39 ॥ इति श्रीब्रह्माण्डे महापुराणे उत्तरभागे हयग्रीवागस्त्यसंवादे ललितोपाख्याने अगस्त्ययात्राजनार्दनाविर्भावो नाम पञ्चमो ऽध्यायः अथोपवेश्य चैवैनमासने परमाद्भुते । हयाननमुपागत्यागस्त्यो वाक्यं समब्रवीत्
39 // iti śrībrahmāṇḍe mahāpurāṇe uttarabhāge hayagrīvāgastyasaṃvāde lalitopākhyāne agastyayātrājanārdanāvirbhāvo nāma pañcamo 'dhyāyaḥ athopaveśya caivainamāsane paramādbhute / hayānanamupāgatyāgastyo vākyaṃ samabravīt
1 ॥ भगवन्सर्वधर्मज्ञ सर्वसिद्धान्तवित्तम् । लोकाभ्युदयहेतुर्हि दर्शनं हि भवादृशाम्
1 // bhagavansarvadharmajña sarvasiddhāntavittam / lokābhyudayaheturhi darśanaṃ hi bhavādṛśām
2 ॥ आविर्भावं महादेव्यास्तस्या रूपान्तराणि च । विहारश्चैव मुख्या ये तान्नो विस्तरतो वद
2 // āvirbhāvaṃ mahādevyāstasyā rūpāntarāṇi ca / vihāraścaiva mukhyā ye tānno vistarato vada
3 ॥ हयग्रीव उवाच अनादिरखिलाधारा सदसत्कर्मरूपिणी । ध्यानैकदृश्या ध्यानाङ्गी विद्याङ्गी हृदयास्पदा
3 // hayagrīva uvāca anādirakhilādhārā sadasatkarmarūpiṇī / dhyānaikadṛśyā dhyānāṅgī vidyāṅgī hṛdayāspadā
4 ॥ आत्मैक्याद्व्यक्तिमायाति चिरानुष्ठानगौरवात्
4 // ātmaikyādvyaktimāyāti cirānuṣṭhānagauravāt
5 ॥ आदौ प्रादुरभूच्छक्तिर्ब्रह्मणो ध्यानयोगतः । प्रकृतिर्नाम सा ख्याता देवानामिष्टसिद्धिदा
5 // ādau prādurabhūcchaktirbrahmaṇo dhyānayogataḥ / prakṛtirnāma sā khyātā devānāmiṣṭasiddhidā
6 ॥ द्वितीयमुदभूद्रूपं प्रवृत्ते ऽमृतमन्थने । शर्वसंमोहजनकमवाङ्मनसगोजरम्
6 // dvitīyamudabhūdrūpaṃ pravṛtte 'mṛtamanthane / śarvasaṃmohajanakamavāṅmanasagojaram
7 ॥ यद्दर्शनादभूदीशः सर्वज्ञो ऽपि विमोहितः । विसृज्य पार्वतीं शीघ्रन्तया रुद्धो ऽतनोद्रतम्
7 // yaddarśanādabhūdīśaḥ sarvajño 'pi vimohitaḥ / visṛjya pārvatīṃ śīghrantayā ruddho 'tanodratam
8 ॥ तस्यां वै जनयामास शास्तारमसुरार्दनम्
8 // tasyāṃ vai janayāmāsa śāstāramasurārdanam
9 ॥ अगस्त्य उवाच कथं वै सर्वभूतेशो वशी मन्मथ शासनः । अहो विमोहितो देव्या जनयामास चात्मजम्
9 // agastya uvāca kathaṃ vai sarvabhūteśo vaśī manmatha śāsanaḥ / aho vimohito devyā janayāmāsa cātmajam
10 ॥ हयग्रीव उवाच पुरामरपुराधीशो विजयश्रीसमृद्धिमान् । त्रैलोक्यं पालयामास सदेवासुरमानुषम्
10 // hayagrīva uvāca purāmarapurādhīśo vijayaśrīsamṛddhimān / trailokyaṃ pālayāmāsa sadevāsuramānuṣam
11 ॥ कैलासशिखराकारं गजेन्द्रमधिरुह्य सः । चचाराखिललोकेषु पूज्यमानो ऽखिलैरपि । तं प्रमत्तं विदित्वाथ भवानीपतिख्ययः
11 // kailāsaśikharākāraṃ gajendramadhiruhya saḥ / cacārākhilalokeṣu pūjyamāno 'khilairapi / taṃ pramattaṃ viditvātha bhavānīpatikhyayaḥ
