57 ॥ इति श्रीब्रह्माण्डे महापुराणे वायुप्रोक्ते मध्यमाभागे तृतीय उपोद्धातपादे गङ्गानयनं नाम षट्पञ्चशत्तमो ऽध्यायः जैमिनिरुवाच ततः शुष्कसुमित्राद्या मुनयः शंसितव्रताः । ययुर्दिदृक्षवो रामं महेन्द्रमचलं प्रति
57 // iti śrībrahmāṇḍe mahāpurāṇe vāyuprokte madhyamābhāge tṛtīya upoddhātapāde gaṅgānayanaṃ nāma ṣaṭpañcaśattamo 'dhyāyaḥ jaiminiruvāca tataḥ śuṣkasumitrādyā munayaḥ śaṃsitavratāḥ / yayurdidṛkṣavo rāmaṃ mahendramacalaṃ prati
1 ॥ अतीत्य सुबहून्देशान्वनानि सरितस्तथा । आसेदुरचलश्रेष्ठं क्रमेण मुनिपुङ्गवाः
1 // atītya subahūndeśānvanāni saritastathā / āseduracalaśreṣṭhaṃ krameṇa munipuṅgavāḥ
2 ॥ तमारुह्य शनैस्तस्यख्यातमाश्रममण्डलम् । प्रशान्तक्रूरसत्त्वाढ्यं शुभं मध्ये तपोवनम्
2 // tamāruhya śanaistasyakhyātamāśramamaṇḍalam / praśāntakrūrasattvāḍhyaṃ śubhaṃ madhye tapovanam
3 ॥ सर्वर्त्तुफलपुष्पाढ्यतरुखण्डमनोहरम् । स्निग्धच्छायमनौपम्यं स्वामोदिसुखमारुतम्
3 // sarvarttuphalapuṣpāḍhyatarukhaṇḍamanoharam / snigdhacchāyamanaupamyaṃ svāmodisukhamārutam
4 ॥ तं तदाश्रममासाद्य ब्रह्मघोषेण नादितम् । विविशुर्त्दृष्टमनसो यथावृद्धपुरस्सरम्
4 // taṃ tadāśramamāsādya brahmaghoṣeṇa nāditam / viviśurtdṛṣṭamanaso yathāvṛddhapurassaram
5 ॥ ब्रह्मासने सुखासीनं मृदुकृष्णाजिनोत्तरे । शिष्यैः परिवृतं शान्तं ददृशुस्ते तपोधनाः
5 // brahmāsane sukhāsīnaṃ mṛdukṛṣṇājinottare / śiṣyaiḥ parivṛtaṃ śāntaṃ dadṛśuste tapodhanāḥ
6 ॥ कालाग्निमिव लोकांस्त्रीन्दग्ध्वा पूर्वं निजेच्छया । तद्दोषशान्त्यै तपसि प्रवृत्तमिव् देहिनम्
6 // kālāgnimiva lokāṃstrīndagdhvā pūrvaṃ nijecchayā / taddoṣaśāntyai tapasi pravṛttamiv dehinam
7 ॥ ते समेत्य भृगुश्रेष्ठं विनयाचारशालिनः । ववन्दिरे महामौनं भक्तिप्रणतकन्धराः
7 // te sametya bhṛguśreṣṭhaṃ vinayācāraśālinaḥ / vavandire mahāmaunaṃ bhaktipraṇatakandharāḥ
8 ॥ ततस्तानागतान्दृष्ट्वा मुनीन्भृगुकुलोद्वहः । अर्घपाद्यादिभिः सम्यक्पूजयामास सादरम्
8 // tatastānāgatāndṛṣṭvā munīnbhṛgukulodvahaḥ / arghapādyādibhiḥ samyakpūjayāmāsa sādaram
9 ॥ तानासीनान्कृतातिथ्यानृषीन्देशान्तरागतान् । उवाच भृगुशार्दूलः स्मितपूर्वमिदं वचः
