114 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपख्याने विशुक्रविषङ्गवधो नामाष्टाविंशो ऽध्यायः अगस्त्य उवाच अश्वानन महाप्राज्ञ वर्णितं मन्त्रिणीबलम् । विषङ्गस्य वधो युद्धे वर्णितो दण्डनाथया
114 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopakhyāne viśukraviṣaṅgavadho nāmāṣṭāviṃśo 'dhyāyaḥ agastya uvāca aśvānana mahāprājña varṇitaṃ mantriṇībalam / viṣaṅgasya vadho yuddhe varṇito daṇḍanāthayā
1 ॥ श्रीदेव्याः श्रोतुमिच्छामि रणचक्रे पराक्रमम् । सोदरस्यापदं दृष्ट्वा भण्डः किमकरोच्छुचा
1 // śrīdevyāḥ śrotumicchāmi raṇacakre parākramam / sodarasyāpadaṃ dṛṣṭvā bhaṇḍaḥ kimakarocchucā
2 ॥ कथं तस्य रणोत्साहः कैः समं समयुध्यत । सहायाः के ऽभवंस्तस्य हतभ्रातृतनूभुवः
2 // kathaṃ tasya raṇotsāhaḥ kaiḥ samaṃ samayudhyata / sahāyāḥ ke 'bhavaṃstasya hatabhrātṛtanūbhuvaḥ
3 ॥ हयग्रीव उवाच इदं शृणु महाप्राज्ञ सर्वपापनिकृन्तनम् । ललिताचरितं पुण्यमणिमादिगुमप्रदम्
3 // hayagrīva uvāca idaṃ śṛṇu mahāprājña sarvapāpanikṛntanam / lalitācaritaṃ puṇyamaṇimādigumapradam
4 ॥ वैषुवायनकालेषु पुण्येषु समयेषु च । सिद्धिदं सर्वपापघ्नं कीर्तिदं पञ्चपर्वसु
4 // vaiṣuvāyanakāleṣu puṇyeṣu samayeṣu ca / siddhidaṃ sarvapāpaghnaṃ kīrtidaṃ pañcaparvasu
5 ॥ तदा हतौ रणे तत्र श्रुत्वा निजसहोदरौ । शोकेन महताविष्टो भण्डः प्रविललाप सः
5 // tadā hatau raṇe tatra śrutvā nijasahodarau / śokena mahatāviṣṭo bhaṇḍaḥ pravilalāpa saḥ
6 ॥ विकीर्मकेशो धरणौ मूर्छितः पतितस्तदा । न लेभे किञ्चिदाश्वासं भ्रातृव्यसनकर्शितः
6 // vikīrmakeśo dharaṇau mūrchitaḥ patitastadā / na lebhe kiñcidāśvāsaṃ bhrātṛvyasanakarśitaḥ
7 ॥ पुनः पुनः प्रविलपन्कुटिलाक्षेण भूरिशः । आश्वास्यामानः शोकेन युक्तः कोपमवाप सः
7 // punaḥ punaḥ pravilapankuṭilākṣeṇa bhūriśaḥ / āśvāsyāmānaḥ śokena yuktaḥ kopamavāpa saḥ
8 ॥ फालं वहन्नतिक्रूरं भ्रमद्भ्रुकुटिभीषणम् । अङ्गारपाटलाक्षश्च निःश्वसन्कृष्णसर्पवत्
8 // phālaṃ vahannatikrūraṃ bhramadbhrukuṭibhīṣaṇam / aṅgārapāṭalākṣaśca niḥśvasankṛṣṇasarpavat
9 ॥ उवाच कुटिलाक्षं द्राक्समस्तपृतनापतिम् । क्षिप्रं मुहुर्मुहुः स्पृष्ट्वा धुन्वानः करवालिकाम्
9 // uvāca kuṭilākṣaṃ drāksamastapṛtanāpatim / kṣipraṃ muhurmuhuḥ spṛṣṭvā dhunvānaḥ karavālikām
10 ॥ क्रोधहुङ्कारमातन्वन्गर्जन्नुत्पातमेघवत्
10 // krodhahuṅkāramātanvangarjannutpātameghavat
11 ॥ ययैव दृष्टया मायाबलाद्युद्धे विनाशिताः । भ्रातरो मम पुत्राश्च सेनानाथाः सहस्रशः
11 // yayaiva dṛṣṭayā māyābalādyuddhe vināśitāḥ / bhrātaro mama putrāśca senānāthāḥ sahasraśaḥ
12 ॥ तस्याः स्त्रियाः प्रमत्तायाः कण्ठोत्थैः शोणितद्रवैः । भ्रातृपुत्रमहाशोकवह्निं निर्वापयाम्यहम्
12 // tasyāḥ striyāḥ pramattāyāḥ kaṇṭhotthaiḥ śoṇitadravaiḥ / bhrātṛputramahāśokavahniṃ nirvāpayāmyaham
13 ॥ गच्छ रे कुटिलाक्ष त्वं सज्जीकुरु पताकिनीम् । इत्युक्त्वा कठिनं वर्म वज्रपातसहं महत्
13 // gaccha re kuṭilākṣa tvaṃ sajjīkuru patākinīm / ityuktvā kaṭhinaṃ varma vajrapātasahaṃ mahat
14 ॥ दधानो भुजमध्येन बध्नन्पृष्ठ तथेषुधी । उद्दाममौर्विनिःश्वासकठोरं भ्रामयन्धनुः
14 // dadhāno bhujamadhyena badhnanpṛṣṭha tatheṣudhī / uddāmamaurviniḥśvāsakaṭhoraṃ bhrāmayandhanuḥ
15 ॥ कालाग्निरिव संक्रुद्धो निर्जगाम निजात्पुरात् । तालजङ्घादिकैः सार्द्धंपूर्वद्वारे निवेशिते
15 // kālāgniriva saṃkruddho nirjagāma nijātpurāt / tālajaṅghādikaiḥ sārddhaṃpūrvadvāre niveśite
16 ॥ चतुर्भिर्धृतशस्त्रौघैर्धृतवर्मभिरुद्धतैः । पञ्चत्रिंशच्चमूनाथैः कुटिलाक्षपुरःसरैः
16 // caturbhirdhṛtaśastraughairdhṛtavarmabhiruddhataiḥ / pañcatriṃśaccamūnāthaiḥ kuṭilākṣapuraḥsaraiḥ
17 ॥ सर्वसेनापतीन्द्रेण कुटिलाक्षेण स क्रुधा । मिलितेन च भण्डेन चत्वारिंशच्चमूवराः
17 // sarvasenāpatīndreṇa kuṭilākṣeṇa sa krudhā / militena ca bhaṇḍena catvāriṃśaccamūvarāḥ
18 ॥ दीप्तायुधा दीप्तकेशा निर्जग्मुर्दीप्तकङ्कटाः । द्विसहस्राक्षौहिणीनां पञ्चाशीतिः परार्धिका
