37 ॥ इति श्रीब्रह्माण्डे महापुराणे वायुप्रोक्ते मध्यमभागे तृतीय उपोद्धातपादे सगरोपाख्याने भार्गवचरिते चतुश्चत्वारिंशत्तमो ऽध्यायः ॥ 44॥ वसिष्ठ उवाच ततः कदाचिद्विपिने चतुरङ्गबलान्वितः । मृगयामगमच्छूरः शूरसेनादिभिः सह
37 // iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde sagaropākhyāne bhārgavacarite catuścatvāriṃśattamo 'dhyāyaḥ // 44// vasiṣṭha uvāca tataḥ kadācidvipine caturaṅgabalānvitaḥ / mṛgayāmagamacchūraḥ śūrasenādibhiḥ saha
1 ॥ ते प्रविश्य महारण्यं हत्वा बहुविधान्मृगान् । जग्मुस्तृषार्त्ता मध्याह्ने सरितं नर्मदामनु
1 // te praviśya mahāraṇyaṃ hatvā bahuvidhānmṛgān / jagmustṛṣārttā madhyāhne saritaṃ narmadāmanu
2 ॥ तत्र स्नात्वा च पीत्वा च वारि नद्या गतश्रमाः । गच्छन्तो ददृशुर्मार्गो जमदग्नेरथाश्रमम्
2 // tatra snātvā ca pītvā ca vāri nadyā gataśramāḥ / gacchanto dadṛśurmārgo jamadagnerathāśramam
3 ॥ द्दष्ट्वाश्रमपदं रम्यं मुनीनागच्छतः पथि । कस्येदमिति पप्रच्छुर्भाविकर्मप्रचोदिताः
3 // ddaṣṭvāśramapadaṃ ramyaṃ munīnāgacchataḥ pathi / kasyedamiti papracchurbhāvikarmapracoditāḥ
4 ॥ ते प्रोचुरतिशान्तात्मा जमदग्नेर्महातपाः । वसत्यस्मिन्सुतो यस्य रामः शस्त्रभृतां वरः
4 // te procuratiśāntātmā jamadagnermahātapāḥ / vasatyasminsuto yasya rāmaḥ śastrabhṛtāṃ varaḥ
5 ॥ तछ्रुत्वा भीरभूत्तेषां रामनामानुकीर्त्तनात् । क्रोधं प्रसङ्यानृशंस्यं पूर्ववैरमनुस्मरन्
5 // tachrutvā bhīrabhūtteṣāṃ rāmanāmānukīrttanāt / krodhaṃ prasaṅyānṛśaṃsyaṃ pūrvavairamanusmaran
6 ॥ अथ ते प्रोचुरन्योन्यं पितृहन्तुर्वधात्पितुः । वैर निर्यातनं किं तु करिष्यामो दिशाधुना
6 // atha te procuranyonyaṃ pitṛhanturvadhātpituḥ / vaira niryātanaṃ kiṃ tu kariṣyāmo diśādhunā
7 ॥ इत्यक्त्वा खड्गहस्तास्ते संप्रविश्य तदाश्रमम् । प्रजाघ्निरे प्रयातेषु मुनिवीरेषु सर्वतः
7 // ityaktvā khaḍgahastāste saṃpraviśya tadāśramam / prajāghnire prayāteṣu munivīreṣu sarvataḥ
8 ॥ तं हत्वास्य शिरो हृत्वा निषादा इव निर्दयाः । प्रययुस्ते दुरात्मानः सबलाः स्वपुरीं प्रति
8 // taṃ hatvāsya śiro hṛtvā niṣādā iva nirdayāḥ / prayayuste durātmānaḥ sabalāḥ svapurīṃ prati
9 ॥ पुत्रास्तस्य महात्मानौ दृष्ट्वा स्वपितरं हतम् । परिवार्य महाराज रुरुदुः शोककर्शिताः
9 // putrāstasya mahātmānau dṛṣṭvā svapitaraṃ hatam / parivārya mahārāja ruruduḥ śokakarśitāḥ
10 ॥ भर्त्तारं निहतं भूमौ पतितं वीक्ष्य रेणुका । पपात मूर्च्छिता सद्यो लतेवाशनिताडिता
10 // bharttāraṃ nihataṃ bhūmau patitaṃ vīkṣya reṇukā / papāta mūrcchitā sadyo latevāśanitāḍitā
11 ॥ सा स्वचेतसि संमूच्छ्य शोकपावकदीपिताः । दूरप्रनष्टसंज्ञेव सद्यः प्राणैर्व्ययुज्यत
11 // sā svacetasi saṃmūcchya śokapāvakadīpitāḥ / dūrapranaṣṭasaṃjñeva sadyaḥ prāṇairvyayujyata
12 ॥ अनालपन्त्यां तस्यां तु संज्ञां याता हि ते पुनः । न्यपतन्मूर्च्छिता भूमौ निमग्नाः शोकसागरे
12 // anālapantyāṃ tasyāṃ tu saṃjñāṃ yātā hi te punaḥ / nyapatanmūrcchitā bhūmau nimagnāḥ śokasāgare
13 ॥ ततस्तपोधना ये ऽन्ये तत्त पोवनवासिनः । समेत्याश्वासयामासुस्तुल्यदुःखाः सुतान्मुने
13 // tatastapodhanā ye 'nye tatta povanavāsinaḥ / sametyāśvāsayāmāsustulyaduḥkhāḥ sutānmune
14 ॥ सांत्व्यमाना मुनिगणैर्जामदग्न्या यथाविधि । आधक्षुर्वचसा तेषामग्नौ पित्रोः कलेवरे
14 // sāṃtvyamānā munigaṇairjāmadagnyā yathāvidhi / ādhakṣurvacasā teṣāmagnau pitroḥ kalevare
15 ॥ चक्रुरेव तदूर्द्ध्वं वै यत्कर्त्तव्यमनन्तरम् । पित्रोर्मरणदुःखेन पीड्यमाना दिवानिशम्
15 // cakrureva tadūrddhvaṃ vai yatkarttavyamanantaram / pitrormaraṇaduḥkhena pīḍyamānā divāniśam
16 ॥ ततः काले गते रामः समानां द्वादशावधौ । निवृत्तस्तपसः सख्या सहागादाश्रमं पितुः
16 // tataḥ kāle gate rāmaḥ samānāṃ dvādaśāvadhau / nivṛttastapasaḥ sakhyā sahāgādāśramaṃ pituḥ