अहो ऽतिदुःखं घोरं च यममार्गे त्वयोदितम् नरकाणि च घोराणि द्वारं याम्यं च सत्तम ॥
aho 'tiduḥkhaṃ ghoraṃ ca yamamārge tvayoditam narakāṇi ca ghorāṇi dvāraṃ yāmyaṃ ca sattama //
अस्त्य् उपायो न वा ब्रह्मन् यममार्गे ऽतिभीषणे ब्रूहि येन नरा यान्ति सुखेन यमसादनम् ॥
asty upāyo na vā brahman yamamārge 'tibhīṣaṇe brūhi yena narā yānti sukhena yamasādanam //
इह ये धर्मसंयुक्तास् त्व् अहिंसानिरता नराः गुरुशुश्रूषणे युक्ता देवब्राह्मणपूजकाः ॥
iha ye dharmasaṃyuktās tv ahiṃsāniratā narāḥ guruśuśrūṣaṇe yuktā devabrāhmaṇapūjakāḥ //
यस्मिन् मनुष्यलोकास् ते सभार्याः ससुतास् तथा तम् अध्वानं च गच्छन्ति यथा तत् कथयामि वः ॥
yasmin manuṣyalokās te sabhāryāḥ sasutās tathā tam adhvānaṃ ca gacchanti yathā tat kathayāmi vaḥ //
विमानैर् विविधैर् दिव्यैः काञ्चनध्वजशोभितैः धर्मराजपुरं यान्ति सेवमानाप्सरोगणैः ॥
vimānair vividhair divyaiḥ kāñcanadhvajaśobhitaiḥ dharmarājapuraṃ yānti sevamānāpsarogaṇaiḥ //
ब्राह्मणेभ्यस् तु दानानि नानारूपाणि भक्तितः ये प्रयच्छन्ति ते यान्ति सुखेनैव महापथे ॥
brāhmaṇebhyas tu dānāni nānārūpāṇi bhaktitaḥ ye prayacchanti te yānti sukhenaiva mahāpathe //
अन्नं ये तु प्रयच्छन्ति ब्राह्मणेभ्यः सुसंकृतम् श्रोत्रियेभ्यो विशेषेण भक्त्या परमया युताः ॥
annaṃ ye tu prayacchanti brāhmaṇebhyaḥ susaṃkṛtam śrotriyebhyo viśeṣeṇa bhaktyā paramayā yutāḥ //
तरुणीभिर् वरस्त्रीभिः सेव्यमानाः प्रयत्नतः धर्मराजपुरं यान्ति विमानैर् अभ्यलंकृतैः ॥
taruṇībhir varastrībhiḥ sevyamānāḥ prayatnataḥ dharmarājapuraṃ yānti vimānair abhyalaṃkṛtaiḥ //
ये च सत्यं प्रभाषन्ते बहिर् अन्तश् च निर्मलाः ते ऽपि यान्त्य् अमरप्रख्या विमानैर् यममन्दिरम् ॥
ye ca satyaṃ prabhāṣante bahir antaś ca nirmalāḥ te 'pi yānty amaraprakhyā vimānair yamamandiram //
गोदानानि पवित्राणि विष्णुम् उद्दिश्य साधुषु ये प्रयच्छन्ति धर्मज्ञाः कृशेषु कृशवृत्तिषु ॥
godānāni pavitrāṇi viṣṇum uddiśya sādhuṣu ye prayacchanti dharmajñāḥ kṛśeṣu kṛśavṛttiṣu //
ते यान्ति दिव्यवर्णाभैर् विमानैर् मणिचित्रितैः धर्मराजपुरं श्रीमान् सेव्यमानाप्सरोगणैः ॥
te yānti divyavarṇābhair vimānair maṇicitritaiḥ dharmarājapuraṃ śrīmān sevyamānāpsarogaṇaiḥ //
उपानद्युगलं छत्त्रं शय्यासनम् अथापि वा ये प्रयच्छन्ति वस्त्राणि तथैवाभरणानि च ॥
upānadyugalaṃ chattraṃ śayyāsanam athāpi vā ye prayacchanti vastrāṇi tathaivābharaṇāni ca //
ते यान्त्य् अश्वै रथैश् चैव कुञ्जरैश् चाप्य् अलंकृताः धर्मराजपुरं दिव्यं छत्त्रैः सौवर्णराजतैः ॥
te yānty aśvai rathaiś caiva kuñjaraiś cāpy alaṃkṛtāḥ dharmarājapuraṃ divyaṃ chattraiḥ sauvarṇarājataiḥ //
