9 ॥ इति श्रागारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तकर्मविपाकनिरूपणं नाम चतुरुत्तरशततमो ऽध्यायः श्रीगरुडमहापुराणम्- 105 विहितस्याननुष्ठानान्निन्दितस्य च सेवनात् । अनिग्रहाच्चेन्द्रियाणां नरः पतनमृच्छति
9 // iti śrāgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktakarmavipākanirūpaṇaṃ nāma caturuttaraśatatamo 'dhyāyaḥ śrīgaruḍamahāpurāṇam- 105 vihitasyānanuṣṭhānānninditasya ca sevanāt / anigrahāccendriyāṇāṃ naraḥ patanamṛcchati
1 ॥ तस्माद्यत्नेन कर्तव्यं प्रायश्चित्तं विशुद्धये । एवमस्यान्तरात्मा च लोकश्चैव प्रसदिति
1 // tasmādyatnena kartavyaṃ prāyaścittaṃ viśuddhaye / evamasyāntarātmā ca lokaścaiva prasaditi
2 ॥ लोकः प्रसीदेदात्मैवं प्रायश्चित्तैरघक्षयः । प्रायश्चित्तमकुर्वाणाः पश्चात्तापविवर्जिताः
2 // lokaḥ prasīdedātmaivaṃ prāyaścittairaghakṣayaḥ / prāyaścittamakurvāṇāḥ paścāttāpavivarjitāḥ
3 ॥ नरकान्यान्ति पापा वै महारौरवरौरवान् । तामिस्त्रं लोहशङ्कुं च पूतिगन्धसमाकुलम्
3 // narakānyānti pāpā vai mahārauravarauravān / tāmistraṃ lohaśaṅkuṃ ca pūtigandhasamākulam
4 ॥ हंसाभं लोहितोदं च सञ्जीवननदीपथम् । महानिलयकाकोलमन्धतामिस्त्रवापनम्
4 // haṃsābhaṃ lohitodaṃ ca sañjīvananadīpatham / mahānilayakākolamandhatāmistravāpanam
5 ॥ अवीचिं कुम्भीपाकं च यान्ति पापा ह्यपुण्यतः । ब्रह्महा मद्यपः स्तेयी संयोगी गुरुतल्पगः
5 // avīciṃ kumbhīpākaṃ ca yānti pāpā hyapuṇyataḥ / brahmahā madyapaḥ steyī saṃyogī gurutalpagaḥ
6 ॥ गुरुनिन्दा वेदनिन्दा ब्रह्महत्यासमे ह्युभे । निषिद्धभक्षणं जिह्मक्रियाचरणमेव च
6 // gurunindā vedanindā brahmahatyāsame hyubhe / niṣiddhabhakṣaṇaṃ jihmakriyācaraṇameva ca
7 ॥ रजस्वलामुखास्वादः सुरापानसमानि तु । अश्वरत्नादिहरणं सुवर्णस्तेयसंमितम्
7 // rajasvalāmukhāsvādaḥ surāpānasamāni tu / aśvaratnādiharaṇaṃ suvarṇasteyasaṃmitam
8 ॥ सखिभार्याकुमारीषु स्वयोनिष्वन्त्यजासु च । सगोत्रासु तथा स्त्रीषु गुरुतल्पसमं स्मृतम्
8 // sakhibhāryākumārīṣu svayoniṣvantyajāsu ca / sagotrāsu tathā strīṣu gurutalpasamaṃ smṛtam
9 ॥ पितुः स्वसारं मातुश्च मातुलानीं स्नुषाम पि । मातुः सपत्नीं भगिनीमाचार्यतनयां तथा
