praśasyate
भरण्यार्द्रा मघाश्लेषा वह्निभगर्क्षयोस् तथा
bharaṇyārdrā maghāśleṣā vahnibhagarkṣayos tathā
जिजीविषुर् न कुर्वीत वस्त्रप्रावरणं नरः
jijīviṣur na kurvīta vastraprāvaraṇaṃ naraḥ
गुरौ शुक्रे बुधे वस्त्रं विवाहादौ न भादिकं
gurau śukre budhe vastraṃ vivāhādau na bhādikaṃ
रेवत्यश्विधनिष्ठासु हस्तादिषु च पञ्चसु
revatyaśvidhaniṣṭhāsu hastādiṣu ca pañcasu
शङ्खविद्रुमरत्नानां परिधानं प्रशस्यते
śaṅkhavidrumaratnānāṃ paridhānaṃ praśasyate
याम्यसर्पधनिष्ठासु त्रिषु पूर्वेषु वारुणे
yāmyasarpadhaniṣṭhāsu triṣu pūrveṣu vāruṇe
क्रीतं हानिकरं द्रव्यं विक्रीतं लाभकृद्भवेत्
krītaṃ hānikaraṃ dravyaṃ vikrītaṃ lābhakṛdbhavet
अश्विनीस्वातिचित्रासु रेवत्यां वारुणे हरौ
aśvinīsvāticitrāsu revatyāṃ vāruṇe harau
क्रीतं लाभकरं द्रवयं विक्रीतं हानिकृद्भवेत्
krītaṃ lābhakaraṃ dravayaṃ vikrītaṃ hānikṛdbhavet
भरणी त्रीणि पूर्वाणि आर्द्राश्लेषा मघानिलाः
bharaṇī trīṇi pūrvāṇi ārdrāśleṣā maghānilāḥ
वह्निज्येष्टाविशाखासु स्वामिनो नोपतिष्ठते
vahnijyeṣṭāviśākhāsu svāmino nopatiṣṭhate
द्रव्यं दत्तं प्रयुक्तं वा यत्र निक्षिप्यते धनं
dravyaṃ dattaṃ prayuktaṃ vā yatra nikṣipyate dhanaṃ
उत्तरे श्रवणे शाक्रे कुर्याद्राजाभिषेचनं
uttare śravaṇe śākre kuryādrājābhiṣecanaṃ
चैत्रं ज्येष्ठं तथा भाद्रमाश्विनं पौषमेव च
caitraṃ jyeṣṭhaṃ tathā bhādramāśvinaṃ pauṣameva ca
माघं चैव परित्यज्य शेषमासे गृहं शुभं
māghaṃ caiva parityajya śeṣamāse gṛhaṃ śubhaṃ
अश्विनी रोहिणी मूलमुत्तरात्रयमैन्दवं
aśvinī rohiṇī mūlamuttarātrayamaindavaṃ
स्वाती हस्तानुराधा च गृहारम्भे प्रशस्यते
svātī hastānurādhā ca gṛhārambhe praśasyate
आदित्यभौमवर्जन्तु वापीप्रासादके तथा
ādityabhaumavarjantu vāpīprāsādake tathā
सिंहराशिगते जीवे गुर्वादित्ये मलिम्लुचे
siṃharāśigate jīve gurvāditye malimluce
बाले वृद्धे ऽस्तगे शुक्रे गृहकर्म विवर्जयेत्
bāle vṛddhe 'stage śukre gṛhakarma vivarjayet
अग्निदाहो भयं रोगो राजपीडा धनक्षतिः
agnidāho bhayaṃ rogo rājapīḍā dhanakṣatiḥ
सङ्ग्रहे तृणकाष्ठानां कृते श्रवणपञ्चके
saṅgrahe tṛṇakāṣṭhānāṃ kṛte śravaṇapañcake
गृहप्रवेशनं कुर्याद्धनिष्ठोत्तरवारुणे
gṛhapraveśanaṃ kuryāddhaniṣṭhottaravāruṇe
नौकाया घटने द्वित्रिपञ्चसप्तत्रयोदशी
naukāyā ghaṭane dvitripañcasaptatrayodaśī
नृपदर्शी धनिष्ठासु हस्तापौष्णाश्विनीषु च
nṛpadarśī dhaniṣṭhāsu hastāpauṣṇāśvinīṣu ca
पूर्वात्रयन्धनिष्ठार्द्रा वह्निः सौम्यविशाखयोः
pūrvātrayandhaniṣṭhārdrā vahniḥ saumyaviśākhayoḥ
