67 ॥ इति श्रीब्रह्माण्डमहापुराणे उत्तरभागे हयग्रीवागस्त्यसम्वादे ललितोपाख्याने श्रीनगरत्रिपुरासप्तकक्षापालकदेवताप्रकाशन कथनं नाम द्वात्रिंशो ऽध्यायः हयग्रीव उवाच कथितं सप्तशालानां लक्षणं शिल्पिभिः कृतम् । अथ रत्नमयाः शालाः प्रकीर्त्यन्ते ऽवधारय
67 // iti śrībrahmāṇḍamahāpurāṇe uttarabhāge hayagrīvāgastyasamvāde lalitopākhyāne śrīnagaratripurāsaptakakṣāpālakadevatāprakāśana kathanaṃ nāma dvātriṃśo 'dhyāyaḥ hayagrīva uvāca kathitaṃ saptaśālānāṃ lakṣaṇaṃ śilpibhiḥ kṛtam / atha ratnamayāḥ śālāḥ prakīrtyante 'vadhāraya
1 ॥ सुवर्णमयशालस्य पुष्परागमयस्य च । सप्तयोजनमात्रं स्यान्मध्येन्तरमुदात्दृतम्
1 // suvarṇamayaśālasya puṣparāgamayasya ca / saptayojanamātraṃ syānmadhyentaramudātdṛtam
2 ॥ तत्र सिद्धाःसिद्धनार्यः खेलन्ति मदविह्वलाः । रसै रसायनैश्चापि खड्गैः पादाञ्जनैरपि
2 // tatra siddhāḥsiddhanāryaḥ khelanti madavihvalāḥ / rasai rasāyanaiścāpi khaḍgaiḥ pādāñjanairapi
3 ॥ ललितायां भक्तियुक्तास्तर्पयन्तो महाजनान् । वसंति विविधास्तत्र पिबन्ति मदिरारसान्
3 // lalitāyāṃ bhaktiyuktāstarpayanto mahājanān / vasaṃti vividhāstatra pibanti madirārasān
4 ॥ पुष्परागादिशालानां पूर्ववद्द्वारकॢप्तयः । पुष्परागादिशालेषु कवाटार्गलगोपुरम् । पुष्परागादिजं ज्ञेयमुच्चेन्द्वादित्यभास्वरम्
4 // puṣparāgādiśālānāṃ pūrvavaddvārakḷptayaḥ / puṣparāgādiśāleṣu kavāṭārgalagopuram / puṣparāgādijaṃ jñeyamuccendvādityabhāsvaram
5 ॥ हेमप्राकारचक्रस्य पुष्परागमयस्य च । अन्तरे या स्वली सापि पुष्परागमयी स्मृता
5 // hemaprākāracakrasya puṣparāgamayasya ca / antare yā svalī sāpi puṣparāgamayī smṛtā
6 ॥ वक्ष्यमाणमहाशालाकक्षासु निखिलास्वपि । तद्वर्णाः पक्षिणस्तत्र तद्वर्णानि सरांसि च
6 // vakṣyamāṇamahāśālākakṣāsu nikhilāsvapi / tadvarṇāḥ pakṣiṇastatra tadvarṇāni sarāṃsi ca
7 ॥ तद्वर्मसलिला नद्यस्तद्वर्णाश्च मणिद्रुमाः । सिद्धजातिषु ये देवीमुपास्य विविधैः क्रमै । त्यक्तवन्तो वपुः पूर्वं ते सिद्धास्तत्र सांगनाः
7 // tadvarmasalilā nadyastadvarṇāśca maṇidrumāḥ / siddhajātiṣu ye devīmupāsya vividhaiḥ kramai / tyaktavanto vapuḥ pūrvaṃ te siddhāstatra sāṃganāḥ
8 ॥ ललितामन्त्रजप्तारो ललिताक्रमतत्पराः । ते सर्वे ललितादेव्या नामकीर्तनकारिणः
8 // lalitāmantrajaptāro lalitākramatatparāḥ / te sarve lalitādevyā nāmakīrtanakāriṇaḥ
9 ॥ पुष्परागमहाशालान्तरे मारुतयोजने । पद्मरागमयः शालश्चतुरस्रः समन्ततः
9 // puṣparāgamahāśālāntare mārutayojane / padmarāgamayaḥ śālaścaturasraḥ samantataḥ