18 // dīptāyudhā dīptakeśā nirjagmurdīptakaṅkaṭāḥ / dvisahasrākṣauhiṇīnāṃ pañcāśītiḥ parārdhikā
19 ॥ तदेनमन्वगादेकहेलया मथितुं द्विषः । भण्डासुरे विनिर्याते सर्वसैनिकसंकुले
19 // tadenamanvagādekahelayā mathituṃ dviṣaḥ / bhaṇḍāsure viniryāte sarvasainikasaṃkule
20 ॥ शून्यके नगरे तत्र स्त्रीमात्रमवशेषितम् । आभिलो नाम दैत्येन्द्रो रथवर्यो महारथः । सहस्रयुग्यसिंहाढ्यमारुरोह रणोद्धतः
20 // śūnyake nagare tatra strīmātramavaśeṣitam / ābhilo nāma daityendro rathavaryo mahārathaḥ / sahasrayugyasiṃhāḍhyamāruroha raṇoddhataḥ
21 ॥ तत्वरे विज्वलज्ज्वालाकालाग्निरिव दीप्तिमान् । घातको नाम वै खड्गश्चन्द्रहाससमाकृतिः
21 // tatvare vijvalajjvālākālāgniriva dīptimān / ghātako nāma vai khaḍgaścandrahāsasamākṛtiḥ
22 ॥ इतस्ततश्चलन्तीनां सेनानां धूलिरुत्थिता । वोढुं तासां भरं भूमिरक्षमेव दिवं ययौ
22 // itastataścalantīnāṃ senānāṃ dhūlirutthitā / voḍhuṃ tāsāṃ bharaṃ bhūmirakṣameva divaṃ yayau
23 ॥ केचिद्भूमेरपर्याप्ताः प्रचेलुर्व्योमवर्त्मना । केषाञ्चित्स्कन्धमारूढाः केचिच्चेलुर्महारथाः
23 // kecidbhūmeraparyāptāḥ pracelurvyomavartmanā / keṣāñcitskandhamārūḍhāḥ keciccelurmahārathāḥ
24 ॥ न दिक्षु न च भूचक्रे न व्योमनि च ते ममुः । दुःखदुखेन ते चेलुरन्योन्याश्लेषपीडिताः
24 // na dikṣu na ca bhūcakre na vyomani ca te mamuḥ / duḥkhadukhena te celuranyonyāśleṣapīḍitāḥ
25 ॥ अत्यन्त सेनासंमर्दाद्रथचक्रैर्विचूर्णिताः । केचित्पादेन नागानां मर्दिता न्यपतन्भुवि
25 // atyanta senāsaṃmardādrathacakrairvicūrṇitāḥ / kecitpādena nāgānāṃ marditā nyapatanbhuvi
26 ॥ इत्थं प्रचलिता तेन समं सर्वैश्च सैनिकैः । वज्रनिष्पेषसदृशो मेघनादो व्यधीयत
26 // itthaṃ pracalitā tena samaṃ sarvaiśca sainikaiḥ / vajraniṣpeṣasadṛśo meghanādo vyadhīyata
27 ॥ तेनातीव कठोरेण सिंहनादेन भूयसा । भण्डदैत्यमुखोत्थेन विदीर्णमभवज्जगत्
27 // tenātīva kaṭhoreṇa siṃhanādena bhūyasā / bhaṇḍadaityamukhotthena vidīrṇamabhavajjagat
28 ॥ सागराः शोषमापन्नाश्चन्द्राकारै प्रपलायितौ । उडूनि न्यपतन्व्योम्नो भूमिर्देलायिताभवत्
28 // sāgarāḥ śoṣamāpannāścandrākārai prapalāyitau / uḍūni nyapatanvyomno bhūmirdelāyitābhavat
29 ॥ दिङ्नागाश्चाभवंस्त्रस्ता मूर्च्छिताश्च दिवौकसः । शक्तीनां कटकं चासीदकाण्डत्रासविह्वलम्
29 // diṅnāgāścābhavaṃstrastā mūrcchitāśca divaukasaḥ / śaktīnāṃ kaṭakaṃ cāsīdakāṇḍatrāsavihvalam
30 ॥ प्राणान्संधारयामासुः कथञ्चिन्मध्य आहवे । शक्तयो भयविभ्रष्टान्यायुधानि पुनर्दधुः
30 // prāṇānsaṃdhārayāmāsuḥ kathañcinmadhya āhave / śaktayo bhayavibhraṣṭānyāyudhāni punardadhuḥ
31 ॥ वह्निप्राकारवलयं प्रशान्तं पुनरुत्थितम् । दैत्येन्द्रसिंहनादेन चमूनाथधनुःस्वनैः
31 // vahniprākāravalayaṃ praśāntaṃ punarutthitam / daityendrasiṃhanādena camūnāthadhanuḥsvanaiḥ
32 ॥ क्रन्दनैश्चापि योद्धॄणामभूच्छब्दमयं जगत् । तेन नादेन महता भण्डदैत्यविनिर्गमम् । निश्चित्य ललिता देवी स्वयं योद्धुं प्रचक्रमे
32 // krandanaiścāpi yoddhṝṇāmabhūcchabdamayaṃ jagat / tena nādena mahatā bhaṇḍadaityavinirgamam / niścitya lalitā devī svayaṃ yoddhuṃ pracakrame
33 ॥ अशक्यमन्यशक्तीनामाकलय्य महाहवम् । भण्डदैत्येन दुष्टेन स्वयमुद्योगमास्थिता
33 // aśakyamanyaśaktīnāmākalayya mahāhavam / bhaṇḍadaityena duṣṭena svayamudyogamāsthitā
34 ॥ चक्रराजरथस्तस्याः प्रचचाल महोदयः । चतुर्वेदमहाचक्रपुरुषार्थमहाभयः
34 // cakrarājarathastasyāḥ pracacāla mahodayaḥ / caturvedamahācakrapuruṣārthamahābhayaḥ
35 ॥ आनन्दध्वजसंयुक्तो नवभिः पर्वभिर्युतः । नवपर्वस्थदेवीभिराकृष्टगुरुधन्विभिः
35 // ānandadhvajasaṃyukto navabhiḥ parvabhiryutaḥ / navaparvasthadevībhirākṛṣṭagurudhanvibhiḥ
36 ॥ परार्धाधिकसंख्यातपरिवारसमृद्धिभिः । पर्वस्थानेषु सर्वेषु पालितः सर्वतो दिशम्
36 // parārdhādhikasaṃkhyātaparivārasamṛddhibhiḥ / parvasthāneṣu sarveṣu pālitaḥ sarvato diśam
37 ॥ दशयोजनमुन्नद्धश्चतुर्योजन विस्तृतः । महाराज्ञीचक्रराजो रथेन्द्रः प्रचलन्बभौ