9 // tānāsīnānkṛtātithyānṛṣīndeśāntarāgatān / uvāca bhṛguśārdūlaḥ smitapūrvamidaṃ vacaḥ
10 ॥ स्वागतं वो महाभागा यूयं सर्वे समागताः । करणीयं किमस्माभिर्वदध्वमविचारितम्
10 // svāgataṃ vo mahābhāgā yūyaṃ sarve samāgatāḥ / karaṇīyaṃ kimasmābhirvadadhvamavicāritam
11 ॥ ततस्ते मुनयो रामं प्रणम्येदमथाब्रुवन् । अवेह्यस्मान्मुनिश्रेष्ठ गोकर्णनिलयान्मुनीन्
11 // tataste munayo rāmaṃ praṇamyedamathābruvan / avehyasmānmuniśreṣṭha gokarṇanilayānmunīn
12 ॥ खनद्भिः सागरैर्भूमिं कस्मिंश्चित्कारणान्तरे । सतीर्थं तन्महाक्षेत्रं पतितं सागरांभसि
12 // khanadbhiḥ sāgarairbhūmiṃ kasmiṃścitkāraṇāntare / satīrthaṃ tanmahākṣetraṃ patitaṃ sāgarāṃbhasi
13 ॥ उत्सारितार्मवजलं क्षेत्रं तत्सर्वपावनम् । उपलब्धुमभीप्सामो भवतस्तु न संशयः
13 // utsāritārmavajalaṃ kṣetraṃ tatsarvapāvanam / upalabdhumabhīpsāmo bhavatastu na saṃśayaḥ
14 ॥ विष्णोरंशेन संजातो भवान्भृगुकुले किल । तस्मात्कर्तुमशक्यं ते त्रैलोक्ये ऽपि न किञ्चन
14 // viṣṇoraṃśena saṃjāto bhavānbhṛgukule kila / tasmātkartumaśakyaṃ te trailokye 'pi na kiñcana
15 ॥ वाञ्छितार्थप्रदो लोके त्वमेवेत्यनुशुश्रुम । वयं त्वामागताः सर्वे रामैतदभियाचितुम्
15 // vāñchitārthaprado loke tvamevetyanuśuśruma / vayaṃ tvāmāgatāḥ sarve rāmaitadabhiyācitum
16 ॥ स त्वमात्मप्रभावेण क्षेत्रप्रवरमद्य तत् । दातुमर्हसि विप्रेन्द्र समुत्सार्यार्मवोदकम्
16 // sa tvamātmaprabhāveṇa kṣetrapravaramadya tat / dātumarhasi viprendra samutsāryārmavodakam
17 ॥ राम उवाच एतत्सर्वमशेषण विदितं मे तपोधनाः । करणीयं च वः कृत्यं मया नात्र विचारणा
17 // rāma uvāca etatsarvamaśeṣaṇa viditaṃ me tapodhanāḥ / karaṇīyaṃ ca vaḥ kṛtyaṃ mayā nātra vicāraṇā
18 ॥ किं तु युष्मदभिप्रेतं कर्म लोके सुदारुणम् । शस्त्रसंग्रहणाच्छक्यं मयापि न तदन्यथा
18 // kiṃ tu yuṣmadabhipretaṃ karma loke sudāruṇam / śastrasaṃgrahaṇācchakyaṃ mayāpi na tadanyathā
19 ॥ दत्तसर्वाभयो ऽहं वै न्यस्तशस्त्रः शमान्वितः । तपः समास्थितश्चर्तु प्रागेव पितृ शासनात्
19 // dattasarvābhayo 'haṃ vai nyastaśastraḥ śamānvitaḥ / tapaḥ samāsthitaścartu prāgeva pitṛ śāsanāt