12 ॥ दुर्वाससमथाहूय प्रजिघाय तदन्तिकम् । खण्डाजिनधरो दण्डीधूरिधूसरविग्रहः । उन्मत्तरूपधारी च ययौ विद्याधराध्वना
12 // durvāsasamathāhūya prajighāya tadantikam / khaṇḍājinadharo daṇḍīdhūridhūsaravigrahaḥ / unmattarūpadhārī ca yayau vidyādharādhvanā
13 ॥ एतस्मिन्नन्तरे काले काचिद्विद्याधराङ्गना । यदृच्छयागता तस्य पुरश्चारुतराकृतिः
13 // etasminnantare kāle kācidvidyādharāṅganā / yadṛcchayāgatā tasya puraścārutarākṛtiḥ
14 ॥ चिरकालेन तपसा तोषयित्वा परांबिकाम् । तत्समर्पितमाल्यं च लब्ध्वा संतुष्टमानसा
14 // cirakālena tapasā toṣayitvā parāṃbikām / tatsamarpitamālyaṃ ca labdhvā saṃtuṣṭamānasā
15 ॥ तां दृष्ट्वा मृगुशावाक्षीमुवाच मुनिपुङ्गवः । कुत्र वा गम्यते भीरु कुतो लब्धमिदं त्वया
15 // tāṃ dṛṣṭvā mṛguśāvākṣīmuvāca munipuṅgavaḥ / kutra vā gamyate bhīru kuto labdhamidaṃ tvayā
16 ॥ प्रणम्य सा महात्मानमुवाच विनयान्विता । चिरेण तपसा ब्रह्मन्देव्या दत्तं प्रसन्नया
16 // praṇamya sā mahātmānamuvāca vinayānvitā / cireṇa tapasā brahmandevyā dattaṃ prasannayā
17 ॥ तछ्रुत्वा वचनं तस्याः सो ऽपृच्छन्माल्यमुत्तमम् । पृष्टमात्रेण सा तुष्टा ददौ तस्मै महात्मने
17 // tachrutvā vacanaṃ tasyāḥ so 'pṛcchanmālyamuttamam / pṛṣṭamātreṇa sā tuṣṭā dadau tasmai mahātmane
18 ॥ कराभ्यां तत्समादाय कृतार्थो ऽस्मीति सत्वरम् । दधौ स्वशिरसा भक्त्या तामुवाचातिर्षितः
18 // karābhyāṃ tatsamādāya kṛtārtho 'smīti satvaram / dadhau svaśirasā bhaktyā tāmuvācātirṣitaḥ
19 ॥ ब्रह्मादीनामलभ्यं यत्तल्लब्धं भाग्यतो मया । भक्तिरस्तु पदांभोजे देव्यास्तव समुज्ज्वला
19 // brahmādīnāmalabhyaṃ yattallabdhaṃ bhāgyato mayā / bhaktirastu padāṃbhoje devyāstava samujjvalā
20 ॥ भविष्यच्छोभनाकारे गच्छ सौम्ये यथासुखम् । सा तं प्रणम्य शिरसा ययौ तुष्टा यथागतम्
20 // bhaviṣyacchobhanākāre gaccha saumye yathāsukham / sā taṃ praṇamya śirasā yayau tuṣṭā yathāgatam
21 ॥ प्रेषयित्वा स तां भूयो ययौ विद्याधराध्वना । विद्याधरवधूहस्तात्प्रतिजग्राह वल्लकीम्
21 // preṣayitvā sa tāṃ bhūyo yayau vidyādharādhvanā / vidyādharavadhūhastātpratijagrāha vallakīm
22 ॥ दिव्यस्रगनुलेपांश्च दिव्यान्याभरणानि च । क्वचिद्गृह्णन्क्वचिद्गा यन्क्वचिद्धसन्
22 // divyasraganulepāṃśca divyānyābharaṇāni ca / kvacidgṛhṇankvacidgā yankvaciddhasan
23 ॥ स्वेच्छाविहारी स मुनिर्ययौ यत्र पुरन्दरः । स्वकरस्थां ततो मालां शक्राय प्रददौ मुनिः
23 // svecchāvihārī sa muniryayau yatra purandaraḥ / svakarasthāṃ tato mālāṃ śakrāya pradadau muniḥ
24 ॥ तां गृहीत्वा गजस्कन्धे स्थापयामास देवराट् । गजस्तु तां गृहीत्वाथ प्रेषयामास भूतले