9 // pituḥ svasāraṃ mātuśca mātulānīṃ snuṣāma pi / mātuḥ sapatnīṃ bhaginīmācāryatanayāṃ tathā
10 ॥ आचार्यपत्नीं स्वसुतां गच्छंस्तु गुरुतल्पगः । छित्त्वा लिङ्गं वधस्तस्य सकामायाः स्त्रियास्तथा
10 // ācāryapatnīṃ svasutāṃ gacchaṃstu gurutalpagaḥ / chittvā liṅgaṃ vadhastasya sakāmāyāḥ striyāstathā
11 ॥ गोवधो व्रात्यतास्तेयमृणानां च परिक्रिया । अनाहिताग्नितापण्यविक्रयः परिवेदनम्
11 // govadho vrātyatāsteyamṛṇānāṃ ca parikriyā / anāhitāgnitāpaṇyavikrayaḥ parivedanam
12 ॥ भृत्याचाध्ययनादानं भृतकाध्या पनन्तथा । पारदार्यं पारिवित्त्यं वार्धुष्यं लवणक्रिया
12 // bhṛtyācādhyayanādānaṃ bhṛtakādhyā panantathā / pāradāryaṃ pārivittyaṃ vārdhuṣyaṃ lavaṇakriyā
13 ॥ सच्छूद्रविट्क्षत्त्रबन्धोर्निन्दितार्थोपजीविता । नास्तिक्यं व्रतलोपश्च शूल्यं गोश्वेव विक्रयः
13 // sacchūdraviṭkṣattrabandhorninditārthopajīvitā / nāstikyaṃ vratalopaśca śūlyaṃ gośveva vikrayaḥ
14 ॥ पितृमातृसुहृत्त्यागस्तडागारामविक्रयः । कन्यायादूषण चैव परिविन्दकयाजनम्
14 // pitṛmātṛsuhṛttyāgastaḍāgārāmavikrayaḥ / kanyāyādūṣaṇa caiva parivindakayājanam
15 ॥ कन्याप्रदानं तस्यैव कौटिल्यं व्रतलोपनम् । आत्मनोर्ऽथे क्रियारम्भो मद्यपस्त्रीनिषेवणम्
15 // kanyāpradānaṃ tasyaiva kauṭilyaṃ vratalopanam / ātmanor'the kriyārambho madyapastrīniṣevaṇam
16 ॥ स्वाध्यायाग्निसुतत्यागो बान्धवत्याग एव च । असच्छास्त्राभिगमनं भार्यात्मपरिवि क्रयः
16 // svādhyāyāgnisutatyāgo bāndhavatyāga eva ca / asacchāstrābhigamanaṃ bhāryātmaparivi krayaḥ
17 ॥ उपपापानि चोक्तानि प्रायश्चित्तं निबोधत । शिरः कपालध्वजवान् भिक्षाशी कर्म वेदयन्
17 // upapāpāni coktāni prāyaścittaṃ nibodhata / śiraḥ kapāladhvajavān bhikṣāśī karma vedayan
18 ॥ ब्रह्महा द्वादश समा मितभुक् शुद्धिमाप्नुयात् । लोमभ्यः स्वाहेति च वा लोमप्रभृति वै तनुम्
18 // brahmahā dvādaśa samā mitabhuk śuddhimāpnuyāt / lomabhyaḥ svāheti ca vā lomaprabhṛti vai tanum
19 ॥ मज्जान्तां जुहुयाद्वापि स्वस्वमन्त्रैर्यथाक्रमम् । शुद्धिः स्याद्ब्राह्मणत्राणात्कृत्वैवं शुद्धिरेव च
19 // majjāntāṃ juhuyādvāpi svasvamantrairyathākramam / śuddhiḥ syādbrāhmaṇatrāṇātkṛtvaivaṃ śuddhireva ca