20 ॥ न जातु शस्त्रग्रहणं करिष्यामीत्यहं पुरा । प्रतिश्रुत्य सतां मध्ये तपः कर्त्तुमिहानघाः
20 // na jātu śastragrahaṇaṃ kariṣyāmītyahaṃ purā / pratiśrutya satāṃ madhye tapaḥ karttumihānaghāḥ
21 ॥ शस्त्रग्रहणसाध्यत्वाद्युष्मदीप्सितवस्तुनः । किङ्कर्त्तव्यं मयात्रेति मम डोलायते मनः
21 // śastragrahaṇasādhyatvādyuṣmadīpsitavastunaḥ / kiṅkarttavyaṃ mayātreti mama ḍolāyate manaḥ
22 ॥ शुष्क उपाच । सतां संरक्षणार्थाय शस्त्रसंग्रहणं तु यत् । तन्नच्यावयते सत्यद्यथोक्तं ब्रह्मणा पुरा
22 // śuṣka upāca / satāṃ saṃrakṣaṇārthāya śastrasaṃgrahaṇaṃ tu yat / tannacyāvayate satyadyathoktaṃ brahmaṇā purā
23 ॥ तस्मादस्मद्धितार्थाय भवता ग्राह्यमायुधम् । धर्म एव महांस्तेन चरितस्ते भविष्यति
23 // tasmādasmaddhitārthāya bhavatā grāhyamāyudham / dharma eva mahāṃstena caritaste bhaviṣyati
24 ॥ जैमिनिरुवाच एवं संप्रार्थ्यमानस्तु मुनिभिर्भृगुपुङ्गवः । तमनुद्रुत्य मेधावी धर्ममुद्दिश्य केवलम्
24 // jaiminiruvāca evaṃ saṃprārthyamānastu munibhirbhṛgupuṅgavaḥ / tamanudrutya medhāvī dharmamuddiśya kevalam
25 ॥ स तैः सह मुनिश्रेष्ठो दिशं दक्षिणपश्चिमाम् । समुद्दिश्य चचौ राजन्द्रष्टुकामः सरित्पतिम्
25 // sa taiḥ saha muniśreṣṭho diśaṃ dakṣiṇapaścimām / samuddiśya cacau rājandraṣṭukāmaḥ saritpatim
26 ॥ स सह्यमचलश्रेष्ठमवतीर्य भृगूद्वहः । तत्परं सरितां पत्युस्तीरं प्राप महामनाः
26 // sa sahyamacalaśreṣṭhamavatīrya bhṛgūdvahaḥ / tatparaṃ saritāṃ patyustīraṃ prāpa mahāmanāḥ
27 ॥ स ददर्श महाभागः परितो मारुताकुलम् । आकरं सर्वरत्नानां पूर्यमाणमनारतम्
27 // sa dadarśa mahābhāgaḥ parito mārutākulam / ākaraṃ sarvaratnānāṃ pūryamāṇamanāratam
28 ॥ अपरिज्ञेयगांभीर्यं महातामिव मानसम् । दुष्पारपारं सर्वस्य विविधग्रहसंहतिम्
28 // aparijñeyagāṃbhīryaṃ mahātāmiva mānasam / duṣpārapāraṃ sarvasya vividhagrahasaṃhatim
29 ॥ अप्रधृष्य तमं लोके धातारमिव केवलम् । आत्मानमिव चात्मत्वे न्यक्कृताखिलमुद्धतम्
29 // apradhṛṣya tamaṃ loke dhātāramiva kevalam / ātmānamiva cātmatve nyakkṛtākhilamuddhatam
30 ॥ आश्रयं सर्वसत्त्वानामापगानां च पार्थिवः । अत्यर्थचपलोत्तुगतरङ्गशतमालिनम्
30 // āśrayaṃ sarvasattvānāmāpagānāṃ ca pārthivaḥ / atyarthacapalottugataraṅgaśatamālinam