अश्लेषा चाश्विनी चैव यात्रासिद्धिस्तु सम्पदा
aśleṣā cāśvinī caiva yātrāsiddhistu sampadā
त्रिषूत्तरेषु रोहिण्यां सिनीबाली चतुर्दशी
triṣūttareṣu rohiṇyāṃ sinībālī caturdaśī
श्रवणा चैव हस्ता च चित्रा च वैष्णवी तथा
śravaṇā caiva hastā ca citrā ca vaiṣṇavī tathā
गोष्ठयात्रां न कुर्वीत प्रवेशं नैव कारयेत्
goṣṭhayātrāṃ na kurvīta praveśaṃ naiva kārayet
अनिलोत्तररोहिण्यां मृगमूलपुनर्वसौ
anilottararohiṇyāṃ mṛgamūlapunarvasau
पुष्यश्रवणहस्तेषु कृषिकर्म समाचरेत्
puṣyaśravaṇahasteṣu kṛṣikarma samācaret
पुनर्वसूत्तरास्वातीभगमूलेन्द्रवारुणे
punarvasūttarāsvātībhagamūlendravāruṇe
गुरोः शुक्रस्य वारे वा वारे च सोमभास्वतोः
guroḥ śukrasya vāre vā vāre ca somabhāsvatoḥ
वृषलग्ने च कर्तव्यङ्कन्यायां मिथुने तथा
vṛṣalagne ca kartavyaṅkanyāyāṃ mithune tathā
द्विपञ्च दशमी सप्त तृतीया च त्रयोदशी
dvipañca daśamī sapta tṛtīyā ca trayodaśī
रेवतीरोहिणीन्द्राग्निहस्तमैत्रोत्तरेषु च
revatīrohiṇīndrāgnihastamaitrottareṣu ca
मन्दारवर्जं वीजानि वापयेत् सम्पदर्थ्यपि
mandāravarjaṃ vījāni vāpayet sampadarthyapi
रेवतीहस्तमूलेषु श्रवणे भगमैत्रयोः
revatīhastamūleṣu śravaṇe bhagamaitrayoḥ
पितृदैवे तथा सौम्ये धान्यच्छेदं मृगोदये
pitṛdaive tathā saumye dhānyacchedaṃ mṛgodaye
हस्तचित्रादितिस्वातौ रेवत्यां श्रवणत्रये
hastacitrāditisvātau revatyāṃ śravaṇatraye
स्थिरे लग्ने गुरोर्वारे अथ भार्गवसौम्ययोः
sthire lagne gurorvāre atha bhārgavasaumyayoḥ
याम्यादितिमघाज्येष्ठासूतरेषु प्रवेशयेत्
yāmyāditimaghājyeṣṭhāsūtareṣu praveśayet
ओं धनदाय सर्वधनेशाय देहि मे धनं स्वाहा । ओं नवे वर्षे इलादेवि लोकसंवर्धनि कामरूपिणि देहि मे धनं स्वाहा ॥
oṃ dhanadāya sarvadhaneśāya dehi me dhanaṃ svāhā / oṃ nave varṣe ilādevi lokasaṃvardhani kāmarūpiṇi dehi me dhanaṃ svāhā ||
पत्रस्थं लिखितं धान्यराशिस्थं धान्यवर्धनं
patrasthaṃ likhitaṃ dhānyarāśisthaṃ dhānyavardhanaṃ
त्रिपूर्वासु विशाखायां धनिष्ठावारुणे ऽपि च
tripūrvāsu viśākhāyāṃ dhaniṣṭhāvāruṇe 'pi ca
एतेषु षट्सु विज्ञेयं धान्यनिष्क्रमणं बुधैः
eteṣu ṣaṭsu vijñeyaṃ dhānyaniṣkramaṇaṃ budhaiḥ
देवतारामवाप्यादिप्रतिष्ठोदङ्मुखे रवौ
devatārāmavāpyādipratiṣṭhodaṅmukhe ravau
मिथुनस्थे रवौ दर्शाद्यादि स्याद् द्वादशी तिथिः
mithunasthe ravau darśādyādi syād dvādaśī tithiḥ
सदा तत्रैव कर्तव्यं शयनं चक्रपाणिनः
sadā tatraiva kartavyaṃ śayanaṃ cakrapāṇinaḥ
सिंहतौलिङ्गते चार्के दर्शाद्यद्वादशीद्वयं