24 // tāṃ gṛhītvā gajaskandhe sthāpayāmāsa devarāṭ / gajastu tāṃ gṛhītvātha preṣayāmāsa bhūtale
25 ॥ तां दृष्ट्वा प्रेषितां मालां तदा क्रोधेन तापसः । उवाच न धृता माला शिरसा तु मयार्पिता
25 // tāṃ dṛṣṭvā preṣitāṃ mālāṃ tadā krodhena tāpasaḥ / uvāca na dhṛtā mālā śirasā tu mayārpitā
26 ॥ त्रैलोक्यैश्वर्यमत्तेन भवता ह्यवमानिता । महादेव्या धृता या तु ब्रह्माद्यैः पूज्यतेहि सा
26 // trailokyaiśvaryamattena bhavatā hyavamānitā / mahādevyā dhṛtā yā tu brahmādyaiḥ pūjyatehi sā
27 ॥ त्वया यच्छासितो लोकः सदेवासुरमानुषः । अशोभनो ह्यतेजस्को मम शापाद्भविष्यति
27 // tvayā yacchāsito lokaḥ sadevāsuramānuṣaḥ / aśobhano hyatejasko mama śāpādbhaviṣyati
28 ॥ इति शप्त्वा विनीतेन तेन संपूजितो ऽपि सः । तूष्णीमेव ययौ ब्रह्मन्भाविकार्यमनुस्मरन्
28 // iti śaptvā vinītena tena saṃpūjito 'pi saḥ / tūṣṇīmeva yayau brahmanbhāvikāryamanusmaran
29 ॥ विजयश्रीस्ततस्तस्य दैत्यं तु बलिमन्वगात् । नित्यश्रीर्नित्यपुरुषं वासुदेवमथान्वगात्
29 // vijayaśrīstatastasya daityaṃ tu balimanvagāt / nityaśrīrnityapuruṣaṃ vāsudevamathānvagāt
30 ॥ इन्द्रो ऽपि स्वपुरं गत्वा सर्वदेवसमन्वितः । विषण्णचेता निःश्रीकश्चिन्तयामास देवराट्
30 // indro 'pi svapuraṃ gatvā sarvadevasamanvitaḥ / viṣaṇṇacetā niḥśrīkaścintayāmāsa devarāṭ
31 ॥ अथामरपुरे दृष्ट्वा निमित्तान्यशुभानि च । बृहस्पतिं समाहूय वाक्यमेतदुवाच ह
31 // athāmarapure dṛṣṭvā nimittānyaśubhāni ca / bṛhaspatiṃ samāhūya vākyametaduvāca ha
32 ॥ भगवन्सर्वधर्मज्ञ त्रिकालज्ञानकोविद । दृश्यते ऽदृष्टपूर्वाणि निमित्तान्यशुभानि च
32 // bhagavansarvadharmajña trikālajñānakovida / dṛśyate 'dṛṣṭapūrvāṇi nimittānyaśubhāni ca
33 ॥ किंफलानि च तानि स्युरुपायो वाथ कीदृशः । इति तद्वचनं श्रुत्वा देवेन्द्रस्य बृहस्पतिः । प्रत्युवाच ततो वाक्यं धर्मार्थसहितं शुभम्
33 // kiṃphalāni ca tāni syurupāyo vātha kīdṛśaḥ / iti tadvacanaṃ śrutvā devendrasya bṛhaspatiḥ / pratyuvāca tato vākyaṃ dharmārthasahitaṃ śubham
34 ॥ कृतस्य कर्मणो राजन्कल्पकोटिशतैरपि । प्रायश्चित्तोपभोगाभ्यां विना नाशो न जायते
34 // kṛtasya karmaṇo rājankalpakoṭiśatairapi / prāyaścittopabhogābhyāṃ vinā nāśo na jāyate
35 ॥ इन्द्र उवाच कर्म वा कीदृशं ब्रह्मन्प्रायश्चित्तं च कीदृशम् । तत्सर्वं श्रोतुमिच्छामि तन्मे विस्तरतो वद
35 // indra uvāca karma vā kīdṛśaṃ brahmanprāyaścittaṃ ca kīdṛśam / tatsarvaṃ śrotumicchāmi tanme vistarato vada
36 ॥ बृहस्पतिरुवाच हननस्तेयहिंसाश्च पानमन्याङ्गनारतिः । कर्म पञ्चविधं प्राहुर्दुष्कृतं धरणीपतेः
