95 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपख्याने श्रीचक्रराजरथज्ञेयचक्ररथपर्वस्थदेवतानामप्रकाशनं नामैकोनविंशो ऽध्यायः हयग्रीव उवाच किरिचक्ररथेन्द्रस्य पञ्चपर्वसमाश्रिताः । देवताश्च शृणु प्राज्ञ नाम यच्छृण्वतां जयः
95 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopakhyāne śrīcakrarājarathajñeyacakrarathaparvasthadevatānāmaprakāśanaṃ nāmaikonaviṃśo 'dhyāyaḥ hayagrīva uvāca kiricakrarathendrasya pañcaparvasamāśritāḥ / devatāśca śṛṇu prājña nāma yacchṛṇvatāṃ jayaḥ
1 ॥ प्रथमं पर्वबिन्द्वाख्यं संप्राप्ता दण्डनायिका । सा तत्र जगदुद्दण्डकण्टकव्रातघस्मरी
1 // prathamaṃ parvabindvākhyaṃ saṃprāptā daṇḍanāyikā / sā tatra jagaduddaṇḍakaṇṭakavrātaghasmarī
2 ॥ नानाविधाभिर्ज्वालाभिर्नर्तयन्ती जयश्रियम्
2 // nānāvidhābhirjvālābhirnartayantī jayaśriyam
3 ॥ उद्दण्डपोत्रनिर्घातनिर्भिन्नोद्धतदानवाः । दंष्ट्राबालमृगाङ्कांशुविभावनविभावरी
3 // uddaṇḍapotranirghātanirbhinnoddhatadānavāḥ / daṃṣṭrābālamṛgāṅkāṃśuvibhāvanavibhāvarī
4 ॥ प्रावृषेण्यपयोवाहव्यूहनीलवपुर्ल्लता । किरिचक्ररथेन्द्रस्य सालङ्कारायते सदा । पोत्रिणी पुत्रिताशेषविश्वावर्तकदंबिका
4 // prāvṛṣeṇyapayovāhavyūhanīlavapurllatā / kiricakrarathendrasya sālaṅkārāyate sadā / potriṇī putritāśeṣaviśvāvartakadaṃbikā
5 ॥ तस्यैव रथनाभस्य द्वितीयं पर्व संश्रिताः । जृंभिनी मोहिनी चैव स्तंभिनी तिस्र एव हि । उत्फुल्लदाडिमीप्रख्यं सर्वदानवमर्दनाः
5 // tasyaiva rathanābhasya dvitīyaṃ parva saṃśritāḥ / jṛṃbhinī mohinī caiva staṃbhinī tisra eva hi / utphulladāḍimīprakhyaṃ sarvadānavamardanāḥ
6 ॥ मुसलं च हलं हालापात्रं मणिगणर्पितम् । ज्वलन्माणिक्यवलयैर्बि भ्राणाः पाणिपल्लवैः
6 // musalaṃ ca halaṃ hālāpātraṃ maṇigaṇarpitam / jvalanmāṇikyavalayairbi bhrāṇāḥ pāṇipallavaiḥ
7 ॥ अतितीक्ष्णकरालाक्ष्यो ज्वालाभिर्दैत्यसैनिकान् । दहन्त्य इव निःशङ्कं सेवन्ते सूकराननाम्
7 // atitīkṣṇakarālākṣyo jvālābhirdaityasainikān / dahantya iva niḥśaṅkaṃ sevante sūkarānanām
8 ॥ किरिचक्ररथेन्द्रस्य तृतीयं पर्व संश्रिताः । अन्धिन्याद्याः पञ्च देव्यो देवीयन्त्रकृतास्पदाः
8 // kiricakrarathendrasya tṛtīyaṃ parva saṃśritāḥ / andhinyādyāḥ pañca devyo devīyantrakṛtāspadāḥ
9 ॥ कठोरेणाट्टहासेन भिन्दन्त्यो भुवनत्रयम् । ज्वाला इव तु कल्पग्नेरङ्गनावेषमाश्रिताः
9 // kaṭhoreṇāṭṭahāsena bhindantyo bhuvanatrayam / jvālā iva tu kalpagneraṅganāveṣamāśritāḥ
10 ॥ भण्डासुरस्य सर्वेषां सैन्यानां रुधिरप्लुतिम् । लिलिक्षमाणा जिह्वाभिर्लेलिहानाभिरुज्ज्वलाः
10 // bhaṇḍāsurasya sarveṣāṃ sainyānāṃ rudhiraplutim / lilikṣamāṇā jihvābhirlelihānābhirujjvalāḥ
