53 ॥ इति श्रीब्रह्माण्डे महापुराणे वायुप्रोक्ते मध्यभागे तृतीय उपोद्धातपादे भार्गवचरिते एकोनचत्वारिंशत्तमो ऽध्यायः ॥ 39॥ वसिष्ठ उवाच सुचन्द्रे पतिते राजन् राजेन्द्राणां शिरोमणौ । तत्पुत्रः पुष्कराक्षस्तु रामं योद्धुमथागतः
53 // iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde bhārgavacarite ekonacatvāriṃśattamo 'dhyāyaḥ // 39// vasiṣṭha uvāca sucandre patite rājan rājendrāṇāṃ śiromaṇau / tatputraḥ puṣkarākṣastu rāmaṃ yoddhumathāgataḥ
1 ॥ स रथस्थो महावीर्यः सर्वशस्त्रास्त्रकोविदः । अभिवीक्ष्य रणेत्युग्रं रामं कालातकोपमम्
1 // sa rathastho mahāvīryaḥ sarvaśastrāstrakovidaḥ / abhivīkṣya raṇetyugraṃ rāmaṃ kālātakopamam
2 ॥ चकार शरजालं च भार्गवेन्द्रस्य सर्वतः । मुहूर्त्तं जामदग्न्यो ऽपि बाणैः संझदितो ऽभवत्
2 // cakāra śarajālaṃ ca bhārgavendrasya sarvataḥ / muhūrttaṃ jāmadagnyo 'pi bāṇaiḥ saṃjhadito 'bhavat
3 ॥ ततो निष्कम्य सहसा भार्गवेन्द्रो महाबलः । शरबन्धान्महाराज समुदैक्षत सर्वतः
3 // tato niṣkamya sahasā bhārgavendro mahābalaḥ / śarabandhānmahārāja samudaikṣata sarvataḥ
4 ॥ दृष्ट्वा तं पुष्काराक्षं तु सुचन्द्रतनयं तदा । क्रोधमाहारयामास दिधक्षन्निव पावकः
4 // dṛṣṭvā taṃ puṣkārākṣaṃ tu sucandratanayaṃ tadā / krodhamāhārayāmāsa didhakṣanniva pāvakaḥ
5 ॥ स क्रोधेन समाविष्टो वारुणं समवासृजत् । ततो मेघाः समुत्पन्ना गर्जन्तो भैरवान्नवान्
5 // sa krodhena samāviṣṭo vāruṇaṃ samavāsṛjat / tato meghāḥ samutpannā garjanto bhairavānnavān
6 ॥ ववृषुर्जलधाराभिः प्लावयन्तो धरां नृप । पुष्कराक्षो महावीर्यो वायव्यास्त्रुमवासृजत्
6 // vavṛṣurjaladhārābhiḥ plāvayanto dharāṃ nṛpa / puṣkarākṣo mahāvīryo vāyavyāstrumavāsṛjat
7 ॥ तेन ते ऽदर्शनं नीताः सद्य एव बलाहकाः । अथ रामो भृशं क्रुद्धो ब्राह्मं तत्राभिसंदधे
7 // tena te 'darśanaṃ nītāḥ sadya eva balāhakāḥ / atha rāmo bhṛśaṃ kruddho brāhmaṃ tatrābhisaṃdadhe
8 ॥ पुष्कराक्षो ऽपि तेनैव विचकर्ष महाबलः । ब्राह्म सो ऽप्याहितं दृष्ट्वा दण्डाहत इवारगः
8 // puṣkarākṣo 'pi tenaiva vicakarṣa mahābalaḥ / brāhma so 'pyāhitaṃ dṛṣṭvā daṇḍāhata ivāragaḥ
9 ॥ घोरं परशुमादाय निःश्वसंस्तमधावत । रामस्याधावतस्तत्र पुष्कराक्षो धनुर्धरः
9 // ghoraṃ paraśumādāya niḥśvasaṃstamadhāvata / rāmasyādhāvatastatra puṣkarākṣo dhanurdharaḥ
10 ॥ संदधे पञ्चविशिखान्दीप्तास्यानुरगानिव । एकैकेन च बाणेन हृदि शीर्षे भुजद्वये
10 // saṃdadhe pañcaviśikhāndīptāsyānuragāniva / ekaikena ca bāṇena hṛdi śīrṣe bhujadvaye
11 ॥ शिखायां च क्रमाद्भित्त्वा तस्तंभ भृश मातुरम् । स चैवं पीडीतो रामः पुष्कराक्षेण संयुगे
