73 ॥ इति श्रीबृहन्नारदीयपुराणोत्तरभागे मोहिनीं प्रति ब्रह्मवाक्यं नाम सप्तमो ऽध्यायः सौतिरुवाच सास श्रुत्वा ब्रह्मणो वाक्यं नारी कमललोचना । उवाच नाम मेदेहि येन गच्छामि मन्दिरम्
73 // iti śrībṛhannāradīyapurāṇottarabhāge mohinīṃ prati brahmavākyaṃ nāma saptamo 'dhyāyaḥ sautiruvāca sāsa śrutvā brahmaṇo vākyaṃ nārī kamalalocanā / uvāca nāma medehi yena gacchāmi mandiram
1 ॥ पित्रा नाम प्रकर्तव्यमपत्यानां जगत्पते । नाम पापहरं प्रोक्तं तत्कुरुष्व कुशध्वज
1 // pitrā nāma prakartavyamapatyānāṃ jagatpate / nāma pāpaharaṃ proktaṃ tatkuruṣva kuśadhvaja
2 ॥ ब्रह्मोवाच यस्मादिदं जगत्सर्वं त्वया सुंदरि मोहितम् । मोहिनी नाम ते देवि सगुणं हि भविष्यति
2 // brahmovāca yasmādidaṃ jagatsarvaṃ tvayā suṃdari mohitam / mohinī nāma te devi saguṇaṃ hi bhaviṣyati
3 ॥ दशावस्थागतः सम्यग् दर्शनात्ते भविष्यति । यदि प्राप्नोति वै सुभ्रु त्वत्संपर्कं सुखावहम्
3 // daśāvasthāgataḥ samyag darśanātte bhaviṣyati / yadi prāpnoti vai subhru tvatsaṃparkaṃ sukhāvaham
4 ॥ एवमुक्ता वरारोहा प्रणम्य कमलासनम् । वीक्ष्यमाणामरैर्मार्गे प्रतस्थे मन्दराचलम्
4 // evamuktā varārohā praṇamya kamalāsanam / vīkṣyamāṇāmarairmārge pratasthe mandarācalam
5 ॥ तृतीयेन मुहूर्तेन संप्राप्ता गिरिमस्तकम् । यस्य संवेष्टने नागो वासुकिर्नहि पूर्यते
5 // tṛtīyena muhūrtena saṃprāptā girimastakam / yasya saṃveṣṭane nāgo vāsukirnahi pūryate
6 ॥ यो धृतो हरिणा पूर्वं मथितो देवदानवैः । षड्लक्षयोजनः सिंधुर्यस्यासौ गह्वरो भवेत्
6 // yo dhṛto hariṇā pūrvaṃ mathito devadānavaiḥ / ṣaḍlakṣayojanaḥ siṃdhuryasyāsau gahvaro bhavet
7 ॥ कूर्मदेहेन संपृक्तो यो न भिन्नो गिरिर्महान् । पतता येन राजेन्द्र सिंधोर्गुह्यं प्रदर्शितम्
7 // kūrmadehena saṃpṛkto yo na bhinno girirmahān / patatā yena rājendra siṃdhorguhyaṃ pradarśitam
8 ॥ गतं ब्रह्माण्डमार्गेण पयो यस्माद्गिरेर्द्विजाः । कूर्मास्थिघर्षता येन पावको जनितो महान्
8 // gataṃ brahmāṇḍamārgeṇa payo yasmādgirerdvijāḥ / kūrmāsthigharṣatā yena pāvako janito mahān
9 ॥ यस्मिन्स वसते देवः सह भूतैर्दिगंबरः । न देवैर्दानवैर्वापि दृष्टो यो हि द्विजोत्तमाः
9 // yasminsa vasate devaḥ saha bhūtairdigaṃbaraḥ / na devairdānavairvāpi dṛṣṭo yo hi dvijottamāḥ
10 ॥ दशवर्षसहस्राख्ये काले महति गच्छति । केयूरघर्षणे येन कृतं देवस्य चक्रिणः
10 // daśavarṣasahasrākhye kāle mahati gacchati / keyūragharṣaṇe yena kṛtaṃ devasya cakriṇaḥ
11 ॥ रत्नानां मन्दिरं ह्येष बहुधातुसमन्वितः
11 // ratnānāṃ mandiraṃ hyeṣa bahudhātusamanvitaḥ
