अथ पञ्चदशाधिकशततमो ऽध्यायः
atha pañcadaśādhikaśatatamo 'dhyāyaḥ
गयायात्राविधिः
gayāyātrāvidhiḥ
अग्निर् उवाच
agnir uvāca
उद्यतश्चेद्गयां यातुं श्राद्धं कृत्वा विधानतः
udyataścedgayāṃ yātuṃ śrāddhaṃ kṛtvā vidhānataḥ
विधाय कार्पटीवेशं ग्रामस्यापि प्रदक्षिणं
vidhāya kārpaṭīveśaṃ grāmasyāpi pradakṣiṇaṃ
कृत्वा प्रतिदिनङ्गच्छेत् संयतश्चाप्रतिग्रही
kṛtvā pratidinaṅgacchet saṃyataścāpratigrahī
गृहाच्चलितमात्रस्य गयया गमनं प्रति
gṛhāccalitamātrasya gayayā gamanaṃ prati
स्वर्गारोहणसोपानं पितॄणान्तु पदे पदे
svargārohaṇasopānaṃ pitṝṇāntu pade pade
ब्रह्मज्ञानेन किं कार्यं गोगृहे मरणेन किं
brahmajñānena kiṃ kāryaṃ gogṛhe maraṇena kiṃ
किं कुरुक्षेत्रवासेन यदा पुत्रो गयां व्रजेत्
kiṃ kurukṣetravāsena yadā putro gayāṃ vrajet
गयाप्राप्तं सुतं दृष्ट्वा पितॄणामुत्सवो भवेत्
gayāprāptaṃ sutaṃ dṛṣṭvā pitṝṇāmutsavo bhavet
पद्भ्यामपि जलं स्पृष्ट्वा अस्मभ्यं किन्न दास्यति
padbhyāmapi jalaṃ spṛṣṭvā asmabhyaṃ kinna dāsyati
ब्रह्मज्ञानं गयाश्राद्धं गोगृहे मरणं तथा
brahmajñānaṃ gayāśrāddhaṃ gogṛhe maraṇaṃ tathā
वासः पुंसां कुरुक्षेत्रे मुक्तिरेषा चतुर्विधा
vāsaḥ puṃsāṃ kurukṣetre muktireṣā caturvidhā
काङ्क्षन्ति पितरः पुत्रं नरकाद्भयभीरवः
kāṅkṣanti pitaraḥ putraṃ narakādbhayabhīravaḥ
गयां यास्यति यः पुत्रः स नस्त्राता भविष्यति
gayāṃ yāsyati yaḥ putraḥ sa nastrātā bhaviṣyati
मुण्डनञ्चोपवासश् च सर्वतीर्थेष्वयं विधिः
muṇḍanañcopavāsaś ca sarvatīrtheṣvayaṃ vidhiḥ
न कालादिर्गयातीर्थे दद्यात् पिण्डांश् च नित्यशः
na kālādirgayātīrthe dadyāt piṇḍāṃś ca nityaśaḥ
पक्षत्रयनिवासी च पुनात्यासप्ततमं कुलं
pakṣatrayanivāsī ca punātyāsaptatamaṃ kulaṃ
अष्टकासु च वृद्धौच गयायां मृतवासरे
aṣṭakāsu ca vṛddhauca gayāyāṃ mṛtavāsare
अत्र मातुः पृथक् श्राद्धमन्यत्र पतिना सह
atra mātuḥ pṛthak śrāddhamanyatra patinā saha
पित्रादिनवदैत्यं तथा द्वादशदैवतं
pitrādinavadaityaṃ tathā dvādaśadaivataṃ
प्रथमे दिवसे स्नायात्तीर्थे ह्य् उत्तरमानसे
prathame divase snāyāttīrthe hy uttaramānase
उत्तरे मानसे पुण्ये आयुरारोग्यवृद्धये
uttare mānase puṇye āyurārogyavṛddhaye
सर्वाघौघविधानाय स्नानं कुर्याद् विमुक्तये
sarvāghaughavidhānāya snānaṃ kuryād vimuktaye
सन्तर्प्य देवपित्रादीन् श्राद्धकृत् पिण्डदो भवेत्
santarpya devapitrādīn śrāddhakṛt piṇḍado bhavet
दिव्यान्तरीक्षभौमस्थान् देवान् सन्तर्पयाम्यहं
divyāntarīkṣabhaumasthān devān santarpayāmyahaṃ