31 ॥ उपान्तोपलसंघातकुहरान्तरसंश्रयात् । विशीर्यमाणलहरीशतफेनौघसोभितम्
31 // upāntopalasaṃghātakuharāntarasaṃśrayāt / viśīryamāṇalaharīśataphenaughasobhitam
32 ॥ गंभीरघोषं जलधिं पश्यन्मुनिगणैः सह । संसेव्यमानस्तरलैर्लहरीकणशीतलैः
32 // gaṃbhīraghoṣaṃ jaladhiṃ paśyanmunigaṇaiḥ saha / saṃsevyamānastaralairlaharīkaṇaśītalaiḥ
33 ॥ मुहूर्त्तमिव राजेन्द्र तीरेनदनदीपतेः । विशश्रमे महाबाहुर्द्रष्टुकामः प्रचेतसम्
33 // muhūrttamiva rājendra tīrenadanadīpateḥ / viśaśrame mahābāhurdraṣṭukāmaḥ pracetasam
34 ॥ ततो रामः समुत्थाय दक्षिणाभिमुखः स्थितः । मेघगंभिरया वाचा वरुणं वाक्यमब्रवीत्
34 // tato rāmaḥ samutthāya dakṣiṇābhimukhaḥ sthitaḥ / meghagaṃbhirayā vācā varuṇaṃ vākyamabravīt
35 ॥ अहं मुनिगणैः सार्द्धमागतस्त्वद्दिदृक्षया । तस्मात्स्वरूपधृङ्मह्यं प्रचेतो देहि दर्शनम्
35 // ahaṃ munigaṇaiḥ sārddhamāgatastvaddidṛkṣayā / tasmātsvarūpadhṛṅmahyaṃ praceto dehi darśanam
36 ॥ इति श्रुत्वापि तद्वाक्यं वरुणो यादसां पतिः । न चचाल निजस्थानान्नृप धीरतरस्त्वयम्
36 // iti śrutvāpi tadvākyaṃ varuṇo yādasāṃ patiḥ / na cacāla nijasthānānnṛpa dhīratarastvayam
37 ॥ पुनः पुनश्च रामेण समाहूतो ऽपि तोयराट् । न ददौ दर्शनं तस्मै प्रतिवाच्यं च नाभ्यधात्
37 // punaḥ punaśca rāmeṇa samāhūto 'pi toyarāṭ / na dadau darśanaṃ tasmai prativācyaṃ ca nābhyadhāt
38 ॥ अलङ्घनीयं तद्वाक्यं वरुणेनावधीरितम् । अत्यन्तमिति कार्यार्थी विदुषा समुपेक्षितम्
38 // alaṅghanīyaṃ tadvākyaṃ varuṇenāvadhīritam / atyantamiti kāryārthī viduṣā samupekṣitam
39 ॥ ततः प्रचेतसा वाक्यं मन्यमानो ऽवधीरितम् । चुकोप तमभिप्रेक्ष्य रामः शस्त्रभृतां वरः
39 // tataḥ pracetasā vākyaṃ manyamāno 'vadhīritam / cukopa tamabhiprekṣya rāmaḥ śastrabhṛtāṃ varaḥ
40 ॥ संक्षुब्धसागराकारः स तदा स्वबलाश्रयात् । निस्तोयमर्णवं कर्तुमियेष रुषितो भृशम्
40 // saṃkṣubdhasāgarākāraḥ sa tadā svabalāśrayāt / nistoyamarṇavaṃ kartumiyeṣa ruṣito bhṛśam
41 ॥ ततो जलमुपस्पृश्य समीपे विजयं धनुः । ततः प्रणम्य मनसा शर्वं रामो महाद्धनुः
41 // tato jalamupaspṛśya samīpe vijayaṃ dhanuḥ / tataḥ praṇamya manasā śarvaṃ rāmo mahāddhanuḥ