11 ॥ सेवन्तें सततं दण्डनाथामुद्दण्डविक्रमाम् । किरिचक्ररथेन्द्रस्य चतुर्थं पर्व संश्रिताः
11 // sevanteṃ satataṃ daṇḍanāthāmuddaṇḍavikramām / kiricakrarathendrasya caturthaṃ parva saṃśritāḥ
12 ॥ ब्रह्माद्याः पञ्चमीवर्ज्या अष्टमीरवर्जिता अपि । षडेव देव्यः षट्चक्रज्वलज्ज्वालाकलेवराः
12 // brahmādyāḥ pañcamīvarjyā aṣṭamīravarjitā api / ṣaḍeva devyaḥ ṣaṭcakrajvalajjvālākalevarāḥ
13 ॥ महता विक्रमौघेण विबन्त्य इव दानवान् । आज्ञया दण्डनाथायास्तं प्रदेशमुपासते
13 // mahatā vikramaugheṇa vibantya iva dānavān / ājñayā daṇḍanāthāyāstaṃ pradeśamupāsate
14 ॥ तस्यैव पर्वणो ऽधस्तात्त्वरिताः स्थानमाश्रिताः । यक्षिणी शङ्खिनी चैव लाकिनी हाकिनी तथा
14 // tasyaiva parvaṇo 'dhastāttvaritāḥ sthānamāśritāḥ / yakṣiṇī śaṅkhinī caiva lākinī hākinī tathā
15 ॥ शाकिनी डाकिनी चैव तासामैक्यस्वरूपिणी । हाकिनी सप्तमीत्येताश्चण्डदोर्दण्डविक्रमाः
15 // śākinī ḍākinī caiva tāsāmaikyasvarūpiṇī / hākinī saptamītyetāścaṇḍadordaṇḍavikramāḥ
16 ॥ पिबन्त्य इव भूतानि पिबन्त्य इव मेदिनीम् । त्वचं रक्तं तथा मांसं मेदो ऽस्थि च विरोधिनाम्
16 // pibantya iva bhūtāni pibantya iva medinīm / tvacaṃ raktaṃ tathā māṃsaṃ medo 'sthi ca virodhinām
17 ॥ मज्जानमथ शुक्रं च पिबन्तयो विकटाननाः । निष्ठुरैः सिंहनादैश्च पूरयन्त्यो दिशो दश
17 // majjānamatha śukraṃ ca pibantayo vikaṭānanāḥ / niṣṭhuraiḥ siṃhanādaiśca pūrayantyo diśo daśa
18 ॥ धातुनाथा इति प्रोक्ता अणिमाद्यष्टसिद्धिदाः । मोहने मारणे चैव स्तंभने ताडने तथा
18 // dhātunāthā iti proktā aṇimādyaṣṭasiddhidāḥ / mohane māraṇe caiva staṃbhane tāḍane tathā
19 ॥ भक्षणे दुष्टदैत्यानामामूलं च निकृन्तने । पण्डिताः खण्डिताशेषविपदो भक्तिशालिषु
19 // bhakṣaṇe duṣṭadaityānāmāmūlaṃ ca nikṛntane / paṇḍitāḥ khaṇḍitāśeṣavipado bhaktiśāliṣu
20 ॥ धातुनाथा इतिप्रोक्ताः सर्वधातुषु संस्थिताः । सप्तापि वारिधीनूर्मिमालासंचुंबितांबरान्
20 // dhātunāthā itiproktāḥ sarvadhātuṣu saṃsthitāḥ / saptāpi vāridhīnūrmimālāsaṃcuṃbitāṃbarān
21 ॥ क्षणर्धेनैव निष्पातुं निष्पन्नबहुसाहसाः । शकटा कारदन्ताश्च भयङ्करविलोचनाः
21 // kṣaṇardhenaiva niṣpātuṃ niṣpannabahusāhasāḥ / śakaṭā kāradantāśca bhayaṅkaravilocanāḥ
22 ॥ स्वस्वामिनीद्रोहकृतां स्वकीयसमयद्रुहाम् । वैदिकद्रोहणादेव द्रोहिणां वीरवैरिणाम्
22 // svasvāminīdrohakṛtāṃ svakīyasamayadruhām / vaidikadrohaṇādeva drohiṇāṃ vīravairiṇām
23 ॥ यज्ञद्रोहकृतां दुष्टदैत्यानां भक्षणे समाः । नित्यमेव च सेवन्ते पोत्रिणीं दण्डनायिकाम्
23 // yajñadrohakṛtāṃ duṣṭadaityānāṃ bhakṣaṇe samāḥ / nityameva ca sevante potriṇīṃ daṇḍanāyikām
24 ॥ तस्यैव पर्वणः पार्श्वे द्वितीये दिव्यमन्दिरे । क्रोधिनी स्तंभिनी ख्याते वर्तेते देवते उभे