36 // bṛhaspatiruvāca hananasteyahiṃsāśca pānamanyāṅganāratiḥ / karma pañcavidhaṃ prāhurduṣkṛtaṃ dharaṇīpateḥ
37 ॥ ब्रह्मक्षत्रियविट्शूद्रगोतुरङ्गखरोष्ट्रकाः । चतुष्पदो ऽण्डजाब्जाश्च तिर्यचो ऽनस्थिकास्तथा
37 // brahmakṣatriyaviṭśūdragoturaṅgakharoṣṭrakāḥ / catuṣpado 'ṇḍajābjāśca tiryaco 'nasthikāstathā
38 ॥ अयुतं च सहस्रं च शतं दश तथा दश । दशपञ्चत्रिरेकार्धमानुपूर्व्यादिदं भवेत्
38 // ayutaṃ ca sahasraṃ ca śataṃ daśa tathā daśa / daśapañcatrirekārdhamānupūrvyādidaṃ bhavet
39 ॥ ब्रह्मक्षत्रविशां स्त्रीणामुक्तार्थे पापमादिशेत् । पितृमातृगुरुस्वामि पुत्राणां चैव निष्कृतिः
39 // brahmakṣatraviśāṃ strīṇāmuktārthe pāpamādiśet / pitṛmātṛgurusvāmi putrāṇāṃ caiva niṣkṛtiḥ
40 ॥ गुर्वाज्ञया कृतं पापं तदाज्ञालङ्घनेर्ऽथकम् । दशब्राह्मणभृत्यर्थमेकं हन्याद्द्विजं नृपः
40 // gurvājñayā kṛtaṃ pāpaṃ tadājñālaṅghaner'thakam / daśabrāhmaṇabhṛtyarthamekaṃ hanyāddvijaṃ nṛpaḥ
41 ॥ शतब्राह्मणभृत्यर्थं ब्राह्मणो ब्राह्मणं तु वा । पञ्चब्रह्मविदामर्थे त्रैश्यमेकं तु दण्डयेत्
41 // śatabrāhmaṇabhṛtyarthaṃ brāhmaṇo brāhmaṇaṃ tu vā / pañcabrahmavidāmarthe traiśyamekaṃ tu daṇḍayet
42 ॥ वैश्यं दशविशामर्थे विशां वा दण्डयेत्तथा । तथा शतविशामर्थे द्विजमेकं तु दण्डयेत्
42 // vaiśyaṃ daśaviśāmarthe viśāṃ vā daṇḍayettathā / tathā śataviśāmarthe dvijamekaṃ tu daṇḍayet
43 ॥ शूद्राणां तु सहस्राणां दण्डयेद्ब्राह्मणं तु वा । तच्छतार्थं तु वा वैश्यं तद्दशार्द्धं तु शूद्रकम्
43 // śūdrāṇāṃ tu sahasrāṇāṃ daṇḍayedbrāhmaṇaṃ tu vā / tacchatārthaṃ tu vā vaiśyaṃ taddaśārddhaṃ tu śūdrakam
44 ॥ बन्धूनां चैव मित्राणामिष्टार्थे तु त्रिपादकम् । अर्थं कलत्रपुत्रार्थे स्वात्मार्थे न तु किञ्चन
44 // bandhūnāṃ caiva mitrāṇāmiṣṭārthe tu tripādakam / arthaṃ kalatraputrārthe svātmārthe na tu kiñcana
45 ॥ आत्मानं हन्तुमारब्धं ब्राह्मणं क्षत्रियं विशम् । गां वा तुरगमन्यं वा हत्वा दोषैर्न लिप्यते
45 // ātmānaṃ hantumārabdhaṃ brāhmaṇaṃ kṣatriyaṃ viśam / gāṃ vā turagamanyaṃ vā hatvā doṣairna lipyate
46 ॥ आत्मदारात्मजभ्रातृबन्धूनां च द्विजोत्तम । क्रमाद्दशगुणो दोषो रक्षणे च तथा फलम्
46 // ātmadārātmajabhrātṛbandhūnāṃ ca dvijottama / kramāddaśaguṇo doṣo rakṣaṇe ca tathā phalam
47 ॥ भूपद्विजश्रोत्रियवेदविद्व्रतीवेदान्तविद्वेदविदां विनाशे । एकद्विपञ्चाशदथायुतं च स्यान्निष्कृतिश्चेति वदन्ति संतः
47 // bhūpadvijaśrotriyavedavidvratīvedāntavidvedavidāṃ vināśe / ekadvipañcāśadathāyutaṃ ca syānniṣkṛtiśceti vadanti saṃtaḥ