11 // śikhāyāṃ ca kramādbhittvā tastaṃbha bhṛśa māturam / sa caivaṃ pīḍīto rāmaḥ puṣkarākṣeṇa saṃyuge
12 ॥ क्षणं स्थित्वा भृशं धावन्परशुं मूर्ध्न्यपतयात् । शिखामारभ्य पादान्तं पुथ्कराक्षं द्विधाकरोत्
12 // kṣaṇaṃ sthitvā bhṛśaṃ dhāvanparaśuṃ mūrdhnyapatayāt / śikhāmārabhya pādāntaṃ puthkarākṣaṃ dvidhākarot
13 ॥ पतिते शकले भूमौ तत्कालं पश्यता नृणाम् । आश्चर्यं सुमाहज्जातं दिवि चैव दिवौ कसाम्
13 // patite śakale bhūmau tatkālaṃ paśyatā nṛṇām / āścaryaṃ sumāhajjātaṃ divi caiva divau kasām
14 ॥ विदार्य रामस्तं क्रोधात्पुष्कराक्ष महाबलम् । तत्सैन्यमदहत्क्रुद्धः पावको विपिनं यथा
14 // vidārya rāmastaṃ krodhātpuṣkarākṣa mahābalam / tatsainyamadahatkruddhaḥ pāvako vipinaṃ yathā
15 ॥ यतो यतो धावति भार्गवेन्द्रो मनो ऽनिलौजाः प्रहरन्परश्वधम् । ततस्ततो वाजिरथेभमानवा निकृत्तगात्राः शतशो निपेतुः
15 // yato yato dhāvati bhārgavendro mano 'nilaujāḥ praharanparaśvadham / tatastato vājirathebhamānavā nikṛttagātrāḥ śataśo nipetuḥ
16 ॥ रामेण तत्रा तिबलेन संगरे निहन्यमानास्तु परश्वधेन । हा तात मातस्त्विति जल्पमांना भस्मीबभूवुः सुविचूर्णितास्तदा
16 // rāmeṇa tatrā tibalena saṃgare nihanyamānāstu paraśvadhena / hā tāta mātastviti jalpamāṃnā bhasmībabhūvuḥ suvicūrṇitāstadā
17 ॥ मुहूर्त्तमात्रेण च भार्गवेण तत्पुष्कराक्षस्य बलं समग्रम् । अनेकराजन्यकुलं हतेश्वरं इतं नवाक्षौहिणिकं भृशातुरम्
17 // muhūrttamātreṇa ca bhārgaveṇa tatpuṣkarākṣasya balaṃ samagram / anekarājanyakulaṃ hateśvaraṃ itaṃ navākṣauhiṇikaṃ bhṛśāturam
18 ॥ पतिते पुष्कराक्षे तु कार्त्तवीर्यार्जुनः स्वयम् । आजगाम महावीर्यः सुवर्णरथमास्थितः
18 // patite puṣkarākṣe tu kārttavīryārjunaḥ svayam / ājagāma mahāvīryaḥ suvarṇarathamāsthitaḥ
19 ॥ नानाशस्त्रसमाकीर्णं नानारत्नपरिच्छदम् । दशनल्वप्रमाणं च शतवाजियुतं नृपः
19 // nānāśastrasamākīrṇaṃ nānāratnaparicchadam / daśanalvapramāṇaṃ ca śatavājiyutaṃ nṛpaḥ
20 ॥ युते बाहुसहस्रेण नानायुधधरेण च । बभौ स्वर्लोकमारोक्ष्यन्देहति सुकृती यथा
20 // yute bāhusahasreṇa nānāyudhadhareṇa ca / babhau svarlokamārokṣyandehati sukṛtī yathā
21 ॥ पुत्रास्तस्य महावीर्याः शतं युद्धविशारदाः । सेनाः संव्यूह्य संतस्थुः संग्रामे पितुराज्ञया
21 // putrāstasya mahāvīryāḥ śataṃ yuddhaviśāradāḥ / senāḥ saṃvyūhya saṃtasthuḥ saṃgrāme piturājñayā
22 ॥ कार्त्तवीर्यस्तु बलवान्रामं दृष्ट्वा रणाजिरे । कालान्तकयमप्रख्यं योद्धुं समुपचक्रमे
22 // kārttavīryastu balavānrāmaṃ dṛṣṭvā raṇājire / kālāntakayamaprakhyaṃ yoddhuṃ samupacakrame
23 ॥ दक्षे पञ्चशतं बाणान्वामे पञ्चशतं धनुः । जग्रा ह भार्गवेन्द्रस्य समरे जेतुमुद्यतः
