15 ॥ इति श्रीमार्कण्डेयपुराणेठकिंपुरुषादिवर्षवर्णनम् ऽ नाम षष्टितमो ऽध्यायः एकषष्टितमो ऽध्यायः- 61 क्रौष्टुकिरुवाच कथितं भवता सम्यग् यत् पृष्टो ऽसि महामुने । भूसमुद्रादिसंस्थानं प्रमाणानि तथा ग्रहाः
15 // iti śrīmārkaṇḍeyapurāṇeṭhakiṃpuruṣādivarṣavarṇanam ' nāma ṣaṣṭitamo 'dhyāyaḥ ekaṣaṣṭitamo 'dhyāyaḥ- 61 krauṣṭukiruvāca kathitaṃ bhavatā samyag yat pṛṣṭo 'si mahāmune / bhūsamudrādisaṃsthānaṃ pramāṇāni tathā grahāḥ
1 ॥ तेषाञ्चैव प्रमाणञ्च नक्षत्राणाञ्च संस्थितिः । भूरादयस्तथा लोकाः पातालान्यखिलान्यपि
1 // teṣāñcaiva pramāṇañca nakṣatrāṇāñca saṃsthitiḥ / bhūrādayastathā lokāḥ pātālānyakhilānyapi
2 ॥ स्वायम्भुवं तथा ख्यातं मुने ! मन्वन्तरं मम । तदन्तराण्यहं श्रोतुमिच्छे मन्वन्तराणि वै । मन्वन्तराधिपान् देवानृषींस्तत्तनयान्नृपान्
2 // svāyambhuvaṃ tathā khyātaṃ mune ! manvantaraṃ mama / tadantarāṇyahaṃ śrotumicche manvantarāṇi vai / manvantarādhipān devānṛṣīṃstattanayānnṛpān
3 ॥ मार्कण्डेय उवाच मन्वन्तरं मयाख्यातं तव स्वायम्भुवं च यत् । स्वारोचिषाख्यमन्यत् तु शृणु तस्मादनन्तरम्
3 // mārkaṇḍeya uvāca manvantaraṃ mayākhyātaṃ tava svāyambhuvaṃ ca yat / svārociṣākhyamanyat tu śṛṇu tasmādanantaram
4 ॥ कश्चिद् द्विजातिप्रवरः पुरे ऽभूदरुणास्पदे । वरुणायास्तटे विप्रो रूपेणात्यश्विनावपि
4 // kaścid dvijātipravaraḥ pure 'bhūdaruṇāspade / varuṇāyāstaṭe vipro rūpeṇātyaśvināvapi
5 ॥ मृदुस्वभावः सद्वृत्तो वेदवेदाङ्गपारगः । सदातिथिप्रियो रात्रावागतानां समाश्रयः
5 // mṛdusvabhāvaḥ sadvṛtto vedavedāṅgapāragaḥ / sadātithipriyo rātrāvāgatānāṃ samāśrayaḥ
6 ॥ तस्य बुद्धिरियं त्वासीदहं पश्ये वसुन्धराम् । अतिरम्यवनोद्यानां नानानगरशोभिताम्
6 // tasya buddhiriyaṃ tvāsīdahaṃ paśye vasundharām / atiramyavanodyānāṃ nānānagaraśobhitām
7 ॥ अथागतो।ञतिथिः कश्चित् कदाचित्तस्य वेश्मनि । नानौषधिप्रभावज्ञो मन्त्रविद्याविशारदः
7 // athāgato/ñatithiḥ kaścit kadācittasya veśmani / nānauṣadhiprabhāvajño mantravidyāviśāradaḥ
8 ॥ अभ्यर्थितस्तु तेनासौ श्रद्धापूतेन चेतसा । तस्याचख्यौ स देशांश्च रम्याणि नगराणि च
8 // abhyarthitastu tenāsau śraddhāpūtena cetasā / tasyācakhyau sa deśāṃśca ramyāṇi nagarāṇi ca
9 ॥ वनानि नद्यः शैलांश्च पुण्यान्यायतनानि च । स ततो विस्मयाविष्टः प्राह तं द्विजसत्तमम्
9 // vanāni nadyaḥ śailāṃśca puṇyānyāyatanāni ca / sa tato vismayāviṣṭaḥ prāha taṃ dvijasattamam