siṃhatauliṅgate cārke darśādyadvādaśīdvayaṃ
आदाविन्द्रसमुप्त्यानं प्रबोधश् च हरेः क्रमात्
ādāvindrasamuptyānaṃ prabodhaś ca hareḥ kramāt
तथा कन्यागते भानौ दुर्गोप्त्याने तथाष्टमी
tathā kanyāgate bhānau durgoptyāne tathāṣṭamī
त्रिपादेषु च ऋक्षेषु यदा भद्रा तिथिर्भवेत्
tripādeṣu ca ṛkṣeṣu yadā bhadrā tithirbhavet
भौमादित्यशनैश्चारि विज्ञेयं तत् त्रिपुष्करं
bhaumādityaśanaiścāri vijñeyaṃ tat tripuṣkaraṃ
सर्वकर्मण्युपादेया विशुद्धिश् चन्द्रतरयोः
sarvakarmaṇyupādeyā viśuddhiś candratarayoḥ
जन्माश्रितस्त्रिषष्ठश् च सप्तमो दशमस् तथा
janmāśritastriṣaṣṭhaś ca saptamo daśamas tathā
एकादशः शशी येषान्तेषामेव शुभं वदेत्
ekādaśaḥ śaśī yeṣānteṣāmeva śubhaṃ vadet
शुक्लपक्षे द्वीतीयश् च पञ्चमो नवमः शुभः
śuklapakṣe dvītīyaś ca pañcamo navamaḥ śubhaḥ
मित्रातिमित्रसाधकसपत्क्षेमादितारकाः
mitrātimitrasādhakasapatkṣemāditārakāḥ
जन्मना मृत्युमाप्नोति विपदा धनसङ्क्षयं
janmanā mṛtyumāpnoti vipadā dhanasaṅkṣayaṃ
प्रत्यरौ मरणं विद्यान्निधने याति पञ्चतां
pratyarau maraṇaṃ vidyānnidhane yāti pañcatāṃ
कृष्णाष्टमीदिनादूर्ध्वं
kṛṣṇāṣṭamīdinādūrdhvaṃ
यावच्छुक्लाष्टमीदिनं
yāvacchuklāṣṭamīdinaṃ
तावत् कालं शशी क्षीणः पूर्णस्तत्रोपरि स्मृतः
tāvat kālaṃ śaśī kṣīṇaḥ pūrṇastatropari smṛtaḥ
वृषे च मिथुने भानौ जीवे चन्द्रेन्द्रदैवते
vṛṣe ca mithune bhānau jīve candrendradaivate
पौर्णमासी गुरोर्वारे महाज्यौष्ठी प्रकीर्तिता
paurṇamāsī gurorvāre mahājyauṣṭhī prakīrtitā
ऐन्द्रे गुरुः शशी चैव प्राजापत्ये रविस् तथा
aindre guruḥ śaśī caiva prājāpatye ravis tathā
पूर्णिमा ज्येष्ठमासस्य महाज्यौष्ठी प्रकीर्तिता
pūrṇimā jyeṣṭhamāsasya mahājyauṣṭhī prakīrtitā
स्वात्यन्तरे यन्त्रनिष्ठे शक्रस्योत्थापयेद् ध्वजं
svātyantare yantraniṣṭhe śakrasyotthāpayed dhvajaṃ
हर्यृक्षपादे चाश्विन्यां सप्ताहान्ते विसर्जयेत्
haryṛkṣapāde cāśvinyāṃ saptāhānte visarjayet
सर्वं हेमसमन्दानं सर्वे ब्रह्मसमा द्विजाः
sarvaṃ hemasamandānaṃ sarve brahmasamā dvijāḥ
सर्वं गङ्गासमन्तोयं राहुग्रस्ते दिवाकरे
sarvaṃ gaṅgāsamantoyaṃ rāhugraste divākare
ध्वाङ्क्षी महोदरी घोरा मन्दा मन्दाकिनी द्विजाः
dhvāṅkṣī mahodarī ghorā mandā mandākinī dvijāḥ
राक्षसी च क्रमेणार्कात्सङ्क्रान्तिर्नामभिः स्मृता
rākṣasī ca krameṇārkātsaṅkrāntirnāmabhiḥ smṛtā
बालवे कौलवे नागे तैतिले करणे यदि
bālave kaulave nāge taitile karaṇe yadi
उत्तिष्ठन् सङ्क्रमत्यर्क्रस्तदा लोकः सुखी भवेत्
uttiṣṭhan saṅkramatyarkrastadā lokaḥ sukhī bhavet
