कपिल उवाच एवं कृत-मतिर् गर्भे दश-मास्यः स्तुवन्न् ऋषिः । सद्यः क्षिपत्य् अवाचीनं प्रसूत्यै सूति-मारुतः ॥
kapila uvāca evaṃ kṛta-matir garbhe daśa-māsyaḥ stuvann ṛṣiḥ / sadyaḥ kṣipaty avācīnaṃ prasūtyai sūti-mārutaḥ //
तेनावसृष्टः सहसा कृत्वावाक् शिर आतुरः । विनिष्क्रामति कृच्छ्रेण निरुच्छ्वासो हत-स्मृतिः ॥
tenāvasṛṣṭaḥ sahasā kṛtvāvāk śira āturaḥ / viniṣkrāmati kṛcchreṇa nirucchvāso hata-smṛtiḥ //
पतितो भुव्य् असृङ्-मिश्रः विष्ठा-भूर् इव चेष्टते । रोरूयति गते ज्ञाने विपरीतां गतिं गतः ॥
patito bhuvy asṛṅ-miśraḥ viṣṭhā-bhūr iva ceṣṭate / rorūyati gate jñāne viparītāṃ gatiṃ gataḥ //
पर-च्छन्दं न विदुषा पुष्यमाणो जनेन सः । अनभिप्रेतम् आपन्नः प्रत्याख्यातुम् अनीश्वरः ॥
para-cchandaṃ na viduṣā puṣyamāṇo janena saḥ / anabhipretam āpannaḥ pratyākhyātum anīśvaraḥ //
शायितो ऽशुचि-पर्यङ्के जन्तुः स्वेदज-दूषिते । नेशः कण्डूयने ऽङ्गानाम् आसनोत्थान-चेष्टने ॥
śāyito 'śuci-paryaṅke jantuḥ svedaja-dūṣite / neśaḥ kaṇḍūyane 'ṅgānām āsanotthāna-ceṣṭane //
तुदन्त्य् आम-त्वचं दंशा मशका मत्कुणादयः । रुदन्तं विगत-ज्ञानं कृमयः कृमिकं यथा ॥
tudanty āma-tvacaṃ daṃśā maśakā matkuṇādayaḥ / rudantaṃ vigata-jñānaṃ kṛmayaḥ kṛmikaṃ yathā //
इत्य् एवं शैशवं भुक्त्वा दुःखं पौगण्डम् एव च । अलब्धाभीप्सितो ऽज्ञानाद् इद्ध-मन्युः शुचार्पितः ॥
ity evaṃ śaiśavaṃ bhuktvā duḥkhaṃ paugaṇḍam eva ca / alabdhābhīpsito 'jñānād iddha-manyuḥ śucārpitaḥ //
सह देहेन मानेन वर्धमानेन मन्युना । करोति विग्रहं कामी कामिष्व् अन्ताय चात्मनः ॥
saha dehena mānena vardhamānena manyunā / karoti vigrahaṃ kāmī kāmiṣv antāya cātmanaḥ //
भूतैः पञ्चभिर् आरब्धे देहे देह्य् अबुधो ऽसकृत् । अहं ममेत्य् असद्-ग्राहः करोति कुमतिर् मतिम् ॥
bhūtaiḥ pañcabhir ārabdhe dehe dehy abudho 'sakṛt / ahaṃ mamety asad-grāhaḥ karoti kumatir matim //
तद्-अर्थं कुरुते कर्म यद्-बद्धो याति संसृतिम् । यो ऽनुयाति ददत् क्लेशम् अविद्या-कर्म-बन्धनः ॥
tad-arthaṃ kurute karma yad-baddho yāti saṃsṛtim / yo 'nuyāti dadat kleśam avidyā-karma-bandhanaḥ //
यद्य् असद्भिः पथि पुनः शिश्नोदर-कृतोद्यमैः । आस्थितो रमते जन्तुस् तमो विशति पूर्ववत् ॥
yady asadbhiḥ pathi punaḥ śiśnodara-kṛtodyamaiḥ / āsthito ramate jantus tamo viśati pūrvavat //
सत्यं शौचं दया मौनं बुद्धिः श्रीर् ह्रीर् यशः क्षमा । शमो दमो भगश् चेति यत्-सङ्गाद् याति सङ्क्षयम् ॥
satyaṃ śaucaṃ dayā maunaṃ buddhiḥ śrīr hrīr yaśaḥ kṣamā / śamo damo bhagaś ceti yat-saṅgād yāti saṅkṣayam //