48 ॥ तेषां च रक्षणविधौ हि कृते च दाने पूर्वोदितोत्तरगुणं प्रवदन्ति पुण्यम् । तेषां च दर्शनविधौ नमने चकार्ये शूश्रूषणे ऽपि चरतां सदृशांश्च तेषाम्
48 // teṣāṃ ca rakṣaṇavidhau hi kṛte ca dāne pūrvoditottaraguṇaṃ pravadanti puṇyam / teṣāṃ ca darśanavidhau namane cakārye śūśrūṣaṇe 'pi caratāṃ sadṛśāṃśca teṣām
49 ॥ सिंहव्याघ्रमृगादीनि लोकहिंसाकराणि तु । नृपो हन्याच्च सततं देवार्थे ब्राह्मणार्थके
49 // siṃhavyāghramṛgādīni lokahiṃsākarāṇi tu / nṛpo hanyācca satataṃ devārthe brāhmaṇārthake
50 ॥ आपत्स्वात्मार्थके चापि हत्वा मेध्यानि भक्षयेत्
50 // āpatsvātmārthake cāpi hatvā medhyāni bhakṣayet
51 ॥ नात्मार्थे पाचयेदन्न नात्मार्थे पाचयेत्पशून् । देवार्थे ब्राह्मणार्थे वा पचमानो न लिप्यते
51 // nātmārthe pācayedanna nātmārthe pācayetpaśūn / devārthe brāhmaṇārthe vā pacamāno na lipyate
52 ॥ पुरा भगवती माया जगदुज्जीवनोन्मुखी । ससर्ज सर्वदेवांश्च तथैवासुरमानुषान्
52 // purā bhagavatī māyā jagadujjīvanonmukhī / sasarja sarvadevāṃśca tathaivāsuramānuṣān
53 ॥ तेषां संरक्षणार्थाय पशूनपि चतुर्दश । यज्ञाश्च तद्विधानानि कृत्वा चैनानुवाच ह
53 // teṣāṃ saṃrakṣaṇārthāya paśūnapi caturdaśa / yajñāśca tadvidhānāni kṛtvā cainānuvāca ha
54 ॥ यजध्वं पशुभिर्देवान्विधिनानेन मानवाः । इष्टानि ये प्रदास्यन्ति पुष्टास्ते यज्ञभाविताः
54 // yajadhvaṃ paśubhirdevānvidhinānena mānavāḥ / iṣṭāni ye pradāsyanti puṣṭāste yajñabhāvitāḥ
55 ॥ एवं प्रवर्तितं चक्रं नानुवर्तयतीह यः । दरिद्रो नारकश्चैव भवेज्जन्मनि जन्मनि
55 // evaṃ pravartitaṃ cakraṃ nānuvartayatīha yaḥ / daridro nārakaścaiva bhavejjanmani janmani
56 ॥ देवतार्थे च पित्रर्थे तथैवाभ्यागते गुरौ । महदागमने चैव हन्यान्मेध्यान्पशून्द्विजः
56 // devatārthe ca pitrarthe tathaivābhyāgate gurau / mahadāgamane caiva hanyānmedhyānpaśūndvijaḥ
57 ॥ आपत्सु ब्राह्मणो मांसं मेध्यमश्नन्न दोषभाक् । विहितानि तु कार्याणि प्रतिषिद्धानि वर्जयेत्
57 // āpatsu brāhmaṇo māṃsaṃ medhyamaśnanna doṣabhāk / vihitāni tu kāryāṇi pratiṣiddhāni varjayet
58 ॥ पुराभूद्युवनाश्वस्य देवतानां महाक्रतुः । ममायमिति देवानां कलहः समजायत
58 // purābhūdyuvanāśvasya devatānāṃ mahākratuḥ / mamāyamiti devānāṃ kalahaḥ samajāyata
59 ॥ तदा विभज्य देवानां मानुषांश्च पशूनपि । विभज्यैकैकशः प्रदाद्ब्रह्मा लोकपितामहः
59 // tadā vibhajya devānāṃ mānuṣāṃśca paśūnapi / vibhajyaikaikaśaḥ pradādbrahmā lokapitāmahaḥ
60 ॥ ततस्तु परमा शक्तिर्भूतसंधसहायिनी । कुपिताभूत्ततो ब्रह्मा तामुवाच नयान्वितः
60 // tatastu paramā śaktirbhūtasaṃdhasahāyinī / kupitābhūttato brahmā tāmuvāca nayānvitaḥ