20 ॥ निरातङ्कं द्विजं गां च ब्राह्मणार्थे हतो ऽपि वा । अरण्ये नियतो जुप्त्वा त्रिः कृत्वो वेदसंहिताम्
20 // nirātaṅkaṃ dvijaṃ gāṃ ca brāhmaṇārthe hato 'pi vā / araṇye niyato juptvā triḥ kṛtvo vedasaṃhitām
21 ॥ सरस्वतीं वा संसेव्यं धनं पात्रे समर्पयेत् । यागस्थक्षत्त्रविड्घात् चरेद्ब्रह्महणो व्रतम्
21 // sarasvatīṃ vā saṃsevyaṃ dhanaṃ pātre samarpayet / yāgasthakṣattraviḍghāt caredbrahmahaṇo vratam
22 ॥ गर्भहा वा यथावर्णं तथात्रेयीनिषू (सू) दनम् । चरेद्ब्रतमहत्वापि घातनार्थमुपागतः
22 // garbhahā vā yathāvarṇaṃ tathātreyīniṣū (sū) danam / caredbratamahatvāpi ghātanārthamupāgataḥ
23 ॥ द्विगुणं सवनस्थे तु ब्राह्मणे व्रतमाचरेत् । सुराम्बुघृतगोमूत्रं पीत्वा शुद्धिः सुरापिणः
23 // dviguṇaṃ savanasthe tu brāhmaṇe vratamācaret / surāmbughṛtagomūtraṃ pītvā śuddhiḥ surāpiṇaḥ
24 ॥ अग्निवर्णं घृतं वापि चीरवास जटी भवेत् । व्रतं ब्रह्महणः कुर्यात्पुनः संस्कारमर्हति
24 // agnivarṇaṃ ghṛtaṃ vāpi cīravāsa jaṭī bhavet / vrataṃ brahmahaṇaḥ kuryātpunaḥ saṃskāramarhati
25 ॥ रेतेविण्मूत्रपानाच्च सुरापा ब्राह्मणी तथा । पतिलोकपरिभ्रष्टा गृध्री स्यात्सूकरी शुनी
25 // reteviṇmūtrapānācca surāpā brāhmaṇī tathā / patilokaparibhraṣṭā gṛdhrī syātsūkarī śunī
26 ॥ स्वर्णहारी द्विजो राज्ञे दत्त्वा तु मुसलं तथा । कर्मणः ख्यापनं कृत्वा हतस्तेन भवेच्छुचिः
26 // svarṇahārī dvijo rājñe dattvā tu musalaṃ tathā / karmaṇaḥ khyāpanaṃ kṛtvā hatastena bhavecchuciḥ
27 ॥ आत्मतुल्यं सुवर्णं वा दत्त्वा शुद्धिमियाद्द्विजः । शयने सार्धमायस्या योषिता निभृतं स्वपेत्
27 // ātmatulyaṃ suvarṇaṃ vā dattvā śuddhimiyāddvijaḥ / śayane sārdhamāyasyā yoṣitā nibhṛtaṃ svapet
28 ॥ उच्छेद्य लिङ्गं वृषणं नैरृत्यामुत्सृजोद्दिशि । प्राजापत्यं चरेत्कृच्छ्रं समा वा गुरुतल्पगः
28 // ucchedya liṅgaṃ vṛṣaṇaṃ nairṛtyāmutsṛjoddiśi / prājāpatyaṃ caretkṛcchraṃ samā vā gurutalpagaḥ
29 ॥ चान्द्रायणं वा त्रीन्मासनभ्यसेद्वेदसंहिताम् । पञ्चगव्यं पिबेद्गोघ्नो मासमासीत संयतः
29 // cāndrāyaṇaṃ vā trīnmāsanabhyasedvedasaṃhitām / pañcagavyaṃ pibedgoghno māsamāsīta saṃyataḥ
30 ॥ गोष्ठेशयो गो ऽनुगामी गोप्रदानेन शुध्यति । उपपातकशुद्धिः स्याच्चान्द्रायणव्रतेन च