तेष्व् अशान्तेषु मूढेषु खण्डितात्मस्व् असाधुषु । सङ्गं न कुर्याच् छोच्येषु योषित्-क्रीडा-मृगेषु च ॥
teṣv aśānteṣu mūḍheṣu khaṇḍitātmasv asādhuṣu / saṅgaṃ na kuryāc chocyeṣu yoṣit-krīḍā-mṛgeṣu ca //
न तथास्य भवेन् मोहो बन्धश् चान्य-प्रसङ्गतः । योषित्-सङ्गाद् यथा पुंसो यथा तत्-सङ्गि-सङ्गतः ॥
na tathāsya bhaven moho bandhaś cānya-prasaṅgataḥ / yoṣit-saṅgād yathā puṃso yathā tat-saṅgi-saṅgataḥ //
प्रजापतिः स्वां दुहितरं दृष्ट्वा तद्-रूप-धर्षितः । रोहिद्-भूतां सो ऽन्वधावद् ऋक्ष-रूपी हत-त्रपः ॥
prajāpatiḥ svāṃ duhitaraṃ dṛṣṭvā tad-rūpa-dharṣitaḥ / rohid-bhūtāṃ so 'nvadhāvad ṛkṣa-rūpī hata-trapaḥ //
तत्-सृष्ट-सृष्ट-सृष्टेषु को न्व् अखण्डित-धीः पुमान् । ऋषिं नारायणम् ऋते योषिन्-मय्येह मायया ॥
tat-sṛṣṭa-sṛṣṭa-sṛṣṭeṣu ko nv akhaṇḍita-dhīḥ pumān / ṛṣiṃ nārāyaṇam ṛte yoṣin-mayyeha māyayā //
बलं मे पश्य मायायाः स्त्री-मय्या जयिनो दिशाम् । या करोति पदाक्रान्तान् भ्रूवि-जृम्भेण केवलम् ॥
balaṃ me paśya māyāyāḥ strī-mayyā jayino diśām / yā karoti padākrāntān bhrūvi-jṛmbheṇa kevalam //
सङ्गं न कुर्यात् प्रमदासु जातु योगस्य पारं परम् आरुरुक्षुः । मत्-सेवया प्रतिलब्धात्म-लाभो वदन्ति या निरय-द्वारम् अस्य ॥
saṅgaṃ na kuryāt pramadāsu jātu yogasya pāraṃ param ārurukṣuḥ / mat-sevayā pratilabdhātma-lābho vadanti yā niraya-dvāram asya //
योपयाति शनैर् माया योषिद् देव-विनिर्मिता । ताम् ईक्षेतात्मनो मृत्युं तृणैः कूपम् इवावृतम् ॥
yopayāti śanair māyā yoṣid deva-vinirmitā / tām īkṣetātmano mṛtyuṃ tṛṇaiḥ kūpam ivāvṛtam //
यां मन्यते पतिं मोहान् मन्-मायाम् ऋषभायतीम् । स्त्रीत्वं स्त्री-सङ्गतः प्राप्तो वित्तापत्य-गृह-प्रदम् ॥
yāṃ manyate patiṃ mohān man-māyām ṛṣabhāyatīm / strītvaṃ strī-saṅgataḥ prāpto vittāpatya-gṛha-pradam //
ताम् आत्मनो विजानीयात् पत्य्-अपत्य-गृहात्मकम् । दैवोपसादितं मृत्युं मृगयोर् गायनं यथा ॥
tām ātmano vijānīyāt paty-apatya-gṛhātmakam / daivopasāditaṃ mṛtyuṃ mṛgayor gāyanaṃ yathā //
देहेन जीव-भूतेन लोकाल् लोकम् अनुव्रजन् । भुञ्जान एव कर्माणि करोत्य् अविरतं पुमान् ॥
dehena jīva-bhūtena lokāl lokam anuvrajan / bhuñjāna eva karmāṇi karoty avirataṃ pumān //
जीवो ह्य् अस्यानुगो देहो भूतेन्द्रिय-मनो-मयः । तन्-निरोधो ऽस्य मरणम् आविर्भावस् तु सम्भवः ॥
jīvo hy asyānugo deho bhūtendriya-mano-mayaḥ / tan-nirodho 'sya maraṇam āvirbhāvas tu sambhavaḥ //
द्रव्योपलब्धि-स्थानस्य द्रव्येक्षायोग्यता यदा । तत् पञ्चत्वम् अहं-मानाद् उत्पत्तिर् द्रव्य-दर्शनम् ॥
