51 ॥ इति श्रीमार्कण्डेयमहापुराणे सावर्णिके मन्वन्तरे देवीमाहत्म्ये देवैः कृता नारायणो स्तुतिर्नामैकनवतितमो ऽध्यायः द्विनवतितमो ऽध्यायः- 92 देव्युवाच एभिः स्तवैश्च मां नित्यं स्तोष्यते यः समाहितः । तस्याहं सकलां बाधां नाशयिष्याम्यसंशयम्
51 // iti śrīmārkaṇḍeyamahāpurāṇe sāvarṇike manvantare devīmāhatmye devaiḥ kṛtā nārāyaṇo stutirnāmaikanavatitamo 'dhyāyaḥ dvinavatitamo 'dhyāyaḥ- 92 devyuvāca ebhiḥ stavaiśca māṃ nityaṃ stoṣyate yaḥ samāhitaḥ / tasyāhaṃ sakalāṃ bādhāṃ nāśayiṣyāmyasaṃśayam
1 ॥ मधुकैटभानाशं च महिषासुरघातनम् । कीर्तयिष्यिन्ति ये तद्वद् वधं शुम्भनिशुम्भयोः
1 // madhukaiṭabhānāśaṃ ca mahiṣāsuraghātanam / kīrtayiṣyinti ye tadvad vadhaṃ śumbhaniśumbhayoḥ
2 ॥ अष्टम्यां च चतुर्दश्यां नवम्यां चैकचेतसः । स्तोष्यन्ति चैव ये भक्त्या मम माहात्म्यमुत्तमम्
2 // aṣṭamyāṃ ca caturdaśyāṃ navamyāṃ caikacetasaḥ / stoṣyanti caiva ye bhaktyā mama māhātmyamuttamam
3 ॥ न तेषां दुष्कृतं किञ्चिद् दुष्कृतोत्था न चापदः । भविष्यति न दारिद्रयं न चैवेष्टवियोजनम्
3 // na teṣāṃ duṣkṛtaṃ kiñcid duṣkṛtotthā na cāpadaḥ / bhaviṣyati na dāridrayaṃ na caiveṣṭaviyojanam
4 ॥ शत्रुतो न भयं तस्य दस्युतो वा न राजतः । न शस्त्रानलतोयौघात् कदाचित् सम्भविष्यति
4 // śatruto na bhayaṃ tasya dasyuto vā na rājataḥ / na śastrānalatoyaughāt kadācit sambhaviṣyati
5 ॥ तस्मान्ममैतन्माहात्म्यं पठितव्यं सहाहितैः । श्रोतव्यं च सदा भक्त्या परं स्वस्त्ययनं महत्
5 // tasmānmamaitanmāhātmyaṃ paṭhitavyaṃ sahāhitaiḥ / śrotavyaṃ ca sadā bhaktyā paraṃ svastyayanaṃ mahat
6 ॥ उपसर्गानशेषांस्तु महामारीसमुद्भवान् । तथा त्रिविधमुत्पातं माहात्म्यं शमयेन्मम
6 // upasargānaśeṣāṃstu mahāmārīsamudbhavān / tathā trividhamutpātaṃ māhātmyaṃ śamayenmama
7 ॥ यत्रैतत् पठ्यते सम्यङ्नित्यमायतने मम । सदा न तद्विमोक्ष्यामि सांनिध्यं तत्र मे स्थितम्
7 // yatraitat paṭhyate samyaṅnityamāyatane mama / sadā na tadvimokṣyāmi sāṃnidhyaṃ tatra me sthitam
8 ॥ बलिप्रदाने पूजायामग्निकार्ये महोत्सवे । सर्वं ममैतच्चरितमुच्चार्यं श्राव्यमेव च
8 // balipradāne pūjāyāmagnikārye mahotsave / sarvaṃ mamaitaccaritamuccāryaṃ śrāvyameva ca
9 ॥ जानताजानता वापि बलिपूजां तथा कृताम् । प्रतीच्छिष्याम्यहं प्रीत्या वह्निहोमं तथा कृतम्
9 // jānatājānatā vāpi balipūjāṃ tathā kṛtām / pratīcchiṣyāmyahaṃ prītyā vahnihomaṃ tathā kṛtam
10 ॥ शरत्काले महापूजा क्रियते या च वार्षिकी । तस्यां ममैतन्माहात्म्यं श्रुत्वा भक्तिसमन्वितः
10 // śaratkāle mahāpūjā kriyate yā ca vārṣikī / tasyāṃ mamaitanmāhātmyaṃ śrutvā bhaktisamanvitaḥ
11 ॥ सर्वबाधाविनिर्मृक्तो धनधान्यसमन्वितः । मनुष्यो मत्प्रसादेन भविष्यति न संशयः