ये च भक्त्या प्रयच्छन्ति गुडपानकम् अर्चितम् ओदनं च द्विजाग्र्येभ्यो विशुद्धेनान्तरात्मना ॥
ye ca bhaktyā prayacchanti guḍapānakam arcitam odanaṃ ca dvijāgryebhyo viśuddhenāntarātmanā //
ते यान्ति काञ्चनैर् यानैर् विविधैस् तु यमालयम् वरस्त्रीभिर् यथाकामं सेव्यमानाः पुनः पुनः ॥
te yānti kāñcanair yānair vividhais tu yamālayam varastrībhir yathākāmaṃ sevyamānāḥ punaḥ punaḥ //
ये च क्षीरं प्रयच्छन्ति घृतं दधि गुडं मधु ब्राह्मणेभ्यः प्रयत्नेन शुद्ध्योपेतं सुसंस्कृतम् ॥
ye ca kṣīraṃ prayacchanti ghṛtaṃ dadhi guḍaṃ madhu brāhmaṇebhyaḥ prayatnena śuddhyopetaṃ susaṃskṛtam //
चक्रवाकप्रयुक्तैश् च विमानैस् तु हिरण्मयैः यान्ति गन्धर्ववादित्रैः सेव्यमाना यमालयम् ॥
cakravākaprayuktaiś ca vimānais tu hiraṇmayaiḥ yānti gandharvavāditraiḥ sevyamānā yamālayam //
ये फलानि प्रयच्छन्ति पुष्पाणि सुरभीणि च हंसयुक्तैर् विमानैस् तु यान्ति धर्मपुरं नराः ॥
ye phalāni prayacchanti puṣpāṇi surabhīṇi ca haṃsayuktair vimānais tu yānti dharmapuraṃ narāḥ //
ये तिलांस् तिलधेनुं च घृतधेनुम् अथापि वा श्रोत्रियेभ्यः प्रयच्छन्ति विप्रेभ्यः श्रद्धयान्विताः ॥
ye tilāṃs tiladhenuṃ ca ghṛtadhenum athāpi vā śrotriyebhyaḥ prayacchanti viprebhyaḥ śraddhayānvitāḥ //
सोममण्डलसंकाशैर् यानैस् ते यान्ति निर्मलैः गन्धर्वैर् उपगीयन्ते पुरे वैवस्वतस्य ते ॥
somamaṇḍalasaṃkāśair yānais te yānti nirmalaiḥ gandharvair upagīyante pure vaivasvatasya te //
येषां वाप्यश् च कूपाश् च तडागानि सरांसि च दीर्घिकाः पुष्करिण्यश् च शीतलाश् च जलाशयाः ॥
yeṣāṃ vāpyaś ca kūpāś ca taḍāgāni sarāṃsi ca dīrghikāḥ puṣkariṇyaś ca śītalāś ca jalāśayāḥ //
यानैस् ते हेमचन्द्राभैर् दिव्यघण्टानिनादितैः व्यजनैस् तालवृन्तैश् च वीज्यमाना महाप्रभाः ॥
yānais te hemacandrābhair divyaghaṇṭānināditaiḥ vyajanais tālavṛntaiś ca vījyamānā mahāprabhāḥ //
येषां देवकुलान्य् अत्र चित्राण्य् आयतनानि च रत्नैः प्रस्फुरमाणानि मनोज्ञानि शुभानि च ॥
yeṣāṃ devakulāny atra citrāṇy āyatanāni ca ratnaiḥ prasphuramāṇāni manojñāni śubhāni ca //
ते यान्ति लोकपालैस् तु विमानैर् वातरंहसैः धर्मराजपुरं दिव्यं नानाजनसमाकुलम् ॥
te yānti lokapālais tu vimānair vātaraṃhasaiḥ dharmarājapuraṃ divyaṃ nānājanasamākulam //
पानीयं ये प्रयच्छन्ति सर्वप्राण्युपजीवितम् ते वितृष्णाः सुखं यान्ति विमानैस् तं महापथम् ॥
pānīyaṃ ye prayacchanti sarvaprāṇyupajīvitam te vitṛṣṇāḥ sukhaṃ yānti vimānais taṃ mahāpatham //
काष्ठपादुकयानानि पीठकान्य् आसनानि च यैर् दत्तानि द्विजातिभ्यस् ते ऽध्वानं यान्ति वै सुखम् ॥