30 // goṣṭheśayo go 'nugāmī gopradānena śudhyati / upapātakaśuddhiḥ syāccāndrāyaṇavratena ca
31 ॥ पयसा वापि मासेन पराकेणापि वा पुनः । ऋषभैकं सहस्रं गा दद्यात्क्षत्त्रवधे पुमान्
31 // payasā vāpi māsena parākeṇāpi vā punaḥ / ṛṣabhaikaṃ sahasraṃ gā dadyātkṣattravadhe pumān
32 ॥ ब्रह्महत्याव्रतं वापि वत्सरत्रितयं चरेत् । वैश्यहाब्दं च (ब्दांश्च) रेदेतद्दद्याद्वैकशतं गवाम्
32 // brahmahatyāvrataṃ vāpi vatsaratritayaṃ caret / vaiśyahābdaṃ ca (bdāṃśca) redetaddadyādvaikaśataṃ gavām
33 ॥ षण्मासाच्छूद्रहा चैतद्दद्याद्वा धेनवो दश । अप्रदुष्टां स्त्रियं हत्वा शूद्रहत्याव्रतं चरेत्
33 // ṣaṇmāsācchūdrahā caitaddadyādvā dhenavo daśa / apraduṣṭāṃ striyaṃ hatvā śūdrahatyāvrataṃ caret
34 ॥ मार्जारगोधानकुलपशुमण्डूकघातनात् । पिबेत्क्षीरं त्र्यहं पापी कृच्छ्रं वाप्यधिकं चरेत्
34 // mārjāragodhānakulapaśumaṇḍūkaghātanāt / pibetkṣīraṃ tryahaṃ pāpī kṛcchraṃ vāpyadhikaṃ caret
35 ॥ गजे नीलान्वृषान्पञ्च शुके वत्सं द्विहायनम् । खराजमेषेषु वृषो देयः क्रौञ्चे त्रिहायणः
35 // gaje nīlānvṛṣānpañca śuke vatsaṃ dvihāyanam / kharājameṣeṣu vṛṣo deyaḥ krauñce trihāyaṇaḥ
36 ॥ वृक्षगुल्मलतावीरुच्छेदने जप्यमृक्शतम् । अवकीर्णो भवेद्गत्त्वा ब्रह्मचारी च योषितम्
36 // vṛkṣagulmalatāvīrucchedane japyamṛkśatam / avakīrṇo bhavedgattvā brahmacārī ca yoṣitam
37 ॥ गर्दभं पशुमालभ्य नैरृतं च विशुध्यति । मधुमांसाशने कार्यं कृच्छ्रं शेषव्रतानि च
37 // gardabhaṃ paśumālabhya nairṛtaṃ ca viśudhyati / madhumāṃsāśane kāryaṃ kṛcchraṃ śeṣavratāni ca
38 ॥ कृच्छ्रत्रयं गुरुः कुर्यान्म्रियेत् प्रहितो यदि । प्रतिकूलं गुरोः कृत्वा प्रसाद्यैव विशुध्यति
38 // kṛcchratrayaṃ guruḥ kuryānmriyet prahito yadi / pratikūlaṃ guroḥ kṛtvā prasādyaiva viśudhyati
39 ॥ रिपून्धान्यप्रदानाद्यैः स्नेहाद्यैर्वाप्युपक्रमेत् । क्रियमाणोपकारे च मृते विप्रे न पातकम्
39 // ripūndhānyapradānādyaiḥ snehādyairvāpyupakramet / kriyamāṇopakāre ca mṛte vipre na pātakam
40 ॥ महापापोपपापाभ्यां योभिशस्तो मृषा परम् । अब्भक्षो मासमासीत स जापी नियतन्द्रियः
40 // mahāpāpopapāpābhyāṃ yobhiśasto mṛṣā param / abbhakṣo māsamāsīta sa jāpī niyatandriyaḥ