24 // tasyaiva parvaṇaḥ pārśve dvitīye divyamandire / krodhinī staṃbhinī khyāte vartete devate ubhe
25 ॥ चामरे वीजयन्त्यौ च लोलकङ्कणदोर्लते । देवद्विषां चमूरक्तहालापानमहोद्धते
25 // cāmare vījayantyau ca lolakaṅkaṇadorlate / devadviṣāṃ camūraktahālāpānamahoddhate
26 ॥ सदा विघूर्णमानाक्ष्यौ सदा प्रहसितानने । अथ तस्य रथेन्द्रस्य किरिचक्राश्रितस्य च
26 // sadā vighūrṇamānākṣyau sadā prahasitānane / atha tasya rathendrasya kiricakrāśritasya ca
27 ॥ पार्श्वद्वयकृतावासमायुधद्वन्द्वमुत्तमम् । हलं च मुसलं चैव देवतारूपमास्थितम्
27 // pārśvadvayakṛtāvāsamāyudhadvandvamuttamam / halaṃ ca musalaṃ caiva devatārūpamāsthitam
28 ॥ स्वकीयमुकुटस्थाने स्वकीयायुधविग्रहम् । आबिभ्राणं जग षिघस्मरं विबुधैः स्मृतम्
28 // svakīyamukuṭasthāne svakīyāyudhavigraham / ābibhrāṇaṃ jaga ṣighasmaraṃ vibudhaiḥ smṛtam
29 ॥ एतदायुधयुग्मेन ललिता दडनायिका । खण्डयिष्यति संग्रामं विषङ्गं नामदानहम्
29 // etadāyudhayugmena lalitā daḍanāyikā / khaṇḍayiṣyati saṃgrāmaṃ viṣaṅgaṃ nāmadānaham
30 ॥ तस्यैव पर्वणो दण्डनाथाया अग्रसीमनि । वर्त्तमानो महाभीमः सिंहो नादैर्ध्वनन्नभः
30 // tasyaiva parvaṇo daṇḍanāthāyā agrasīmani / varttamāno mahābhīmaḥ siṃho nādairdhvanannabhaḥ
31 ॥ दंष्ट्राकटकटात्कार बधिरीकृतदिङ्मुखः । चण्डोच्चण्ड इति ख्यातश्चतुर्हस्तस्त्रिलोचनः
31 // daṃṣṭrākaṭakaṭātkāra badhirīkṛtadiṅmukhaḥ / caṇḍoccaṇḍa iti khyātaścaturhastastrilocanaḥ
32 ॥ शूलखड्गप्रेतपाशान्दधानो दीप्तविग्रहः । सदा संसेवते देवीं पश्यन्नेव हि पोत्रिणीम्
32 // śūlakhaḍgapretapāśāndadhāno dīptavigrahaḥ / sadā saṃsevate devīṃ paśyanneva hi potriṇīm
33 ॥ किरिचक्ररथेन्द्रस्य षष्टं पर्व समाश्रिताः । वार्त्ताल्याद्या अष्ट देव्यो दिक्ष्वष्टासूपविश्रुताः
33 // kiricakrarathendrasya ṣaṣṭaṃ parva samāśritāḥ / vārttālyādyā aṣṭa devyo dikṣvaṣṭāsūpaviśrutāḥ
34 ॥ अष्टपर्वतनिष्पातघोरनिर्घातनिःस्वनाः । अष्टनागस्फुरद्भूषा अनष्टबलतेजसः
34 // aṣṭaparvataniṣpātaghoranirghātaniḥsvanāḥ / aṣṭanāgasphuradbhūṣā anaṣṭabalatejasaḥ
35 ॥ प्रकृष्टदोष्प्रकाण्डोष्महुतदानवकोटयः । सेवन्ते ललितां देव्यो दण्डनाथामहर्निशम्
35 // prakṛṣṭadoṣprakāṇḍoṣmahutadānavakoṭayaḥ / sevante lalitāṃ devyo daṇḍanāthāmaharniśam
36 ॥ तासामाख्याश्च विख्याताः समाकर्णय कुंभज । वार्ताली चैव वाराहीसा वाराहमुखी परा
36 // tāsāmākhyāśca vikhyātāḥ samākarṇaya kuṃbhaja / vārtālī caiva vārāhīsā vārāhamukhī parā
37 ॥ अन्धिनी रोधिनी चैव जृंभिणी चैव मोहिनी । स्तंभिनीति रिपुक्षोभस्तंभनोच्चाटनक्षमाः
37 // andhinī rodhinī caiva jṛṃbhiṇī caiva mohinī / staṃbhinīti ripukṣobhastaṃbhanoccāṭanakṣamāḥ