kāṣṭhapādukayānāni pīṭhakāny āsanāni ca yair dattāni dvijātibhyas te 'dhvānaṃ yānti vai sukham //
सौवर्णमणिपीठेषु पादौ कृत्वोत्तमेषु च ते प्रयान्ति विमानैस् तु अप्सरोगणमण्डितैः ॥
sauvarṇamaṇipīṭheṣu pādau kṛtvottameṣu ca te prayānti vimānais tu apsarogaṇamaṇḍitaiḥ //
आरामाणि विचित्राणि पुष्पाढ्यानीह मानवाः रोपयन्ति फलाढ्यानि नराणाम् उपकारिणः ॥
ārāmāṇi vicitrāṇi puṣpāḍhyānīha mānavāḥ ropayanti phalāḍhyāni narāṇām upakāriṇaḥ //
वृक्षच्छायासु रम्यासु शीतलासु स्वलंकृताः वरस्त्रीगीतवाद्यैश् च सेव्यमाना व्रजन्ति ते ॥
vṛkṣacchāyāsu ramyāsu śītalāsu svalaṃkṛtāḥ varastrīgītavādyaiś ca sevyamānā vrajanti te //
सुवर्णं रजतं वापि विद्रुमं मौक्तिकं तथा ये प्रयच्छन्ति ते यान्ति विमानैः कनकोज्ज्वलैः ॥
suvarṇaṃ rajataṃ vāpi vidrumaṃ mauktikaṃ tathā ye prayacchanti te yānti vimānaiḥ kanakojjvalaiḥ //
भूमिदा दीप्यमानाश् च सर्वकामैस् तु तर्पिताः उदितादित्यसंकाशैर् विमानैर् भृशनादितैः ॥
bhūmidā dīpyamānāś ca sarvakāmais tu tarpitāḥ uditādityasaṃkāśair vimānair bhṛśanāditaiḥ //
कन्यां तु ये प्रयच्छन्ति ब्रह्मदेयाम् अलंकृताम् दिव्यकन्यावृता यान्ति विमानैस् ते यमालयम् ॥
kanyāṃ tu ye prayacchanti brahmadeyām alaṃkṛtām divyakanyāvṛtā yānti vimānais te yamālayam //
सुगन्धागुरुकर्पूरान् पुष्पधूपान् द्विजोत्तमाः प्रयच्छन्ति द्विजातिभ्यो भक्त्या परमयान्विताः ॥
sugandhāgurukarpūrān puṣpadhūpān dvijottamāḥ prayacchanti dvijātibhyo bhaktyā paramayānvitāḥ //
ते सुगन्धाः सुवेशाश् च सुप्रभाः सुविभूषिताः यान्ति धर्मपुरं यानैर् विचित्रैर् अभ्यलंकृताः ॥
te sugandhāḥ suveśāś ca suprabhāḥ suvibhūṣitāḥ yānti dharmapuraṃ yānair vicitrair abhyalaṃkṛtāḥ //
दीपदा यान्ति यानैश् च दीपयन्तो दिशो दश आदित्यसदृशैर् यानैर् दीप्यमाना यथाग्नयः ॥
dīpadā yānti yānaiś ca dīpayanto diśo daśa ādityasadṛśair yānair dīpyamānā yathāgnayaḥ //
गृहावसथदातारो गृहैः काञ्चनमण्डितैः व्रजन्ति बालार्कनिभैर् धर्मराजगृहं नराः ॥
gṛhāvasathadātāro gṛhaiḥ kāñcanamaṇḍitaiḥ vrajanti bālārkanibhair dharmarājagṛhaṃ narāḥ //
जलभाजनदातारः कुण्डिकाकरकप्रदाः पूजमानाप्सरोभिश् च यान्ति दृप्ता महागजैः ॥
jalabhājanadātāraḥ kuṇḍikākarakapradāḥ pūjamānāpsarobhiś ca yānti dṛptā mahāgajaiḥ //
पादाभ्यङ्गं शिरोभ्यङ्गं स्नानपानोदकं तथा ये प्रयच्छन्ति विप्रेभ्यस् ते यान्त्य् अश्वैर् यमालयम् ॥
pādābhyaṅgaṃ śirobhyaṅgaṃ snānapānodakaṃ tathā ye prayacchanti viprebhyas te yānty aśvair yamālayam //