37 // daśayojanamunnaddhaścaturyojana vistṛtaḥ / mahārājñīcakrarājo rathendraḥ pracalanbabhau
38 ॥ तस्मिन्प्रचलिते जुष्टे श्यामया दण्डनाथया । गेयचक्रं तु बालाग्रे किरिचक्रं तु बृष्ठतः
38 // tasminpracalite juṣṭe śyāmayā daṇḍanāthayā / geyacakraṃ tu bālāgre kiricakraṃ tu bṛṣṭhataḥ
39 ॥ अन्यासामपि शक्तीनां वाहनानि परार्द्धशः । नृसिंहोष्ट्रनरव्यालमृगपक्षिहयास्तथा
39 // anyāsāmapi śaktīnāṃ vāhanāni parārddhaśaḥ / nṛsiṃhoṣṭranaravyālamṛgapakṣihayāstathā
40 ॥ गजभेरुण्डशरभ व्याघ्रवातमृगास्तथा । एतादृशश्च तिर्यञ्चो ऽप्यन्ये वाहनतां गताः
40 // gajabheruṇḍaśarabha vyāghravātamṛgāstathā / etādṛśaśca tiryañco 'pyanye vāhanatāṃ gatāḥ
41 ॥ मुहुरुच्चावचाः शक्तीर्भण्डासुरवधोद्यताः । योजनायामविस्तारमपि तद्द्वारमण्डलम् । वह्निप्राकारचक्रस्य न पर्याप्तं चमूपतेः
41 // muhuruccāvacāḥ śaktīrbhaṇḍāsuravadhodyatāḥ / yojanāyāmavistāramapi taddvāramaṇḍalam / vahniprākāracakrasya na paryāptaṃ camūpateḥ
42 ॥ ज्वालामालिनिका नित्या द्वारस्यात्यन्तविस्तृतिम् । विततान समस्तानां सैन्यानां निर्गमैषिणी
42 // jvālāmālinikā nityā dvārasyātyantavistṛtim / vitatāna samastānāṃ sainyānāṃ nirgamaiṣiṇī
43 ॥ अथ सा जगतां माता महाराज्ञी महोदया । निर्जगामा ग्निपुरता वरद्वारात्प्रतापिनी
43 // atha sā jagatāṃ mātā mahārājñī mahodayā / nirjagāmā gnipuratā varadvārātpratāpinī
44 ॥ देवदुन्दुभयो नेदुः पतिताः पुष्पवृष्टयः । महामुक्तातपत्रं तद्दिवि दीप्तमदृश्यत
44 // devadundubhayo neduḥ patitāḥ puṣpavṛṣṭayaḥ / mahāmuktātapatraṃ taddivi dīptamadṛśyata
45 ॥ निमित्तानि प्रसन्नानि शंसकानि जयश्रियाः । अभवंल्ललितासैन्ये उत्पातास्तु द्विषां बले
45 // nimittāni prasannāni śaṃsakāni jayaśriyāḥ / abhavaṃllalitāsainye utpātāstu dviṣāṃ bale
46 ॥ ततः प्रववृते युद्धं सेन योरुभयोरपि । प्रसर्पद्विशिखैः स्तोमबद्धान्धतमसच्छटम्
46 // tataḥ pravavṛte yuddhaṃ sena yorubhayorapi / prasarpadviśikhaiḥ stomabaddhāndhatamasacchaṭam
47 ॥ हन्यमानगजस्तोमसृतशोणितबिन्दुभिः । ह्नीयमाणशिरश्छन्नदैत्यश्वेतातपत्रकम्
47 // hanyamānagajastomasṛtaśoṇitabindubhiḥ / hnīyamāṇaśiraśchannadaityaśvetātapatrakam
48 ॥ न दिशो न नभो नागा न भूमिर्न च किञ्चन । दृश्यते केवलं दृष्टं रजोमात्रं च सूर्च्छितम्
48 // na diśo na nabho nāgā na bhūmirna ca kiñcana / dṛśyate kevalaṃ dṛṣṭaṃ rajomātraṃ ca sūrcchitam
49 ॥ नृत्यत्कबन्धनिवहाविर्भूततटपादपम् । दैत्यकेशसहस्रैस्तु शैवालाङ्कुरकोमला
49 // nṛtyatkabandhanivahāvirbhūtataṭapādapam / daityakeśasahasraistu śaivālāṅkurakomalā
50 ॥ श्वेतातपत्रयवलयश्वेतपङ्कजभासुरा । चक्रकृत्तकरिग्रामपादकूर्मपरंपरा
50 // śvetātapatrayavalayaśvetapaṅkajabhāsurā / cakrakṛttakarigrāmapādakūrmaparaṃparā
51 ॥ शक्तिध्वस्तमहादैत्यगलगण्डशिलोच्चया । विलूनकाण्डैः पतितैः सफेना बलचामरैः
51 // śaktidhvastamahādaityagalagaṇḍaśiloccayā / vilūnakāṇḍaiḥ patitaiḥ saphenā balacāmaraiḥ
52 ॥ तीक्ष्णासिवल्लरीजालैर्निबिडीकृततीरभूः । दैत्यवीरेक्षमश्रेणिमुक्तिंसपुटभासुरा
52 // tīkṣṇāsivallarījālairnibiḍīkṛtatīrabhūḥ / daityavīrekṣamaśreṇimuktiṃsapuṭabhāsurā
53 ॥ दैत्यवाहनसंघातन क्रमीनशताकुला । प्रावहच्छोणितनदी सेनयोर्युध्यमानयोः
53 // daityavāhanasaṃghātana kramīnaśatākulā / prāvahacchoṇitanadī senayoryudhyamānayoḥ
54 ॥ इत्थं प्रववृते युद्धं मृत्योश्च त्रासदायकम् । चतुर्थयुद्धदिवसे प्रातरा रभ्यभीषणम् । प्रहरद्वयपर्यन्तं सेनयोरुभयोरपि
54 // itthaṃ pravavṛte yuddhaṃ mṛtyośca trāsadāyakam / caturthayuddhadivase prātarā rabhyabhīṣaṇam / praharadvayaparyantaṃ senayorubhayorapi
55 ॥ ततः श्रीललितादेव्या भण्डस्याथाभवद्रणः । अस्त्रप्रत्यस्त्रसंक्षोभैस्तुमुलीकृतदिक्तटः
55 // tataḥ śrīlalitādevyā bhaṇḍasyāthābhavadraṇaḥ / astrapratyastrasaṃkṣobhaistumulīkṛtadiktaṭaḥ
56 ॥ धनुर्ज्यातलटङ्कारहुङ्कारैरतिभीषणः । तूणीरवदनात्कृष्टधनुर्वरविनिः सृतैः । विमुक्तैर्विशिशैर्भीमैराहवे प्राणहारिभिः