38 ॥ तासां च पर्वणो वामभागे सततसंस्थितिः । दण्डनाथोपवाह्यस्तु कासरो धूसराकृतिः
38 // tāsāṃ ca parvaṇo vāmabhāge satatasaṃsthitiḥ / daṇḍanāthopavāhyastu kāsaro dhūsarākṛtiḥ
39 ॥ अर्धक्रोशायतः शृङ्गद्वितये क्रोशविग्रहः । खड्गवन्निष्ठुरैर्लोमजातैः संवृतविग्रहः
39 // ardhakrośāyataḥ śṛṅgadvitaye krośavigrahaḥ / khaḍgavanniṣṭhurairlomajātaiḥ saṃvṛtavigrahaḥ
40 ॥ कालदण्डवदुच्चण्डबालकाण्डभयङ्करः । नीलाञ्जनाचलप्रख्यो विकटोन्नतरुष्टभूः
40 // kāladaṇḍavaduccaṇḍabālakāṇḍabhayaṅkaraḥ / nīlāñjanācalaprakhyo vikaṭonnataruṣṭabhūḥ
41 ॥ महानीलगिरिश्रेष्ठगरिष्ठस्कन्धमण्डलः । प्रभूतोष्मलनिश्वासप्रसराकंपितांबुधिः
41 // mahānīlagiriśreṣṭhagariṣṭhaskandhamaṇḍalaḥ / prabhūtoṣmalaniśvāsaprasarākaṃpitāṃbudhiḥ
42 ॥ घर्घरध्वनिना कालमहिषं विहसन्निव । वर्त्तते खुरविक्षिप्तपुष्कलावर्तवारिदः
42 // ghargharadhvaninā kālamahiṣaṃ vihasanniva / varttate khuravikṣiptapuṣkalāvartavāridaḥ
43 ॥ तस्यैव पर्वणो ऽधस्ताच्चित्रस्थानकृतालयाः । इन्द्रादयो ऽनेकभेदा दिशामष्टकदेवताः
43 // tasyaiva parvaṇo 'dhastāccitrasthānakṛtālayāḥ / indrādayo 'nekabhedā diśāmaṣṭakadevatāḥ
44 ॥ ललितायां कार्यसिद्धिं विज्ञापयितुमागताः । इन्द्रश्चाप्सरसश्चैव स चतुष्षष्टिकोटयः
44 // lalitāyāṃ kāryasiddhiṃ vijñāpayitumāgatāḥ / indraścāpsarasaścaiva sa catuṣṣaṣṭikoṭayaḥ
45 ॥ सिद्ध अग्निश्च साध्याश्च विश्वेदेवास्तथापरे । विश्वकर्मा मयश्चैव मातरश्च बलोन्नताः
45 // siddha agniśca sādhyāśca viśvedevāstathāpare / viśvakarmā mayaścaiva mātaraśca balonnatāḥ
46 ॥ रुद्राश्च परिचाराश्च रुद्राश्चैव पिशाचकाः । क्रन्दञ्चिरक्षसां नाथा राक्षसा बहवस्तथा
46 // rudrāśca paricārāśca rudrāścaiva piśācakāḥ / krandañcirakṣasāṃ nāthā rākṣasā bahavastathā
47 ॥ मित्राश्च तत्र गन्धर्वाः सदा गानविशारदाः । विश्वावसुप्रभृतयो विख्यातास्तत्पुरोगमाः
47 // mitrāśca tatra gandharvāḥ sadā gānaviśāradāḥ / viśvāvasuprabhṛtayo vikhyātāstatpurogamāḥ
48 ॥ तथा भूतगणाश्चान्ये वरुणो वासवः परे । विद्याधराः किन्नराश्च मारुतेश्वर एव च
48 // tathā bhūtagaṇāścānye varuṇo vāsavaḥ pare / vidyādharāḥ kinnarāśca māruteśvara eva ca
49 ॥ तथा चित्ररथश्चैव रथकारक कारकाः । तुंबुरुर्नारदो यक्षः सोमोयक्षेश्वरस्तथा
49 // tathā citrarathaścaiva rathakāraka kārakāḥ / tuṃbururnārado yakṣaḥ somoyakṣeśvarastathā
50 ॥ देवैश्च भगवांस्तत्र गोविन्दः कमलापतिः । ईशानश्च जगच्चक्रभक्षकः शूलभीषणः
50 // devaiśca bhagavāṃstatra govindaḥ kamalāpatiḥ / īśānaśca jagaccakrabhakṣakaḥ śūlabhīṣaṇaḥ
51 ॥ ब्रह्मा चैवाश्विनीपुत्रो वैद्यविद्याविशारदौ । धन्वन्तरिश्च भगवानथान्ये गणनायकाः