dravyopalabdhi-sthānasya dravyekṣāyogyatā yadā / tat pañcatvam ahaṃ-mānād utpattir dravya-darśanam //
यथाक्ष्णोर् द्रव्यावयव- दर्शनायोग्यता यदा । तदैव चक्षुषो द्रष्टुर् द्रष्टृत्वायोग्यतानयोः ॥
yathākṣṇor dravyāvayava- darśanāyogyatā yadā / tadaiva cakṣuṣo draṣṭur draṣṭṛtvāyogyatānayoḥ //
तस्मान् न कार्यः सन्त्रासो न कार्पण्यं न सम्भ्रमः । बुद्ध्वा जीव-गतिं धीरो मुक्त-सङ्गश् चरेद् इह ॥
tasmān na kāryaḥ santrāso na kārpaṇyaṃ na sambhramaḥ / buddhvā jīva-gatiṃ dhīro mukta-saṅgaś cared iha //
सम्यग्-दर्शनया बुद्ध्या योग-वैराग्य-युक्तया । माया-विरचिते लोके चरेन् न्यस्य कलेवरम् ॥
samyag-darśanayā buddhyā yoga-vairāgya-yuktayā / māyā-viracite loke caren nyasya kalevaram //
कपिल उवाच अथ यो गृह-मेधीयान् धर्मान् एवावसन् गृहे । कामम् अर्थं च धर्मान् स्वान् दोग्धि भूयः पिपर्ति तान् ॥
kapila uvāca atha yo gṛha-medhīyān dharmān evāvasan gṛhe / kāmam arthaṃ ca dharmān svān dogdhi bhūyaḥ piparti tān //
स चापि भगवद्-धर्मात् काम-मूढः पराङ्-मुखः । यजते क्रतुभिर् देवान् पित्-ंश् च श्रद्धयान्वितः ॥
sa cāpi bhagavad-dharmāt kāma-mūḍhaḥ parāṅ-mukhaḥ / yajate kratubhir devān pit-ṃś ca śraddhayānvitaḥ //
तच्-छ्रद्धयाक्रान्त-मतिः पितृ-देव-व्रतः पुमान् । गत्वा चान्द्रमसं लोकं सोम-पाः पुनर् एष्यति ॥
tac-chraddhayākrānta-matiḥ pitṛ-deva-vrataḥ pumān / gatvā cāndramasaṃ lokaṃ soma-pāḥ punar eṣyati //
यदा चाहीन्द्र-शय्यायां शेते ऽनन्तासनो हरिः । तदा लोका लयं यान्ति त एते गृह-मेधिनाम् ॥
yadā cāhīndra-śayyāyāṃ śete 'nantāsano hariḥ / tadā lokā layaṃ yānti ta ete gṛha-medhinām //
ये स्व-धर्मान् न दुह्यन्ति धीराः कामार्थ-हेतवे । निःसङ्गा न्यस्त-कर्माणः प्रशान्ताः शुद्ध-चेतसः ॥
ye sva-dharmān na duhyanti dhīrāḥ kāmārtha-hetave / niḥsaṅgā nyasta-karmāṇaḥ praśāntāḥ śuddha-cetasaḥ //
निवृत्ति-धर्म-निरता निर्ममा निरहङ्कृताः । स्व-धर्माप्तेन सत्त्वेन परिशुद्धेन चेतसा ॥
nivṛtti-dharma-niratā nirmamā nirahaṅkṛtāḥ / sva-dharmāptena sattvena pariśuddhena cetasā //
सूर्य-द्वारेण ते यान्ति पुरुषं विश्वतो-मुखम् । परावरेशं प्रकृतिम् अस्योत्पत्त्य्-अन्त-भावनम् ॥
sūrya-dvāreṇa te yānti puruṣaṃ viśvato-mukham / parāvareśaṃ prakṛtim asyotpatty-anta-bhāvanam //
द्वि-परार्धावसाने यः प्रलयो ब्रह्मणस् तु ते । तावद् अध्यासते लोकं परस्य पर-चिन्तकाः ॥
dvi-parārdhāvasāne yaḥ pralayo brahmaṇas tu te / tāvad adhyāsate lokaṃ parasya para-cintakāḥ //