56 // dhanurjyātalaṭaṅkārahuṅkārairatibhīṣaṇaḥ / tūṇīravadanātkṛṣṭadhanurvaraviniḥ sṛtaiḥ / vimuktairviśiśairbhīmairāhave prāṇahāribhiḥ
57 ॥ हस्तलाघववेगेन न प्राज्ञायत किञ्चन । महाराज्ञीकरांभोजव्यापारं शरमोक्षणे । शृणु सर्वं प्रवक्ष्यामि कुम्भसंभव सङ्गरे
57 // hastalāghavavegena na prājñāyata kiñcana / mahārājñīkarāṃbhojavyāpāraṃ śaramokṣaṇe / śṛṇu sarvaṃ pravakṣyāmi kumbhasaṃbhava saṅgare
58 ॥ संधाने त्वेकधा तस्य दशधा चापनिर्गमे । शतधा गगने दैत्यसैन्यप्राप्तौ सहस्रधा । दैत्याङ्गसंगे संप्राप्ताः कोटिसंख्याः शिलीमुखाः
58 // saṃdhāne tvekadhā tasya daśadhā cāpanirgame / śatadhā gagane daityasainyaprāptau sahasradhā / daityāṅgasaṃge saṃprāptāḥ koṭisaṃkhyāḥ śilīmukhāḥ
59 ॥ परान्धकारं सृजती भिन्दती रोदसी शरैः । मर्माभिनत्प्रचण्डस्य महाराज्ञी महेषुभिः
59 // parāndhakāraṃ sṛjatī bhindatī rodasī śaraiḥ / marmābhinatpracaṇḍasya mahārājñī maheṣubhiḥ
60 ॥ वहत्कोपारुणं नेत्रं ततो भण्डः स दानवः । ववष शरजालेन महता ललितेश्वरीम्
60 // vahatkopāruṇaṃ netraṃ tato bhaṇḍaḥ sa dānavaḥ / vavaṣa śarajālena mahatā laliteśvarīm
61 ॥ अन्धतामिस्रकं नाम महास्त्रं प्रमुमोच सः । महातरणिबाणेन तन्नुनोद महेश्वरी
61 // andhatāmisrakaṃ nāma mahāstraṃ pramumoca saḥ / mahātaraṇibāṇena tannunoda maheśvarī
62 ॥ पाखण्डास्त्रं महावीरो भण्डः प्रमुमुचे रणे । गायत्र्यस्त्रं तस्य नुत्यै ससर्ज जगदंबिका
62 // pākhaṇḍāstraṃ mahāvīro bhaṇḍaḥ pramumuce raṇe / gāyatryastraṃ tasya nutyai sasarja jagadaṃbikā
63 ॥ अन्धास्त्रमसृजद्भण्डः शक्तिदृष्टिविनाशनम् । चाक्षुष्मतमहास्त्रेण शमयायास तत्प्रसूः
63 // andhāstramasṛjadbhaṇḍaḥ śaktidṛṣṭivināśanam / cākṣuṣmatamahāstreṇa śamayāyāsa tatprasūḥ
64 ॥ शक्तिनाशाभिधं भण्डो मुमोचास्त्रं महारणे । विश्वावसोरथास्त्रेण तस्य दर्पमपाकरोत्
64 // śaktināśābhidhaṃ bhaṇḍo mumocāstraṃ mahāraṇe / viśvāvasorathāstreṇa tasya darpamapākarot
65 ॥ अन्तकास्त्रं ससर्जोच्चैः संक्रुद्धो भडदानवः । महामृत्युञ्जयास्त्रेण नाशयामास तद्बलम्
65 // antakāstraṃ sasarjoccaiḥ saṃkruddho bhaḍadānavaḥ / mahāmṛtyuñjayāstreṇa nāśayāmāsa tadbalam
66 ॥ सर्वास्त्रस्मृतिनाशाख्यमस्त्रं भण्डो व्यमुञ्चत । धारणास्त्रेण चक्रेशी तद्बलं समनाशयत्
66 // sarvāstrasmṛtināśākhyamastraṃ bhaṇḍo vyamuñcata / dhāraṇāstreṇa cakreśī tadbalaṃ samanāśayat
67 ॥ भयास्त्रमसृजद्भण्डः शक्तीनां भीतिदायकम् । अभयङ्करमैन्द्रास्त्रं मुमुचे जगदंबिका
67 // bhayāstramasṛjadbhaṇḍaḥ śaktīnāṃ bhītidāyakam / abhayaṅkaramaindrāstraṃ mumuce jagadaṃbikā
68 ॥ महारोगास्त्रमसृजच्छक्तिसेनासु दानवः । राजयक्ष्मादयो रोगास्ततो ऽभूवन्सहस्रशः
68 // mahārogāstramasṛjacchaktisenāsu dānavaḥ / rājayakṣmādayo rogāstato 'bhūvansahasraśaḥ
69 ॥ तन्निवारणसिद्ध्यर्थं ललिता परमेश्वरी । नामत्रयमहामन्त्रमहास्त्रं सा मुमोच ह
69 // tannivāraṇasiddhyarthaṃ lalitā parameśvarī / nāmatrayamahāmantramahāstraṃ sā mumoca ha
70 ॥ अच्युतश्चाप्यनन्तश्च गोविन्दस्तु शरोत्थिताः । हुङ्कारमात्रतो दग्ध्वारोगांस्ताननयन्मुदम्
70 // acyutaścāpyanantaśca govindastu śarotthitāḥ / huṅkāramātrato dagdhvārogāṃstānanayanmudam
71 ॥ नत्वा च तां महेशानीं तद्भक्तव्याधिमर्दनम् । विधातुं त्रिषु लोकेषु नियुक्ताः स्वपदं ययुः
71 // natvā ca tāṃ maheśānīṃ tadbhaktavyādhimardanam / vidhātuṃ triṣu lokeṣu niyuktāḥ svapadaṃ yayuḥ
72 ॥ आयुर्नाशनमस्त्रं तु मुक्तवान्भण्डदानवः । कालसंकर्षणीरूपमस्त्रं राज्ञी व्यमुञ्चत
72 // āyurnāśanamastraṃ tu muktavānbhaṇḍadānavaḥ / kālasaṃkarṣaṇīrūpamastraṃ rājñī vyamuñcata
73 ॥ महासुरास्त्रमुद्दामं व्यसृजद्भण्डदानवः । ततः सहस्रशो जाता महाकाया महाबलाः
73 // mahāsurāstramuddāmaṃ vyasṛjadbhaṇḍadānavaḥ / tataḥ sahasraśo jātā mahākāyā mahābalāḥ
74 ॥ मधुश्च कैटभश्चैव महिषासुर एव च । धूम्रलोचनदैत्यश्च चण्डमुण्डादयो ऽसुराः
74 // madhuśca kaiṭabhaścaiva mahiṣāsura eva ca / dhūmralocanadaityaśca caṇḍamuṇḍādayo 'surāḥ
75 ॥ चिक्षुभश्चामरश्चैव रक्तबीजो ऽसुरस्तथा । शुम्भश्चैव निशुम्भश्च कालकेया महाबलाः
