79 ॥ इति श्रीमार्कण्डेयपुराणेठब्राह्मणवाक्यम्ऽ नामैकषष्टितमो ऽध्यायः द्विषष्टितमो ऽध्यायः- 62 मार्कण्डेय उवाच एवन्तु वदतस्तस्य द्विजपुत्रस्य पावकः । गार्हपत्यः शरीरे तु सन्निधानमथाकरोत्
79 // iti śrīmārkaṇḍeyapurāṇeṭhabrāhmaṇavākyam' nāmaikaṣaṣṭitamo 'dhyāyaḥ dviṣaṣṭitamo 'dhyāyaḥ- 62 mārkaṇḍeya uvāca evantu vadatastasya dvijaputrasya pāvakaḥ / gārhapatyaḥ śarīre tu sannidhānamathākarot
1 ॥ तेन चाधिष्ठितः सो ऽथ प्रभामण्डलमध्यगः । व्यदीपयत तं देशं मूर्तिमानिव हव्यवाट्
1 // tena cādhiṣṭhitaḥ so 'tha prabhāmaṇḍalamadhyagaḥ / vyadīpayata taṃ deśaṃ mūrtimāniva havyavāṭ
2 ॥ तस्यास्तु सुतरां तत्र तादृग्रूपे द्विजन्मनि । अनुरागो ऽभवद्विप्रं पश्यन्त्या देवयोषितः
2 // tasyāstu sutarāṃ tatra tādṛgrūpe dvijanmani / anurāgo 'bhavadvipraṃ paśyantyā devayoṣitaḥ
3 ॥ ततः सो ऽधिष्ठितस्तेन हव्यवाहेन तत्क्षणात् । यथापूर्वं तथा गन्तुं प्रवृत्तो द्विजनन्दनः
3 // tataḥ so 'dhiṣṭhitastena havyavāhena tatkṣaṇāt / yathāpūrvaṃ tathā gantuṃ pravṛtto dvijanandanaḥ
4 ॥ जगाम च त्वरायुक्तस्तया देव्या निरीक्षितः । आदृष्टिपातात्तन्वङ्ग्या निश्वासोत्कम्पिकन्धरम्
4 // jagāma ca tvarāyuktastayā devyā nirīkṣitaḥ / ādṛṣṭipātāttanvaṅgyā niśvāsotkampikandharam
5 ॥ ततः क्षणेनैव तदा निजगेहमवाप्य सः । यथाप्रोक्तं द्विजश्रेष्ठश्चकार सकलाः क्रियाः
5 // tataḥ kṣaṇenaiva tadā nijagehamavāpya saḥ / yathāproktaṃ dvijaśreṣṭhaścakāra sakalāḥ kriyāḥ
6 ॥ अथ सा चारुसर्वाङ्गी तत्रासक्तात्ममानसा । निश्वासपरमा निन्ये दिनशेषं तथा निशाम्
6 // atha sā cārusarvāṅgī tatrāsaktātmamānasā / niśvāsaparamā ninye dinaśeṣaṃ tathā niśām
7 ॥ निश्वसन्त्यनवद्याङ्गी हाहेति रुदती मुहुः । मन्दभाग्येति चात्मानं निनिन्द मदिरेक्षणा
7 // niśvasantyanavadyāṅgī hāheti rudatī muhuḥ / mandabhāgyeti cātmānaṃ nininda madirekṣaṇā
8 ॥ न विहारे न चाहारे रमणीये न वा वने । न कन्दरेषु रम्येषु सा बबन्ध तदा रतिम्
8 // na vihāre na cāhāre ramaṇīye na vā vane / na kandareṣu ramyeṣu sā babandha tadā ratim
9 ॥ चकार रममाणे च चक्रवाकयुगे स्पृहाम् । मुक्ता तेन वरारोहा निनिन्द निजयौवनम्
9 // cakāra ramamāṇe ca cakravākayuge spṛhām / muktā tena varārohā nininda nijayauvanam
10 ॥ क्वागताहमिमं शैलं दुष्टदैवबलात्कृता । क्व च प्राप्तः स मे दृष्टेर्गोचरं तादृशो नरः
10 // kvāgatāhamimaṃ śailaṃ duṣṭadaivabalātkṛtā / kva ca prāptaḥ sa me dṛṣṭergocaraṃ tādṛśo naraḥ
11 ॥ यद्यद्य स महाभागो न मे सङ्गमुपैष्यति । तत्कामाग्निरवश्यं मां क्षपयिष्यति दुः सहः
11 // yadyadya sa mahābhāgo na me saṅgamupaiṣyati / tatkāmāgniravaśyaṃ māṃ kṣapayiṣyati duḥ sahaḥ
12 ॥ रमणीयमभूद्यत्तत्पुंस्कोकिलनिनादितम् । तेन हीनन्तदेवैतद्दहतीवाद्य मामलम्
12 // ramaṇīyamabhūdyattatpuṃskokilanināditam / tena hīnantadevaitaddahatīvādya māmalam
13 ॥ मार्कण्डेय उवाच इत्थं सा मदनाविष्टा जगाम मुनिसत्तम । ववृधे च तदा रागस्तस्यास्तस्मिन् प्रतिक्षणम्
13 // mārkaṇḍeya uvāca itthaṃ sā madanāviṣṭā jagāma munisattama / vavṛdhe ca tadā rāgastasyāstasmin pratikṣaṇam
14 ॥ कलिर्नाम्ना तु गन्धर्वः सानुरागो निराकृतः । तया पूर्वमभूत्सो ऽथ तदवस्थां ददर्श ताम्
14 // kalirnāmnā tu gandharvaḥ sānurāgo nirākṛtaḥ / tayā pūrvamabhūtso 'tha tadavasthāṃ dadarśa tām
15 ॥ स चिन्तयामास तदा किं न्वेषा गजगामिनी । निश्वासपवनम्लाना गिरावत्र वरूथिनी