41 ॥ अनियुक्तो भ्रातृभार्यां गच्छंश्चान्द्रायणं चरेत् । त्रिरात्रान्ते घृतं प्राश्य गत्वोदक्यां शुचिर्भवेत्
41 // aniyukto bhrātṛbhāryāṃ gacchaṃścāndrāyaṇaṃ caret / trirātrānte ghṛtaṃ prāśya gatvodakyāṃ śucirbhavet
42 ॥ गोष्ठे वसन्ब्रह्मचारी मासमेकं पयोव्रती । गायत्त्रीजप्यनिरतो मुच्यते ऽसत्प्रतिग्रहात्
42 // goṣṭhe vasanbrahmacārī māsamekaṃ payovratī / gāyattrījapyanirato mucyate 'satpratigrahāt
43 ॥ त्रिः कृच्छ्रमाचरेद्व्रात्ययाजको ऽपि चरन्नपि । वेदप्लावी यवाश्यब्दं त्यक्त्वा च शरणागतान्
43 // triḥ kṛcchramācaredvrātyayājako 'pi carannapi / vedaplāvī yavāśyabdaṃ tyaktvā ca śaraṇāgatān
44 ॥ प्राणायामत्रयं कुर्यात्खरयानोष्ट्रयानगः । नग्नः स्नात्वा च सुप्त्वा च गत्वा चैव दिवा स्त्रियम्
44 // prāṇāyāmatrayaṃ kuryātkharayānoṣṭrayānagaḥ / nagnaḥ snātvā ca suptvā ca gatvā caiva divā striyam
45 ॥ गुरुन्त्वं कृत्य हुङ्कृत्य विप्रं निर्जित्य वाद तः । प्रसाद्य तं च मुनयस्ततो ह्युपवसेद्दिनम्
45 // guruntvaṃ kṛtya huṅkṛtya vipraṃ nirjitya vāda taḥ / prasādya taṃ ca munayastato hyupavaseddinam
46 ॥ विप्रे दण्डोद्यमे कृच्छ्रमतिकृच्छ्रं निपातने । देशं कालं वयः शक्तिं पापं चावेक्ष्य यत्नतः
46 // vipre daṇḍodyame kṛcchramatikṛcchraṃ nipātane / deśaṃ kālaṃ vayaḥ śaktiṃ pāpaṃ cāvekṣya yatnataḥ
47 ॥ प्रायश्चितं प्रकल्प्यं स्याद्यत्र योक्ता तु निष्कृतिः । गर्भत्यागो भर्तृनिन्दा स्त्रीणां पतनकारणम्
47 // prāyaścitaṃ prakalpyaṃ syādyatra yoktā tu niṣkṛtiḥ / garbhatyāgo bhartṛnindā strīṇāṃ patanakāraṇam
48 ॥ एष ग्रहान्तिके दोषः तस्मात्तां दूतरस्त्यजेत् । विख्यातदोषः कुर्वीत गुरोरनुमतं व्रतम्
48 // eṣa grahāntike doṣaḥ tasmāttāṃ dūtarastyajet / vikhyātadoṣaḥ kurvīta guroranumataṃ vratam
49 ॥ असंविख्यातदोषस्तु रहस्यं व्रतमाचरेत् । त्रिरात्रोपोषणो जप्त्वा ब्रह्महा त्वघमर्षणम्
49 // asaṃvikhyātadoṣastu rahasyaṃ vratamācaret / trirātropoṣaṇo japtvā brahmahā tvaghamarṣaṇam
50 ॥ अन्तर्जले विशुद्धे च दत्त्वा गां च पयस्विनीम् । लोमभ्यः स्वाहेति ऋचा दिवसं मारुताशनः
50 // antarjale viśuddhe ca dattvā gāṃ ca payasvinīm / lomabhyaḥ svāheti ṛcā divasaṃ mārutāśanaḥ