75 // cikṣubhaścāmaraścaiva raktabījo 'surastathā / śumbhaścaiva niśumbhaśca kālakeyā mahābalāḥ
76 ॥ धूम्राभिधानाश्च परे तस्मादस्त्रात्समुत्थिताः । ते सर्वे दानवश्रेष्ठाः कठोरैः शस्त्रमण्डलैः
76 // dhūmrābhidhānāśca pare tasmādastrātsamutthitāḥ / te sarve dānavaśreṣṭhāḥ kaṭhoraiḥ śastramaṇḍalaiḥ
77 ॥ शक्तिसेनां मर्दयन्तो नर्द्दन्तश्च भयङ्करम् । हाहेति क्रन्दमानाश्चशक्तयो दैत्यमर्दिताः
77 // śaktisenāṃ mardayanto narddantaśca bhayaṅkaram / hāheti krandamānāścaśaktayo daityamarditāḥ
78 ॥ ललितां शरणं प्राप्ताः पाहि पाहीति सत्वरम् । अथ देवी भृशं क्रुद्धा रुषाट्टहासमातनोत्
78 // lalitāṃ śaraṇaṃ prāptāḥ pāhi pāhīti satvaram / atha devī bhṛśaṃ kruddhā ruṣāṭṭahāsamātanot
79 ॥ ततः समुत्थिता काचिद्दुर्गा नाम यशस्विनी । समस्तदेवतेजोभिर्निर्मिता विश्वरूपिणी
79 // tataḥ samutthitā kāciddurgā nāma yaśasvinī / samastadevatejobhirnirmitā viśvarūpiṇī
80 ॥ शूलं च शूलिना दत्तं चक्रं चक्रिसमर्पितम् । शङ्खं वरुणदत्तश्च शक्तिं दत्तां हविर्भुजा
80 // śūlaṃ ca śūlinā dattaṃ cakraṃ cakrisamarpitam / śaṅkhaṃ varuṇadattaśca śaktiṃ dattāṃ havirbhujā
81 ॥ चापमक्षयतूणीरौ मरुद्दत्तौ महामृधे । वज्रिदत्तं च कुलिशं चषकन्धनदार्पितम्
81 // cāpamakṣayatūṇīrau maruddattau mahāmṛdhe / vajridattaṃ ca kuliśaṃ caṣakandhanadārpitam
82 ॥ कालदण्डं महादण्डं पाशं पाशधरार्पितम् । ब्रह्मदत्तां कुण्डिकां च घण्टामैरावतार्पिताम्
82 // kāladaṇḍaṃ mahādaṇḍaṃ pāśaṃ pāśadharārpitam / brahmadattāṃ kuṇḍikāṃ ca ghaṇṭāmairāvatārpitām
83 ॥ मृत्युदत्तौ खड्गखेटौ हारं जलधिनार्पितम् । विश्वकर्मप्रदत्तानि भूषणानि च बिभ्रती
83 // mṛtyudattau khaḍgakheṭau hāraṃ jaladhinārpitam / viśvakarmapradattāni bhūṣaṇāni ca bibhratī
84 ॥ अङ्गैः सहस्रकिरणश्रेणिभासुररश्मिभिः । आयुधानि समस्तानि दीपयन्ति महोदयैः
84 // aṅgaiḥ sahasrakiraṇaśreṇibhāsuraraśmibhiḥ / āyudhāni samastāni dīpayanti mahodayaiḥ
85 ॥ अन्यदत्तैरथान्यैश्च शोभमाना परिच्छदैः । सिंहवाहनमारुह्य युद्धं नारायणीव्यधात्
85 // anyadattairathānyaiśca śobhamānā paricchadaiḥ / siṃhavāhanamāruhya yuddhaṃ nārāyaṇīvyadhāt
86 ॥ तथा ते महिषप्रख्या दानवा विनिपातिताः । चण्डिकासप्तशत्यां तु यथा कर्म पुराकरोत्
86 // tathā te mahiṣaprakhyā dānavā vinipātitāḥ / caṇḍikāsaptaśatyāṃ tu yathā karma purākarot
87 ॥ तथैव समरञ्चक्रे महिषादिमदापहम् । तत्कृत्वा दुष्करं कर्म ललितां प्रणनाम सा
87 // tathaiva samarañcakre mahiṣādimadāpaham / tatkṛtvā duṣkaraṃ karma lalitāṃ praṇanāma sā
88 ॥ मूकास्त्रमसृद्दुष्टः शक्तिसेनासु दानवः । महावाग्वा दिनी नाम ससर्जास्त्रं जगत्प्रसूः
88 // mūkāstramasṛdduṣṭaḥ śaktisenāsu dānavaḥ / mahāvāgvā dinī nāma sasarjāstraṃ jagatprasūḥ
89 ॥ विद्यारूपस्य वेदस्य तस्करानसुराधमान् । ससर्ज तत्र समरे दुर्मदो भण्डदानवः
89 // vidyārūpasya vedasya taskarānasurādhamān / sasarja tatra samare durmado bhaṇḍadānavaḥ
90 ॥ दक्षहस्ताङ्गुष्ठनखान्महाराज्ञ्या तिरस्कृतः । अर्णवास्त्रं महादीरो भण्डदैत्यो रणे ऽसृजत्
90 // dakṣahastāṅguṣṭhanakhānmahārājñyā tiraskṛtaḥ / arṇavāstraṃ mahādīro bhaṇḍadaityo raṇe 'sṛjat
91 ॥ तत्रोद्दामपयः पूरे शक्तिसैन्यं ममजज च । अथ श्रीललितादक्षहस्ततर्जनिकानखात् । आदिकूर्मः समुत्पन्नो योजनायतविस्तरः
91 // tatroddāmapayaḥ pūre śaktisainyaṃ mamajaja ca / atha śrīlalitādakṣahastatarjanikānakhāt / ādikūrmaḥ samutpanno yojanāyatavistaraḥ
92 ॥ धृतास्तेन महाभोगखर्परेण प्रथीयसा । शक्तयो हर्षमापन्नाः सागरास्त्रभयं जहुः
92 // dhṛtāstena mahābhogakharpareṇa prathīyasā / śaktayo harṣamāpannāḥ sāgarāstrabhayaṃ jahuḥ
93 ॥ तत्सामुद्रं च भगवान्सकलं सलिलं पपौ । हैरण्याक्षं महास्त्रं तु विजहौ दुष्टदानवः
93 // tatsāmudraṃ ca bhagavānsakalaṃ salilaṃ papau / hairaṇyākṣaṃ mahāstraṃ tu vijahau duṣṭadānavaḥ
94 ॥ तस्मात्सहस्रशो जाता हिरण्याक्षा गदायुधाः । तैर्हन्यमाने शक्तीनां सैन्ये सन्त्रा सविह्वले । इतस्ततः प्रचलिते शिथिले रणकर्मणि