51 // brahmā caivāśvinīputro vaidyavidyāviśāradau / dhanvantariśca bhagavānathānye gaṇanāyakāḥ
52 ॥ कटकाण्डगलद्दान संतर्पितमधुव्रताः । अनन्तो वासुकिस्तक्षः कर्केटः पद्म एव च
52 // kaṭakāṇḍagaladdāna saṃtarpitamadhuvratāḥ / ananto vāsukistakṣaḥ karkeṭaḥ padma eva ca
53 ॥ महापद्मः शङ्खपालो गुलिकः सुबलस्तथा । एते नागेश्वराश्चैव नागकोटिभिरावृताः
53 // mahāpadmaḥ śaṅkhapālo gulikaḥ subalastathā / ete nāgeśvarāścaiva nāgakoṭibhirāvṛtāḥ
54 ॥ एवंप्रकारा बहवो देवतास्तत्र जाग्रति । पूर्वादिदिशमारभ्य परितः कृतमन्दिराः
54 // evaṃprakārā bahavo devatāstatra jāgrati / pūrvādidiśamārabhya paritaḥ kṛtamandirāḥ
55 ॥ तत्रैव देवताश्चक्रे चक्राकारा मरुद्दिशः । आश्रित्य किल वर्तन्ते तदधिष्ठातृदेवताः
55 // tatraiva devatāścakre cakrākārā maruddiśaḥ / āśritya kila vartante tadadhiṣṭhātṛdevatāḥ
56 ॥ जृंभिणी स्तंभिनी चैव मोहिनी तिस्र एव च । तस्यैव पर्वणः प्रान्ते किरिचक्रस्य भास्वतः
56 // jṛṃbhiṇī staṃbhinī caiva mohinī tisra eva ca / tasyaiva parvaṇaḥ prānte kiricakrasya bhāsvataḥ
57 ॥ कपालं च गदां बिभ्रदूर्ध्वकेशो महावपुः । पातालतलजंबालबहुला कारकालिमा
57 // kapālaṃ ca gadāṃ bibhradūrdhvakeśo mahāvapuḥ / pātālatalajaṃbālabahulā kārakālimā
58 ॥ अट्टहासमहावज्रदीर्णब्रह्माण्डमण्डलः । भिन्दन्डमरुकध्वानै रोदसीकन्दरोदरम्
58 // aṭṭahāsamahāvajradīrṇabrahmāṇḍamaṇḍalaḥ / bhindanḍamarukadhvānai rodasīkandarodaram
59 ॥ फूत्कारीत्रिपुरायुक्तं फणिपाशं करे वहन् । क्षेत्रपालः सदा भाति सेवमानः किटीश्वरीम्
59 // phūtkārītripurāyuktaṃ phaṇipāśaṃ kare vahan / kṣetrapālaḥ sadā bhāti sevamānaḥ kiṭīśvarīm
60 ॥ तस्यैव च समीपस्थस्तस्या वाहनकेसरी । यमा रुह्य प्रववृते भण्टासुरबधैषिणी
60 // tasyaiva ca samīpasthastasyā vāhanakesarī / yamā ruhya pravavṛte bhaṇṭāsurabadhaiṣiṇī
61 ॥ प्रागुक्तमेव देवेशीवाहसिंहस्य लक्षण्म् । तस्यैव पर्वणो ऽधस्ताद्दण्डनाथासमत्विषः
61 // prāguktameva deveśīvāhasiṃhasya lakṣaṇm / tasyaiva parvaṇo 'dhastāddaṇḍanāthāsamatviṣaḥ
62 ॥ दण्डिनीसदृशाशेषभूषणायुधमण्डिताः । शम्याः क्रोडाननाश्चन्द्ररेखोत्तंसितकुन्तलाः
62 // daṇḍinīsadṛśāśeṣabhūṣaṇāyudhamaṇḍitāḥ / śamyāḥ kroḍānanāścandrarekhottaṃsitakuntalāḥ
63 ॥ हलं च मुसलं हस्ते घूर्णयन्त्यो मुहुर्मुहुः । ललिताद्रोहिणां श्यामाद्रोहिणां स्वामिनीद्रुहाम्
63 // halaṃ ca musalaṃ haste ghūrṇayantyo muhurmuhuḥ / lalitādrohiṇāṃ śyāmādrohiṇāṃ svāminīdruhām
64 ॥ रक्तस्रोतोभिरुत्कूलैः पूरयन्त्यः कपालकम् । निजभक्तद्रोहकृता मन्त्रमालाविभूषणाः
64 // raktasrotobhirutkūlaiḥ pūrayantyaḥ kapālakam / nijabhaktadrohakṛtā mantramālāvibhūṣaṇāḥ
65 ॥ स्वगोष्ठीसमायाक्षेपकारिणां मुण्डमण्डलैः । अखण्डरक्तविच्छर्दैर्बिभ्रत्यो वक्षसि क्रजः