विश्रामयन्ति ये विप्राञ् श्रान्तान् अध्वनि कर्शितान् चक्रवाकप्रयुक्तेन यान्ति यानेन ते सुखम् ॥
viśrāmayanti ye viprāñ śrāntān adhvani karśitān cakravākaprayuktena yānti yānena te sukham //
स्वागतेन च यो विप्रं पूजयेद् आसनेन च स गच्छति तम् अध्वानं सुखं परमनिर्वृतः ॥
svāgatena ca yo vipraṃ pūjayed āsanena ca sa gacchati tam adhvānaṃ sukhaṃ paramanirvṛtaḥ //
नमो ब्रह्मण्यदेवेति यो हरिं चाभिवादयेत् गां च पापहरेत्य् उक्त्वा सुखं यान्ति च तत् पथम् ॥
namo brahmaṇyadeveti yo hariṃ cābhivādayet gāṃ ca pāpaharety uktvā sukhaṃ yānti ca tat patham //
अनन्तराशिनो ये च दम्भानृतविवर्जिताः ते ऽपि सारसयुक्तैस् तु यान्ति यानैश् च तत् पथम् ॥
anantarāśino ye ca dambhānṛtavivarjitāḥ te 'pi sārasayuktais tu yānti yānaiś ca tat patham //
वर्तन्ते ह्य् एकभक्तेन शाठ्यदम्भविवर्जिताः हंसयुक्तैर् विमानैस् तु सुखं यान्ति यमालयम् ॥
vartante hy ekabhaktena śāṭhyadambhavivarjitāḥ haṃsayuktair vimānais tu sukhaṃ yānti yamālayam //
चतुर्थेनैकभक्तेन वर्तन्ते ये जितेन्द्रियाः ते यान्ति धर्मनगरं यानैर् बर्हिणयोजितैः ॥
caturthenaikabhaktena vartante ye jitendriyāḥ te yānti dharmanagaraṃ yānair barhiṇayojitaiḥ //
तृतीये दिवसे ये तु भुञ्जते नियतव्रताः ते ऽपि हस्तिरथैर् दिव्यैर् यान्ति यानैश् च तत् पदम् ॥
tṛtīye divase ye tu bhuñjate niyatavratāḥ te 'pi hastirathair divyair yānti yānaiś ca tat padam //
षष्ठे ऽन्नभक्षको यस् तु शौचनित्यो जितेन्द्रियः स याति कुञ्जरस्थस् तु शचीपतिर् इव स्वयम् ॥
ṣaṣṭhe 'nnabhakṣako yas tu śaucanityo jitendriyaḥ sa yāti kuñjarasthas tu śacīpatir iva svayam //
धर्मराजपुरं दिव्यं नानामणिविभूषितम् नानास्वरसमायुक्तं जयशब्दरवैर् युतम् ॥
dharmarājapuraṃ divyaṃ nānāmaṇivibhūṣitam nānāsvarasamāyuktaṃ jayaśabdaravair yutam //
पक्षोपवासिनो यान्ति यानैः शार्दूलयोजितैः पुरं तद् धर्मराजस्य सेव्यमानाः सुरासुरैः ॥
pakṣopavāsino yānti yānaiḥ śārdūlayojitaiḥ puraṃ tad dharmarājasya sevyamānāḥ surāsuraiḥ //
ये च मासोपवासं तु कुर्वते संयतेन्द्रियाः ते ऽपि सूर्यप्रदीप्तैस् तु यान्ति यानैर् यमालयम् ॥
ye ca māsopavāsaṃ tu kurvate saṃyatendriyāḥ te 'pi sūryapradīptais tu yānti yānair yamālayam //
महाप्रस्थानम् एकाग्रो यः प्रयाति दृढव्रतः सेव्यमानस् तु गन्धर्वैर् याति यानैर् यमालयम् ॥
mahāprasthānam ekāgro yaḥ prayāti dṛḍhavrataḥ sevyamānas tu gandharvair yāti yānair yamālayam //
शरीरं साधयेद् यस् तु वैष्णवेनान्तरात्मना स रथेनाग्निवर्णेन यातीह त्रिदशालयम् ॥
śarīraṃ sādhayed yas tu vaiṣṇavenāntarātmanā sa rathenāgnivarṇena yātīha tridaśālayam //