10 ॥ स्थली च पद्मरागढ्या गोपुराद्यं च तन्मयम् । तत्र चारणदेशस्थाः पूर्वदेहविनाशतः । सिद्धिं प्राप्ता महाराज्ञीचरमाम्भोजसेवकाः
10 // sthalī ca padmarāgaḍhyā gopurādyaṃ ca tanmayam / tatra cāraṇadeśasthāḥ pūrvadehavināśataḥ / siddhiṃ prāptā mahārājñīcaramāmbhojasevakāḥ
11 ॥ चारणीनां स्त्रियश्चापि चार्वङ्ग्यो मदलालसाः । गायन्ति ललितादेव्या गीतिबन्धान्मुहुर्मुहुः
11 // cāraṇīnāṃ striyaścāpi cārvaṅgyo madalālasāḥ / gāyanti lalitādevyā gītibandhānmuhurmuhuḥ
12 ॥ तत्रैव कल्पवृक्षाणां मध्यस्थवेदिकास्थिताः । भर्तृभिः सहचारिण्यः पिबन्ति मधुरं मधु
12 // tatraiva kalpavṛkṣāṇāṃ madhyasthavedikāsthitāḥ / bhartṛbhiḥ sahacāriṇyaḥ pibanti madhuraṃ madhu
13 ॥ पद्मरागमहाशालान्तरे मरुतयोजने । गोमेदकमहाशालः पूर्वशालासमाकृतिः । अतितुङ्गो हीरशालस्तयोर्मध्ये च हीरभूः
13 // padmarāgamahāśālāntare marutayojane / gomedakamahāśālaḥ pūrvaśālāsamākṛtiḥ / atituṅgo hīraśālastayormadhye ca hīrabhūḥ
14 ॥ तत्र देवीं समभ्यर्च्य पूर्वजन्मनि कुम्भज । वसन्त्यप्सरसां वृन्दैः साकं गन्धर्वपुङ्गवाः
14 // tatra devīṃ samabhyarcya pūrvajanmani kumbhaja / vasantyapsarasāṃ vṛndaiḥ sākaṃ gandharvapuṅgavāḥ
15 ॥ महाराज्ञीगुणगणान्गायन्तो वल्लकीस्वनैः । कामभोजैकरसिकाः कामसन्निभविग्रहाः । सुकुमारप्रकृतयः श्रीदेवीभक्तिशालिनः
15 // mahārājñīguṇagaṇāngāyanto vallakīsvanaiḥ / kāmabhojaikarasikāḥ kāmasannibhavigrahāḥ / sukumāraprakṛtayaḥ śrīdevībhaktiśālinaḥ
16 ॥ गोमेदकस्य शालस्तुपूर्वशालसमाकृतिः । तदन्तरे योगिनीनां भैरवाणां च कोटयः । कालसङ्कर्षणीमंबां सेवन्ते तत्र भक्तितः
16 // gomedakasya śālastupūrvaśālasamākṛtiḥ / tadantare yoginīnāṃ bhairavāṇāṃ ca koṭayaḥ / kālasaṅkarṣaṇīmaṃbāṃ sevante tatra bhaktitaḥ
17 ॥ गोमेदकमहाशालान्तरे मारुतयोजने । उर्वशी मेनका चैव रम्भा चालंबुषा तथा
17 // gomedakamahāśālāntare mārutayojane / urvaśī menakā caiva rambhā cālaṃbuṣā tathā
18 ॥ मञ्जुघोषा सुकेशी च पूर्वचित्तिर्घृताचिका । कृतस्थला च विश्वाची पुञ्जिकस्थलया सह
18 // mañjughoṣā sukeśī ca pūrvacittirghṛtācikā / kṛtasthalā ca viśvācī puñjikasthalayā saha
19 ॥ तिलोत्तमेति देवानां वेश्या एतादृशो ऽपराः । गन्धर्वैः सह नव्यानि कल्पवृक्षम धूनि च
19 // tilottameti devānāṃ veśyā etādṛśo 'parāḥ / gandharvaiḥ saha navyāni kalpavṛkṣama dhūni ca
20 ॥ पिबन्त्यो ललितादेवीं ध्यायन्त्यश्च मुहुर्मुहुः । स्वसौभाग्यविवृद्ध्यर्थं गुणयन्त्यश्च तन्मनुम्
20 // pibantyo lalitādevīṃ dhyāyantyaśca muhurmuhuḥ / svasaubhāgyavivṛddhyarthaṃ guṇayantyaśca tanmanum
21 ॥ चतुर्दशसुचोत्पन्ना स्थानेष्वप्सरसो ऽखिलाः । तत्रैव देवीमर्चन्त्यो वसंति मुदिताशयाः