65 // svagoṣṭhīsamāyākṣepakāriṇāṃ muṇḍamaṇḍalaiḥ / akhaṇḍaraktavicchardairbibhratyo vakṣasi krajaḥ
66 ॥ सहस्रं देवताः प्रोक्ताः सेवमानाः किटीश्वरीम्
66 // sahasraṃ devatāḥ proktāḥ sevamānāḥ kiṭīśvarīm
67 ॥ तासां नामानि सर्वासां दण्डिन्याः कुंभसंभव । सहस्रनामाध्याये तु वक्ष्यन्ते नाधुना पुनः
67 // tāsāṃ nāmāni sarvāsāṃ daṇḍinyāḥ kuṃbhasaṃbhava / sahasranāmādhyāye tu vakṣyante nādhunā punaḥ
68 ॥ अथ तासां देवतानां कोलास्यानां समीपतः । वाहनं कृष्णसारङ्गो दण्डिन्याः समये स्थितः
68 // atha tāsāṃ devatānāṃ kolāsyānāṃ samīpataḥ / vāhanaṃ kṛṣṇasāraṅgo daṇḍinyāḥ samaye sthitaḥ
69 ॥ क्रोशार्धार्द्धायतः शृङ्गे तदर्धार्धायतो मुखे । क्रोशप्रमाणापादश्च सदा चोद्धृतवालधिः
69 // krośārdhārddhāyataḥ śṛṅge tadardhārdhāyato mukhe / krośapramāṇāpādaśca sadā coddhṛtavāladhiḥ
70 ॥ उदरे धवलच्छायो हुङ्कारेण महीयसा । हसन्मारुतवाहस्य हरिणस्य पराक्रमम्
70 // udare dhavalacchāyo huṅkāreṇa mahīyasā / hasanmārutavāhasya hariṇasya parākramam
71 ॥ तस्यैव पर्वणो देशे वर्त्तते वाहनोत्तमम् । किरिचक्ररथेन्द्रस्य स्थितस्तत्रैव पर्वणि
71 // tasyaiva parvaṇo deśe varttate vāhanottamam / kiricakrarathendrasya sthitastatraiva parvaṇi
72 ॥ वर्त्तते मदिरासिंधुर्देवतारूपमास्थिता । माणिक्यगिरिवच्छोणं हस्ते पिशितपिण्डकम्
72 // varttate madirāsiṃdhurdevatārūpamāsthitā / māṇikyagirivacchoṇaṃ haste piśitapiṇḍakam
73 ॥ दधाना घूर्णमा नाक्षी हेमांभोजस्रगावृता । मदशक्त्या समाश्लिष्टा धृतरक्तसरोजया
73 // dadhānā ghūrṇamā nākṣī hemāṃbhojasragāvṛtā / madaśaktyā samāśliṣṭā dhṛtaraktasarojayā
74 ॥ यदायदा भण्डदैत्यः संग्रामे संप्रवर्तते । युद्धस्वेद मनुप्राप्ताः शक्तयः स्युः पिपासिताः
74 // yadāyadā bhaṇḍadaityaḥ saṃgrāme saṃpravartate / yuddhasveda manuprāptāḥ śaktayaḥ syuḥ pipāsitāḥ
75 ॥ तदातदा सुरासिंधुरात्मानं बहुधा क्षिपन् । रणे खेदं देवतानामञ्जसापाकरिष्यति
75 // tadātadā surāsiṃdhurātmānaṃ bahudhā kṣipan / raṇe khedaṃ devatānāmañjasāpākariṣyati
76 ॥ तदप्यद्भुतमे वर्षे भविष्यति न संशयः । तदा श्रोष्यसि संग्रामे कथ्यमानं मया मुदा
76 // tadapyadbhutame varṣe bhaviṣyati na saṃśayaḥ / tadā śroṣyasi saṃgrāme kathyamānaṃ mayā mudā
77 ॥ तस्यैव पर्वणो ऽधस्तादष्टदिक्ष्वघ एव हि । उपर्यपि कृतावासा हेतुकाद्या दश स्मृताः
77 // tasyaiva parvaṇo 'dhastādaṣṭadikṣvagha eva hi / uparyapi kṛtāvāsā hetukādyā daśa smṛtāḥ
78 ॥ महान्तो भैरवश्रेष्ठाः ख्याता विपुलविक्रमाः । उद्दीप्तायुत तेजोभिर्द्दिवा दीपितभानवः
78 // mahānto bhairavaśreṣṭhāḥ khyātā vipulavikramāḥ / uddīptāyuta tejobhirddivā dīpitabhānavaḥ