दिव्यान्तरीक्षभौमादि पितृमात्रादि तर्पयेत्
divyāntarīkṣabhaumādi pitṛmātrādi tarpayet
पिता पितामहश् चैव तथैव प्रपितामहः
pitā pitāmahaś caiva tathaiva prapitāmahaḥ
माता पितामही चैव तथैव प्रपितामही
mātā pitāmahī caiva tathaiva prapitāmahī
मातामहः प्रमातामहो वृद्धप्रमातामहः
mātāmahaḥ pramātāmaho vṛddhapramātāmahaḥ
तेभ्यो.न्येभ्य इमान् पिण्डानुद्धाराय ददाम्यहं
tebhyo.nyebhya imān piṇḍānuddhārāya dadāmyahaṃ
ओं नमः सूर्यदेवाय सोमभौमज्ञरूपिणे
oṃ namaḥ sūryadevāya somabhaumajñarūpiṇe
जीवशुक्रशनैश्चारिराहुकेतुस्वरूपिणे
jīvaśukraśanaiścārirāhuketusvarūpiṇe
उत्तरे मानसे स्नाता उद्धरेत्सकलं कुलं
uttare mānase snātā uddharetsakalaṃ kulaṃ
सूर्यं नत्वा व्रजेन्मौनी नरो दक्षिणमानसं
sūryaṃ natvā vrajenmaunī naro dakṣiṇamānasaṃ
दक्षिणे मानसे स्नानं करोमि पितृतृप्तये
dakṣiṇe mānase snānaṃ karomi pitṛtṛptaye
गयायामागतः स्वर्गं यान्तु मे पितरो ऽखिलाः
gayāyāmāgataḥ svargaṃ yāntu me pitaro 'khilāḥ
श्राद्धं पिण्डन्ततः कृत्वा सूर्यं नत्वा वदेदिदं
śrāddhaṃ piṇḍantataḥ kṛtvā sūryaṃ natvā vadedidaṃ
ओं नमो भानवे भर्त्रे भवाय भव मे विभो
oṃ namo bhānave bhartre bhavāya bhava me vibho
भुक्तिमुक्तिप्रदः सर्वपितॄणां भवभावितः
bhuktimuktipradaḥ sarvapitṝṇāṃ bhavabhāvitaḥ
कव्यवालानलः सोमो यमश् चैवार्यमा तथा
kavyavālānalaḥ somo yamaś caivāryamā tathā
अग्निष्वात्ता वर्हिषद आज्यपाः पितृदेवताः
agniṣvāttā varhiṣada ājyapāḥ pitṛdevatāḥ
आगच्छन्तु महाभागा युष्माभी रक्षितास्त्विह
āgacchantu mahābhāgā yuṣmābhī rakṣitāstviha
मदीयाः पितरो ये च मातृमातामहादयः
madīyāḥ pitaro ye ca mātṛmātāmahādayaḥ
तेषां पिण्डप्रदाताहमागतो ऽस्मि गयामिमां
teṣāṃ piṇḍapradātāhamāgato 'smi gayāmimāṃ
उदीच्यां मुण्डपृष्ठस्य देवर्षिगणपूजितं
udīcyāṃ muṇḍapṛṣṭhasya devarṣigaṇapūjitaṃ
नाम्ना कनखलं तीर्थं त्रिषु लोकेषु विश्रुतं
nāmnā kanakhalaṃ tīrthaṃ triṣu lokeṣu viśrutaṃ
सिद्धानां प्रीतिजननैः पापानाञ्च भयङ्करैः
siddhānāṃ prītijananaiḥ pāpānāñca bhayaṅkaraiḥ
लेलिहानैर् महानागै रक्ष्यते चैव नित्यशः
lelihānair mahānāgai rakṣyate caiva nityaśaḥ
तत्र स्नात्वा दिवं यान्ति क्रीडन्ते भुवि मानवाः
tatra snātvā divaṃ yānti krīḍante bhuvi mānavāḥ
फल्गुतीर्थं ततो गच्छेन्महानद्यां स्थितं परं
phalgutīrthaṃ tato gacchenmahānadyāṃ sthitaṃ paraṃ
नागाज्जनार्दनात् कूपाद्वटाच्चोत्तरमानसात्
nāgājjanārdanāt kūpādvaṭāccottaramānasāt