10 ॥ अनेकदेशदर्शित्वेनातिश्रमसमन्वितः । त्वं नातिवृद्धो वयसा नातिवृत्तश्च यौवनात् । कथमल्पेन कालेन पृथिवीमटसि द्विज
10 // anekadeśadarśitvenātiśramasamanvitaḥ / tvaṃ nātivṛddho vayasā nātivṛttaśca yauvanāt / kathamalpena kālena pṛthivīmaṭasi dvija
11 ॥ ब्राह्मण उवाच मन्त्रौषधिप्रभावेण विप्राप्रतिहता गतिः । योजनानां सहस्रं हि दिनार्धेन व्रजाम्यम्
11 // brāhmaṇa uvāca mantrauṣadhiprabhāveṇa viprāpratihatā gatiḥ / yojanānāṃ sahasraṃ hi dinārdhena vrajāmyam
12 ॥ मार्कण्डेय उवाच ततः स विप्रस्तं भूयः प्रत्युवाचेदमादरात् । श्रद्धधानो वचस्तस्य ब्राह्मणस्य विपश्चितः
12 // mārkaṇḍeya uvāca tataḥ sa viprastaṃ bhūyaḥ pratyuvācedamādarāt / śraddhadhāno vacastasya brāhmaṇasya vipaścitaḥ
13 ॥ मम प्रसादं भगवन् ! कुरु मन्त्रप्रभावजम् । द्रष्टुमेतां मम महीमतीवेच्छा प्रवर्तते
13 // mama prasādaṃ bhagavan ! kuru mantraprabhāvajam / draṣṭumetāṃ mama mahīmatīvecchā pravartate
14 ॥ प्रादात् स ब्राह्मणश्चास्मै पादलेपमुदारधीः । अभिमन्त्रयामास दिशं तेनाख्याताञ्च यत्नतः
14 // prādāt sa brāhmaṇaścāsmai pādalepamudāradhīḥ / abhimantrayāmāsa diśaṃ tenākhyātāñca yatnataḥ
15 ॥ तेनानुलिप्तपादो ऽथ स द्विजो द्विजसत्तम । हिमवन्तमगाद् द्रष्टुं नानाप्रस्त्रवणान्वितम्
15 // tenānuliptapādo 'tha sa dvijo dvijasattama / himavantamagād draṣṭuṃ nānāprastravaṇānvitam
16 ॥ सहस्रं योजनानां हि दिनार्धेन व्रजामि यत् । आयास्यामीति सञ्चिन्त्य तदर्धेनापरेण हि
16 // sahasraṃ yojanānāṃ hi dinārdhena vrajāmi yat / āyāsyāmīti sañcintya tadardhenāpareṇa hi
17 ॥ सम्प्राप्तो हिमवत्पृष्ठं नातिश्रान्ततनुर्द्विज । विचचार ततस्तत्र तुहिनाचलभूतले
17 // samprāpto himavatpṛṣṭhaṃ nātiśrāntatanurdvija / vicacāra tatastatra tuhinācalabhūtale
18 ॥ पादाक्रान्तेन तस्याथ तुहिनेन विलीयता । प्रक्षालितः पादलेपः परमौषधिसम्भः
18 // pādākrāntena tasyātha tuhinena vilīyatā / prakṣālitaḥ pādalepaḥ paramauṣadhisambhaḥ
19 ॥ ततो जडगतिः सो ऽथ इतश्चेतश्च पर्यटन् । ददर्शातिमनोज्ञानि सानूनि हिमभूभृतः
19 // tato jaḍagatiḥ so 'tha itaścetaśca paryaṭan / dadarśātimanojñāni sānūni himabhūbhṛtaḥ
20 ॥ सिद्धगन्धर्वजुष्टानि किन्नराभिरतानि च । क्रीडाविहाररम्याणि देवादीनामितस्ततः
20 // siddhagandharvajuṣṭāni kinnarābhiratāni ca / krīḍāvihāraramyāṇi devādīnāmitastataḥ
21 ॥ दिव्याप्सरोगणशतैराकीर्णान्यवलोकयन् । नातृप्यत द्विजश्रेष्ठः प्रोद्भूतपुलको मुने