क्ष्माम्भो-ऽनलानिल-वियन्-मन-इन्द्रियार्थ- भूतादिभिः परिवृतं प्रतिसञ्जिहीर्षुः अम्प्; अव्याकृतं विशति यर्हि गुण-त्रयात्माकालं पराख्यम् अनुभूय परः स्वयम्भूः ॥
kṣmāmbho-'nalānila-viyan-mana-indriyārtha- bhūtādibhiḥ parivṛtaṃ pratisañjihīrṣuḥ amp; avyākṛtaṃ viśati yarhi guṇa-trayātmākālaṃ parākhyam anubhūya paraḥ svayambhūḥ //
एवं परेत्य भगवन्तम् अनुप्रविष्टाये योगिनो जित-मरुन्-मनसो विरागाः एवं परेत्य भगवन्तम् अनुप्रविष्टाये योगिनो जित-मरुन्-मनसो विरागाः तेनैव साकम् अमृतं पुरुषं पुराणं ब्रह्म प्रधानम् उपयान्त्य् अगताभिमानाः ॥
evaṃ paretya bhagavantam anupraviṣṭāye yogino jita-marun-manaso virāgāḥ evaṃ paretya bhagavantam anupraviṣṭāye yogino jita-marun-manaso virāgāḥ tenaiva sākam amṛtaṃ puruṣaṃ purāṇaṃ brahma pradhānam upayānty agatābhimānāḥ //
अथ तं सर्व-भूतानां हृत्-पद्मेषु कृतालयम् । श्रुतानुभावं शरणं व्रज भावेन भामिनि ॥
atha taṃ sarva-bhūtānāṃ hṛt-padmeṣu kṛtālayam / śrutānubhāvaṃ śaraṇaṃ vraja bhāvena bhāmini //
आद्यः स्थिर-चराणां यो वेद-गर्भः सहर्षिभिः । योगेश्वरैः कुमाराद्यैः सिद्धैर् योग-प्रवर्तकैः ॥
ādyaḥ sthira-carāṇāṃ yo veda-garbhaḥ saharṣibhiḥ / yogeśvaraiḥ kumārādyaiḥ siddhair yoga-pravartakaiḥ //
भेद-दृष्ट्याभिमानेन निःसङ्गेनापि कर्मणा । कर्तृत्वात् सगुणं ब्रह्म पुरुषं पुरुषर्षभम् ॥
bheda-dṛṣṭyābhimānena niḥsaṅgenāpi karmaṇā / kartṛtvāt saguṇaṃ brahma puruṣaṃ puruṣarṣabham //
स संसृत्य पुनः काले कालेनेश्वर-मूर्तिना । जाते गुण-व्यतिकरे यथा-पूर्वं प्रजायते ॥
sa saṃsṛtya punaḥ kāle kāleneśvara-mūrtinā / jāte guṇa-vyatikare yathā-pūrvaṃ prajāyate //
ऐश्वर्यं पारमेष्ठ्यं च ते ऽपि धर्म-विनिर्मितम् । निषेव्य पुनर् आयान्ति गुण-व्यतिकरे सति ॥
aiśvaryaṃ pārameṣṭhyaṃ ca te 'pi dharma-vinirmitam / niṣevya punar āyānti guṇa-vyatikare sati //
ये त्व् इहासक्त-मनसः कर्मसु श्रद्धयान्विताः । कुर्वन्त्य् अप्रतिषिद्धानि नित्यान्य् अपि च कृत्स्नशः ॥
ye tv ihāsakta-manasaḥ karmasu śraddhayānvitāḥ / kurvanty apratiṣiddhāni nityāny api ca kṛtsnaśaḥ //
रजसा कुण्ठ-मनसः कामात्मानो ऽजितेन्द्रियाः । पित्-न् यजन्त्य् अनुदिनं गृहेष्व् अभिरताशयाः ॥
rajasā kuṇṭha-manasaḥ kāmātmāno 'jitendriyāḥ / pit-n yajanty anudinaṃ gṛheṣv abhiratāśayāḥ //
त्रै-वर्गिकास् ते पुरुषा विमुखा हरि-मेधसः । कथायां कथनीयोरु- विक्रमस्य मधुद्विषः ॥
trai-vargikās te puruṣā vimukhā hari-medhasaḥ / kathāyāṃ kathanīyoru- vikramasya madhudviṣaḥ //
नूनं दैवेन विहता ये चाच्युत-कथा-सुधाम् । हित्वा शृण्वन्त्य् असद्-गाथाः पुरीषम् इव विड्-भुजः ॥