अग्निप्रवेशं यः कुर्यान् नारायणपरायणः स यात्य् अग्निप्रकाशेन विमानेन यमालयम् ॥
agnipraveśaṃ yaḥ kuryān nārāyaṇaparāyaṇaḥ sa yāty agniprakāśena vimānena yamālayam //
प्राणांस् त्यजति यो मर्त्यः स्मरन् विष्णुं सनातनम् यानेनार्कप्रकाशेन याति धर्मपुरं नरः ॥
prāṇāṃs tyajati yo martyaḥ smaran viṣṇuṃ sanātanam yānenārkaprakāśena yāti dharmapuraṃ naraḥ //
प्रविष्टो ऽन्तर् जलं यस् तु प्राणांस् त्यजति मानवः सोममण्डलकल्पेन याति यानेन वै सुखम् ॥
praviṣṭo 'ntar jalaṃ yas tu prāṇāṃs tyajati mānavaḥ somamaṇḍalakalpena yāti yānena vai sukham //
स्वशरीरं हि गृध्रेभ्यो वैष्णवो यः प्रयच्छति स याति रथमुख्येन काञ्चनेन यमालयम् ॥
svaśarīraṃ hi gṛdhrebhyo vaiṣṇavo yaḥ prayacchati sa yāti rathamukhyena kāñcanena yamālayam //
स्त्रीग्रहे गोग्रहे वापि युद्धे मृत्युम् उपैति यः स यात्य् अमरकन्याभिः सेव्यमानो रविप्रभः ॥
strīgrahe gograhe vāpi yuddhe mṛtyum upaiti yaḥ sa yāty amarakanyābhiḥ sevyamāno raviprabhaḥ //
वैष्णवा ये च कुर्वन्ति तीर्थयात्रां जितेन्द्रियाः तत् पथं यान्ति ते घोरं सुखयानैर् अलंकृताः ॥
vaiṣṇavā ye ca kurvanti tīrthayātrāṃ jitendriyāḥ tat pathaṃ yānti te ghoraṃ sukhayānair alaṃkṛtāḥ //
ये यजन्ति द्विजश्रेष्ठाः क्रतुभिर् भूरिदक्षिणैः तप्तहाटकसंकाशैर् विमानैर् यान्ति ते सुखम् ॥
ye yajanti dvijaśreṣṭhāḥ kratubhir bhūridakṣiṇaiḥ taptahāṭakasaṃkāśair vimānair yānti te sukham //
परपीडाम् अकुर्वन्तो भृत्यानां भरणादिकम् कुर्वन्ति ते सुखं यान्ति विमानैः कनकोज्ज्वलैः ॥
parapīḍām akurvanto bhṛtyānāṃ bharaṇādikam kurvanti te sukhaṃ yānti vimānaiḥ kanakojjvalaiḥ //
ये क्षान्ताः सर्वभूतेषु प्राणिनाम् अभयप्रदाः क्रोधमोहविनिर्मुक्ता निर्मदाः संयतेन्द्रियाः ॥
ye kṣāntāḥ sarvabhūteṣu prāṇinām abhayapradāḥ krodhamohavinirmuktā nirmadāḥ saṃyatendriyāḥ //
पूर्णचन्द्रप्रकाशेन विमानेन महाप्रभाः यान्ति वैवस्वतपुरं देवगन्धर्वसेविताः ॥
pūrṇacandraprakāśena vimānena mahāprabhāḥ yānti vaivasvatapuraṃ devagandharvasevitāḥ //
एकभावेन ये विष्णुं ब्रह्माणं त्र्यम्बकं रविम् पूजयन्ति हि ते यान्ति विमानैर् भास्करप्रभैः ॥
ekabhāvena ye viṣṇuṃ brahmāṇaṃ tryambakaṃ ravim pūjayanti hi te yānti vimānair bhāskaraprabhaiḥ //
ये च मांसं न खादन्ति सत्यशौचसमन्विताः ते ऽपि यान्ति सुखेनैव धर्मराजपुरं नराः ॥
ye ca māṃsaṃ na khādanti satyaśaucasamanvitāḥ te 'pi yānti sukhenaiva dharmarājapuraṃ narāḥ //
मांसान् मिष्टतरं नास्ति भक्ष्यभोज्यादिकेषु च तस्मान् मांसं न भुञ्जीत नास्ति मिष्टैः सुखोदयः ॥
māṃsān miṣṭataraṃ nāsti bhakṣyabhojyādikeṣu ca tasmān māṃsaṃ na bhuñjīta nāsti miṣṭaiḥ sukhodayaḥ //