21 // caturdaśasucotpannā sthāneṣvapsaraso 'khilāḥ / tatraiva devīmarcantyo vasaṃti muditāśayāḥ
22 ॥ अगस्त्य उवाच चतुर्दशापि जन्मानि तासामप्सरसां विभो । कीर्तय त्वं महाप्राज्ञ सर्वविद्यामहानिधे
22 // agastya uvāca caturdaśāpi janmāni tāsāmapsarasāṃ vibho / kīrtaya tvaṃ mahāprājña sarvavidyāmahānidhe
23 ॥ हयग्रीव उवाच ब्राह्मणो हृदयं कामो मृत्युरुर्वी च मारुतः । तपनस्य कराश्चन्द्रकरो वेदाश्च पावकः
23 // hayagrīva uvāca brāhmaṇo hṛdayaṃ kāmo mṛtyururvī ca mārutaḥ / tapanasya karāścandrakaro vedāśca pāvakaḥ
24 ॥ सौदामिनी च पीयूषं दक्षकन्या जलं तथा । जन्मनः कारणान्येतान्या मनन्ति मनीषिणः
24 // saudāminī ca pīyūṣaṃ dakṣakanyā jalaṃ tathā / janmanaḥ kāraṇānyetānyā mananti manīṣiṇaḥ
25 ॥ गीर्वाणगण्यनारीणां स्फुरत्सौभाग्यसंपदाम् । एताः समस्ता गन्धर्वैः सार्धमर्चन्ति चक्रिणीम्
25 // gīrvāṇagaṇyanārīṇāṃ sphuratsaubhāgyasaṃpadām / etāḥ samastā gandharvaiḥ sārdhamarcanti cakriṇīm
26 ॥ किन्नराः सह नारीभिस्तथा किंपुरुषा मुने । स्त्रीभिः सह मदोन्मत्ता हीरकस्थलमाश्रिताः
26 // kinnarāḥ saha nārībhistathā kiṃpuruṣā mune / strībhiḥ saha madonmattā hīrakasthalamāśritāḥ
27 ॥ महाराज्ञीमन्त्रजापैर्विधूताशेष कल्मषाः । नृत्यन्तश्चैव गायन्तो वर्तन्ते कुंभसंभव
27 // mahārājñīmantrajāpairvidhūtāśeṣa kalmaṣāḥ / nṛtyantaścaiva gāyanto vartante kuṃbhasaṃbhava
28 ॥ तत्रैव हीरकक्षोण्यां वज्रा नाम नदी मुने । वज्रकारैर्निबिडिता भासमाना तटद्रुमैः
28 // tatraiva hīrakakṣoṇyāṃ vajrā nāma nadī mune / vajrakārairnibiḍitā bhāsamānā taṭadrumaiḥ
29 ॥ वज्ररत्नैकसिकता वज्रद्रवमयोदका । सदा वहति सा सिंधुः परितस्तत्र पावनी
29 // vajraratnaikasikatā vajradravamayodakā / sadā vahati sā siṃdhuḥ paritastatra pāvanī
30 ॥ ललितापरमेशान्यां भक्त ये मानवोत्तमाः । ते तस्या उदकं पीत्वा वज्ररूपकलेवराः । दीर्घायुषश्च नीरोगा भवन्ति कलशोद्भव
30 // lalitāparameśānyāṃ bhakta ye mānavottamāḥ / te tasyā udakaṃ pītvā vajrarūpakalevarāḥ / dīrghāyuṣaśca nīrogā bhavanti kalaśodbhava
31 ॥ भण्डासुरेण गलिते मुक्ते वज्रे शतक्रतुः । तरयास्तीरे तपस्तेपे वज्रेशीं प्रति भक्तिमान्
31 // bhaṇḍāsureṇa galite mukte vajre śatakratuḥ / tarayāstīre tapastepe vajreśīṃ prati bhaktimān
32 ॥ तज्जलादुदिता देवी वज्रं दत्त्वा बलद्विषे । पुनरन्तर्दधेसो ऽपि कृतार्थःस्वर्गमेयिवान्
32 // tajjalāduditā devī vajraṃ dattvā baladviṣe / punarantardadheso 'pi kṛtārthaḥsvargameyivān
33 ॥ अथ वज्राख्यशालस्यान्तरे मारुतयोजने । वैदूर्यशाल उत्तुङ्गः पूर्ववद्गोपुरान्वितः । स्थाली च तत्र वैदृर्यनिर्मिता भास्वराकृतिः