79 ॥ कल्पान्तकाले दण्डिन्या आज्ञया विश्वघस्मराः । अत्युदग्रप्रकृतयो रददष्टौष्ठसंपुटाः
79 // kalpāntakāle daṇḍinyā ājñayā viśvaghasmarāḥ / atyudagraprakṛtayo radadaṣṭauṣṭhasaṃpuṭāḥ
80 ॥ त्रिशूलाग्रविनिर्भिन्नमहावारिदमण्डलाः । हेतुकस्त्रिपुरारिश्च तृतीयश्चाग्निभैरवः
80 // triśūlāgravinirbhinnamahāvāridamaṇḍalāḥ / hetukastripurāriśca tṛtīyaścāgnibhairavaḥ
81 ॥ यमजिह्वैकपादौ च तथा कालकरालकौ । भीमरूपो हाटकेशस्तथैवाचलनामवान्
81 // yamajihvaikapādau ca tathā kālakarālakau / bhīmarūpo hāṭakeśastathaivācalanāmavān
82 ॥ एते दशैव विख्याता दशकोटिभटान्विताः । तस्यैव किरिचक्रस्य वर्तन्ते पर्वसीमनि
82 // ete daśaiva vikhyātā daśakoṭibhaṭānvitāḥ / tasyaiva kiricakrasya vartante parvasīmani
83 ॥ एवं हि दण्डनाथायाः किरिचक्रस्य देवताः । जृंभिण्याद्यचलेन्द्रान्ताः प्रोक्तास्त्रैलोक्यपावनाः
83 // evaṃ hi daṇḍanāthāyāḥ kiricakrasya devatāḥ / jṛṃbhiṇyādyacalendrāntāḥ proktāstrailokyapāvanāḥ
84 ॥ तत्रत्यैर्देवतावृन्दैर्बहवस्तत्र संगरे । दानवा मारयिष्यन्ते पास्यन्ते रक्तवृष्टयः
84 // tatratyairdevatāvṛndairbahavastatra saṃgare / dānavā mārayiṣyante pāsyante raktavṛṣṭayaḥ
85 ॥ इत्थं बहुविधत्राणं पर्वस्थैर्देवतागणैः । किरिचक्रं दण्डनेत्र्या रथरत्नं चचाल ह
85 // itthaṃ bahuvidhatrāṇaṃ parvasthairdevatāgaṇaiḥ / kiricakraṃ daṇḍanetryā ratharatnaṃ cacāla ha
86 ॥ चक्रराजरथो यत्र तत्र गेयरथोत्तमः । यत्र गेयरथस्तत्र किरिचक्ररथोत्तमः
86 // cakrarājaratho yatra tatra geyarathottamaḥ / yatra geyarathastatra kiricakrarathottamaḥ
87 ॥ एतद्रथ त्रयं तत्र त्रैलोक्यमिव जङ्गमम् । शक्तिसेनासहस्रस्यान्तश्चचार तदा शुभम्
87 // etadratha trayaṃ tatra trailokyamiva jaṅgamam / śaktisenāsahasrasyāntaścacāra tadā śubham
88 ॥ मेरुमन्दरविन्ध्यानां समवाय इवाभवत् । महाघोषः प्रववृते शक्तीनां सैन्यमण्डले । चचाल वसुधा सर्वा तच्चक्ररवदारिता
88 // merumandaravindhyānāṃ samavāya ivābhavat / mahāghoṣaḥ pravavṛte śaktīnāṃ sainyamaṇḍale / cacāla vasudhā sarvā taccakraravadāritā
89 ॥ ललिता चक्रराजाख्या रथनाथस्य कीर्तिताः । षट्सारथय उद्दण्डपाशग्रहणकोविदाः
89 // lalitā cakrarājākhyā rathanāthasya kīrtitāḥ / ṣaṭsārathaya uddaṇḍapāśagrahaṇakovidāḥ
90 ॥ यत्र गेयरथस्तत्र किरिचक्ररथोत्तमम् । इति देवी प्रथमतस्तथा त्रिपुरभैरवी
90 // yatra geyarathastatra kiricakrarathottamam / iti devī prathamatastathā tripurabhairavī
91 ॥ संहारभैरवश्चान्यो रक्तयोगिनिवल्लभः । सारसः पञ्चमश्चैव चामुण्डा च तथा परा
91 // saṃhārabhairavaścānyo raktayoginivallabhaḥ / sārasaḥ pañcamaścaiva cāmuṇḍā ca tathā parā
92 ॥ एतासु देवतास्तत्र रथसारथयः स्मृताः । गेयच क्ररथेन्द्रस्य सारथिस्तु हसंतिका