21 // divyāpsarogaṇaśatairākīrṇānyavalokayan / nātṛpyata dvijaśreṣṭhaḥ prodbhūtapulako mune
22 ॥ क्वचित् प्रस्त्रवणाद् भ्रष्टजलपातमनोरमम् । प्रनृत्यच्छिखिकेकाभिरन्यतश्च निनादितम्
22 // kvacit prastravaṇād bhraṣṭajalapātamanoramam / pranṛtyacchikhikekābhiranyataśca nināditam
23 ॥ दात्यूहकोयष्टिकाद्यैः क्वचिच्चातिमनोहरैः । पुंस्कोकिलकलालापैः श्रुतिहारिभिरन्वितम्
23 // dātyūhakoyaṣṭikādyaiḥ kvaciccātimanoharaiḥ / puṃskokilakalālāpaiḥ śrutihāribhiranvitam
24 ॥ प्रफुल्लतरुगन्धेन वासितानिलवीजितम् । मुदा युक्तः स ददृशे हिमवन्तं महागिरिम्
24 // praphullatarugandhena vāsitānilavījitam / mudā yuktaḥ sa dadṛśe himavantaṃ mahāgirim
25 ॥ दृष्ट्वा चैतं द्विजसुतो हिमवन्तं महाचलम् । श्वो द्रक्ष्यामीति संचिन्त्य मतिञ्चक्रे गृहं प्रति
25 // dṛṣṭvā caitaṃ dvijasuto himavantaṃ mahācalam / śvo drakṣyāmīti saṃcintya matiñcakre gṛhaṃ prati
26 ॥ विभ्रष्टपादलेपो ऽथ चिरेण जडितक्रमः । चिन्तयामास किमिदं मयाज्ञानादनुष्ठितम्
26 // vibhraṣṭapādalepo 'tha cireṇa jaḍitakramaḥ / cintayāmāsa kimidaṃ mayājñānādanuṣṭhitam
27 ॥ यदि प्रलेपो नष्टो मे विलीनो हिमवारिणा । शैलो ऽतिदुर्गमश्चायं दूरञ्चाहमिहागतः
27 // yadi pralepo naṣṭo me vilīno himavāriṇā / śailo 'tidurgamaścāyaṃ dūrañcāhamihāgataḥ
28 ॥ प्रयास्यामि क्रियाहानिमग्निशुश्रूषणादिकम् । कथमत्र करिष्यामि सङ्कटं महदागतम्
28 // prayāsyāmi kriyāhānimagniśuśrūṣaṇādikam / kathamatra kariṣyāmi saṅkaṭaṃ mahadāgatam
29 ॥ इदं रम्यमिदं रम्यमित्यस्मिन् वरपर्वते । शक्तदृष्टिरहं तृप्तिं न यास्ये ऽब्दशतैरपि
29 // idaṃ ramyamidaṃ ramyamityasmin varaparvate / śaktadṛṣṭirahaṃ tṛptiṃ na yāsye 'bdaśatairapi
30 ॥ किन्नराणां कलालापाः समन्ताच्छ्रोत्रहारिणः । प्रफुल्लतरुगन्धांश्च घ्राणमत्यन्तमृच्छति
30 // kinnarāṇāṃ kalālāpāḥ samantācchrotrahāriṇaḥ / praphullatarugandhāṃśca ghrāṇamatyantamṛcchati
31 ॥ सुखस्पर्शस्तथा वायुः फलानि रसवन्ति च । हरन्ति प्रसभं चेतो मनोज्ञानि सरांसि च
31 // sukhasparśastathā vāyuḥ phalāni rasavanti ca / haranti prasabhaṃ ceto manojñāni sarāṃsi ca
32 ॥ एवं गते तु पश्येयं यदि कञ्चित् तपोनिधिम् । स ममोपदिशेन्मार्गं गमनाय गृहं प्रति
32 // evaṃ gate tu paśyeyaṃ yadi kañcit taponidhim / sa mamopadiśenmārgaṃ gamanāya gṛhaṃ prati
33 ॥ मार्कण्डेय उवाच स एवं चिन्तयन् विप्रो बभ्राम च हिमाचले । भ्रष्टपादौषधिबलो वैक्लवं परमं गतः