94 // tasmātsahasraśo jātā hiraṇyākṣā gadāyudhāḥ / tairhanyamāne śaktīnāṃ sainye santrā savihvale / itastataḥ pracalite śithile raṇakarmaṇi
95 ॥ अथ श्रीललितादक्षहस्तमध्याङ्गुलीनखात् । महावराहः समभूच्छ्वेतः कैलाससंनिभः
95 // atha śrīlalitādakṣahastamadhyāṅgulīnakhāt / mahāvarāhaḥ samabhūcchvetaḥ kailāsasaṃnibhaḥ
96 ॥ तेन वज्रसमानेन पोत्रिणाभिविदारिताः । कोटिशस्ते हिरण्याक्षा मर्द्यमानाः क्षयं गताः
96 // tena vajrasamānena potriṇābhividāritāḥ / koṭiśaste hiraṇyākṣā mardyamānāḥ kṣayaṃ gatāḥ
97 ॥ अथभण्डस्त्वतिक्रोधाद्भुकुटीं विततान ह । तस्य भ्रुकुटितो जाता हिरण्याः कोटिसंख्यकाः
97 // athabhaṇḍastvatikrodhādbhukuṭīṃ vitatāna ha / tasya bhrukuṭito jātā hiraṇyāḥ koṭisaṃkhyakāḥ
98 ॥ ज्वलदादित्यवद्दीप्ता दीपप्रहरणाश्व ते । अमर्दयच्चक्तिसैन्यं प्रह्लादं चाप्यमर्दयन्
98 // jvaladādityavaddīptā dīpapraharaṇāśva te / amardayaccaktisainyaṃ prahlādaṃ cāpyamardayan
99 ॥ यः प्रह्लादो ऽस्ति शक्तीनां परमानन्दलक्षणः । स एव बालकोभूत्वा हिरण्यपरिपीडितः
99 // yaḥ prahlādo 'sti śaktīnāṃ paramānandalakṣaṇaḥ / sa eva bālakobhūtvā hiraṇyaparipīḍitaḥ
100 ॥ ललितां शरणं प्राप्तस्तेन राज्ञी कृपामगात् । अथ शक्त्या नन्दरूपं प्रह्लादं परिरक्षितुम्
100 // lalitāṃ śaraṇaṃ prāptastena rājñī kṛpāmagāt / atha śaktyā nandarūpaṃ prahlādaṃ parirakṣitum
101 ॥ दक्षहस्तानामिकाग्रं धुनोति स्म महेश्वरी । तस्माद् धूतसटाजालः प्रज्वलल्लोचनत्रयः
101 // dakṣahastānāmikāgraṃ dhunoti sma maheśvarī / tasmād dhūtasaṭājālaḥ prajvalallocanatrayaḥ
102 ॥ सिंहास्यः पुरुषा कारः कण्ठस्याधो जनार्दनः । नखायुधः कालरुद्ररूपी घोराट्टहासवान्
102 // siṃhāsyaḥ puruṣā kāraḥ kaṇṭhasyādho janārdanaḥ / nakhāyudhaḥ kālarudrarūpī ghorāṭṭahāsavān
103 ॥ सहस्रसंख्यदोर्दण्डो ललिताज्ञानुपालकः । हिरण्यकशिपून्सर्वान्भण्डभ्रुकुटिसंभवान्
103 // sahasrasaṃkhyadordaṇḍo lalitājñānupālakaḥ / hiraṇyakaśipūnsarvānbhaṇḍabhrukuṭisaṃbhavān
104 ॥ क्षणाद्विदारयामास नखैः कुलिशकर्कशैः । बलीन्द्रास्त्रं महाघोरं सर्वदैवतनाशनम् । अमुञ्चल्ललिता देवी प्रतिभण्डमहासुरम्
104 // kṣaṇādvidārayāmāsa nakhaiḥ kuliśakarkaśaiḥ / balīndrāstraṃ mahāghoraṃ sarvadaivatanāśanam / amuñcallalitā devī pratibhaṇḍamahāsuram
105 ॥ तदस्त्रदर्पनाशाय वामनाः शतशो ऽभवन् । महाराज्ञीदक्षहस्तकनिष्ठाग्रान्महौजसः
105 // tadastradarpanāśāya vāmanāḥ śataśo 'bhavan / mahārājñīdakṣahastakaniṣṭhāgrānmahaujasaḥ
106 ॥ क्षणेक्षणे वर्धमानाः पाशहस्ता महाबलाः । बलीन्द्रानस्त्रसंभूतान्बध्नन्तः पाशबन्धनैः
106 // kṣaṇekṣaṇe vardhamānāḥ pāśahastā mahābalāḥ / balīndrānastrasaṃbhūtānbadhnantaḥ pāśabandhanaiḥ
107 ॥ दक्षहस्तकनिष्ठाग्राज्जाताः कामेशयोषितः । महाकाया महोत्साहास्तदस्त्रं समनाशयन्
107 // dakṣahastakaniṣṭhāgrājjātāḥ kāmeśayoṣitaḥ / mahākāyā mahotsāhāstadastraṃ samanāśayan
108 ॥ हैहयास्त्रं समसृजद्भण्डदैत्यो रणाजिरे । तस्मात्सहस्रशोजाताः सहस्रार्जुनकोटयः
108 // haihayāstraṃ samasṛjadbhaṇḍadaityo raṇājire / tasmātsahasraśojātāḥ sahasrārjunakoṭayaḥ
109 ॥ अथ श्रीललितावामहस्ताङ्गुष्टनखादितः । प्रज्वलन्भार्गवो रामः सक्रोधः सिंहनादवान्
109 // atha śrīlalitāvāmahastāṅguṣṭanakhāditaḥ / prajvalanbhārgavo rāmaḥ sakrodhaḥ siṃhanādavān
110 ॥ धारया दारयन्नेतान्कुठारस्य कठोरया । सहस्रार्जुनसंख्यातान्क्षणादेव व्यनाशयन्
110 // dhārayā dārayannetānkuṭhārasya kaṭhorayā / sahasrārjunasaṃkhyātānkṣaṇādeva vyanāśayan
111 ॥ अथ क्रुद्धो भण्डदैत्यः क्रोधाद्धुङ्कारमातनोत् । तस्माद्धुङ्कारतो जातश्चन्द्रहासकृपाणवान्
111 // atha kruddho bhaṇḍadaityaḥ krodhāddhuṅkāramātanot / tasmāddhuṅkārato jātaścandrahāsakṛpāṇavān
112 ॥ सहस्राक्षौहिणीरक्षःसेनया परिवारितः । कनिष्ठं कुंभकर्णं च मेघनादं च नन्दनम् । गृहीत्वा शक्तिसैन्यं तदतिदूरममर्दयत्
112 // sahasrākṣauhiṇīrakṣaḥsenayā parivāritaḥ / kaniṣṭhaṃ kuṃbhakarṇaṃ ca meghanādaṃ ca nandanam / gṛhītvā śaktisainyaṃ tadatidūramamardayat