एतद् गयाशिरः प्रोक्तं फल्गुतीर्थं तदुच्यते
etad gayāśiraḥ proktaṃ phalgutīrthaṃ taducyate
मुण्डपृष्ठनागाद्याश् च सारात् सारमथान्तरं
muṇḍapṛṣṭhanāgādyāś ca sārāt sāramathāntaraṃ
यस्मिन् फलति श्रीर्गौर्वा कामधेनुर्जलं मही
yasmin phalati śrīrgaurvā kāmadhenurjalaṃ mahī
दृष्टिरम्यादिकं यस्मात् फल्गुतीर्थं न फल्गुवत्
dṛṣṭiramyādikaṃ yasmāt phalgutīrthaṃ na phalguvat
फल्गुतीर्थे नरः स्नात्वा दृष्ट्वा देवं गदाधरं
phalgutīrthe naraḥ snātvā dṛṣṭvā devaṃ gadādharaṃ
एतेन किं न पर्याप्तं नृणां सुकृटकारिणां
etena kiṃ na paryāptaṃ nṛṇāṃ sukṛṭakāriṇāṃ
पृथिव्यां यानि तीर्थानि आसमुद्रात्सरांसि च
pṛthivyāṃ yāni tīrthāni āsamudrātsarāṃsi ca
फल्गुतीर्थं गमिष्यन्ति वारमेकं दिने दिने
phalgutīrthaṃ gamiṣyanti vāramekaṃ dine dine
फल्गुतीर्थे तीर्थराजे करोति स्नानमादृतः
phalgutīrthe tīrtharāje karoti snānamādṛtaḥ
पितॄणां ब्रह्मलोकाप्त्यै आत्मनो भुक्तिमुक्तये
pitṝṇāṃ brahmalokāptyai ātmano bhuktimuktaye
स्नात्वा श्राद्धी पिण्डदो ऽथ नमेद्देवं पितामहं
snātvā śrāddhī piṇḍado 'tha nameddevaṃ pitāmahaṃ
कलौ माहेश्वरा लोका अत्र देवी गदाधरः
kalau māheśvarā lokā atra devī gadādharaḥ
पितामहो लिङ्गरूपी तन्नमामि महेश्वरं
pitāmaho liṅgarūpī tannamāmi maheśvaraṃ
गदाधरं बलं काममनिरुद्धं नरायणं
gadādharaṃ balaṃ kāmamaniruddhaṃ narāyaṇaṃ
ब्रह्मविष्णुनृसिंहाख्यं वराहादिं नमाम्यहं
brahmaviṣṇunṛsiṃhākhyaṃ varāhādiṃ namāmyahaṃ
ततो गदाधरं दृष्ट्वा कुलानां शतमुद्धरेत्
tato gadādharaṃ dṛṣṭvā kulānāṃ śatamuddharet
धर्मारण्यं द्वितीये ऽह्नि मतङ्गस्याश्रमे वरे
dharmāraṇyaṃ dvitīye 'hni mataṅgasyāśrame vare
मतङ्गवाप्यां संस्नाय श्राद्धकृत् पिण्डदो भवेत्
mataṅgavāpyāṃ saṃsnāya śrāddhakṛt piṇḍado bhavet
मतङ्गेशं सुद्धेशं नत्वा चेदमुदीरयेत्
mataṅgeśaṃ suddheśaṃ natvā cedamudīrayet
प्रमाणं देवताः सन्तु लोकपालाश् च साक्षिणः
pramāṇaṃ devatāḥ santu lokapālāś ca sākṣiṇaḥ
मयागत्य मतङ्गे ऽस्मिन् पितॄणां निष्कृतिः कृता
mayāgatya mataṅge 'smin pitṝṇāṃ niṣkṛtiḥ kṛtā
स्नानतर्पणश्राद्धादिर्ब्रह्मतीर्थे ऽथ कूपके
snānatarpaṇaśrāddhādirbrahmatīrthe 'tha kūpake
तत्कूर्पयूपयोर्मध्ये श्राद्धं कुलशतोद्धृतौ
tatkūrpayūpayormadhye śrāddhaṃ kulaśatoddhṛtau
महाबोधतुरुं नत्वा धर्मवान् स्वर्गलोकभाक्
mahābodhaturuṃ natvā dharmavān svargalokabhāk
तृतीये ब्रह्मसरसि स्नानं कुर्याद्यतव्रतः
tṛtīye brahmasarasi snānaṃ kuryādyatavrataḥ