33 // atha vajrākhyaśālasyāntare mārutayojane / vaidūryaśāla uttuṅgaḥ pūrvavadgopurānvitaḥ / sthālī ca tatra vaidṛryanirmitā bhāsvarākṛtiḥ
34 ॥ पातालवासिनो येये श्रीदेव्यर्चनसाधकाः । ते सिद्धमूर्तयस्तत्र वसन्ति सुखमेदुराः
34 // pātālavāsino yeye śrīdevyarcanasādhakāḥ / te siddhamūrtayastatra vasanti sukhamedurāḥ
35 ॥ शेषकर्केटकमहापद्मवासुकिशङ्खकाः । तक्षकः शङ्खचूडश्च महादन्तो महाफणः
35 // śeṣakarkeṭakamahāpadmavāsukiśaṅkhakāḥ / takṣakaḥ śaṅkhacūḍaśca mahādanto mahāphaṇaḥ
36 ॥ इत्येवमादयस्तत्र नागा नागास्त्रयो ऽपि च । बलीन्द्रप्रमुखानां च दैत्यानां धर्मवर्तिनाम् । गणस्तत्र तथा नागैः सार्धं वसति सांगनाः
36 // ityevamādayastatra nāgā nāgāstrayo 'pi ca / balīndrapramukhānāṃ ca daityānāṃ dharmavartinām / gaṇastatra tathā nāgaiḥ sārdhaṃ vasati sāṃganāḥ
37 ॥ ललितामन्त्र जप्तारो ललिताशास्त्रदीक्षिताः । ललितापूजका नित्यं वसन्त्यसुरभोगिनः
37 // lalitāmantra japtāro lalitāśāstradīkṣitāḥ / lalitāpūjakā nityaṃ vasantyasurabhoginaḥ
38 ॥ तत्र वैदूर्यकक्षायां नद्यः शिशिरपाथसः । सरांसिविमलांभांसि सारसालङ्कृतानि च
38 // tatra vaidūryakakṣāyāṃ nadyaḥ śiśirapāthasaḥ / sarāṃsivimalāṃbhāṃsi sārasālaṅkṛtāni ca
39 ॥ भवनानि तु दिव्यानि वैदूर्यमणिमन्ति च । तेषु क्रीडन्ति ते नागा असुराश्च सहाङ्गनाः
39 // bhavanāni tu divyāni vaidūryamaṇimanti ca / teṣu krīḍanti te nāgā asurāśca sahāṅganāḥ
40 ॥ वैदूर्याख्यमहाशालान्तरे मारुतयोजने । इन्द्रनीलमयः शालश्चक्रवाल इवापरः
40 // vaidūryākhyamahāśālāntare mārutayojane / indranīlamayaḥ śālaścakravāla ivāparaḥ
41 ॥ तन्मध्यकक्षाभूमिश्च नीलरत्नमयी मुने । तत्र नद्यश्च मधुराः सरांसि शिशिराणि च । नानाविधानि भोग्यानि वस्तूनि सरसान्यपि
41 // tanmadhyakakṣābhūmiśca nīlaratnamayī mune / tatra nadyaśca madhurāḥ sarāṃsi śiśirāṇi ca / nānāvidhāni bhogyāni vastūni sarasānyapi
42 ॥ ये भूलोकगता मर्त्या ललितामन्त्रसाधकाः । ते देहान्ते शक्रनीलकक्ष्यां प्राप्य वसंति वै
42 // ye bhūlokagatā martyā lalitāmantrasādhakāḥ / te dehānte śakranīlakakṣyāṃ prāpya vasaṃti vai
43 ॥ तत्र दिव्यानि वस्तूनि भुञ्जाना वनितासखाः । पिबन्तो मधुरं मद्यं नृत्यन्तो भक्तिनिर्भराः
43 // tatra divyāni vastūni bhuñjānā vanitāsakhāḥ / pibanto madhuraṃ madyaṃ nṛtyanto bhaktinirbharāḥ
44 ॥ सरस्सु तेषु सिंधूनां कुलेषु कलशोद्भव । लतागृहेषु रम्येषु मन्दिरेषु महर्द्धिषु
44 // sarassu teṣu siṃdhūnāṃ kuleṣu kalaśodbhava / latāgṛheṣu ramyeṣu mandireṣu maharddhiṣu