113 ॥ अथ श्रीललितावामहस्ततर्जनिकानखात् । कोदण्डरामः समभूल्लक्ष्मणेन समन्वितः
113 // atha śrīlalitāvāmahastatarjanikānakhāt / kodaṇḍarāmaḥ samabhūllakṣmaṇena samanvitaḥ
114 ॥ जटामुकुटवान्वल्लीबन्ध्धतूणीरपृष्टभूः । नीलोत्पलदलश्यामो धनुर्विस्फारयन्मुहुः
114 // jaṭāmukuṭavānvallībandhdhatūṇīrapṛṣṭabhūḥ / nīlotpaladalaśyāmo dhanurvisphārayanmuhuḥ
115 ॥ नाशयामास दिव्यास्त्रैः क्षणाद्राक्षससैनिकम् । मर्दयामास पौलस्त्यं कुंभकर्णं च सोदरम् । लक्ष्मणो मेघनादं च महावीरमनाशयत्
115 // nāśayāmāsa divyāstraiḥ kṣaṇādrākṣasasainikam / mardayāmāsa paulastyaṃ kuṃbhakarṇaṃ ca sodaram / lakṣmaṇo meghanādaṃ ca mahāvīramanāśayat
116 ॥ द्विविदास्त्रं महाभीममसृजद्भण्डदानवः । तस्मादनेकशो जाताः कपयः पिङ्गलोचनाः
116 // dvividāstraṃ mahābhīmamasṛjadbhaṇḍadānavaḥ / tasmādanekaśo jātāḥ kapayaḥ piṅgalocanāḥ
117 ॥ क्रोधेनात्यन्तता म्रास्याः प्रत्येकं हनुमत्समाः । व्यनाशयच्छक्तिसैन्यं क्रूरक्रेङ्कारकारिणः
117 // krodhenātyantatā mrāsyāḥ pratyekaṃ hanumatsamāḥ / vyanāśayacchaktisainyaṃ krūrakreṅkārakāriṇaḥ
118 ॥ अथ श्रीललितावामहस्तमध्याङ्गुलीनखात् । आविर्बभूव तालाङ्कः क्रोधमध्यारुणेक्षणः
118 // atha śrīlalitāvāmahastamadhyāṅgulīnakhāt / āvirbabhūva tālāṅkaḥ krodhamadhyāruṇekṣaṇaḥ
119 ॥ नीलांबरपिनद्धाङ्गः कैलासाचलनिर्मलः । द्विविदास्त्रसमुद्भूतान्कपीन्सर्न्वान्व्यनाशयन्
119 // nīlāṃbarapinaddhāṅgaḥ kailāsācalanirmalaḥ / dvividāstrasamudbhūtānkapīnsarnvānvyanāśayan
120 ॥ राजासुरं नाम महत्ससर्जास्त्रं महाबलः । तस्मादस्त्रात्समुद्भूता बहवो नृपदानवाः
120 // rājāsuraṃ nāma mahatsasarjāstraṃ mahābalaḥ / tasmādastrātsamudbhūtā bahavo nṛpadānavāḥ
121 ॥ शिशुपालो दन्तवक्त्रः शाल्वः काशीपतिस्तथा । पैण्ड्रको वासुदेवश्च रुक्मी डिंभकहंसकौ
121 // śiśupālo dantavaktraḥ śālvaḥ kāśīpatistathā / paiṇḍrako vāsudevaśca rukmī ḍiṃbhakahaṃsakau
122 ॥ शंबरश्च प्रलंबश्च तथा बाणासुरो ऽपि च । कंसश्चाणूरमल्लश्च मुष्टिकोत्पलशेखरौ
122 // śaṃbaraśca pralaṃbaśca tathā bāṇāsuro 'pi ca / kaṃsaścāṇūramallaśca muṣṭikotpalaśekharau
123 ॥ अरिष्टो धेनुकः केशी कालियो यमलार्जुनौ । पूतना शकटश्चैव तृणावर्तादयो ऽसुराः
123 // ariṣṭo dhenukaḥ keśī kāliyo yamalārjunau / pūtanā śakaṭaścaiva tṛṇāvartādayo 'surāḥ
124 ॥ नरकाख्यो महावीरो विष्णुरूपी मुरासुरः । अनेके सह सेनाभिरुत्थिताः शस्त्रपाणयः
124 // narakākhyo mahāvīro viṣṇurūpī murāsuraḥ / aneke saha senābhirutthitāḥ śastrapāṇayaḥ
125 ॥ तान्विनाशयितुंसर्वान्वासुदेवः सनातनः । श्रीदेवीवामहस्ताब्जानामिकानखसंभवः
125 // tānvināśayituṃsarvānvāsudevaḥ sanātanaḥ / śrīdevīvāmahastābjānāmikānakhasaṃbhavaḥ
126 ॥ चतुर्व्यूहं समातेने चत्वारस्ते ततो ऽभवन् । वासुदेवो द्वितीयस्तु संकर्षण इति स्मृतः
126 // caturvyūhaṃ samātene catvāraste tato 'bhavan / vāsudevo dvitīyastu saṃkarṣaṇa iti smṛtaḥ
127 ॥ प्रद्युम्नश्चानिरुद्धश्च ते सर्वे प्रीद्यतायुधाः । तानशेषान्दुराचारान्भूमभोरप्रवर्तकान्
127 // pradyumnaścāniruddhaśca te sarve prīdyatāyudhāḥ / tānaśeṣāndurācārānbhūmabhorapravartakān
128 ॥ नाशयामासुरुर्वीशवेषच्छन्नान्महासुरान्
128 // nāśayāmāsururvīśaveṣacchannānmahāsurān
129 ॥ अथ तेषु विनष्टेषु संक्रुद्धो भण्ड्रदानवः । धर्मविप्लावकं घोरं कल्यस्त्रं सममुञ्चत
129 // atha teṣu vinaṣṭeṣu saṃkruddho bhaṇḍradānavaḥ / dharmaviplāvakaṃ ghoraṃ kalyastraṃ samamuñcata
130 ॥ ततः कल्यस्त्रतोजाता आन्ध्राः पुण्डाश्च भूमिपाः । किराताः शबरा हूणा यवनाः पापवृत्तयः
130 // tataḥ kalyastratojātā āndhrāḥ puṇḍāśca bhūmipāḥ / kirātāḥ śabarā hūṇā yavanāḥ pāpavṛttayaḥ
131 ॥ वेद विप्लावका धर्मद्रोहिणः प्राणहिंसकाः । वर्णाश्रमेषु सांकर्यकारिणो मलिनाङ्गकाः । ललिताशक्तिसैन्यानि भूयोभूयो व्यमर्दयन्
131 // veda viplāvakā dharmadrohiṇaḥ prāṇahiṃsakāḥ / varṇāśrameṣu sāṃkaryakāriṇo malināṅgakāḥ / lalitāśaktisainyāni bhūyobhūyo vyamardayan
132 ॥ अथ श्रीललितावामहस्तपद्मस्य भास्वतः । कनिष्ठिकानखोद्भूतः कल्किर्नाम जनार्दनः