15 // sa cintayāmāsa tadā kiṃ nveṣā gajagāminī / niśvāsapavanamlānā girāvatra varūthinī
16 ॥ मुनिशापक्षता किंनु केनचित् किं विमानिता । वाष्पवारिपरिक्लिन्नमियन्धत्ते यतो मुखम्
16 // muniśāpakṣatā kiṃnu kenacit kiṃ vimānitā / vāṣpavāripariklinnamiyandhatte yato mukham
17 ॥ ततः स दध्यौ सुचिरं तमर्थं कौतुकात् कलिः । ज्ञातवांश्च प्रभावेण समाधेः स यथातथम्
17 // tataḥ sa dadhyau suciraṃ tamarthaṃ kautukāt kaliḥ / jñātavāṃśca prabhāveṇa samādheḥ sa yathātatham
18 ॥ पुनः स चिन्तयामास तद्विज्ञाय मुनेः कलिः । ममोपपादितं साधु भाग्यैरेतत्पुराकृतैः
18 // punaḥ sa cintayāmāsa tadvijñāya muneḥ kaliḥ / mamopapāditaṃ sādhu bhāgyairetatpurākṛtaiḥ
19 ॥ मयैषा सानुरागेण बहुशः प्रार्थिता सती । निराकृतवती सेयमद्य प्राप्या भविष्यति
19 // mayaiṣā sānurāgeṇa bahuśaḥ prārthitā satī / nirākṛtavatī seyamadya prāpyā bhaviṣyati
20 ॥ मानुषे सानुरागेयं तत्र तद्रूपधारिणि । रंस्यते मय्यसन्दिग्धं किं कालेन करोमि तत्
20 // mānuṣe sānurāgeyaṃ tatra tadrūpadhāriṇi / raṃsyate mayyasandigdhaṃ kiṃ kālena karomi tat
21 ॥ मार्कण्डेय उवाच आत्मप्रभावेण ततस्तस्य रूपं द्विजन्मनः । कृत्वा चचार यत्रास्ते निषण्णा सा वरूथिनी
21 // mārkaṇḍeya uvāca ātmaprabhāveṇa tatastasya rūpaṃ dvijanmanaḥ / kṛtvā cacāra yatrāste niṣaṇṇā sā varūthinī
22 ॥ सा तं दृष्ट्वा वरारोहा किञ्चिदुत्फुल्ललोचना । समेत्य प्राह तन्वङ्गी प्रसीदेति पुनः पुनः
22 // sā taṃ dṛṣṭvā varārohā kiñcidutphullalocanā / sametya prāha tanvaṅgī prasīdeti punaḥ punaḥ
23 ॥ त्वया त्यक्ता न सन्देहः परित्यक्ष्यामि जीवितम् । तत्राधर्मः कष्टतरः क्रियालोपो भविष्यति
23 // tvayā tyaktā na sandehaḥ parityakṣyāmi jīvitam / tatrādharmaḥ kaṣṭataraḥ kriyālopo bhaviṣyati
24 ॥ मया समेत्य रम्ये ऽस्मिन् महाकन्दरकन्दरे । मत्परित्राणजं धर्ममवश्यं प्रतिपत्स्यसे
24 // mayā sametya ramye 'smin mahākandarakandare / matparitrāṇajaṃ dharmamavaśyaṃ pratipatsyase
25 ॥ आयुषः सावशेषं मे नृनमस्ति महामते । निवृत्तस्तेन नूनं त्वं हृदयाह्लादकारकः
25 // āyuṣaḥ sāvaśeṣaṃ me nṛnamasti mahāmate / nivṛttastena nūnaṃ tvaṃ hṛdayāhlādakārakaḥ
26 ॥ कलिरुवाच किं करोमि क्रियाहानिर्भवत्यत्र सतो मम । त्वमप्येवंविधं वाक्यं ब्रवीषि तनुमध्यमे
26 // kaliruvāca kiṃ karomi kriyāhānirbhavatyatra sato mama / tvamapyevaṃvidhaṃ vākyaṃ bravīṣi tanumadhyame
27 ॥ तदहं सङ्कटं प्राप्तो यद्ब्रवीमि करोषि तत् । यदि स्यात् सङ्गमो मे ऽद्य भवत्या सह नान्यथा
27 // tadahaṃ saṅkaṭaṃ prāpto yadbravīmi karoṣi tat / yadi syāt saṅgamo me 'dya bhavatyā saha nānyathā
28 ॥ वरूथिनी उवाच प्रसीद यद्ब्रवीषि त्वं तत्करोमि न ते मृषा । ब्रवीम्येतदनाशङ्कं यत्ते कार्यं मयाधुना
28 // varūthinī uvāca prasīda yadbravīṣi tvaṃ tatkaromi na te mṛṣā / bravīmyetadanāśaṅkaṃ yatte kāryaṃ mayādhunā
29 ॥ कलिरुवाच नाद्य संभोगसमये द्रष्टव्यो ऽहं त्वया वने । निमीलिताक्ष्याः संसर्गस्तव सुभ्रु मया सह
29 // kaliruvāca nādya saṃbhogasamaye draṣṭavyo 'haṃ tvayā vane / nimīlitākṣyāḥ saṃsargastava subhru mayā saha
30 ॥ वरूथिन्युवाच एवं भवतु भद्रन्ते यथेच्छसि तथास्तु तत् । मया सर्वप्रकारं हि वशे स्थेयं तवाधुना
30 // varūthinyuvāca evaṃ bhavatu bhadrante yathecchasi tathāstu tat / mayā sarvaprakāraṃ hi vaśe stheyaṃ tavādhunā