स्नानं ब्रह्मसरस्तीर्थे करोमि ब्रह्मभूतये
snānaṃ brahmasarastīrthe karomi brahmabhūtaye
पितॄणां ब्रह्मलोकाय ब्रह्मर्षिगणसेविते
pitṝṇāṃ brahmalokāya brahmarṣigaṇasevite
तर्पणं श्राद्धकृत् पिण्डं प्रदद्यात्तु प्रसेचनं
tarpaṇaṃ śrāddhakṛt piṇḍaṃ pradadyāttu prasecanaṃ
कुर्याच्च वाजपेयार्थी ब्रह्मयूपप्रदक्षिणं
kuryācca vājapeyārthī brahmayūpapradakṣiṇaṃ
एको मुनिः कुम्भकुशाग्रहस्त आम्रस्य मूले सलिलन्ददाति
eko muniḥ kumbhakuśāgrahasta āmrasya mūle salilandadāti
आम्नाय सिक्ताः पितरश् च तृप्ता एका क्रिया द्व्यर्थकरी प्रसिद्धा
āmnāya siktāḥ pitaraś ca tṛptā ekā kriyā dvyarthakarī prasiddhā
ब्रह्माणञ्च नमस्कृत्य कुलानां शतमुद्धरेत्
brahmāṇañca namaskṛtya kulānāṃ śatamuddharet
फल्गुतीर्थे चतुर्थे ऽह्नि स्नात्वा देवादितर्पणं
phalgutīrthe caturthe 'hni snātvā devāditarpaṇaṃ
कृत्वा श्राद्धं सपिण्डञ्च गयाशिरसि कारयेत्
kṛtvā śrāddhaṃ sapiṇḍañca gayāśirasi kārayet
पञ्चक्रोशं गयाक्षेत्रं क्रोशमेकं गयाशिरः
pañcakrośaṃ gayākṣetraṃ krośamekaṃ gayāśiraḥ
तत्र पिण्डप्रदानेन कुलानां शतमुधरेत्
tatra piṇḍapradānena kulānāṃ śatamudharet
मुण्डपृष्ठे पदं न्न्यास्तं महादेवेन धीमता
muṇḍapṛṣṭhe padaṃ nnyāstaṃ mahādevena dhīmatā
मुण्डपृष्ठे शिरः साक्षाद् गयाशिर उदाहृतं
muṇḍapṛṣṭhe śiraḥ sākṣād gayāśira udāhṛtaṃ
साक्षाद् गयाशिरस्तत्र फल्गुतीर्थाश्रमं कृतं
sākṣād gayāśirastatra phalgutīrthāśramaṃ kṛtaṃ
अमृतं तत्र वहति पितॄणान्दत्तमक्षयं
amṛtaṃ tatra vahati pitṝṇāndattamakṣayaṃ
स्नात्वा दशाश्वमेधे तु दृष्ट्वा देवं पितामहं
snātvā daśāśvamedhe tu dṛṣṭvā devaṃ pitāmahaṃ
रुद्रपादं नरः स्पृष्ट्वा नेह भूयो ऽभिजायते
rudrapādaṃ naraḥ spṛṣṭvā neha bhūyo 'bhijāyate
शमीपत्रप्रमाणेन पिण्डं दत्वा गयाशिरे
śamīpatrapramāṇena piṇḍaṃ datvā gayāśire
नरकस्था दिवं यान्ति स्वर्गस्था मोक्षमाप्नुयुः
narakasthā divaṃ yānti svargasthā mokṣamāpnuyuḥ
पायसेनाथ पिष्टेन शक्तुना चरुणा तथा
pāyasenātha piṣṭena śaktunā caruṇā tathā
पिण्डदानं तण्डुलैश् च गोधूमैस्तिलमिश्रितैः
piṇḍadānaṃ taṇḍulaiś ca godhūmaistilamiśritaiḥ
पिण्डं दत्वा रुद्रपदे कुलानां शतमुद्धरेत्
piṇḍaṃ datvā rudrapade kulānāṃ śatamuddharet
तथा विष्णुपदे श्राद्धपिण्डदो ह्य् ऋणमुक्तिकृत्
tathā viṣṇupade śrāddhapiṇḍado hy ṛṇamuktikṛt
पित्रादीनां शतकुलं स्वात्मानं तारयेन्नरः
pitrādīnāṃ śatakulaṃ svātmānaṃ tārayennaraḥ
तथा ब्रह्मपदे श्राद्धी ब्रह्मलोकं नयेत्पितॄन्