51 ॥ जले जप्त्वा तु जुहुयाच्चात्वारिंशद्घृताहुतीः । त्रिरात्रोपोषणो हुत्वा कूष्माण्डीभिर्घृतं शुचिः
51 // jale japtvā tu juhuyāccātvāriṃśadghṛtāhutīḥ / trirātropoṣaṇo hutvā kūṣmāṇḍībhirghṛtaṃ śuciḥ
52 ॥ सुरापः स्वर्णहारी च रुद्रजापी जले स्थितः । सहस्रशीर्षाजप्येन मुच्यते गुरुतल्पगः
52 // surāpaḥ svarṇahārī ca rudrajāpī jale sthitaḥ / sahasraśīrṣājapyena mucyate gurutalpagaḥ
53 ॥ प्राणायामशतं कुर्यात्सर्वपापापनुक्त्ये । ओङ्काराभियुतं सोमसलिलप्रशनाच्छुचिः
53 // prāṇāyāmaśataṃ kuryātsarvapāpāpanuktye / oṅkārābhiyutaṃ somasalilapraśanācchuciḥ
54 ॥ कृत्वोपवासं रेतोविण्मूत्राणां प्राशनेद्विजः । अज्ञानकृतपापस्य नाशः सन्ध्यात्रये कृते
54 // kṛtvopavāsaṃ retoviṇmūtrāṇāṃ prāśanedvijaḥ / ajñānakṛtapāpasya nāśaḥ sandhyātraye kṛte
55 ॥ रुद्रैकादशजप्याद्धि पापनाशो भवेद्द्विजैः । वेदाभ्यासरतं शान्तं पञ्चयज्ञक्रियापरम्
55 // rudraikādaśajapyāddhi pāpanāśo bhaveddvijaiḥ / vedābhyāsarataṃ śāntaṃ pañcayajñakriyāparam
56 ॥ न स्पृशन्ति हा पापानि चाशु स्मृत्वा ह्यपोहितः । जप्त्वा सहस्रगायत्त्रीं शुचिर्ब्रह्महणादृते
56 // na spṛśanti hā pāpāni cāśu smṛtvā hyapohitaḥ / japtvā sahasragāyattrīṃ śucirbrahmahaṇādṛte
57 ॥ ब्रह्मचर्यं दया क्षान्तिर्ध्यानं सत्यमकल्कता । अहिंसा स्तेयमाधुर्ये दमश्चैते यमाः स्मृताः
57 // brahmacaryaṃ dayā kṣāntirdhyānaṃ satyamakalkatā / ahiṃsā steyamādhurye damaścaite yamāḥ smṛtāḥ
58 ॥ स्नानमौनोपवासोज्यास्वाध्यायोपस्थनिग्रहः । तपो ऽक्रोधो गुरोर्भक्तिः शौचं च नियमाः स्मृताः
58 // snānamaunopavāsojyāsvādhyāyopasthanigrahaḥ / tapo 'krodho gurorbhaktiḥ śaucaṃ ca niyamāḥ smṛtāḥ
59 ॥ पञ्चगव्यं तु गोक्षीरं दधिमूत्रशकृद्घृतम् । जग्ध्वा परेह्न्युपवसेत्कृच्छ्रं सान्तपनं चरेत्
59 // pañcagavyaṃ tu gokṣīraṃ dadhimūtraśakṛdghṛtam / jagdhvā parehnyupavasetkṛcchraṃ sāntapanaṃ caret
60 ॥ पृथक् सान्तपनैर्द्रव्यैः षडहः सोपवासकः । सप्ताहेन तु कृच्छ्रो ऽयं महासान्तपनः स्मृतः
60 // pṛthak sāntapanairdravyaiḥ ṣaḍahaḥ sopavāsakaḥ / saptāhena tu kṛcchro 'yaṃ mahāsāntapanaḥ smṛtaḥ
61 ॥ पर्णोदुम्बरराजीवबील्वपत्रकुशोदकैः । प्रत्येकं प्रत्यहाभ्यस्तैः पर्ण कृच्छ्र उदाहृतः
61 // parṇodumbararājīvabīlvapatrakuśodakaiḥ / pratyekaṃ pratyahābhyastaiḥ parṇa kṛcchra udāhṛtaḥ