132 // atha śrīlalitāvāmahastapadmasya bhāsvataḥ / kaniṣṭhikānakhodbhūtaḥ kalkirnāma janārdanaḥ
133 ॥ अश्वारूढः प्रतीप्त श्रीरट्टहासं चकार सः । तस्यैव ध्वनिना सर्वे वज्रनिष्पेषबन्धुना
133 // aśvārūḍhaḥ pratīpta śrīraṭṭahāsaṃ cakāra saḥ / tasyaiva dhvaninā sarve vajraniṣpeṣabandhunā
134 ॥ किराता मूर्च्छिता नेशुः शक्तयश्चापि हर्षिताः । दशावतारनाथास्ते कृत्वेदं कर्म दुष्करम्
134 // kirātā mūrcchitā neśuḥ śaktayaścāpi harṣitāḥ / daśāvatāranāthāste kṛtvedaṃ karma duṣkaram
135 ॥ ललितां तां नमस्कृत्य बद्धाञ्जलिपुटाः स्थिताः । प्रतिकल्पं धर्मरक्षां कर्तुं मत्स्या दिजन्मभिः । ललितांबानियुक्तास्ते वैकुण्ठाय प्रतस्थिरे
135 // lalitāṃ tāṃ namaskṛtya baddhāñjalipuṭāḥ sthitāḥ / pratikalpaṃ dharmarakṣāṃ kartuṃ matsyā dijanmabhiḥ / lalitāṃbāniyuktāste vaikuṇṭhāya pratasthire
136 ॥ इत्थं समस्तेष्वस्त्रंषु नाशितेषु दुराशयः । महामोहास्त्रमसृजच्छक्तयस्तेन मूर्छिताः
136 // itthaṃ samasteṣvastraṃṣu nāśiteṣu durāśayaḥ / mahāmohāstramasṛjacchaktayastena mūrchitāḥ
137 ॥ शांभवास्त्रं विसृज्यांबा महामोहास्त्रमक्षिणोत् । अस्त्रप्रत्यस्त्रधाराभिरित्थं जाते महाहवे । अस्तशैलङ्गभस्तीशो गन्तुमारभतारुणः
137 // śāṃbhavāstraṃ visṛjyāṃbā mahāmohāstramakṣiṇot / astrapratyastradhārābhiritthaṃ jāte mahāhave / astaśailaṅgabhastīśo gantumārabhatāruṇaḥ
138 ॥ अथ नारायणास्त्रेण सा देवी ललितांबिका । सर्वा अक्षौहिणीस्तस्य भस्मसादकरोद्रणे
138 // atha nārāyaṇāstreṇa sā devī lalitāṃbikā / sarvā akṣauhiṇīstasya bhasmasādakarodraṇe
139 ॥ अथ पाशुपतास्त्रेण दीप्तकालानलत्विषा । चत्वारिंशच्चमूनाथान्महाराज्ञी व्यमर्दयत्
139 // atha pāśupatāstreṇa dīptakālānalatviṣā / catvāriṃśaccamūnāthānmahārājñī vyamardayat
140 ॥ अथैकशेषं तं दुष्टं निहताशेषबान्धवम् । क्रोधेन प्रज्वलन्तं च जगद्विप्लवकारिणम्
140 // athaikaśeṣaṃ taṃ duṣṭaṃ nihatāśeṣabāndhavam / krodhena prajvalantaṃ ca jagadviplavakāriṇam
141 ॥ महासुरं महासत्त्वं भण्डं चण्डपराक्रमम् । महाकामेश्वरास्त्रेण सहस्रादित्यवर्चसा । गतासुमकरोन्माता ललिता परमेश्वरी
141 // mahāsuraṃ mahāsattvaṃ bhaṇḍaṃ caṇḍaparākramam / mahākāmeśvarāstreṇa sahasrādityavarcasā / gatāsumakaronmātā lalitā parameśvarī
142 ॥ तदस्त्रज्वालयाक्रान्तं शून्यकं तस्य पट्टनम् । सस्त्रीकं च सबालं च सगोष्ठं धनधान्यकम्
142 // tadastrajvālayākrāntaṃ śūnyakaṃ tasya paṭṭanam / sastrīkaṃ ca sabālaṃ ca sagoṣṭhaṃ dhanadhānyakam
143 ॥ निर्दग्धमासीत्सहसा स्थलमात्रमशिष्यत । भण्डस्य संक्षयेणासीत्त्रैलोक्यं हर्षनर्तितम्
143 // nirdagdhamāsītsahasā sthalamātramaśiṣyata / bhaṇḍasya saṃkṣayeṇāsīttrailokyaṃ harṣanartitam
144 ॥ इत्थं विधाय सुरकार्यमनिन्द्यशीला श्रीचक्रराजरथमण्डलमण्डनश्रीः । कामेश्वरी त्रिजगतां जननी बभासे विद्योतमानविभवा विज्यश्रियाढ्या
144 // itthaṃ vidhāya surakāryamanindyaśīlā śrīcakrarājarathamaṇḍalamaṇḍanaśrīḥ / kāmeśvarī trijagatāṃ jananī babhāse vidyotamānavibhavā vijyaśriyāḍhyā
145 ॥ सैन्यं समस्तमपि सङ्गरकर्मखिन्नं भण्डासुरप्रबलबाणकृशानुतप्तम् । अस्तं गते सवितरि प्रथितप्रभावा श्रीदेवता शिबिरमात्मन आनिनाय
145 // sainyaṃ samastamapi saṅgarakarmakhinnaṃ bhaṇḍāsuraprabalabāṇakṛśānutaptam / astaṃ gate savitari prathitaprabhāvā śrīdevatā śibiramātmana ānināya
146 ॥ यो भण्डदानववधं ललितांबयेमं कॢप्तं सकृत्पठति तस्य तपोधनेन्द्र । नाशं प्रयान्ति कदनानि दृताष्टसिद्धेर्भुक्तिश्च मुक्तिरपि वर्तत एव हस्ते
146 // yo bhaṇḍadānavavadhaṃ lalitāṃbayemaṃ kḷptaṃ sakṛtpaṭhati tasya tapodhanendra / nāśaṃ prayānti kadanāni dṛtāṣṭasiddherbhuktiśca muktirapi vartata eva haste
147 ॥ इमं पवित्रं ललितापराक्रमं समस्तपापघ्नमशेषसिद्धिदम् । पठन्ति पुण्येषु दिनेषु ये नरा भजन्ति ते भाग्यसमृद्धिमुत्तमाम्
147 // imaṃ pavitraṃ lalitāparākramaṃ samastapāpaghnamaśeṣasiddhidam / paṭhanti puṇyeṣu dineṣu ye narā bhajanti te bhāgyasamṛddhimuttamām