45 ॥ सदा जपन्तः श्रीदेवी पठन्तश्चापि तद्गुणान् । निवसंति महाभागा नारीभिः परिवेष्टिताः
45 // sadā japantaḥ śrīdevī paṭhantaścāpi tadguṇān / nivasaṃti mahābhāgā nārībhiḥ pariveṣṭitāḥ
46 ॥ कर्मक्षये पुनर्यान्ति भूलोके मानुषीं तनुम् । पूर्ववासनया युक्ताः पुनरर्चन्ति चक्रिणीम् । पुनर्यान्ति श्रीनगरे शक्रनीलमहास्थलीम्
46 // karmakṣaye punaryānti bhūloke mānuṣīṃ tanum / pūrvavāsanayā yuktāḥ punararcanti cakriṇīm / punaryānti śrīnagare śakranīlamahāsthalīm
47 ॥ तत्स्थलस्यैव संपर्काद्रागद्वेषसमुद्भवैः । नीलैर्भावैः सदा युक्ता वर्तन्ते मनुजा मुने
47 // tatsthalasyaiva saṃparkādrāgadveṣasamudbhavaiḥ / nīlairbhāvaiḥ sadā yuktā vartante manujā mune
48 ॥ ये पुनर्ज्ञानिनो मर्त्या निर्द्वन्द्वा नियतेन्द्रियाः । ते मुने विस्मयाविष्टाः संविशन्ति महेश्वरीम्
48 // ye punarjñānino martyā nirdvandvā niyatendriyāḥ / te mune vismayāviṣṭāḥ saṃviśanti maheśvarīm
49 ॥ इन्द्रनीलाख्यशालस्यान्तरे मारुतयोजने । मुक्ताफलमयःशालः पूर्ववद्गोपुरान्वितः
49 // indranīlākhyaśālasyāntare mārutayojane / muktāphalamayaḥśālaḥ pūrvavadgopurānvitaḥ
50 ॥ अत्यन्तभास्वरा स्वच्छा तयोर्मध्ये स्थली मुने । सर्वापि मुक्ताखचिताः शिशिरातिमनोहराः
50 // atyantabhāsvarā svacchā tayormadhye sthalī mune / sarvāpi muktākhacitāḥ śiśirātimanoharāḥ
51 ॥ ताम्रपर्णी महापर्णी सदा मुक्ताफलोदका । एवमाद्या महानद्यः प्रवरन्ति महास्थले
51 // tāmraparṇī mahāparṇī sadā muktāphalodakā / evamādyā mahānadyaḥ pravaranti mahāsthale
52 ॥ तासां तीरेषु सर्वे ऽपि देवलोकनिवासिनः । वसंति पूर्वजनुषि श्रीदेवीमन्त्रसाधकाः
52 // tāsāṃ tīreṣu sarve 'pi devalokanivāsinaḥ / vasaṃti pūrvajanuṣi śrīdevīmantrasādhakāḥ
53 ॥ पूर्वाद्यष्टसु भागेषु लोकाः शक्रादिगोचराः । मुक्ताशालस्य परितः संयुज्य द्वारदेशकान्
53 // pūrvādyaṣṭasu bhāgeṣu lokāḥ śakrādigocarāḥ / muktāśālasya paritaḥ saṃyujya dvāradeśakān
54 ॥ मुक्ताशालस्य नीलस्य द्वारयोर्मध्यदेशतः । पूर्वभागे शक्रलोकस्तत्कोणे वह्निलोकभूः
54 // muktāśālasya nīlasya dvārayormadhyadeśataḥ / pūrvabhāge śakralokastatkoṇe vahnilokabhūḥ
55 ॥ याम्यभागे यमपुरं तत्र दण्डधरः प्रभुः । सर्वत्र ललितामन्त्रजापी तीव्रस्वभाववान्
55 // yāmyabhāge yamapuraṃ tatra daṇḍadharaḥ prabhuḥ / sarvatra lalitāmantrajāpī tīvrasvabhāvavān
56 ॥ आज्ञाधरो यमभटैश्चित्रगुप्तपुरोगमैः । सार्धं नियमयत्येव श्रीदेवीसमयं गुहः
56 // ājñādharo yamabhaṭaiścitraguptapurogamaiḥ / sārdhaṃ niyamayatyeva śrīdevīsamayaṃ guhaḥ
57 ॥ गुहशप्तान्दुराचाराल्लंलिताद्वेषकारिणः । कूडभक्तिपरान्मूर्खांस्तब्धानत्यन्तदर्पितान्