11 // sarvabādhāvinirmṛkto dhanadhānyasamanvitaḥ / manuṣyo matprasādena bhaviṣyati na saṃśayaḥ
12 ॥ श्रुत्वा ममैतन्माहात्म्यं तथोत्पत्तीः पृथक् शुभाः । पराक्रमं च युद्धेषु जायते निर्भयः पुमान्
12 // śrutvā mamaitanmāhātmyaṃ tathotpattīḥ pṛthak śubhāḥ / parākramaṃ ca yuddheṣu jāyate nirbhayaḥ pumān
13 ॥ रिपवः संक्षयं यान्ति कल्याणं चोपपद्यते । नन्दते च कुलं पुंसां माहात्म्यं मम शृण्वताम्
13 // ripavaḥ saṃkṣayaṃ yānti kalyāṇaṃ copapadyate / nandate ca kulaṃ puṃsāṃ māhātmyaṃ mama śṛṇvatām
14 ॥ शान्तिकर्मणि सर्वत्र तथा दुः स्वप्नदर्शने । ग्रहपीडासु चोग्रासु माहात्म्यं शृणुयान्मम
14 // śāntikarmaṇi sarvatra tathā duḥ svapnadarśane / grahapīḍāsu cogrāsu māhātmyaṃ śṛṇuyānmama
15 ॥ उपसर्गाः शमं यान्ति ग्रहपीडाश्च दारुणाः । दुः स्वप्नं च नृभिर्दृष्टं सुस्वप्नमुपजायते
15 // upasargāḥ śamaṃ yānti grahapīḍāśca dāruṇāḥ / duḥ svapnaṃ ca nṛbhirdṛṣṭaṃ susvapnamupajāyate
16 ॥ बालग्रहाभिभूतानां बालानां शान्तिकारकम् । संघातभेदे च नृणां मैत्रीकरणमुत्तमम्
16 // bālagrahābhibhūtānāṃ bālānāṃ śāntikārakam / saṃghātabhede ca nṛṇāṃ maitrīkaraṇamuttamam
17 ॥ दुर्वृत्तानामशेषाणां बलहानिकरं परम् । रक्षोभूतपिशाचानां पठनादेव नाशनम्
17 // durvṛttānāmaśeṣāṇāṃ balahānikaraṃ param / rakṣobhūtapiśācānāṃ paṭhanādeva nāśanam
18 ॥ सर्वं ममैतन्माहात्म्यं मम सन्निधिकारकम्
18 // sarvaṃ mamaitanmāhātmyaṃ mama sannidhikārakam
19 ॥ पशुपुष्पार्घ्यधूपैश्च गन्धदीपैस्तथोत्तमैः । विप्राणां भोजनैर्हेमैः प्रोक्षणीयैरहर्निशम्
19 // paśupuṣpārghyadhūpaiśca gandhadīpaistathottamaiḥ / viprāṇāṃ bhojanairhemaiḥ prokṣaṇīyairaharniśam
20 ॥ अन्यैश्च विविधैर्भोगैः प्रदानैर्वत्सरेण या । प्रीतिर्मे क्रियते सास्मिन् सकृत्सुचरिते श्रुते
20 // anyaiśca vividhairbhogaiḥ pradānairvatsareṇa yā / prītirme kriyate sāsmin sakṛtsucarite śrute
21 ॥ श्रुतं हरति पापानि तथाऽरोग्यं प्रयच्छति । रक्षां करोति भूतेभ्यो जन्मनां कीर्तनं मम
21 // śrutaṃ harati pāpāni tathā'rogyaṃ prayacchati / rakṣāṃ karoti bhūtebhyo janmanāṃ kīrtanaṃ mama
22 ॥ युद्धेषु चरितं यन्मे दुष्टदैत्यनिबर्हणम् । तस्मिन् श्रुते वैरिकृतं भयं पुंसां न जायते
22 // yuddheṣu caritaṃ yanme duṣṭadaityanibarhaṇam / tasmin śrute vairikṛtaṃ bhayaṃ puṃsāṃ na jāyate
23 ॥ युष्माभिः स्तुतयो याश्च याश्च ब्रह्मर्षिभिः कृताः । ब्रह्मणा च कृतास्तास्तु प्रयच्छन्ति शुभां गतिम्
23 // yuṣmābhiḥ stutayo yāśca yāśca brahmarṣibhiḥ kṛtāḥ / brahmaṇā ca kṛtāstāstu prayacchanti śubhāṃ gatim
24 ॥ अरण्ये प्रान्तरे वापि दावाग्निपरिवारितः । दस्युभिर्वा वृतः शून्ये गृहीतो वापि शत्रुभिः
24 // araṇye prāntare vāpi dāvāgniparivāritaḥ / dasyubhirvā vṛtaḥ śūnye gṛhīto vāpi śatrubhiḥ