गरे ववे वणिग्विष्टौ किन्तुघ्ने शकुनौ व्रजेत्
gare vave vaṇigviṣṭau kintughne śakunau vrajet
राज्ञो दोषेण लोको ऽयम्पीड्यते सम्पदा समं
rājño doṣeṇa loko 'yampīḍyate sampadā samaṃ
चतुष्पाद्विष्टिवाणिज्ये शयितः सङ्क्रमेद्रविः
catuṣpādviṣṭivāṇijye śayitaḥ saṅkramedraviḥ
दुर्भिक्षं राजसङ्ग्रामो दम्पत्योः संशयो भवेत्
durbhikṣaṃ rājasaṅgrāmo dampatyoḥ saṃśayo bhavet
आधाने जन्मनक्षत्रे व्याधौ क्लेशादिकं भवेत्
ādhāne janmanakṣatre vyādhau kleśādikaṃ bhavet
कृत्तिकायान्नवदिनन्त्रिरात्रं रोहिणीषु च
kṛttikāyānnavadinantrirātraṃ rohiṇīṣu ca
मृगशिरःपञ्चरात्रं आर्द्रासु प्राणनाशनं
mṛgaśiraḥpañcarātraṃ ārdrāsu prāṇanāśanaṃ
पुनर्वसौ च पुष्ये च सप्तरात्रं विधीयते
punarvasau ca puṣye ca saptarātraṃ vidhīyate
नवरात्रं तथाश्लेषा श्मशानान्तं मघासु च
navarātraṃ tathāśleṣā śmaśānāntaṃ maghāsu ca
द्वौ मासौ पूर्वफाल्गुन्यामुत्तरासु त्रिपञ्चकम्
dvau māsau pūrvaphālgunyāmuttarāsu tripañcakam
हस्ते तु दृश्यते चित्रा अर्धमासन्तु पीडनम्
haste tu dṛśyate citrā ardhamāsantu pīḍanam
मासद्वयन्तथा स्वातिर्विशाखा विंशतिर्दिनं
māsadvayantathā svātirviśākhā viṃśatirdinaṃ
मैत्रे चैव दशाहानि ज्येष्ठास्वेवार्धमासकम्
maitre caiva daśāhāni jyeṣṭhāsvevārdhamāsakam
मूले न जायते मोक्षः पूर्वाषाढा त्रिपञ्चकम्
mūle na jāyate mokṣaḥ pūrvāṣāḍhā tripañcakam
उत्तरा दिनविंशत्या द्वौ मासौ श्रवणेन च
uttarā dinaviṃśatyā dvau māsau śravaṇena ca
धनिष्ठा चार्धमासञ्च वारुणे च दशाहकम्
dhaniṣṭhā cārdhamāsañca vāruṇe ca daśāhakam
न च भाद्रपदे मोक्ष उत्तरासु त्रिपञ्चकम्
na ca bhādrapade mokṣa uttarāsu tripañcakam
रेवती दशरात्रञ्च अहोरात्रन्तथाश्विनी
revatī daśarātrañca ahorātrantathāśvinī
भरण्यां प्राणहानिः स्याद् गायत्रीहोमतः शुभं
bharaṇyāṃ prāṇahāniḥ syād gāyatrīhomataḥ śubhaṃ
पञ्चधान्यतिलाज्याद्यैर् धेनुदानन्द्विजे शमं
pañcadhānyatilājyādyair dhenudānandvije śamaṃ
दशा सूर्यस्य षष्ठाब्दा इन्दोः पञ्चदशैव तु
daśā sūryasya ṣaṣṭhābdā indoḥ pañcadaśaiva tu
अष्टौ वर्षाणि भौमस्य दशसप्तदशा बुधे
aṣṭau varṣāṇi bhaumasya daśasaptadaśā budhe
दशाब्दानि दशा पङ्गोरूनविंशद्गुरोर्दृशा
daśābdāni daśā paṅgorūnaviṃśadgurordṛśā
राहोर्द्वादशवर्षाणि भार्गवस्यैकविंशतिः
rāhordvādaśavarṣāṇi bhārgavasyaikaviṃśatiḥ
इत्य् आग्नेये महापुराणे ज्योतिःशस्त्रसारो नाम एकविंशत्यधिकशततमो ऽध्यायः ॥
ity āgneye mahāpurāṇe jyotiḥśastrasāro nāma ekaviṃśatyadhikaśatatamo 'dhyāyaḥ ||