23 // dakṣe pañcaśataṃ bāṇānvāme pañcaśataṃ dhanuḥ / jagrā ha bhārgavendrasya samare jetumudyataḥ
24 ॥ बाणवर्षं चकाराथ रामस्योपरि भूपते । यथा बलाहको वीर पर्वतोपरि वर्षति
24 // bāṇavarṣaṃ cakārātha rāmasyopari bhūpate / yathā balāhako vīra parvatopari varṣati
25 ॥ बाणवर्षेण नेनाजौ सत्कृतो भृगुनन्दनः । जग्राह स्वघनुर्दिव्यं बाणवर्षं तथाकरोत्
25 // bāṇavarṣeṇa nenājau satkṛto bhṛgunandanaḥ / jagrāha svaghanurdivyaṃ bāṇavarṣaṃ tathākarot
26 ॥ तावुभौरणसंदृप्तौ तदा भार्गवहैहयौ । चक्रतुर्यद्धमतुलं तुमुलं लोमहर्षणम्
26 // tāvubhauraṇasaṃdṛptau tadā bhārgavahaihayau / cakraturyaddhamatulaṃ tumulaṃ lomaharṣaṇam
27 ॥ ब्रह्मास्त्रं च सभूपालः संदधे रणमूर्द्धनि । वधाय भार्गवेन्द्रस्य सर्वशस्त्रास्त्रधृगबली
27 // brahmāstraṃ ca sabhūpālaḥ saṃdadhe raṇamūrddhani / vadhāya bhārgavendrasya sarvaśastrāstradhṛgabalī
28 ॥ रामो ऽपि वार्युपस्पृश्य ब्रह्मं ब्राह्मय संदधे । ततो व्योम्नि सदा सक्ते द्वे चाप्य स्त्रे नराधिप
28 // rāmo 'pi vāryupaspṛśya brahmaṃ brāhmaya saṃdadhe / tato vyomni sadā sakte dve cāpya stre narādhipa
29 ॥ ववृधाते जगत्प्रान्ते तेजसा ज्वलनार्कवत् । त्रयो लोकाः सपाताला दृष्ट्वा तन्महदद्भुतम्
29 // vavṛdhāte jagatprānte tejasā jvalanārkavat / trayo lokāḥ sapātālā dṛṣṭvā tanmahadadbhutam
30 ॥ ज्वलदस्त्रयुगं तप्ता मेनिरे ऽस्योपसंयमम् । रामस्तदा वीक्ष्य जगत्प्रणाशं जगन्निवासोक्तमथास्मरत्तदा
30 // jvaladastrayugaṃ taptā menire 'syopasaṃyamam / rāmastadā vīkṣya jagatpraṇāśaṃ jagannivāsoktamathāsmarattadā
31 ॥ रक्षा विधेयाद्य मयास्य संयमो निवारणीयः परमांशधारिणा । इति व्यवस्य प्रभुरुग्रतेजा नेत्रद्वयेनाथ तदस्त्रयुगमम्
31 // rakṣā vidheyādya mayāsya saṃyamo nivāraṇīyaḥ paramāṃśadhāriṇā / iti vyavasya prabhurugratejā netradvayenātha tadastrayugamam
32 ॥ पीत्वातिरामं जगदाकलय्य तस्थौ क्षणं ध्यानगतो महात्मा । ध्यानप्रभावेण ततस्तु तस्य ब्रह्मास्त्रयुग्मं विगतप्रभावम्
32 // pītvātirāmaṃ jagadākalayya tasthau kṣaṇaṃ dhyānagato mahātmā / dhyānaprabhāveṇa tatastu tasya brahmāstrayugmaṃ vigataprabhāvam
33 ॥ पपात भूमौ सहसाथ तत्क्षणं सर्वं जगत्स्वास्थ्यमुपाजगाम । स जामदग्न्यो महातां महीयान्स्रष्टुं तथा पालयितुं निहन्तुम्
33 // papāta bhūmau sahasātha tatkṣaṇaṃ sarvaṃ jagatsvāsthyamupājagāma / sa jāmadagnyo mahātāṃ mahīyānsraṣṭuṃ tathā pālayituṃ nihantum
34 ॥ विभुस्तथापीह निजंप्रभावं गोपायितुं लोकविधिं चकार । धनुर्द्धरः शूरतमो महस्वान्सदग्रणीः संसदि तथ्यवक्ता
34 // vibhustathāpīha nijaṃprabhāvaṃ gopāyituṃ lokavidhiṃ cakāra / dhanurddharaḥ śūratamo mahasvānsadagraṇīḥ saṃsadi tathyavaktā