25 ॥ सिंहव्याघ्रानुयातो वा वने वा वनहस्तिभिः । राज्ञा क्रुद्धेन चाज्ञप्तो वध्यो बन्धगतो ऽपि वा
25 // siṃhavyāghrānuyāto vā vane vā vanahastibhiḥ / rājñā kruddhena cājñapto vadhyo bandhagato 'pi vā
26 ॥ आघूर्णितो वा वातेन स्थितः पोते महार्णवे । पतत्सु चापि शस्त्रेषु संग्रामे भृशदारुणे
26 // āghūrṇito vā vātena sthitaḥ pote mahārṇave / patatsu cāpi śastreṣu saṃgrāme bhṛśadāruṇe
27 ॥ सर्वाबाधासु घोरासु वेदनाभ्यर्दितो ऽपि वा । स्मरन्ममैतच्छरितं नरो मुच्येत सङ्कटात्
27 // sarvābādhāsu ghorāsu vedanābhyardito 'pi vā / smaranmamaitaccharitaṃ naro mucyeta saṅkaṭāt
28 ॥ मम प्रभावात्सिंहाद्या दस्यवो वैरिणस्तथा । दूरादेव पलायन्ते स्मरतश्चरितं मम
28 // mama prabhāvātsiṃhādyā dasyavo vairiṇastathā / dūrādeva palāyante smarataścaritaṃ mama
29 ॥ ऋषिरुवाच इत्युक्त्वा सा भगवती चण्डिका चण्डविक्रमा । पश्यतामेव देवानां तत्रैवान्तरधीयत
29 // ṛṣiruvāca ityuktvā sā bhagavatī caṇḍikā caṇḍavikramā / paśyatāmeva devānāṃ tatraivāntaradhīyata
30 ॥ ते ऽपि देव्या निरातङ्का स्वाधिकारान् यथा पुरा । यज्ञभागभुजः सर्वे चक्रुर्विनिहतारयः
30 // te 'pi devyā nirātaṅkā svādhikārān yathā purā / yajñabhāgabhujaḥ sarve cakrurvinihatārayaḥ
31 ॥ दैत्याश्च देव्या निहते शुम्भे देवरिपौ युधि । जगद्विध्वंसके तस्मिन् महोग्रे ऽतुलविक्रमे । निशुम्भे च महावीर्ये शेषाः पातालमाययुः
31 // daityāśca devyā nihate śumbhe devaripau yudhi / jagadvidhvaṃsake tasmin mahogre 'tulavikrame / niśumbhe ca mahāvīrye śeṣāḥ pātālamāyayuḥ
32 ॥ एवं भगवती देवी सा नित्यापि पुनः पुनः । सम्भूय कुरुते भूप जगतः परिपालनम्
32 // evaṃ bhagavatī devī sā nityāpi punaḥ punaḥ / sambhūya kurute bhūpa jagataḥ paripālanam
33 ॥ तयैतन्मोह्यते विश्वं सैव विश्वं प्रसूयते । सा याचिता च विज्ञानं तुष्टा ऋद्धिं प्रयच्छति
33 // tayaitanmohyate viśvaṃ saiva viśvaṃ prasūyate / sā yācitā ca vijñānaṃ tuṣṭā ṛddhiṃ prayacchati
34 ॥ व्याप्तं तयैतत्सकलं ब्रह्माण्डं मनुजेश्वर । महाकाल्या महाकाले महाकारीस्वरूपया
34 // vyāptaṃ tayaitatsakalaṃ brahmāṇḍaṃ manujeśvara / mahākālyā mahākāle mahākārīsvarūpayā
35 ॥ सैव काले महामारी सैव सृष्टिर्भवत्यजा । स्थितिं करोति भूतानां सैव काले सनातनी
35 // saiva kāle mahāmārī saiva sṛṣṭirbhavatyajā / sthitiṃ karoti bhūtānāṃ saiva kāle sanātanī
36 ॥ भवकाले नृणां सैव लक्ष्मीर्वृद्धिप्रदा गृहे । सैवाभावे तथालक्ष्मीर्विनाशायोपजायते
36 // bhavakāle nṛṇāṃ saiva lakṣmīrvṛddhipradā gṛhe / saivābhāve tathālakṣmīrvināśāyopajāyate
37 ॥ स्तुता सम्पूजिता पुष्पैर्धूपगन्धादिबिस्तथा । ददाति वित्तं पुत्रांश्च मतिं धर्मे गतिं शुभाम्
37 // stutā sampūjitā puṣpairdhūpagandhādibistathā / dadāti vittaṃ putrāṃśca matiṃ dharme gatiṃ śubhām