tathā brahmapade śrāddhī brahmalokaṃ nayetpitṝn
दक्षिणाग्निपदे तद्वद्गार्हपत्यपदे तथा
dakṣiṇāgnipade tadvadgārhapatyapade tathā
पदे वाहवनीयस्य श्राद्धी यज्ञफलं लभेत्
pade vāhavanīyasya śrāddhī yajñaphalaṃ labhet
आवसथ्यस्य चन्द्रस्य सूर्यस्य च गणस्य च
āvasathyasya candrasya sūryasya ca gaṇasya ca
अगस्त्यकार्त्तिकेयस्य श्राद्धी तारयते कुलं
agastyakārttikeyasya śrāddhī tārayate kulaṃ
आदित्यस्य रथं नत्वा कर्णादित्यं नमीन्नरः
ādityasya rathaṃ natvā karṇādityaṃ namīnnaraḥ
कनकेशपदं नत्वा गयाकेदारकं नमेत्
kanakeśapadaṃ natvā gayākedārakaṃ namet
सर्वपापविनिर्मुक्तः पितॄन् ब्रह्मपुरं नयेत्
sarvapāpavinirmuktaḥ pitṝn brahmapuraṃ nayet
विशालो ऽपि गयाशीर्षे पिण्डदो ऽभूच्च पुत्रवान्
viśālo 'pi gayāśīrṣe piṇḍado 'bhūcca putravān
विशालायां विशालो ऽभूद्राजपुत्रो ऽब्रवीद् द्विजान्
viśālāyāṃ viśālo 'bhūdrājaputro 'bravīd dvijān
कथं पुत्रादयः स्युर्मे द्विजा ऊचुर्विशालकं
kathaṃ putrādayaḥ syurme dvijā ūcurviśālakaṃ
गयायां पिण्डदानेन तव सर्वं भविष्यति
gayāyāṃ piṇḍadānena tava sarvaṃ bhaviṣyati
विशालो ऽपि गयाशीर्षे पितृपिण्डान्ददौ ततः
viśālo 'pi gayāśīrṣe pitṛpiṇḍāndadau tataḥ
दृष्ट्वाकाशे सितं रक्तं पुरुषांस्तांश् चपृष्टवान्
dṛṣṭvākāśe sitaṃ raktaṃ puruṣāṃstāṃś capṛṣṭavān
के युयन्तेषु चैवैकः सितः प्रोचे विशालकं
ke yuyanteṣu caivaikaḥ sitaḥ proce viśālakaṃ
अहं सितस्ते जनक इन्द्रलोकं गतः शुभान्
ahaṃ sitaste janaka indralokaṃ gataḥ śubhān
मम रक्तः पिता पुत्र कृष्णश् चैव पितामहः
mama raktaḥ pitā putra kṛṣṇaś caiva pitāmahaḥ
अब्रवीत् नरकं प्राप्ता त्वया मुक्तीकृता वयं
abravīt narakaṃ prāptā tvayā muktīkṛtā vayaṃ
पिण्डदानाद् ब्रह्मलोकं ब्रजाम इति ते गताः
piṇḍadānād brahmalokaṃ brajāma iti te gatāḥ
विशालः प्राप्तपुतादी राज्यं कृत्वा हरिं ययौ
viśālaḥ prāptaputādī rājyaṃ kṛtvā hariṃ yayau
प्रेतराजः स्वमुक्त्यै च वणिजञ्चेदमब्रवीत्
pretarājaḥ svamuktyai ca vaṇijañcedamabravīt
प्रेतैः सर्वैः सहार्तः सन् सुकृतं भुज्यते फलं
pretaiḥ sarvaiḥ sahārtaḥ san sukṛtaṃ bhujyate phalaṃ
श्रवणद्वादशीयोगे कुम्भः सान्नश् च सोदकः
śravaṇadvādaśīyoge kumbhaḥ sānnaś ca sodakaḥ
दत्तः पुरा स मध्याह्ने जीवनायोपतिष्ठते
dattaḥ purā sa madhyāhne jīvanāyopatiṣṭhate
धनं गृहीत्वा मे गच्छ गयायां पिण्डदो भव
dhanaṃ gṛhītvā me gaccha gayāyāṃ piṇḍado bhava
वणिग्धनं गृहीत्वा तु गयायां पिण्डदो ऽभवत्
vaṇigdhanaṃ gṛhītvā tu gayāyāṃ piṇḍado 'bhavat