57 // guhaśaptāndurācārāllaṃlitādveṣakāriṇaḥ / kūḍabhaktiparānmūrkhāṃstabdhānatyantadarpitān
58 ॥ मन्त्रचोरान्कुमन्त्रांश्च कुविद्यानघसंश्रयान् । नास्तिकान्पापशीलांश्च वृथैव प्राणिहिंसकान्
58 // mantracorānkumantrāṃśca kuvidyānaghasaṃśrayān / nāstikānpāpaśīlāṃśca vṛthaiva prāṇihiṃsakān
59 ॥ स्त्रीद्विष्टांल्लोकविद्विष्टान्पाषण्डानां हि पालिनः । कालसूत्रे रौरवे च कुम्भीपाके च कुम्भज
59 // strīdviṣṭāṃllokavidviṣṭānpāṣaṇḍānāṃ hi pālinaḥ / kālasūtre raurave ca kumbhīpāke ca kumbhaja
60 ॥ असिपत्रवने घोरे कृमिभक्षे प्रतापने । लालाक्षेपे सूचिवेधे तथैवाङ्गारपातने
60 // asipatravane ghore kṛmibhakṣe pratāpane / lālākṣepe sūcivedhe tathaivāṅgārapātane
61 ॥ एवमादिषु कष्टेषु नरकेषु घटोद्भव । पातयत्याज्ञया तस्याः श्रीदेव्याः स महौजसः
61 // evamādiṣu kaṣṭeṣu narakeṣu ghaṭodbhava / pātayatyājñayā tasyāḥ śrīdevyāḥ sa mahaujasaḥ
62 ॥ तस्यैव पश्चिमे भागे निरृतिः खड्गधारकः । राक्षसं लोकमाश्रित्य वर्तते ललितार्चकः
62 // tasyaiva paścime bhāge nirṛtiḥ khaḍgadhārakaḥ / rākṣasaṃ lokamāśritya vartate lalitārcakaḥ
63 ॥ तस्य चोत्तरभागे तु द्वारयोरन्तस्यले । वारुणं लोकमाश्रित्य वरुणे वर्तते सदा
63 // tasya cottarabhāge tu dvārayorantasyale / vāruṇaṃ lokamāśritya varuṇe vartate sadā
64 ॥ वारुण्यास्वादनोन्मत्तः शुभ्राङ्गो झषवाहनः । सदा श्रीदेवतामं त्रजापी श्रीक्रमसाधकः
64 // vāruṇyāsvādanonmattaḥ śubhrāṅgo jhaṣavāhanaḥ / sadā śrīdevatāmaṃ trajāpī śrīkramasādhakaḥ
65 ॥ श्रीदेवतादर्शनस्य द्वेषिणः पाशबन्धनैः । बद्ध्वा नयत्यधोमार्गं भक्तानां बन्धमोचकः
65 // śrīdevatādarśanasya dveṣiṇaḥ pāśabandhanaiḥ / baddhvā nayatyadhomārgaṃ bhaktānāṃ bandhamocakaḥ
66 ॥ तस्य चोत्तरकोणेषु वायुलोको महाद्युतिः । तत्र वायुशरीराश्च सदानन्दमहोदयाः
66 // tasya cottarakoṇeṣu vāyuloko mahādyutiḥ / tatra vāyuśarīrāśca sadānandamahodayāḥ
67 ॥ सिद्धा दिव्यर्षयश्चैव पवनाभ्यासिनो ऽपरे । गोरक्षप्रमुखाश्चान्ये योगिनो योगतत्पराः
67 // siddhā divyarṣayaścaiva pavanābhyāsino 'pare / gorakṣapramukhāścānye yogino yogatatparāḥ
68 ॥ एतैः सह महासत्त्वक्तत्र श्रीमारुतेश्वरः । सर्वथा भिन्नमूर्तिश्च वर्तते कुम्भसम्भव
68 // etaiḥ saha mahāsattvaktatra śrīmāruteśvaraḥ / sarvathā bhinnamūrtiśca vartate kumbhasambhava
69 ॥ इडा च पिङ्गला चैव सुषुम्णा तस्य शक्तयः । तिस्रो मारुतनाथस्य सदा मधुमदालसाः
69 // iḍā ca piṅgalā caiva suṣumṇā tasya śaktayaḥ / tisro mārutanāthasya sadā madhumadālasāḥ
70 ॥ ध्वजहस्तो मृगवरे वाहने महति स्थितः । ललितायजनध्यानक्रमपूजनतत्परः
