Chapter 207

कौमुदाख्यं मयोक्तञ्च चरेदाश्वयुजे सिते

kaumudākhyaṃ mayoktañca caredāśvayuje site

हरिं यजेत् मासमेकमेकादश्यामुपोषितः

hariṃ yajet māsamekamekādaśyāmupoṣitaḥ

आश्विने शुक्लपक्षेहमेकाहारी हरिं जपन्

āśvine śuklapakṣehamekāhārī hariṃ japan

मासमेकं भुक्तिमुक्त्यै करिष्ये कौमुदं व्रतं

māsamekaṃ bhuktimuktyai kariṣye kaumudaṃ vrataṃ

उपोष्य विष्णुं द्वादश्यां यजेद्देवं विलिप्य च

upoṣya viṣṇuṃ dvādaśyāṃ yajeddevaṃ vilipya ca

चन्दनागुरुकाश्मीरैः कमलोत्पलपुष्पकैः

candanāgurukāśmīraiḥ kamalotpalapuṣpakaiḥ

कल्हारैर्वाथ मालत्या दीपं तैलेन वाग्यतः

kalhārairvātha mālatyā dīpaṃ tailena vāgyataḥ

अहोरात्रं च नैवेद्यं पायसापूपमोदकैः

ahorātraṃ ca naivedyaṃ pāyasāpūpamodakaiḥ

ओं नमो वासुदेवाय विज्ञाप्याथ क्षमापयेत्

oṃ namo vāsudevāya vijñāpyātha kṣamāpayet

भोजनादि द्विजे दद्याद्यावद् देवः प्रबुद्ध्यते

bhojanādi dvije dadyādyāvad devaḥ prabuddhyate

तावन्मासोपवासः स्यादधिकं फलमप्यतः

tāvanmāsopavāsaḥ syādadhikaṃ phalamapyataḥ