42 ॥ गृहीत्वारोपयामास क्रोधसंरक्तलोचनः । अभिमृश्य धनुःश्रेष्ठं सगुणं भृगुसत्तमः
42 // gṛhītvāropayāmāsa krodhasaṃraktalocanaḥ / abhimṛśya dhanuḥśreṣṭhaṃ saguṇaṃ bhṛgusattamaḥ
43 ॥ पश्यतां सर्वभूतानां ज्याघोषमकरोत्तदा । ज्याघोषः शुश्रुवे तस्य दिविस्पृगतिनिष्ठुरः
43 // paśyatāṃ sarvabhūtānāṃ jyāghoṣamakarottadā / jyāghoṣaḥ śuśruve tasya divispṛgatiniṣṭhuraḥ
44 ॥ चचाल निखिलायेन सप्तद्वीपार्मवा मही । ततः सरभसं रामश्चापे कालानलोपमम्
44 // cacāla nikhilāyena saptadvīpārmavā mahī / tataḥ sarabhasaṃ rāmaścāpe kālānalopamam
45 ॥ सुवर्मपुङ्खं विशिखं संदधे शरसत्तमम् । तस्मिन्नस्त्रं महाघोरं भार्गवं वह्निदैवतम्
45 // suvarmapuṅkhaṃ viśikhaṃ saṃdadhe śarasattamam / tasminnastraṃ mahāghoraṃ bhārgavaṃ vahnidaivatam
46 ॥ युयोज भृगुशार्दूलः समन्त्राभ्यासमोक्षणम् । ततश्चचाल वसुधा सशैलवनकानना
46 // yuyoja bhṛguśārdūlaḥ samantrābhyāsamokṣaṇam / tataścacāla vasudhā saśailavanakānanā
47 ॥ प्रक्षोभं परमं जग्मुर्देवासुरमहोरगाः । संधितास्त्रं भृगुश्रेष्ठं क्रोधसंरक्तलोचनम्
47 // prakṣobhaṃ paramaṃ jagmurdevāsuramahoragāḥ / saṃdhitāstraṃ bhṛguśreṣṭhaṃ krodhasaṃraktalocanam
48 ॥ दृष्ट्वा संभ्रान्तमनसो बभूवुः सचराचराः । सदिग्दाहभ्रपटलैरभवन्संवृता दिशः
48 // dṛṣṭvā saṃbhrāntamanaso babhūvuḥ sacarācarāḥ / sadigdāhabhrapaṭalairabhavansaṃvṛtā diśaḥ
49 ॥ ववुश्च परुषा वाता रजोव्याप्ता महारवाः । मन्दरश्मिरशीतांशुरभूतसंरक्तमण्डलः
49 // vavuśca paruṣā vātā rajovyāptā mahāravāḥ / mandaraśmiraśītāṃśurabhūtasaṃraktamaṇḍalaḥ
50 ॥ सोल्कापाताशनिर्वृष्टिर्बभूव रुधिरोदका । किमेतदिति संभ्रान्ता धूमोद्गारातिभीषणम्
50 // solkāpātāśanirvṛṣṭirbabhūva rudhirodakā / kimetaditi saṃbhrāntā dhūmodgārātibhīṣaṇam
51 ॥ अधिरोपितदिव्यास्त्रं प्रचकर्ष महाशरम् । धनुर्विकर्षमाणं तं स्फुरज्ज्वालाग्रसायकम्
51 // adhiropitadivyāstraṃ pracakarṣa mahāśaram / dhanurvikarṣamāṇaṃ taṃ sphurajjvālāgrasāyakam
52 ॥ ददृशुर्मुनयो रामं कल्पान्तानलसन्निभम् । आकर्णाकृष्टकोदण्डमण्डलाभ्यं तरस्थितम्
52 // dadṛśurmunayo rāmaṃ kalpāntānalasannibham / ākarṇākṛṣṭakodaṇḍamaṇḍalābhyaṃ tarasthitam