nūnaṃ daivena vihatā ye cācyuta-kathā-sudhām / hitvā śṛṇvanty asad-gāthāḥ purīṣam iva viḍ-bhujaḥ //
दक्षिणेन पथार्यम्णः पितृ-लोकं व्रजन्ति ते । प्रजाम् अनु प्रजायन्ते श्मशानान्त-क्रिया-कृतः ॥
dakṣiṇena pathāryamṇaḥ pitṛ-lokaṃ vrajanti te / prajām anu prajāyante śmaśānānta-kriyā-kṛtaḥ //
ततस् ते क्षीण-सुकृताः पुनर् लोकम् इमं सति । पतन्ति विवशा देवैः सद्यो विभ्रंशितोदयाः ॥
tatas te kṣīṇa-sukṛtāḥ punar lokam imaṃ sati / patanti vivaśā devaiḥ sadyo vibhraṃśitodayāḥ //
तस्मात् त्वं सर्व-भावेन भजस्व परमेष्ठिनम् । तद्-गुणाश्रयया भक्त्या भजनीय-पदाम्बुजम् ॥
tasmāt tvaṃ sarva-bhāvena bhajasva parameṣṭhinam / tad-guṇāśrayayā bhaktyā bhajanīya-padāmbujam //
वासुदेवे भगवति भक्ति-योगः प्रयोजितः । जनयत्य् आशु वैराग्यं ज्ञानं यद् ब्रह्म-दर्शनम् ॥
vāsudeve bhagavati bhakti-yogaḥ prayojitaḥ / janayaty āśu vairāgyaṃ jñānaṃ yad brahma-darśanam //
यदास्य चित्तम् अर्थेषु समेष्व् इन्द्रिय-वृत्तिभिः । न विगृह्णाति वैषम्यं प्रियम् अप्रियम् इत्य् उत ॥
yadāsya cittam artheṣu sameṣv indriya-vṛttibhiḥ / na vigṛhṇāti vaiṣamyaṃ priyam apriyam ity uta //
स तदैवात्मनात्मानं निःसङ्गं सम-दर्शनम् । हेयोपादेय-रहितम् आरूढं पदम् ईक्षते ॥
sa tadaivātmanātmānaṃ niḥsaṅgaṃ sama-darśanam / heyopādeya-rahitam ārūḍhaṃ padam īkṣate //
ज्ञान-मात्रं परं ब्रह्म परमात्मेश्वरः पुमान् । दृश्य्-आदिभिः पृथग् भावैर् भगवान् एक ईयते ॥
jñāna-mātraṃ paraṃ brahma paramātmeśvaraḥ pumān / dṛśy-ādibhiḥ pṛthag bhāvair bhagavān eka īyate //
एतावान् एव योगेन समग्रेणेह योगिनः । युज्यते ऽभिमतो ह्य् अर्थो यद् असङ्गस् तु कृत्स्नशः ॥
etāvān eva yogena samagreṇeha yoginaḥ / yujyate 'bhimato hy artho yad asaṅgas tu kṛtsnaśaḥ //
ज्ञानम् एकं पराचीनैर् इन्द्रियैर् ब्रह्म निर्गुणम् । अवभात्य् अर्थ-रूपेण भ्रान्त्या शब्दादि-धर्मिणा ॥
jñānam ekaṃ parācīnair indriyair brahma nirguṇam / avabhāty artha-rūpeṇa bhrāntyā śabdādi-dharmiṇā //
यथा महान् अहं-रूपस् त्रि-वृत् पञ्च-विधः स्वराट् । एकादश-विधस् तस्य वपुर् अण्डं जगद् यतः ॥
yathā mahān ahaṃ-rūpas tri-vṛt pañca-vidhaḥ svarāṭ / ekādaśa-vidhas tasya vapur aṇḍaṃ jagad yataḥ //
एतद् वै श्रद्धया भक्त्या योगाभ्यासेन नित्यशः । समाहितात्मा निःसङ्गो विरक्त्या परिपश्यति ॥
etad vai śraddhayā bhaktyā yogābhyāsena nityaśaḥ / samāhitātmā niḥsaṅgo viraktyā paripaśyati //
इत्य् एतत् कथितं गुर्वि ज्ञानं तद् ब्रह्म-दर्शनम् । येनानुबुद्ध्यते तत्त्वं प्रकृतेः पुरुषस्य च ॥