प्रेतराजः सह प्रेतैर् मुक्तो नीतो हरेः पुरं
pretarājaḥ saha pretair mukto nīto hareḥ puraṃ
गयाशीर्षे पिण्डदानादात्मानं स्वपितॄंस् तथा
gayāśīrṣe piṇḍadānādātmānaṃ svapitṝṃs tathā
पितृवंशे सुता ये च मातृवंशे तथैव च
pitṛvaṃśe sutā ye ca mātṛvaṃśe tathaiva ca
गुरुश्वशुरबन्धूनां ये चान्ये बान्धवा मृताः
guruśvaśurabandhūnāṃ ye cānye bāndhavā mṛtāḥ
ये मे कुले लुप्तपिण्डाः पुत्रदारविवर्जिताः
ye me kule luptapiṇḍāḥ putradāravivarjitāḥ
क्रियालोपगता ये च जात्यन्धाः पुङ्गवस् तथा
kriyālopagatā ye ca jātyandhāḥ puṅgavas tathā
विरूपा आमगर्भा ये ज्ञाताज्ञाताः कुले मम
virūpā āmagarbhā ye jñātājñātāḥ kule mama
तेषां पिण्डो मया दत्तो ह्य् अक्षय्यमुपतिष्ठतां
teṣāṃ piṇḍo mayā datto hy akṣayyamupatiṣṭhatāṃ
ये केचित् प्रेतरूपेण तिष्ठन्ति पितरो मम
ye kecit pretarūpeṇa tiṣṭhanti pitaro mama
ते सर्वे तृप्तिमायान्तु पिण्डदानेन सर्वदा
te sarve tṛptimāyāntu piṇḍadānena sarvadā
पिण्डो देयस्तु सर्वेभ्यः सर्वैर् वै कुलतारकैः
piṇḍo deyastu sarvebhyaḥ sarvair vai kulatārakaiḥ
आत्मनस्तु तथा देयो ह्य् अक्षयं लोकमिच्छता
ātmanastu tathā deyo hy akṣayaṃ lokamicchatā
पञ्चमे ऽह्नि गदालोले स्नायान्मन्त्रेण बुद्धिमान्
pañcame 'hni gadālole snāyānmantreṇa buddhimān
गदाप्रक्षालने तीर्थे गदालोले ऽतिपावने
gadāprakṣālane tīrthe gadālole 'tipāvane
स्नानं करामि संसारगदशान्त्यै जनार्दन
snānaṃ karāmi saṃsāragadaśāntyai janārdana
नमो ऽक्षयवटायैव अक्षयस्वर्गदायिने
namo 'kṣayavaṭāyaiva akṣayasvargadāyine
पित्रादीनामक्षयाय सर्वपापक्षयाय च
pitrādīnāmakṣayāya sarvapāpakṣayāya ca
श्राद्धं वटतले कुर्याद् ब्राह्मणानाञ्च भोजनं
śrāddhaṃ vaṭatale kuryād brāhmaṇānāñca bhojanaṃ
एकस्मिन् भोजिते विप्रे कोटिर्भवति भोजिता
ekasmin bhojite vipre koṭirbhavati bhojitā
किम्पुनर्बहुभिर्भुक्तैः पितॄणां दत्तमक्षयं
kimpunarbahubhirbhuktaiḥ pitṝṇāṃ dattamakṣayaṃ
गयायामन्नदाता यः पितरस्तेन पुत्रिणः
gayāyāmannadātā yaḥ pitarastena putriṇaḥ
वटं वटेश्वरं नत्वा पूजयेत् प्रपितामहं
vaṭaṃ vaṭeśvaraṃ natvā pūjayet prapitāmahaṃ
अक्षयांल्लभते लोकान् कुलानां शतमुद्धरेत्
akṣayāṃllabhate lokān kulānāṃ śatamuddharet
क्रमतो ऽक्रमतो वापि गयायत्रा महाफला
kramato 'kramato vāpi gayāyatrā mahāphalā
इत्य् आग्नेये महापुराणे गयामाहात्म्ये गययात्रा नाम पञ्चदशाधिकशततमो ऽध्यायः ॥
ity āgneye mahāpurāṇe gayāmāhātmye gayayātrā nāma pañcadaśādhikaśatatamo 'dhyāyaḥ ||