70 // dhvajahasto mṛgavare vāhane mahati sthitaḥ / lalitāyajanadhyānakramapūjanatatparaḥ
71 ॥ आनन्दपूरिताङ्गीभिरन्याभिः शक्तिभिर्वृतः । स मारुतेश्वरः श्रीमान्सदा जपति चक्रिणीम्
71 // ānandapūritāṅgībhiranyābhiḥ śaktibhirvṛtaḥ / sa māruteśvaraḥ śrīmānsadā japati cakriṇīm
72 ॥ तेन सत्त्वेन कल्पान्ते त्रैलोक्यं सचराचरम् । परागमयतां नीत्वा विनोदयति तत्क्षणात्
72 // tena sattvena kalpānte trailokyaṃ sacarācaram / parāgamayatāṃ nītvā vinodayati tatkṣaṇāt
73 ॥ तस्य सत्त्वस्य सिद्ध्यर्थं तामेव ललितेश्वरीम् । पूजयन्भावयन्नास्ते सर्वाभरणभूषितः
73 // tasya sattvasya siddhyarthaṃ tāmeva laliteśvarīm / pūjayanbhāvayannāste sarvābharaṇabhūṣitaḥ
74 ॥ तल्लोकपूर्वभागस्थे यक्षलोके महाद्युतिः । यक्षेन्द्रो वसति श्रीमांस्तद्द्वारद्वन्द्वमध्यगः
74 // tallokapūrvabhāgasthe yakṣaloke mahādyutiḥ / yakṣendro vasati śrīmāṃstaddvāradvandvamadhyagaḥ
75 ॥ निधिभिश्च नवाकारैरृद्धिवृद्ध्यादिशक्तिभिः । सहितो ललिताभक्तान्पूरयन्धनसम्पदा
75 // nidhibhiśca navākārairṛddhivṛddhyādiśaktibhiḥ / sahito lalitābhaktānpūrayandhanasampadā
76 ॥ यक्षीभिश्च मनोज्ञाभिरनुकूलप्रवृत्तिभिः । विविधैर्मधुभेदैश्च सम्पूजयति चक्रिणीम्
76 // yakṣībhiśca manojñābhiranukūlapravṛttibhiḥ / vividhairmadhubhedaiśca sampūjayati cakriṇīm
77 ॥ मणिभद्रः पूर्णभद्रो मणिमान्माणिकन्धरः । इत्येवमादयो यक्षसेनान्यस्तत्र संति वै
77 // maṇibhadraḥ pūrṇabhadro maṇimānmāṇikandharaḥ / ityevamādayo yakṣasenānyastatra saṃti vai
78 ॥ तल्लोकपूर्वभागे तु रुद्रलोको महोदयः । अनर्ध्यरत्नखचितस्तत्र रुद्रो ऽधिदेवता
78 // tallokapūrvabhāge tu rudraloko mahodayaḥ / anardhyaratnakhacitastatra rudro 'dhidevatā
79 ॥ सदैव मन्युना दीप्तः सदा बद्धमहेषुधिः । स्वसमानैर्महासत्त्वैलोङ्कनिर्वाहदक्षिणैः
79 // sadaiva manyunā dīptaḥ sadā baddhamaheṣudhiḥ / svasamānairmahāsattvailoṅkanirvāhadakṣiṇaiḥ
80 ॥ अधिज्यकार्मुकैर्दक्षैः षोडशावरणस्थितैः । आवृतः सततं वक्त्रैर्जपञ्छीदेवतामनुम्
80 // adhijyakārmukairdakṣaiḥ ṣoḍaśāvaraṇasthitaiḥ / āvṛtaḥ satataṃ vaktrairjapañchīdevatāmanum
81 ॥ श्रीदेवीध्यानसम्पन्नः श्रीदेवीपूजनोत्सुकः । अनेककोटिरुद्राणीगणमण्डितपार्श्वभूः
81 // śrīdevīdhyānasampannaḥ śrīdevīpūjanotsukaḥ / anekakoṭirudrāṇīgaṇamaṇḍitapārśvabhūḥ
82 ॥ ताश्च सर्वाः प्रदीप्ताङ्ग्यो नवयौवनगर्विताः । ललिताध्याननिरनाः सदासवमदालसाः
82 // tāśca sarvāḥ pradīptāṅgyo navayauvanagarvitāḥ / lalitādhyānaniranāḥ sadāsavamadālasāḥ
83 ॥ ताभिश्च साकं स श्रीमान्महारुद्रस्त्रिशूलभृत् । हिरण्यबाहुप्रमुशै रुद्रैरन्यैर्निषेवितः