33 // mārkaṇḍeya uvāca sa evaṃ cintayan vipro babhrāma ca himācale / bhraṣṭapādauṣadhibalo vaiklavaṃ paramaṃ gataḥ
34 ॥ तं ददर्श भ्रमन्तञ्च मुनिश्रेष्ठं वरूथिनी । वराप्सरा महाभागा मौलेया रूपशालिनी
34 // taṃ dadarśa bhramantañca muniśreṣṭhaṃ varūthinī / varāpsarā mahābhāgā mauleyā rūpaśālinī
35 ॥ तस्मिन् दृष्टे ततः साभूद् द्विजवर्ये वरूथिनी । मदनाकृष्टहृदया सानुरागा हि तत्क्षणात्
35 // tasmin dṛṣṭe tataḥ sābhūd dvijavarye varūthinī / madanākṛṣṭahṛdayā sānurāgā hi tatkṣaṇāt
36 ॥ चिन्तयामास को न्वेष रमणीयतमाकृतिः । सफलं मे भवेज्जन्म यदि मां नावमन्यते
36 // cintayāmāsa ko nveṣa ramaṇīyatamākṛtiḥ / saphalaṃ me bhavejjanma yadi māṃ nāvamanyate
37 ॥ अहो ऽस्य रूपमाधुर्यमहो ऽस्य ललिता गतिः । अहो गम्भीरता दृष्टेः कुतो ऽस्य सदृशो भुवि
37 // aho 'sya rūpamādhuryamaho 'sya lalitā gatiḥ / aho gambhīratā dṛṣṭeḥ kuto 'sya sadṛśo bhuvi
38 ॥ दृष्टा देवास्तथा दैत्याः सिद्धगन्धर्वपन्नगाः । कथमेको ऽपि नास्त्यस्य तुल्यरूपो महात्मनः
38 // dṛṣṭā devāstathā daityāḥ siddhagandharvapannagāḥ / kathameko 'pi nāstyasya tulyarūpo mahātmanaḥ
39 ॥ यथाहमस्मिन्मय्येष सानुरागस्तथा यदि । भवेदत्र मया कार्यस्तत्कृतः पुण्यसञ्चयः
39 // yathāhamasminmayyeṣa sānurāgastathā yadi / bhavedatra mayā kāryastatkṛtaḥ puṇyasañcayaḥ
40 ॥ यद्येष मयि सुस्त्रिग्धां दृष्टिमद्य निपातयेत् । कृतपुण्या न मत्तो ऽन्या त्रैलोक्ये वनिता ततः
40 // yadyeṣa mayi sustrigdhāṃ dṛṣṭimadya nipātayet / kṛtapuṇyā na matto 'nyā trailokye vanitā tataḥ
41 ॥ मार्कण्डेय उवाच एवं सञ्चिन्तयन्ती सा दिव्ययोषित् स्मरातुरा । आत्मानं दर्शयामास कमनीयतराकृतिम्
41 // mārkaṇḍeya uvāca evaṃ sañcintayantī sā divyayoṣit smarāturā / ātmānaṃ darśayāmāsa kamanīyatarākṛtim
42 ॥ तान्तु दृष्ट्वा द्विजसुतश्चारुरूपां वरूथिनीम् । सोपचारं समागम्य वाक्यमेतदुवाच ह
42 // tāntu dṛṣṭvā dvijasutaścārurūpāṃ varūthinīm / sopacāraṃ samāgamya vākyametaduvāca ha
43 ॥ का त्वं कमलगर्भाभे कस्य किं वानुतिष्ठसि । ब्राह्मणो ऽहमिहायातो नगरादरुणास्पदात्
43 // kā tvaṃ kamalagarbhābhe kasya kiṃ vānutiṣṭhasi / brāhmaṇo 'hamihāyāto nagarādaruṇāspadāt
44 ॥ पादलेपो ऽत्र मे ध्वस्तो विलीनो हिमवारिणा । यस्यानुभावादत्राहमागतो मदिरेक्षणे
44 // pādalepo 'tra me dhvasto vilīno himavāriṇā / yasyānubhāvādatrāhamāgato madirekṣaṇe