12 ॥ क्रीडाविहारो ऽपि दिवौकसां यस्तपस्विना यस्तपसो ऽपि हेतुः । सुराङ्गनानां रतिवर्द्धनो यो रत्नौषधीनां प्रभवो गिरिर्महान्
12 // krīḍāvihāro 'pi divaukasāṃ yastapasvinā yastapaso 'pi hetuḥ / surāṅganānāṃ rativarddhano yo ratnauṣadhīnāṃ prabhavo girirmahān
13 ॥ दशैकसाहस्रमितश्च मूले तत्संख्यया विस्तरतां गतो ऽसौ । दैर्घ्येण तावन्ति हि योजनानि त्रैलोक्ययष्टीव समुच्छ्रितो ऽसौ
13 // daśaikasāhasramitaśca mūle tatsaṃkhyayā vistaratāṃ gato 'sau / dairghyeṇa tāvanti hi yojanāni trailokyayaṣṭīva samucchrito 'sau
14 ॥ सकाञ्चनै रत्नमयैश्च शृङ्गैः प्रकाशयन्भूमितलं वियच्च । यस्मिन्गतः कश्य पनन्दनो वै विरश्मितामेति विनष्टतेजाः
14 // sakāñcanai ratnamayaiśca śṛṅgaiḥ prakāśayanbhūmitalaṃ viyacca / yasmingataḥ kaśya panandano vai viraśmitāmeti vinaṣṭatejāḥ
15 ॥ काञ्चनाकारभूताङ्गं सप्राप्ता काञ्चनप्रभा । सूर्यतेजोनिहन्तारं मन्दरं तेजसा स्वयम्
15 // kāñcanākārabhūtāṅgaṃ saprāptā kāñcanaprabhā / sūryatejonihantāraṃ mandaraṃ tejasā svayam
16 ॥ कुर्वती नृपकामार्थमुपविष्टा शिलातले । नीलकान्तिमये दिव्ये सप्तयोजनविरतृते
16 // kurvatī nṛpakāmārthamupaviṣṭā śilātale / nīlakāntimaye divye saptayojanaviratṛte
17 ॥ तस्यां शिलायां राजेन्द्र लिगं तिष्ठति कौलिशम् । दशहस्त प्रमाणं हि विस्तरादूर्द्ध्वसंख्यया
17 // tasyāṃ śilāyāṃ rājendra ligaṃ tiṣṭhati kauliśam / daśahasta pramāṇaṃ hi vistarādūrddhvasaṃkhyayā
18 ॥ वृषलिङ्गेति विख्यातं प्रासादाभ्रसमं परम् । तस्मिन्बाला द्विजश्रेष्ठाश्चक्रे संगीतमुत्तमम्
18 // vṛṣaliṅgeti vikhyātaṃ prāsādābhrasamaṃ param / tasminbālā dvijaśreṣṭhāścakre saṃgītamuttamam
19 ॥ तन्त्रीता लसमायुक्तं क्लमहानिकरं परम् । समीपवर्तिनी तस्य भूत्वा लिङ्गस्य भामिनी
19 // tantrītā lasamāyuktaṃ klamahānikaraṃ param / samīpavartinī tasya bhūtvā liṅgasya bhāminī
20 ॥ मूर्च्छनातालसहितं गान्धारध्वनिसंयुतम् । तस्मिन्प्रवृत्ते राजेन्द्रगीते मन्मथवर्द्धने
20 // mūrcchanātālasahitaṃ gāndhāradhvanisaṃyutam / tasminpravṛtte rājendragīte manmathavarddhane
21 ॥ बभूव स्थावराणां हि स्पृहा तस्मिन्मुनीश्वराः । न च दैवं न चादैवं गीतं तादृग्बभूव ह
21 // babhūva sthāvarāṇāṃ hi spṛhā tasminmunīśvarāḥ / na ca daivaṃ na cādaivaṃ gītaṃ tādṛgbabhūva ha
22 ॥ मोहिनीमुखनिर्गीतं गीतं सत्वविमोहनम्
22 // mohinīmukhanirgītaṃ gītaṃ satvavimohanam
23 ॥ श्रुत्वैव गीतं हि दिगम्बरस्तु तेनैव रूपेण वराङ्गनायाः । कामातुरो भोक्तुमनाश्चचाल तां मोहिनीं पार्वतिदृष्टिलज्जः
23 // śrutvaiva gītaṃ hi digambarastu tenaiva rūpeṇa varāṅganāyāḥ / kāmāturo bhoktumanāścacāla tāṃ mohinīṃ pārvatidṛṣṭilajjaḥ