62 ॥ तप्तक्षीरघृताम्बूनामेकैकं प्रत्यहं पिबेत् । एकरात्रोपवासश्च तप्तकृच्छ्रश्च पावनः
62 // taptakṣīraghṛtāmbūnāmekaikaṃ pratyahaṃ pibet / ekarātropavāsaśca taptakṛcchraśca pāvanaḥ
63 ॥ एकभक्तेन नक्तेन तथैवायाचितेन च । उपवासेन चकन पादकृच्छ्र उदाहृतः
63 // ekabhaktena naktena tathaivāyācitena ca / upavāsena cakana pādakṛcchra udāhṛtaḥ
64 ॥ यथा कथञ्चित्त्रिगुणः प्रजापत्यो ऽयमुच्यते । अयमेवातिकृच्छ्रः स्यात्पाणिपूर्णाम्बुभोजनात्
64 // yathā kathañcittriguṇaḥ prajāpatyo 'yamucyate / ayamevātikṛcchraḥ syātpāṇipūrṇāmbubhojanāt
65 ॥ कृच्छ्रातिकृच्छ्रं पयसा दिवसानेकविंशतिम् । द्वादशाहोपवासैश्च पराकः समुदाहृतः
65 // kṛcchrātikṛcchraṃ payasā divasānekaviṃśatim / dvādaśāhopavāsaiśca parākaḥ samudāhṛtaḥ
66 ॥ पिण्याकाचामतक्राम्बुसक्तूनां प्रतिवासरम् । एकैकमुपवासश्च कृच्छ्रः सौम्यो ऽयमुच्यते
66 // piṇyākācāmatakrāmbusaktūnāṃ prativāsaram / ekaikamupavāsaśca kṛcchraḥ saumyo 'yamucyate
67 ॥ एषां त्रिरात्रमभ्यासादेकैकं स्याद्यथाक्रमात् । तुलापुरुष इत्येष ज्ञेयः पञ्चदशाहिकः
67 // eṣāṃ trirātramabhyāsādekaikaṃ syādyathākramāt / tulāpuruṣa ityeṣa jñeyaḥ pañcadaśāhikaḥ
68 ॥ तिथिपिण्डांश्चरेद्वृद्ध्या शुक्ले शिख्यण्डसंमितान् । एकैकं ह्रासयेत्कृष्णे पिण्डं चान्द्रायणं चरेत्
68 // tithipiṇḍāṃścaredvṛddhyā śukle śikhyaṇḍasaṃmitān / ekaikaṃ hrāsayetkṛṣṇe piṇḍaṃ cāndrāyaṇaṃ caret
69 ॥ यथाकथञ्चित्पिण्डानां चत्वारिंशच्छतद्वयम् । मासेनैवोपभुञ्जीत चान्द्रायणमथापरम्
69 // yathākathañcitpiṇḍānāṃ catvāriṃśacchatadvayam / māsenaivopabhuñjīta cāndrāyaṇamathāparam
70 ॥ कृत्वा त्रिषवणं स्नानं पिण्डं चान्द्रायणं चरेत् । पवित्राणि जपेत्पिण्डान् गायत्त्र्या चाभिमन्त्रयेत्
70 // kṛtvā triṣavaṇaṃ snānaṃ piṇḍaṃ cāndrāyaṇaṃ caret / pavitrāṇi japetpiṇḍān gāyattryā cābhimantrayet
71 ॥ अनादिष्टेषु पापेषु शुद्धिश्चान्द्रायणेन तु । धर्मार्थो यश्चरेदेतच्चन्द्रस्यैति सलोकताम्
71 // anādiṣṭeṣu pāpeṣu śuddhiścāndrāyaṇena tu / dharmārtho yaścaredetaccandrasyaiti salokatām
72 ॥ कृच्छ्रकृद्धर्मकामस्तु महतीं श्रियमश्नुते
72 // kṛcchrakṛddharmakāmastu mahatīṃ śriyamaśnute