45 ॥ वरूथिन्युवाच मौलेयाहं महाभागा नाम्ना ख्याता वरूथिनी । विचरामि सदैवात्र रमणीये महाचले
45 // varūthinyuvāca mauleyāhaṃ mahābhāgā nāmnā khyātā varūthinī / vicarāmi sadaivātra ramaṇīye mahācale
46 ॥ साहं त्वद्दर्शनाद्विप्र ! कामवक्तव्यताङ्गता । प्रशाधि यन्मया कार्यं त्वदधीनास्मि साम्प्रतम्
46 // sāhaṃ tvaddarśanādvipra ! kāmavaktavyatāṅgatā / praśādhi yanmayā kāryaṃ tvadadhīnāsmi sāmpratam
47 ॥ ब्राह्मण उवाच येनोपायेन गच्छेयं निजगेहं शुचिस्मिते । तन्ममाचक्ष्व कल्याणि हानिर्नो ऽखिलकर्मणाम्
47 // brāhmaṇa uvāca yenopāyena gaccheyaṃ nijagehaṃ śucismite / tanmamācakṣva kalyāṇi hānirno 'khilakarmaṇām
48 ॥ नित्यनैमित्तिकानान्तु महाहानिर्द्विजन्मनः । भवत्यतस्त्वं हे भद्रे ! मामुद्धर हिमालयात्
48 // nityanaimittikānāntu mahāhānirdvijanmanaḥ / bhavatyatastvaṃ he bhadre ! māmuddhara himālayāt
49 ॥ प्रशस्यते न प्रवासो ब्राह्मणानां कदाचम । अपराद्धं न मे भीरु देशदर्शनकौतुकम्
49 // praśasyate na pravāso brāhmaṇānāṃ kadācama / aparāddhaṃ na me bhīru deśadarśanakautukam
50 ॥ सतो गृहे द्विजाग्र्यस्य निष्पत्तिः सर्वकर्मणाम् । नित्यनैमित्तिकानाञ्च हानिरेवं प्रवासिनः
50 // sato gṛhe dvijāgryasya niṣpattiḥ sarvakarmaṇām / nityanaimittikānāñca hānirevaṃ pravāsinaḥ
51 ॥ सा त्वं किं बहुनोक्तेन तथा कुरु यशस्विनि । यथा नास्तं गेत सूर्ये पश्यामि निजमालयम्
51 // sā tvaṃ kiṃ bahunoktena tathā kuru yaśasvini / yathā nāstaṃ geta sūrye paśyāmi nijamālayam
52 ॥ वरूथिन्युवाच मैवं ब्रूहि महाभाग ! मा भूत्स दिवसो मम । मां परित्यज्य यत्र त्वं निजगेहमुपैष्यसि
52 // varūthinyuvāca maivaṃ brūhi mahābhāga ! mā bhūtsa divaso mama / māṃ parityajya yatra tvaṃ nijagehamupaiṣyasi
53 ॥ अहो रम्यतरः स्वर्गो न यतो द्विजनन्दन । अतो वयं परित्यज्य तिष्ठामो ऽत्र सुरालयम्
53 // aho ramyataraḥ svargo na yato dvijanandana / ato vayaṃ parityajya tiṣṭhāmo 'tra surālayam
54 ॥ स त्वं सह मया कान्त ! कान्ते ऽत्र तुहिनाचले । रममाणो न मर्त्यानां बान्धवानां स्मरिष्यसि
54 // sa tvaṃ saha mayā kānta ! kānte 'tra tuhinācale / ramamāṇo na martyānāṃ bāndhavānāṃ smariṣyasi
55 ॥ स्त्रजो वस्त्राण्यलङ्कारान् भोगभोज्यानुलेपनम् । दास्याम्यत्र तथाहन्ते स्मरेण वशगा हृता
55 // strajo vastrāṇyalaṅkārān bhogabhojyānulepanam / dāsyāmyatra tathāhante smareṇa vaśagā hṛtā