53 ॥ तस्य प्रतिभयाकारं दुष्प्रापमभवद्वपुः । विकृष्टधनुषस्तस्य रूपमुग्रं रवेरिव
53 // tasya pratibhayākāraṃ duṣprāpamabhavadvapuḥ / vikṛṣṭadhanuṣastasya rūpamugraṃ raveriva
54 ॥ कल्पान्ते ऽभ्युदितस्येव मण्डलं परिवेषितम् । कल्पान्ताग्नसमज्वालाभीषणं स्फुरतो वपुः
54 // kalpānte 'bhyuditasyeva maṇḍalaṃ pariveṣitam / kalpāntāgnasamajvālābhīṣaṇaṃ sphurato vapuḥ
55 ॥ तस्यालक्ष्यत चक्रम्य हरेरिव च मण्डलम् । स्फुरत्क्रोधानलज्वालापरीतस्यातिरौद्रताम्
55 // tasyālakṣyata cakramya hareriva ca maṇḍalam / sphuratkrodhānalajvālāparītasyātiraudratām
56 ॥ अवाप विष्णोः स तदा नरसिंहाकृतेरिव । वपुर्विकृष्टचापस्य भृकुटीकुटिलाननम्
56 // avāpa viṣṇoḥ sa tadā narasiṃhākṛteriva / vapurvikṛṣṭacāpasya bhṛkuṭīkuṭilānanam
57 ॥ रामस्याभूद्भवस्येव दिधक्षोस्त्रिपुरं पुरा । जाज्वल्यमानवपुषं तं दृष्ट्वा सहसा भयात्
57 // rāmasyābhūdbhavasyeva didhakṣostripuraṃ purā / jājvalyamānavapuṣaṃ taṃ dṛṣṭvā sahasā bhayāt
58 ॥ प्रसीद जय रामेति तुष्टुवुर्मुनयो ऽखिलाः । ततो ऽस्त्राग्निस्फुरद्धूमपटलैः शकलीकृतम्
58 // prasīda jaya rāmeti tuṣṭuvurmunayo 'khilāḥ / tato 'strāgnisphuraddhūmapaṭalaiḥ śakalīkṛtam
59 ॥ बभूव च्छन्नमंभोधेरन्तः पुरमशैषतः । ज्वलदस्त्रानलज्वालाप रितापपराहतः
59 // babhūva cchannamaṃbhodherantaḥ puramaśaiṣataḥ / jvaladastrānalajvālāpa ritāpaparāhataḥ
60 ॥ अत्यरिच्यत संभ्रान्तसलिलौघ उदन्वतः । तिमिङ्गिलतिमिग्राहनक्रमत्स्याहिकच्छपाः
60 // atyaricyata saṃbhrāntasalilaugha udanvataḥ / timiṅgilatimigrāhanakramatsyāhikacchapāḥ
61 ॥ प्रजग्मुः परमामार्त्तिं प्राणिनः सलिलेशयाः । उत्पतन्निपतत्ताम्यन्नानासत्त्वोद्धतोर्मिभिः
61 // prajagmuḥ paramāmārttiṃ prāṇinaḥ salileśayāḥ / utpatannipatattāmyannānāsattvoddhatormibhiḥ
62 ॥ प्रक्षोभं भृशमंभोधिः सहसा समुपागमत् । त्रासरासं च विपुलमंभसा प्लवता सह
62 // prakṣobhaṃ bhṛśamaṃbhodhiḥ sahasā samupāgamat / trāsarāsaṃ ca vipulamaṃbhasā plavatā saha
63 ॥ उद्वेलतामितस्तप्ताः सलिलान्तरचारिणः । ततस्तस्माच्छराज्ज्वालाः फूत्कृताशेष भीषणाः
63 // udvelatāmitastaptāḥ salilāntaracāriṇaḥ / tatastasmāccharājjvālāḥ phūtkṛtāśeṣa bhīṣaṇāḥ