ity etat kathitaṃ gurvi jñānaṃ tad brahma-darśanam / yenānubuddhyate tattvaṃ prakṛteḥ puruṣasya ca //
ज्ञान-योगश् च मन्-निष्ठो नैर्गुण्यो भक्ति-लक्षणः । द्वयोर् अप्य् एक एवार्थो भगवच्-छब्द-लक्षणः ॥
jñāna-yogaś ca man-niṣṭho nairguṇyo bhakti-lakṣaṇaḥ / dvayor apy eka evārtho bhagavac-chabda-lakṣaṇaḥ //
यथेन्द्रियैः पृथग्-द्वारैर् अर्थो बहु-गुणाश्रयः । एको नानेयते तद्वद् भगवान् शास्त्र-वर्त्मभिः ॥
yathendriyaiḥ pṛthag-dvārair artho bahu-guṇāśrayaḥ / eko nāneyate tadvad bhagavān śāstra-vartmabhiḥ //
क्रियया क्रतुभिर् दानैस् तपः-स्वाध्याय-मर्शनैः । आत्मेन्द्रिय-जयेनापि सन्न्यासेन च कर्मणाम् ॥
kriyayā kratubhir dānais tapaḥ-svādhyāya-marśanaiḥ / ātmendriya-jayenāpi sannyāsena ca karmaṇām //
योगेन विविधाङ्गेन भक्ति-योगेन चैव हि । धर्मेणोभय-चिह्नेन यः प्रवृत्ति-निवृत्तिमान् ॥
yogena vividhāṅgena bhakti-yogena caiva hi / dharmeṇobhaya-cihnena yaḥ pravṛtti-nivṛttimān //
आत्म-तत्त्वावबोधेन वैराग्येण दृढेन च । ईयते भगवान् एभिः सगुणो निर्गुणः स्व-दृक् ॥
ātma-tattvāvabodhena vairāgyeṇa dṛḍhena ca / īyate bhagavān ebhiḥ saguṇo nirguṇaḥ sva-dṛk //
प्रावोचं भक्ति-योगस्य स्वरूपं ते चतुर्-विधम् । कालस्य चाव्यक्त-गतेर् यो ऽन्तर्धावति जन्तुषु ॥
prāvocaṃ bhakti-yogasya svarūpaṃ te catur-vidham / kālasya cāvyakta-gater yo 'ntardhāvati jantuṣu //
जीवस्य संसृतीर् बह्वीर् अविद्या-कर्म-निर्मिताः । यास्व् अङ्ग प्रविशन्न् आत्मा न वेद गतिम् आत्मनः ॥
jīvasya saṃsṛtīr bahvīr avidyā-karma-nirmitāḥ / yāsv aṅga praviśann ātmā na veda gatim ātmanaḥ //
नैतत् खलायोपदिशेन् नाविनीताय कर्हिचित् । न स्तब्धाय न भिन्नाय नैव धर्म-ध्वजाय च ॥
naitat khalāyopadiśen nāvinītāya karhicit / na stabdhāya na bhinnāya naiva dharma-dhvajāya ca //
न लोलुपायोपदिशेन् न गृहारूढ-चेतसे । नाभक्ताय च मे जातु न मद्-भक्त-द्विषाम् अपि ॥
na lolupāyopadiśen na gṛhārūḍha-cetase / nābhaktāya ca me jātu na mad-bhakta-dviṣām api //
श्रद्दधानाय भक्ताय विनीतायानसूयवे । भूतेषु कृत-मैत्राय शुश्रूषाभिरताय च ॥
śraddadhānāya bhaktāya vinītāyānasūyave / bhūteṣu kṛta-maitrāya śuśrūṣābhiratāya ca //
बहिर्-जात-विरागाय शान्त-चित्ताय दीयताम् । निर्मत्सराय शुचये यस्याहं प्रेयसां प्रियः ॥
bahir-jāta-virāgāya śānta-cittāya dīyatām / nirmatsarāya śucaye yasyāhaṃ preyasāṃ priyaḥ //
य इदं शृणुयाद् अम्ब श्रद्धया पुरुषः सकृत् । यो वाभिधत्ते मच्-चित्तः स ह्य् एति पदवीं च मे ॥
ya idaṃ śṛṇuyād amba śraddhayā puruṣaḥ sakṛt / yo vābhidhatte mac-cittaḥ sa hy eti padavīṃ ca me //