56 ॥ वीणावेणुस्वनं गीतं किन्नराणां मनोरमम् । अङ्गाह्लादकरो वायुरुष्णान्नमुदकं शुचि
56 // vīṇāveṇusvanaṃ gītaṃ kinnarāṇāṃ manoramam / aṅgāhlādakaro vāyuruṣṇānnamudakaṃ śuci
57 ॥ मनोभिलषिता शय्या सुगन्धमनुलेपनम् । इहासतो महाभाग गृहे किन्ते निजे ऽधिकम्
57 // manobhilaṣitā śayyā sugandhamanulepanam / ihāsato mahābhāga gṛhe kinte nije 'dhikam
58 ॥ इहासतो नैव जरा कदाचित्ते भविष्यति । त्रिदशानामियं भूमिर्यौवनोपचयप्रदा
58 // ihāsato naiva jarā kadācitte bhaviṣyati / tridaśānāmiyaṃ bhūmiryauvanopacayapradā
59 ॥ इत्युक्त्वा सानुरागा सा सहसा कमलेक्षणा । आलिलिङ्ग प्रसीदेति वदन्ती कलमुन्मनाः
59 // ityuktvā sānurāgā sā sahasā kamalekṣaṇā / āliliṅga prasīdeti vadantī kalamunmanāḥ
60 ॥ ब्राह्मण उवाच मा मां स्प्राक्षीर्व्रजान्यत्र दुष्टे यः सदृशस्तव । मयान्यथा याचिता त्वमन्यथैवाप्युपैषि माम्
60 // brāhmaṇa uvāca mā māṃ sprākṣīrvrajānyatra duṣṭe yaḥ sadṛśastava / mayānyathā yācitā tvamanyathaivāpyupaiṣi mām
61 ॥ सायं प्रातर्हुतं हव्यं लोकान् यच्छति शाश्वतान् । त्रैलोक्यमेतदखिलं मूढे इव्ये प्रतिष्ठितम्
61 // sāyaṃ prātarhutaṃ havyaṃ lokān yacchati śāśvatān / trailokyametadakhilaṃ mūḍhe ivye pratiṣṭhitam
62 ॥ वरूथिन्युवाच किं ते नाहं प्रिया विप्र ! रमणीयो न किं गिरिः । गन्धर्वान् किन्नरादींश्च त्यक्त्वाभीष्टो हि कस्तव
62 // varūthinyuvāca kiṃ te nāhaṃ priyā vipra ! ramaṇīyo na kiṃ giriḥ / gandharvān kinnarādīṃśca tyaktvābhīṣṭo hi kastava
63 ॥ निजमालयमप्यस्माद्भवान् यास्यत्यसंशयम् । स्वल्पकालं मया सार्धं भुङ्क्षव भोगान् सुदुर्लभान्
63 // nijamālayamapyasmādbhavān yāsyatyasaṃśayam / svalpakālaṃ mayā sārdhaṃ bhuṅkṣava bhogān sudurlabhān
64 ॥ ब्राह्मण उवाच अष्टावात्मगुणा ये हि तेषामादौ दया द्विज । तां करोषि कथं न त्वं मयि सद्धर्मपालक
64 // brāhmaṇa uvāca aṣṭāvātmaguṇā ye hi teṣāmādau dayā dvija / tāṃ karoṣi kathaṃ na tvaṃ mayi saddharmapālaka
66 ॥ त्वद्विमुक्ता न जीवामि तथा प्रीतिमती त्वयि । नैतद्वदाम्यहं मिथ्या प्रसीद कुलनन्दन
66 // tvadvimuktā na jīvāmi tathā prītimatī tvayi / naitadvadāmyahaṃ mithyā prasīda kulanandana
67 ॥ ब्राह्मण उवाच यदि प्रीतिमती सत्यं नोपचाराद्ब्रवीषि माम् । तदुपायं समाचक्ष्व येन यामि स्वमालयम्
67 // brāhmaṇa uvāca yadi prītimatī satyaṃ nopacārādbravīṣi mām / tadupāyaṃ samācakṣva yena yāmi svamālayam