64 ॥ निरूपितमिव व्यक्तं निश्चेरुः सर्वतो दिशम् । ततः प्रचण्डपवनैः सर्वतः परिवर्त्तितम्
64 // nirūpitamiva vyaktaṃ niśceruḥ sarvato diśam / tataḥ pracaṇḍapavanaiḥ sarvataḥ parivarttitam
65 ॥ अग्निज्वालामयं रक्तवितानाभमलक्ष्यत । प्रलयाब्धेरिवात्यर्थमस्त्राग्निव्याकुलांभसः
65 // agnijvālāmayaṃ raktavitānābhamalakṣyata / pralayābdherivātyarthamastrāgnivyākulāṃbhasaḥ
66 ॥ समुद्रिक्ततया तस्य तरङ्गास्तीरमभ्ययुः । अस्त्राग्निविद्धाकुलितजलघोषेण भूयसा
66 // samudriktatayā tasya taraṅgāstīramabhyayuḥ / astrāgnividdhākulitajalaghoṣeṇa bhūyasā
67 ॥ ककुभो बधिरीकुवन्नलक्ष्यत पयोनिधिः । परितो ऽस्त्रानलज्वालापरिवीतजलाविलः
67 // kakubho badhirīkuvannalakṣyata payonidhiḥ / parito 'strānalajvālāparivītajalāvilaḥ
68 ॥ जगाम परमामार्त्तिं सह्यः सद्यस्तदाश्रयः । आकर्णाकृष्टकोदण्डं दृष्ट्वा रामं पयोनिधिः
68 // jagāma paramāmārttiṃ sahyaḥ sadyastadāśrayaḥ / ākarṇākṛṣṭakodaṇḍaṃ dṛṣṭvā rāmaṃ payonidhiḥ
69 ॥ विषादमगमत्तीव्रं यमं दृष्ट्वेव पातकी । भयकंपितसर्वाङ्गस्ततो नदनदीपतिः
69 // viṣādamagamattīvraṃ yamaṃ dṛṣṭveva pātakī / bhayakaṃpitasarvāṅgastato nadanadīpatiḥ
70 ॥ विहाय सहजं धैर्यं भीरुत्वं समुपागमत् । ततः स्वरूपमास्थाय सर्वाभरणभूषितः
70 // vihāya sahajaṃ dhairyaṃ bhīrutvaṃ samupāgamat / tataḥ svarūpamāsthāya sarvābharaṇabhūṣitaḥ
71 ॥ उत्तीर्यमाणः स्वजलं वरुणः प्रत्यदृश्यत । कृताञ्जलिः सार्वहस्तः प्रचेता भार्गवान्तिकम्
71 // uttīryamāṇaḥ svajalaṃ varuṇaḥ pratyadṛśyata / kṛtāñjaliḥ sārvahastaḥ pracetā bhārgavāntikam
72 ॥ त्वरयाभ्यायायौ शीघ्रसायकाद्भीतभीतवत् । अभ्येत्याकृष्टधनुषः स तस्य चरणाब्जयोः
72 // tvarayābhyāyāyau śīghrasāyakādbhītabhītavat / abhyetyākṛṣṭadhanuṣaḥ sa tasya caraṇābjayoḥ
73 ॥ अब्रवीच्च भृशं भीतः संभ्रमाकुलिताक्षरम् । रक्ष मां भृगुशार्दूल कृपया शरणागतम्
73 // abravīcca bhṛśaṃ bhītaḥ saṃbhramākulitākṣaram / rakṣa māṃ bhṛguśārdūla kṛpayā śaraṇāgatam
74 ॥ अपराधमिमं राम मया कृतमजानता । स्थितो ऽस्मि तव निर्देशेशाधि किं करवाणि वै
74 // aparādhamimaṃ rāma mayā kṛtamajānatā / sthito 'smi tava nirdeśeśādhi kiṃ karavāṇi vai