गोसहस्रं तु यो दद्याद् यस् तु मांसं न भक्षयेत् समाव् एतौ पुरा प्राह ब्रह्मा वेदविदां वरः ॥
gosahasraṃ tu yo dadyād yas tu māṃsaṃ na bhakṣayet samāv etau purā prāha brahmā vedavidāṃ varaḥ //
सर्वतीर्थेषु यत् पुण्यं सर्वयज्ञेषु यत् फलम् अमांसभक्षणे विप्रास् तच् च तच् च च तत्समम् ॥
sarvatīrtheṣu yat puṇyaṃ sarvayajñeṣu yat phalam amāṃsabhakṣaṇe viprās tac ca tac ca ca tatsamam //
एवं सुखेन ते यान्ति यमलोकं च धार्मिकाः दानव्रतपरा यानैर् यत्र देवो रवेः सुतः ॥
evaṃ sukhena te yānti yamalokaṃ ca dhārmikāḥ dānavrataparā yānair yatra devo raveḥ sutaḥ //
दृष्ट्वा तान् धार्मिकान् देवः स्वयं संमानयेद् यमः स्वागतासनदानेन पाद्यार्घ्येण प्रियेण तु ॥
dṛṣṭvā tān dhārmikān devaḥ svayaṃ saṃmānayed yamaḥ svāgatāsanadānena pādyārghyeṇa priyeṇa tu //
धन्या यूयं महात्मान आत्मनो हितकारिणः येन दिव्यसुखार्थाय भवद्भिः सुकृतं कृतम् ॥
dhanyā yūyaṃ mahātmāna ātmano hitakāriṇaḥ yena divyasukhārthāya bhavadbhiḥ sukṛtaṃ kṛtam //
इदं विमानम् आरुह्य दिव्यस्त्रीभोगभूषिताः स्वर्गं गच्छध्वम् अतुलं सर्वकामसमन्वितम् ॥
idaṃ vimānam āruhya divyastrībhogabhūṣitāḥ svargaṃ gacchadhvam atulaṃ sarvakāmasamanvitam //
तत्र भुक्त्वा महाभोगान् अन्ते पुण्यपरिक्षयात् यत् किंचिद् अल्पम् अशुभं फलं तद् इह भोक्ष्यथ ॥
tatra bhuktvā mahābhogān ante puṇyaparikṣayāt yat kiṃcid alpam aśubhaṃ phalaṃ tad iha bhokṣyatha //
ये तु तं धर्मराजानं नराः पुण्यानुभावतः पश्यन्ति सौम्यमनसं पितृभूतम् इवात्मनः ॥
ye tu taṃ dharmarājānaṃ narāḥ puṇyānubhāvataḥ paśyanti saumyamanasaṃ pitṛbhūtam ivātmanaḥ //
तस्माद् धर्मः सेवितव्यः सदा मुक्तिफलप्रदः धर्माद् अर्थस् तथा कामो मोक्षश् च परिकीर्त्यते ॥
tasmād dharmaḥ sevitavyaḥ sadā muktiphalapradaḥ dharmād arthas tathā kāmo mokṣaś ca parikīrtyate //
धर्मो माता पिता भ्राता धर्मो नाथः सुहृत् तथा धर्मः स्वामी सखा गोप्ता तथा धाता च पोषकः ॥
dharmo mātā pitā bhrātā dharmo nāthaḥ suhṛt tathā dharmaḥ svāmī sakhā goptā tathā dhātā ca poṣakaḥ //
धर्माद् अर्थो ऽर्थतः कामः कामाद् भोगः सुखानि च धर्माद् ऐश्वर्यम् एकाग्र्यं धर्मात् स्वर्गगतिः परा ॥
dharmād artho 'rthataḥ kāmaḥ kāmād bhogaḥ sukhāni ca dharmād aiśvaryam ekāgryaṃ dharmāt svargagatiḥ parā //
धर्मस् तु सेवितो विप्रास् त्रायते महतो भयात् देवत्वं च द्विजत्वं च धर्मात् प्राप्नोत्य् असंशयम् ॥
dharmas tu sevito viprās trāyate mahato bhayāt devatvaṃ ca dvijatvaṃ ca dharmāt prāpnoty asaṃśayam //