68 ॥ वरूथिन्युवाच निजमालयमप्यस्माद्भवान् यास्यत्यसंशयम् । स्वल्पकालं मया सार्धं भुङ्क्ष्व भोगान् सुदुर्लभान्
68 // varūthinyuvāca nijamālayamapyasmādbhavān yāsyatyasaṃśayam / svalpakālaṃ mayā sārdhaṃ bhuṅkṣva bhogān sudurlabhān
69 ॥ ब्राह्मण उवाच न भोगार्थाय विप्राणां शस्यते हि वरूथिनी । इह क्लेशाय विप्राणां चेष्टा प्रेत्याफलप्रदा
69 // brāhmaṇa uvāca na bhogārthāya viprāṇāṃ śasyate hi varūthinī / iha kleśāya viprāṇāṃ ceṣṭā pretyāphalapradā
70 ॥ वरूथिन्युवाच सन्त्राणं म्रियमाणाया मम कृत्वा परत्र ते । पुण्यस्यैव फलं भावि भोगाश्चान्यत्र जन्मनि
70 // varūthinyuvāca santrāṇaṃ mriyamāṇāyā mama kṛtvā paratra te / puṇyasyaiva phalaṃ bhāvi bhogāścānyatra janmani
71 ॥ एवं च द्वयमप्यत्र तवोपचयकारणम् । प्रत्याख्यानादहं मृत्युं त्वञ्च पापमवाप्स्यसि
71 // evaṃ ca dvayamapyatra tavopacayakāraṇam / pratyākhyānādahaṃ mṛtyuṃ tvañca pāpamavāpsyasi
72 ॥ ब्राह्मण उवाच परस्त्रियं नाभिलषेदित्युचुर्गुरवो मम । तेन त्वां नाभिवाञ्छामि कामं विलप शुष्य वा
72 // brāhmaṇa uvāca parastriyaṃ nābhilaṣedityucurguravo mama / tena tvāṃ nābhivāñchāmi kāmaṃ vilapa śuṣya vā
73 ॥ मार्कण्डेय उवाच इत्युक्त्वा स महाभागः स्पृष्ट्वापः प्रयतः शुचिः । प्राहेदं प्रणिपत्याग्निं गार्हपत्यमुपांशुना
73 // mārkaṇḍeya uvāca ityuktvā sa mahābhāgaḥ spṛṣṭvāpaḥ prayataḥ śuciḥ / prāhedaṃ praṇipatyāgniṃ gārhapatyamupāṃśunā
74 ॥ भगवन् ! गार्हपत्याग्ने योनिस्त्वं सर्वकर्मणाम् । त्वत्त आहवनीयो ऽग्निर्दक्षिणाग्निश्च नान्यतः
74 // bhagavan ! gārhapatyāgne yonistvaṃ sarvakarmaṇām / tvatta āhavanīyo 'gnirdakṣiṇāgniśca nānyataḥ
75 ॥ युष्मदाप्यायनाद् देवा वृष्टिशस्यादिहेतवः । भवन्ति शस्यादखिलं जगद्भवति नान्यतः
75 // yuṣmadāpyāyanād devā vṛṣṭiśasyādihetavaḥ / bhavanti śasyādakhilaṃ jagadbhavati nānyataḥ
76 ॥ एवं त्वत्तो भवत्येतद्येन सत्येन वै जगत् । तथाहमद्य स्वं गेहं पश्येयं सति भास्करे
76 // evaṃ tvatto bhavatyetadyena satyena vai jagat / tathāhamadya svaṃ gehaṃ paśyeyaṃ sati bhāskare
77 ॥ यथा वै वैदिकं कर्म स्वकाले नोज्झितं मया । तेन सत्येन पश्येयं गृहस्थो ऽद्य दिवाकरम्
77 // yathā vai vaidikaṃ karma svakāle nojjhitaṃ mayā / tena satyena paśyeyaṃ gṛhastho 'dya divākaram
78 ॥ यथा च न परद्रव्ये परदारे च मे मतिः । कदाचित् साभिलाषाभूत्तथैतत् सिद्धिमेतु मे
78 // yathā ca na paradravye paradāre ca me matiḥ / kadācit sābhilāṣābhūttathaitat siddhimetu me