Chapter 206

अगस्त्यो भगवान्विष्णुस्तमभ्यर्च्याप्नुयाद्धरिं

agastyo bhagavānviṣṇustamabhyarcyāpnuyāddhariṃ

अप्राप्ते भास्करे कन्यां सत्रिभागैस्त्रिभिर्दिनैः

aprāpte bhāskare kanyāṃ satribhāgaistribhirdinaiḥ

अर्घ्यं दद्यादगस्त्याय पूजयित्वा ह्य् उपोषितः

arghyaṃ dadyādagastyāya pūjayitvā hy upoṣitaḥ

काशपुष्पमयीं मूर्तिं प्रदोषे विन्यसेद् घटे

kāśapuṣpamayīṃ mūrtiṃ pradoṣe vinyased ghaṭe

मुनेर्यजेत्तां कुम्भस्थां रात्रौ कुर्यात् प्रजागरं

muneryajettāṃ kumbhasthāṃ rātrau kuryāt prajāgaraṃ

अगस्त्य मिनिशार्दूल तेजोराशे महामते

agastya miniśārdūla tejorāśe mahāmate

इमां मम कृतां पूजां गृह्णीष्व प्रियया सह

imāṃ mama kṛtāṃ pūjāṃ gṛhṇīṣva priyayā saha

आवाह्यार्घ्ये च सम्मुख्यं प्रार्चयेच्चन्दनादिना

āvāhyārghye ca sammukhyaṃ prārcayeccandanādinā

जलाशयसमीपे तु प्रातर्नीत्वार्घ्यमर्पयेत्

jalāśayasamīpe tu prātarnītvārghyamarpayet

काशपुष्पप्रतीकाश अग्निमारुतसम्भव

kāśapuṣpapratīkāśa agnimārutasambhava

मित्रावरुणयोः पुत्र कुम्भयोने नमो ऽस्तु ते

mitrāvaruṇayoḥ putra kumbhayone namo 'stu te

आतापिर्भक्षितो येन वातापिश् च महासुरः

ātāpirbhakṣito yena vātāpiś ca mahāsuraḥ

समुद्रः शोषितो येन सो ऽगस्त्यः सम्मुखो ऽस्तु मे

samudraḥ śoṣito yena so 'gastyaḥ sammukho 'stu me

अगस्तिं प्रार्थयिष्यामि कर्मणा मनसा गिरा

agastiṃ prārthayiṣyāmi karmaṇā manasā girā

अर्चयिस्याम्यहं मैत्रं परलोकाभिकाङ्क्षया

arcayisyāmyahaṃ maitraṃ paralokābhikāṅkṣayā

द्वीपान्तरसमुत्पन्नं देवानां परमं प्रियं

dvīpāntarasamutpannaṃ devānāṃ paramaṃ priyaṃ

राजानं सर्ववृक्षाणां चन्दनं प्रतिगृह्यतां

rājānaṃ sarvavṛkṣāṇāṃ candanaṃ pratigṛhyatāṃ

धर्मार्थकाममोक्षाणां भाजनी पापनाशनी

dharmārthakāmamokṣāṇāṃ bhājanī pāpanāśanī

सौभाग्यारोग्यलक्ष्मीदा पुष्पमाला प्रगृह्यतां

saubhāgyārogyalakṣmīdā puṣpamālā pragṛhyatāṃ

धूपो ऽयं गृह्यतां देव भक्तिं मे ह्य् अचलाङ्कुरु

dhūpo 'yaṃ gṛhyatāṃ deva bhaktiṃ me hy acalāṅkuru

ईप्सितं मे वरं देहि परत्र च शुभाङ्गतिं

īpsitaṃ me varaṃ dehi paratra ca śubhāṅgatiṃ

सुरासुरैर्मुनिश्रेष्ठ सर्वकामफलप्रद

surāsurairmuniśreṣṭha sarvakāmaphalaprada

वस्त्रव्रीहिफलैर्हेम्ना दत्तस्त्वर्घ्यो ह्य् अयं मया

vastravrīhiphalairhemnā dattastvarghyo hy ayaṃ mayā

अगस्त्यं बोधयिष्यामि यन्मया मनसोद्धृतं

agastyaṃ bodhayiṣyāmi yanmayā manasoddhṛtaṃ

फलैरर्घ्यं प्रदास्यामि गृहाणार्घ्यं महामुने

phalairarghyaṃ pradāsyāmi gṛhāṇārghyaṃ mahāmune

अगस्त्य एवं खनमानः खनित्रैः प्रजामपत्यंबलमीहमानः

agastya evaṃ khanamānaḥ khanitraiḥ prajāmapatyaṃbalamīhamānaḥ

उभौ कर्णावृषिरुग्रतेजाः पुपोष सत्या देवेष्वाशिषोजगाम

ubhau karṇāvṛṣirugratejāḥ pupoṣa satyā deveṣvāśiṣojagāma

राजपुत्रि नमस्तुभ्यं मुनिपत्नी महाव्रते

rājaputri namastubhyaṃ munipatnī mahāvrate

अर्घ्यं गृह्णीष्व देवेशि लोपामुद्रे यशस्विनि

arghyaṃ gṛhṇīṣva deveśi lopāmudre yaśasvini

पञ्चरत्नसमायुक्तं हेमरूप्यसमन्वितं

pañcaratnasamāyuktaṃ hemarūpyasamanvitaṃ

सप्तधान्यवृतं पात्रं दधिचन्दनसंयुतं

saptadhānyavṛtaṃ pātraṃ dadhicandanasaṃyutaṃ

अर्घ्यं दद्यादगस्त्याय स्त्रीशूद्राणामवैदिकं

arghyaṃ dadyādagastyāya strīśūdrāṇāmavaidikaṃ

अगस्त्य मुनिशार्दूल तेजोराशे च सर्वद

agastya muniśārdūla tejorāśe ca sarvada

इमां मम कृतां पूजां गृहीत्वा व्रज शान्तये

imāṃ mama kṛtāṃ pūjāṃ gṛhītvā vraja śāntaye

त्यजेदगस्त्र्यमुद्दिश्य धान्यमेकं फलं रसं

tyajedagastryamuddiśya dhānyamekaṃ phalaṃ rasaṃ

ततो ऽन्नं भोजयेद्विप्रान् घृतपायसमोदकान्

tato 'nnaṃ bhojayedviprān ghṛtapāyasamodakān

गां वासांसि सुवर्णञ्च तेभ्यो दद्याच्च दक्षिणां

gāṃ vāsāṃsi suvarṇañca tebhyo dadyācca dakṣiṇāṃ

घृतपायसयुक्तेन पात्रेणाच्छादिताननं

ghṛtapāyasayuktena pātreṇācchāditānanaṃ

सहिरण्यञ्च तं कुम्भं ब्राह्मणायोपकल्पयेत्

sahiraṇyañca taṃ kumbhaṃ brāhmaṇāyopakalpayet

सप्तवर्षाणि दत्वार्घ्यं सर्वे सर्वमवाप्नुयुः

saptavarṣāṇi datvārghyaṃ sarve sarvamavāpnuyuḥ

नीरा पुत्रांश् च सौभाग्यं पतिं कन्या नृपोद्भवं

nīrā putrāṃś ca saubhāgyaṃ patiṃ kanyā nṛpodbhavaṃ