83 // tābhiśca sākaṃ sa śrīmānmahārudrastriśūlabhṛt / hiraṇyabāhupramuśai rudrairanyairniṣevitaḥ
84 ॥ ललितादर्शनभ्रष्टानुद्धतान्गुरुधिक्कृतान् । शूलकोट्या विनिर्भिद्य नेत्रोत्थैः कटुपावकैः
84 // lalitādarśanabhraṣṭānuddhatāngurudhikkṛtān / śūlakoṭyā vinirbhidya netrotthaiḥ kaṭupāvakaiḥ
85 ॥ दहंस्तेषा वधूभृत्यान्प्रजाश्चैव विनाशयन् । आज्ञाधरो महावीरो ललिताज्ञाप्रपालकः
85 // dahaṃsteṣā vadhūbhṛtyānprajāścaiva vināśayan / ājñādharo mahāvīro lalitājñāprapālakaḥ
86 ॥ रुद्रलोके ऽतिरुचिरे वर्तते कुम्भसम्भव । महारुद्रस्य तस्यर्षे परिवाराः प्रमाथिनः
86 // rudraloke 'tirucire vartate kumbhasambhava / mahārudrasya tasyarṣe parivārāḥ pramāthinaḥ
87 ॥ ये रुद्रास्तानसंख्यातान्को वा वक्तुं पटुर्भवेत् । ये रुद्रा अधिभूम्यां तु सहस्राणां सहस्रशः
87 // ye rudrāstānasaṃkhyātānko vā vaktuṃ paṭurbhavet / ye rudrā adhibhūmyāṃ tu sahasrāṇāṃ sahasraśaḥ
88 ॥ दिविये ऽपि च वर्तन्ते सहस्राणां सहस्रशः । येषामन्नमिषश्चव येषां वातास्तथेषवः
88 // diviye 'pi ca vartante sahasrāṇāṃ sahasraśaḥ / yeṣāmannamiṣaścava yeṣāṃ vātāstatheṣavaḥ
89 ॥ येषां च वर्षमिषवः प्रदीप्ताः पिङ्गलेक्षणाः । अर्णवे चान्तरिक्षे च वर्तमाना महौजसः
89 // yeṣāṃ ca varṣamiṣavaḥ pradīptāḥ piṅgalekṣaṇāḥ / arṇave cāntarikṣe ca vartamānā mahaujasaḥ
90 ॥ जटावन्तो मधुष्मन्तो नीलग्रीवा विलोहिताः । ये भूतानामधिभुवो विशिखासः कपर्दिनः
90 // jaṭāvanto madhuṣmanto nīlagrīvā vilohitāḥ / ye bhūtānāmadhibhuvo viśikhāsaḥ kapardinaḥ
91 ॥ ये अन्नेषु विविध्यन्ति पात्रेषु पिबतो जनान् । ये पथां रथका रुद्रा ये च तीर्थनिवासिनः
91 // ye anneṣu vividhyanti pātreṣu pibato janān / ye pathāṃ rathakā rudrā ye ca tīrthanivāsinaḥ
92 ॥ सहस्रसंख्या ये चान्ये सृकावन्तो निषङ्गिणः । ललिताज्ञाप्रणेतारो दिशो रुद्रा वितस्थिरे
92 // sahasrasaṃkhyā ye cānye sṛkāvanto niṣaṅgiṇaḥ / lalitājñāpraṇetāro diśo rudrā vitasthire
93 ॥ ते सर्वे सुमहात्मानः क्षणाद्विश्वत्रयीवहाः । श्रीदेव्या ध्याननिषणाताञ्छ्रीदेवीमन्त्रजापिनः
93 // te sarve sumahātmānaḥ kṣaṇādviśvatrayīvahāḥ / śrīdevyā dhyānaniṣaṇātāñchrīdevīmantrajāpinaḥ
94 ॥ श्रीदेवतायां भक्ताश्च पालयन्ति कृपालवः । षोडशावरणं चक्रं मुक्ताप्राकारमण्डले
94 // śrīdevatāyāṃ bhaktāśca pālayanti kṛpālavaḥ / ṣoḍaśāvaraṇaṃ cakraṃ muktāprākāramaṇḍale
95 ॥ आश्रित्य रुद्रास्ते सर्वे महारुद्रं महोदयम् । हिरण्यबाहुप्रमुखा ज्वलन्मन्युमुपासते
95 // āśritya rudrāste sarve mahārudraṃ mahodayam / hiraṇyabāhupramukhā jvalanmanyumupāsate