38 ॥ इति श्रीमार्कण्डेयपुराणे सावर्णिके मन्वन्तरे देवीमाहात्म्ये देवीवाक्यं नाम द्विनवतितमो ऽध्यायः त्रिनवतितमो ऽध्यायः- 93 ऋषिरुवाच एतत्ते कथितं भूप देवीमाहात्म्यमुत्तमम् । एवंप्रभावा सा देवी ययेदं धार्यते जगत्
38 // iti śrīmārkaṇḍeyapurāṇe sāvarṇike manvantare devīmāhātmye devīvākyaṃ nāma dvinavatitamo 'dhyāyaḥ trinavatitamo 'dhyāyaḥ- 93 ṛṣiruvāca etatte kathitaṃ bhūpa devīmāhātmyamuttamam / evaṃprabhāvā sā devī yayedaṃ dhāryate jagat
1 ॥ विद्या तथैव क्रियते भगवद्विष्णुमायया । तथा त्वमेष वैश्यश्च तथैवान्ये विवेकिनः । मोह्यन्ते मोहिताश्चैव मोहमेष्यन्ति चापरे
1 // vidyā tathaiva kriyate bhagavadviṣṇumāyayā / tathā tvameṣa vaiśyaśca tathaivānye vivekinaḥ / mohyante mohitāścaiva mohameṣyanti cāpare
2 ॥ तामुपैहि महाराज शरणं परमेश्वरीम् । आराधिता सैव नृणां भोगस्वर्गापवर्गदा
2 // tāmupaihi mahārāja śaraṇaṃ parameśvarīm / ārādhitā saiva nṛṇāṃ bhogasvargāpavargadā
3 ॥ मार्कण्डेय उवाच इति तस्य वचः श्रुत्वा सुरथः स नराधिपः । प्रणिपत्य महाभागं तमृषिं शंसितव्रतम्
3 // mārkaṇḍeya uvāca iti tasya vacaḥ śrutvā surathaḥ sa narādhipaḥ / praṇipatya mahābhāgaṃ tamṛṣiṃ śaṃsitavratam
4 ॥ निर्विण्णो ऽतिममत्वेन राज्यापहरणेन च । जगम सद्यस्तपसे स च वैश्यो महामुने
4 // nirviṇṇo 'timamatvena rājyāpaharaṇena ca / jagama sadyastapase sa ca vaiśyo mahāmune
5 ॥ संदर्शनार्थमम्बाया नदीपुलिनसंस्थितः । स च वैश्यस्तपस्तेपे देवीसूक्तं परं जपन्
5 // saṃdarśanārthamambāyā nadīpulinasaṃsthitaḥ / sa ca vaiśyastapastepe devīsūktaṃ paraṃ japan
6 ॥ तौ तस्मिन् पिलिने देव्याः कृत्वा मूर्ति महीमयीम् । अर्हणां चक्रतुस्तस्याः पुष्पधूपाग्नितर्पणैः
6 // tau tasmin piline devyāḥ kṛtvā mūrti mahīmayīm / arhaṇāṃ cakratustasyāḥ puṣpadhūpāgnitarpaṇaiḥ
7 ॥ निराहारौ यतात्मानौ तन्मनस्कौ समाहितौ । ददतुस्तौ बलिं चैव निजगात्रासृगुक्षितम्
7 // nirāhārau yatātmānau tanmanaskau samāhitau / dadatustau baliṃ caiva nijagātrāsṛgukṣitam
8 ॥ एवं समाराधयतोस्त्रिभिर्वर्षैर्यतात्मनोः । परितुष्टा जगद्धात्री प्रत्यक्षं प्राह चण्डिका
8 // evaṃ samārādhayatostribhirvarṣairyatātmanoḥ / parituṣṭā jagaddhātrī pratyakṣaṃ prāha caṇḍikā
9 ॥ श्रीदेव्युवाच यत्प्रार्थ्यते त्वया भूप त्वया च कुलनन्दन । मत्तस्तत्प्राप्यतां सर्वं परितुष्टा ददामि तत्
9 // śrīdevyuvāca yatprārthyate tvayā bhūpa tvayā ca kulanandana / mattastatprāpyatāṃ sarvaṃ parituṣṭā dadāmi tat
10 ॥ मार्कण्डेय उवाच ततो वव्रे नृपो राज्यमविभ्रंश्यन्यजन्मनि । अत्रैव च निजं राज्यं हतशत्रुबलं बलात्
10 // mārkaṇḍeya uvāca tato vavre nṛpo rājyamavibhraṃśyanyajanmani / atraiva ca nijaṃ rājyaṃ hataśatrubalaṃ balāt
11 ॥ सो ऽपि वैश्यस्ततो ज्ञानं वव्रे निर्विण्णमानसः । ममेत्यहमिति प्राज्ञः सङ्गविच्युतिकारकम्
11 // so 'pi vaiśyastato jñānaṃ vavre nirviṇṇamānasaḥ / mametyahamiti prājñaḥ saṅgavicyutikārakam
12 ॥ श्रीदेव्युवाच स्वल्पैरहोभिर्नृपते स्वं राज्यं प्राप्स्यते भवान् । हत्वा रिपूनस्खलितं तव तत्र भविष्यति
12 // śrīdevyuvāca svalpairahobhirnṛpate svaṃ rājyaṃ prāpsyate bhavān / hatvā ripūnaskhalitaṃ tava tatra bhaviṣyati
13 ॥ मृतश्च भूयः सम्प्राप्य जन्म देवाद्विवस्वतः । सावर्णिको नाम मनुर्भवान् भुवि भविष्यति
13 // mṛtaśca bhūyaḥ samprāpya janma devādvivasvataḥ / sāvarṇiko nāma manurbhavān bhuvi bhaviṣyati
14 ॥ वैश्यवर्य त्वया यश्च वरो ऽस्मत्तो ऽभिवाञ्छतः । तं प्रयच्छामि संसिद्ध्यै तव ज्ञानं भविष्यति
14 // vaiśyavarya tvayā yaśca varo 'smatto 'bhivāñchataḥ / taṃ prayacchāmi saṃsiddhyai tava jñānaṃ bhaviṣyati
15 ॥ मार्कण्डेय उवाच इति दत्त्वा तयोर्देवी यथाभिलषितं वरम् । बभूवान्तर्हिता सद्यो भक्त्या ताभ्यामभिष्टुता
15 // mārkaṇḍeya uvāca iti dattvā tayordevī yathābhilaṣitaṃ varam / babhūvāntarhitā sadyo bhaktyā tābhyāmabhiṣṭutā
16 ॥ एवं देव्या वरं लब्ध्वा सुरथः क्षत्रियर्षभः । सूर्याज्जन्म समासाद्य सावर्णिर्भविता मनुः
16 // evaṃ devyā varaṃ labdhvā surathaḥ kṣatriyarṣabhaḥ / sūryājjanma samāsādya sāvarṇirbhavitā manuḥ