Chapter 236

राज्यलक्ष्मीस्थिरत्वाय यथेन्द्रेण पुरा श्रियः

rājyalakṣmīsthiratvāya yathendreṇa purā śriyaḥ

स्तुतिः कृता तथा राजा जयार्थं स्तुतिमाचरेत्

stutiḥ kṛtā tathā rājā jayārthaṃ stutimācaret

नमस्ये सर्वलोकानां जननीमब्धिसम्भवां

namasye sarvalokānāṃ jananīmabdhisambhavāṃ

श्रियमुन्निन्द्रपद्माक्षीं विष्णुवक्षःस्थलस्थितां

śriyamunnindrapadmākṣīṃ viṣṇuvakṣaḥsthalasthitāṃ

त्वं सिद्धिस्त्वं स्वधा स्वाहा सुधा त्वं लोकपावनि

tvaṃ siddhistvaṃ svadhā svāhā sudhā tvaṃ lokapāvani

सन्धया रात्रिः प्रभा भूतिर्मेधा श्रद्धा सरस्वती

sandhayā rātriḥ prabhā bhūtirmedhā śraddhā sarasvatī

यज्ञविद्या महाविद्या गुह्यविद्या च शोभने

yajñavidyā mahāvidyā guhyavidyā ca śobhane

आत्मविद्या च देवि त्वं विमुक्तिफलदायिनी

ātmavidyā ca devi tvaṃ vimuktiphaladāyinī

आन्वीक्षिकी त्रयी वार्ता दण्डनीतिस्त्वमेव च

ānvīkṣikī trayī vārtā daṇḍanītistvameva ca

सौम्या सौम्यैर् जगद्रूपैस्त्वयैतद्देवि पूरितं

saumyā saumyair jagadrūpaistvayaitaddevi pūritaṃ

का त्वन्या त्वामृते देवि सर्वयज्ञमयं वपुः

kā tvanyā tvāmṛte devi sarvayajñamayaṃ vapuḥ

अध्यास्ते देव देवस्य योगिचिन्त्यं गदाभृतः

adhyāste deva devasya yogicintyaṃ gadābhṛtaḥ

त्वया देवि परित्यक्तं सकलं भुवनत्रयं

tvayā devi parityaktaṃ sakalaṃ bhuvanatrayaṃ

विनष्टप्रायमभवत् त्वयेदानीं समेधितं

vinaṣṭaprāyamabhavat tvayedānīṃ samedhitaṃ

दाराः पुत्रास् तथागारं सुहृद्धान्यधनादिकं

dārāḥ putrās tathāgāraṃ suhṛddhānyadhanādikaṃ

भवत्येतन्महाभागे नित्यं त्वद्वीक्षणान् नृणां

bhavatyetanmahābhāge nityaṃ tvadvīkṣaṇān nṛṇāṃ

शरीरारोग्यमैश्वर्यमरिपक्षक्षयः सुखं

śarīrārogyamaiśvaryamaripakṣakṣayaḥ sukhaṃ

देवि त्वद्दृष्टिदृष्टानां पुरुषाणां न दुर्लभं

devi tvaddṛṣṭidṛṣṭānāṃ puruṣāṇāṃ na durlabhaṃ

त्वमम्बा सर्वभूतानां देवदेवो हरिः पिता

tvamambā sarvabhūtānāṃ devadevo hariḥ pitā

त्वयैतद्वोइष्णुना चाम्ब जगद्व्याप्तं चराचरं

tvayaitadvoiṣṇunā cāmba jagadvyāptaṃ carācaraṃ

मानं कोषं तथा कोष्ठं मा गृहं मा परिच्छदं

mānaṃ koṣaṃ tathā koṣṭhaṃ mā gṛhaṃ mā paricchadaṃ

मा शरीरं कलत्रञ्च त्यजेथाः सर्वपावनि

mā śarīraṃ kalatrañca tyajethāḥ sarvapāvani

मा पुत्रान्मासुहृद्वर्गान्मा पशून्मा विभूषणं

mā putrānmāsuhṛdvargānmā paśūnmā vibhūṣaṇaṃ

त्यजेथा मम देवस्य विष्णोर्वक्षःस्थलालये

tyajethā mama devasya viṣṇorvakṣaḥsthalālaye

सत्त्वेन सत्यशौचाभ्यां तथा शीलादिभिर्गुणैः

sattvena satyaśaucābhyāṃ tathā śīlādibhirguṇaiḥ

त्यजन्ते ते नरा सद्यः सन्त्यक्ता ये त्वयामले

tyajante te narā sadyaḥ santyaktā ye tvayāmale

त्वयावलोकिताः सद्यः शीलाद्यैर् अखिलैर् गुणैः

tvayāvalokitāḥ sadyaḥ śīlādyair akhilair guṇaiḥ

कुलैश्वर्यैश् च युज्यन्ते पुरुषा निर्गुणा अपि

kulaiśvaryaiś ca yujyante puruṣā nirguṇā api

स श्लाघ्यः स गुणी धन्यः स कुलीनः स बुद्धिमान्

sa ślāghyaḥ sa guṇī dhanyaḥ sa kulīnaḥ sa buddhimān

स शूरः स च विक्रान्तो यस्त्वया देवि वीक्षितः

sa śūraḥ sa ca vikrānto yastvayā devi vīkṣitaḥ

सद्यो वैगुण्यमायान्ति शीलाद्याः सकला गुणाः

sadyo vaiguṇyamāyānti śīlādyāḥ sakalā guṇāḥ

पराङ्मुखी जगद्धात्री यस्य त्वं विष्णुवल्लभे

parāṅmukhī jagaddhātrī yasya tvaṃ viṣṇuvallabhe

न ते वर्णयितुं शक्ता गुणान् जिह्वापि वेधसः

na te varṇayituṃ śaktā guṇān jihvāpi vedhasaḥ

प्रसीद देवि पद्माक्षि नास्मांस्त्याक्षीः कदाचन

prasīda devi padmākṣi nāsmāṃstyākṣīḥ kadācana

एवं स्तुता ददौ श्रीश् च वरमिन्द्राय चेप्सितं

evaṃ stutā dadau śrīś ca varamindrāya cepsitaṃ

सुस्थिरत्वं च राज्यस्य सङ्ग्रामविजयादिकं

susthiratvaṃ ca rājyasya saṅgrāmavijayādikaṃ

स्वस्तोत्रपाठश्रवणकर्तॄणां भुक्तिमुक्तिदं

svastotrapāṭhaśravaṇakartṝṇāṃ bhuktimuktidaṃ

श्रीस्तोत्रं सततं तस्मात् पठेच्च शृणुयान्नरः

śrīstotraṃ satataṃ tasmāt paṭhecca śṛṇuyānnaraḥ