61 ॥ प्रादुर्भूता समुद्वीक्ष्य भूतानन्दभयान्वितः । प्राञ्जलिः प्रणतस्तुत्वा प्रसीदेति पुनः पुनः
61 // prādurbhūtā samudvīkṣya bhūtānandabhayānvitaḥ / prāñjaliḥ praṇatastutvā prasīdeti punaḥ punaḥ
62 ॥ प्रादुर्भूता यतो ऽसि त्वं कृतर्थो ऽस्मि पुरो मम । त्वयैतदखिलं कर्म निर्मितं सुशुभाशुभम्
62 // prādurbhūtā yato 'si tvaṃ kṛtartho 'smi puro mama / tvayaitadakhilaṃ karma nirmitaṃ suśubhāśubham
63 ॥ श्रुतयः स्मृतयश्चैव त्वयैव प्रतिपादिताः । त्वयैव कल्पिता यागा मन्मुखात्तु महाक्रतौ
63 // śrutayaḥ smṛtayaścaiva tvayaiva pratipāditāḥ / tvayaiva kalpitā yāgā manmukhāttu mahākratau
64 ॥ ये विभक्तास्तु पशवो देवानां परमेश्वरि । ते सर्वे तावकाः संतुभूतानामपि तृप्तये
64 // ye vibhaktāstu paśavo devānāṃ parameśvari / te sarve tāvakāḥ saṃtubhūtānāmapi tṛptaye
65 ॥ इत्युक्त्वान्तर्दधे तेषां पुर एव पितामहः । तदुक्तेनैव विधिना चकार च महाक्रतून्
65 // ityuktvāntardadhe teṣāṃ pura eva pitāmahaḥ / taduktenaiva vidhinā cakāra ca mahākratūn
66 ॥ इयाज च परां शक्तिं हत्वा मेध्यान्पशूनपि । तत्तद्विभागो वेदेषु प्रोक्तत्वादिह नोदितः
66 // iyāja ca parāṃ śaktiṃ hatvā medhyānpaśūnapi / tattadvibhāgo vedeṣu proktatvādiha noditaḥ
67 ॥ स्त्रियः शुद्रास्तथा मांसमादद्युर्ब्राह्मणं विना । आपत्सु ब्राह्मणो वापि भक्षयेद्गुर्वनुज्ञया
67 // striyaḥ śudrāstathā māṃsamādadyurbrāhmaṇaṃ vinā / āpatsu brāhmaṇo vāpi bhakṣayedgurvanujñayā
68 ॥ शिवोद्भवमिद पिण्डमत्यथ शिवतां गतम् । उद्बुध्यस्व पशो त्वं हि नाशिवः सञ्छिवो ह्यसि
68 // śivodbhavamida piṇḍamatyatha śivatāṃ gatam / udbudhyasva paśo tvaṃ hi nāśivaḥ sañchivo hyasi
69 ॥ ईशः सर्वजगत्कर्ता प्रभवः प्रलयस्तथा । यतो विश्वाधिको रुद्रस्तेन रुद्रो ऽसि वै पशो
69 // īśaḥ sarvajagatkartā prabhavaḥ pralayastathā / yato viśvādhiko rudrastena rudro 'si vai paśo
70 ॥ अनेन तुरगं गा वा गजोष्ट्रमहिषादिकम् । आत्मार्थं वा परार्थं वा हत्वा दोषैर्न लिप्यते
70 // anena turagaṃ gā vā gajoṣṭramahiṣādikam / ātmārthaṃ vā parārthaṃ vā hatvā doṣairna lipyate
71 ॥ गृहानिष्टकरान्वापि नागाखुबलिवृश्चिकान् । एतद्गृहाश्रमस्थानां क्रियाफलमभीप्सताम् । मनःसंकल्पसिद्धानां महतां शिववर्चसाम्
71 // gṛhāniṣṭakarānvāpi nāgākhubalivṛścikān / etadgṛhāśramasthānāṃ kriyāphalamabhīpsatām / manaḥsaṃkalpasiddhānāṃ mahatāṃ śivavarcasām
72 ॥ पशुयज्ञेन चान्येषामिष्टा पूर्तिकरं भवेत् । जपहोमार्चनाद्यैस्तु तेषामिष्टं च सिध्यति
72 // paśuyajñena cānyeṣāmiṣṭā pūrtikaraṃ bhavet / japahomārcanādyaistu teṣāmiṣṭaṃ ca sidhyati