92 // etāsu devatāstatra rathasārathayaḥ smṛtāḥ / geyaca krarathendrasya sārathistu hasaṃtikā
93 ॥ किरिचक्ररथेन्द्रस्य स्तंभिनी सारथिः स्मृता । दशयोजनमुन्नम्रो ललितारथपुङ्गवः
93 // kiricakrarathendrasya staṃbhinī sārathiḥ smṛtā / daśayojanamunnamro lalitārathapuṅgavaḥ
94 ॥ सप्तयोजनमुच्छ्रायो गीतसक्ररथोत्तमः । षड्योजनसमुन्नम्रो किरिचक्ररथो मुने
94 // saptayojanamucchrāyo gītasakrarathottamaḥ / ṣaḍyojanasamunnamro kiricakraratho mune
95 ॥ महामुक्तातपत्रं तु दशयोजनविस्तृतम् । वर्तते ललितेशान्या रथ एव न चान्यतः
95 // mahāmuktātapatraṃ tu daśayojanavistṛtam / vartate laliteśānyā ratha eva na cānyataḥ
96 ॥ तदेव शक्तिसाम्राज्यसूचकं परिकीर्तितम् । सामान्यमातपत्रं तु तथद्वन्द्वेपि वर्तते
96 // tadeva śaktisāmrājyasūcakaṃ parikīrtitam / sāmānyamātapatraṃ tu tathadvandvepi vartate
97 ॥ अथ सा ललितेशानी सर्वशक्तिमहेश्वरी । महासाम्राज्यपदवीमारूढा परमेश्वरी
97 // atha sā laliteśānī sarvaśaktimaheśvarī / mahāsāmrājyapadavīmārūḍhā parameśvarī
98 ॥ चचाल भण्डदेत्यस्य क्षयसिद्ध्यभिकाङ्क्षिणी । शब्दायन्ते दिशः सर्वाः कंपते च वसुंधरा
98 // cacāla bhaṇḍadetyasya kṣayasiddhyabhikāṅkṣiṇī / śabdāyante diśaḥ sarvāḥ kaṃpate ca vasuṃdharā
99 ॥ क्षुभ्यन्ति सर्वभूतानि ललितेशाविनिर्गमे । देवदुन्दुभयो नेदुर्निपेतुः पुष्पवृष्टयः
99 // kṣubhyanti sarvabhūtāni laliteśāvinirgame / devadundubhayo nedurnipetuḥ puṣpavṛṣṭayaḥ
100 ॥ विश्वावसुप्रभृतयो गन्धर्वाः सुरगायकाः । तुम्बुरुर्नारदश्चैव साक्षादेव सरस्वती
100 // viśvāvasuprabhṛtayo gandharvāḥ suragāyakāḥ / tumbururnāradaścaiva sākṣādeva sarasvatī
101 ॥ जयमङ्गल पद्यानि पठन्तः पटुगीतिभिः । हर्षसंफुल्लवदनाः स्फुरत्पुलकभूषणाः । मुहुर्जयजयेत्येवं स्तुवाना ललितेश्वरीम्
101 // jayamaṅgala padyāni paṭhantaḥ paṭugītibhiḥ / harṣasaṃphullavadanāḥ sphuratpulakabhūṣaṇāḥ / muhurjayajayetyevaṃ stuvānā laliteśvarīm
102 ॥ हर्षेणाढ्या मदोन्मत्ताः प्रनृत्यन्तः पदेपदे । सप्तर्षयो वशिष्ठाद्या ऋग्यजुः सामरूपिभिः
102 // harṣeṇāḍhyā madonmattāḥ pranṛtyantaḥ padepade / saptarṣayo vaśiṣṭhādyā ṛgyajuḥ sāmarūpibhiḥ
103 ॥ अथर्वरूपैर्मन्त्रैश्च वर्धयन्तो जयश्रियम् । हविषेव महावह्निशिखामत्यन्तपाविनीम्
103 // atharvarūpairmantraiśca vardhayanto jayaśriyam / haviṣeva mahāvahniśikhāmatyantapāvinīm
104 ॥ आशीर्वादेन महता वर्धयामासुरुत्तमाः । तैः स्तूयमाना ललिता राजमाना रथोत्तमे
104 // āśīrvādena mahatā vardhayāmāsuruttamāḥ / taiḥ stūyamānā lalitā rājamānā rathottame
105 ॥ भण्डासुरं विनिर्जेतुमुद्दण्डैः सह सैनिकैः
105 // bhaṇḍāsuraṃ vinirjetumuddaṇḍaiḥ saha sainikaiḥ