अथोनचत्वारिंशदधिकत्रिशततमो ऽध्यायः
athonacatvāriṃśadadhikatriśatatamo 'dhyāyaḥ
रीतिनिरूपणं
rītinirūpaṇaṃ
अग्निरुचाच
agnirucāca
वाग्विद्यासम्प्रतिज्ञाने रीतिः सापि चतुर्विधा
vāgvidyāsampratijñāne rītiḥ sāpi caturvidhā
पाञ्चाली गौडदेशीया वैदर्भी लाटजा तथा
pāñcālī gauḍadeśīyā vaidarbhī lāṭajā tathā
उपचारयुता मृद्वी पाञ्चाली ह्रस्वविग्रहा
upacārayutā mṛdvī pāñcālī hrasvavigrahā
अनवस्थितसन्दर्भा गौडीया दीर्घविग्रहा
anavasthitasandarbhā gauḍīyā dīrghavigrahā
उपचारैर् न बहुभिरुपचारैर् विवर्जिता
upacārair na bahubhirupacārair vivarjitā
नातिकोमलसन्दर्भा वैदर्भी मुक्तविग्रहा
nātikomalasandarbhā vaidarbhī muktavigrahā
लाटीया स्फुटसन्धर्भा नातिविस्फुरविग्रहा
lāṭīyā sphuṭasandharbhā nātivisphuravigrahā
परित्यक्तापि भूयोभिरुपचारैर् उदाहृता
parityaktāpi bhūyobhirupacārair udāhṛtā
क्रियास्वविषमा वृत्तिर्भारत्यारभटी तथा
kriyāsvaviṣamā vṛttirbhāratyārabhaṭī tathā
कौशिकी सात्वती चेति सा चतुर्धा प्रतिष्ठिता
kauśikī sātvatī ceti sā caturdhā pratiṣṭhitā
वाक्प्रधाना नरप्राया स्त्रीयुक्ता प्राकृतोक्तिता
vākpradhānā naraprāyā strīyuktā prākṛtoktitā
भरतेन प्रणीतत्वाद् भारती रीतिरुच्यते
bharatena praṇītatvād bhāratī rītirucyate
चत्वार्यङ्गानि भारत्या वीथी प्रहसनन्तथा
catvāryaṅgāni bhāratyā vīthī prahasanantathā
प्रस्तावना नाटकादेर्वीथ्यङ्गाश् च त्रयोदश
prastāvanā nāṭakādervīthyaṅgāś ca trayodaśa
उद्घातकं तथैव स्याल्लपितं स्याद्द्वितीयकम्
udghātakaṃ tathaiva syāllapitaṃ syāddvitīyakam
असत्प्रलापो वाक्श्रेणी नालिका विपणन्तथा
asatpralāpo vākśreṇī nālikā vipaṇantathā
व्याहारस्तिमतञ्चैव छलावस्कन्दिते तथा
vyāhārastimatañcaiva chalāvaskandite tathā
गण्डो ऽथ मृदवश् चैव त्रयोदशमथाचितम्
gaṇḍo 'tha mṛdavaś caiva trayodaśamathācitam
तापसादेः प्रहसनं परिहासपरं वचः
tāpasādeḥ prahasanaṃ parihāsaparaṃ vacaḥ
मायेन्द्रजालयुद्धादिबहुलारभटी स्मृता
māyendrajālayuddhādibahulārabhaṭī smṛtā
मङ्क्षिप्तकारपातौ च वस्तूत्थापनमेव च
maṅkṣiptakārapātau ca vastūtthāpanameva ca
इत्य् आग्नेये महापुराणे अलङ्कारे रीतिनिरूपणं नामोनचत्वारिंशदधिकत्रिशततमो ऽध्यायः
ity āgneye mahāpurāṇe alaṅkāre rītinirūpaṇaṃ nāmonacatvāriṃśadadhikatriśatatamo 'dhyāyaḥ