यदा च क्षीयते पापं नराणां पूर्वसंचितम् तदैषां भजते बुद्धिर् धर्मं चात्र द्विजोत्तमाः ॥
yadā ca kṣīyate pāpaṃ narāṇāṃ pūrvasaṃcitam tadaiṣāṃ bhajate buddhir dharmaṃ cātra dvijottamāḥ //
जन्मान्तरसहस्रेषु मानुष्यं प्राप्य दुर्लभम् यो हि नाचरते धर्मं भवेत् स खलु वञ्चितः ॥
janmāntarasahasreṣu mānuṣyaṃ prāpya durlabham yo hi nācarate dharmaṃ bhavet sa khalu vañcitaḥ //
कुत्सिता ये दरिद्राश् च विरूपा व्याधितास् तथा परप्रेष्याश् च मूर्खाश् च ज्ञेया धर्मविवर्जिताः ॥
kutsitā ye daridrāś ca virūpā vyādhitās tathā parapreṣyāś ca mūrkhāś ca jñeyā dharmavivarjitāḥ //
ये हि दीर्घायुषः शूराः पण्डिता भोगिनो ऽर्थिनः अरोगा रूपवन्तश् च तैस् तु धर्मः पुरा कृतः ॥
ye hi dīrghāyuṣaḥ śūrāḥ paṇḍitā bhogino 'rthinaḥ arogā rūpavantaś ca tais tu dharmaḥ purā kṛtaḥ //
एवं धर्मरता विप्रा गच्छन्ति गतिम् उत्तमाम् अधर्मं सेवमानास् तु तिर्यग्योनिं व्रजन्ति ते ॥
evaṃ dharmaratā viprā gacchanti gatim uttamām adharmaṃ sevamānās tu tiryagyoniṃ vrajanti te //
ये नरा नरकध्वंसिवासुदेवम् अनुव्रताः ते स्वप्ने ऽपि न पश्यन्ति यमं वा नरकाणि वा ॥
ye narā narakadhvaṃsivāsudevam anuvratāḥ te svapne 'pi na paśyanti yamaṃ vā narakāṇi vā //
अनादिनिधनं देवं दैत्यदानवदारणम् ये नमन्ति नरा नित्यं नहि पश्यन्ति ते यमम् ॥
anādinidhanaṃ devaṃ daityadānavadāraṇam ye namanti narā nityaṃ nahi paśyanti te yamam //
कर्मणा मनसा वाचा ये ऽच्युतं शरणं गताः न समर्थो यमस् तेषां ते मुक्तिफलभागिनः ॥
karmaṇā manasā vācā ye 'cyutaṃ śaraṇaṃ gatāḥ na samartho yamas teṣāṃ te muktiphalabhāginaḥ //
ये जना जगतां नाथं नित्यं नारायणं द्विजाः नमन्ति नहि ते विष्णोः स्थानाद् अन्यत्र गामिनः ॥
ye janā jagatāṃ nāthaṃ nityaṃ nārāyaṇaṃ dvijāḥ namanti nahi te viṣṇoḥ sthānād anyatra gāminaḥ //
न ते दूतान् न तन् मार्गं न यमं न च तां पुरीम् प्रणम्य विष्णुं पश्यन्ति नरकाणि कथंचन ॥
na te dūtān na tan mārgaṃ na yamaṃ na ca tāṃ purīm praṇamya viṣṇuṃ paśyanti narakāṇi kathaṃcana //
कृत्वापि बहुशः पापं नरा मोहसमन्विताः न यान्ति नरकं नत्वा सर्वपापहरं हरिम् ॥
kṛtvāpi bahuśaḥ pāpaṃ narā mohasamanvitāḥ na yānti narakaṃ natvā sarvapāpaharaṃ harim //
शाठ्येनापि नरा नित्यं ये स्मरन्ति जनार्दनम् ते ऽपि यान्ति तनुं त्यक्त्वा विष्णुलोकम् अनामयम् ॥
śāṭhyenāpi narā nityaṃ ye smaranti janārdanam te 'pi yānti tanuṃ tyaktvā viṣṇulokam anāmayam //
अत्यन्तक्रोधसक्तो ऽपि कदाचित् कीर्तयेद् धरिम् सो ऽपि दोषक्षयान् मुक्तिं लभेच् चेदिपतिर् यथा ॥
atyantakrodhasakto 'pi kadācit kīrtayed dharim so 'pi doṣakṣayān muktiṃ labhec cedipatir yathā //