35 ॥ कलाकलापेषु कृतप्रयत्नो विद्यासु शास्त्रेषु बुधो विधिज्ञः । एवं नृलोके प्रथयन्स्वभावं सर्वाणि कल्यानि करोति नित्यम्
35 // kalākalāpeṣu kṛtaprayatno vidyāsu śāstreṣu budho vidhijñaḥ / evaṃ nṛloke prathayansvabhāvaṃ sarvāṇi kalyāni karoti nityam
36 ॥ सर्वे तु लोका विजितास्तु तेन रामेण राजन्यनिषूदनेन । एवं स रामः प्रथितप्रभावः प्रशामयित्वा तु तदस्त्रयुग्मम्
36 // sarve tu lokā vijitāstu tena rāmeṇa rājanyaniṣūdanena / evaṃ sa rāmaḥ prathitaprabhāvaḥ praśāmayitvā tu tadastrayugmam
37 ॥ पुनः प्रवृत्तो निधनं प्रकर्तुं रणागणे हैहयवंशकेतोः । तुणीरतः पत्रियुगं गृहीत्वा पुङ्खे निधायाथ धनुर्ज्यकायाम्
37 // punaḥ pravṛtto nidhanaṃ prakartuṃ raṇāgaṇe haihayavaṃśaketoḥ / tuṇīrataḥ patriyugaṃ gṛhītvā puṅkhe nidhāyātha dhanurjyakāyām
38 ॥ आलक्ष्य लक्ष्यं नृपकर्णयुग्मं चकर्त्त चूडामणिहर्तुकामः । स कृत्तकर्णो नृपतिर्महात्मा विनिर्जिताशेषजगत्प्रवीरः
38 // ālakṣya lakṣyaṃ nṛpakarṇayugmaṃ cakartta cūḍāmaṇihartukāmaḥ / sa kṛttakarṇo nṛpatirmahātmā vinirjitāśeṣajagatpravīraḥ
39 ॥ मेने निजं वीर्यमिह प्रणष्टं रामेण भूमीशतिरस्कृतात्मा । क्षणं धराधीशतनुर्विवर्णा गतानुभावा नृपतेर्बभूव
39 // mene nijaṃ vīryamiha praṇaṣṭaṃ rāmeṇa bhūmīśatiraskṛtātmā / kṣaṇaṃ dharādhīśatanurvivarṇā gatānubhāvā nṛpaterbabhūva
40 ॥ लेख्येव सच्चित्रकरप्रयुक्ता सुदीनचित्तस्य विलक्ष्यते ऽग । ततः स राजा निजवीर्यवैभवं समस्तलोकाधिकतां प्रयातम्
40 // lekhyeva saccitrakaraprayuktā sudīnacittasya vilakṣyate 'ga / tataḥ sa rājā nijavīryavaibhavaṃ samastalokādhikatāṃ prayātam
41 ॥ विचिन्त्य पौलस्त्यजयादिलब्धं शोचन्निवासीत्स जयाभिकाङ्क्षीं । दध्यौ पुनर्मीलितलोचनो नृपौ दत्तं तमात्रेयकुलप्रदीपम्
41 // vicintya paulastyajayādilabdhaṃ śocannivāsītsa jayābhikāṅkṣīṃ / dadhyau punarmīlitalocano nṛpau dattaṃ tamātreyakulapradīpam
42 ॥ यस्य प्रभावानुगृहीत ओजसा तिरश्चकारा खिललोकपालकान् । यदास्य हृद्येष महानुभावो दत्तः प्रयातो न हि दर्शनं तदा
42 // yasya prabhāvānugṛhīta ojasā tiraścakārā khilalokapālakān / yadāsya hṛdyeṣa mahānubhāvo dattaḥ prayāto na hi darśanaṃ tadā
43 ॥ खिन्नो ऽतिमात्रं धरणीपतिस्तदा पुनः पुनर्ध्यानपथं जगाम । स ध्यायमानो ऽपि न चाजगाम दत्तो मनोगोचरमस्य राजन्
43 // khinno 'timātraṃ dharaṇīpatistadā punaḥ punardhyānapathaṃ jagāma / sa dhyāyamāno 'pi na cājagāma datto manogocaramasya rājan
44 ॥ तपस्विनो दान्ततमस्य साधोरनागसो दुष्कृतिकारिणो विभुः । एवं यदात्रेस्तनयो महात्मा दृष्टो न च ध्यानपथे नृपेण
44 // tapasvino dāntatamasya sādhoranāgaso duṣkṛtikāriṇo vibhuḥ / evaṃ yadātrestanayo mahātmā dṛṣṭo na ca dhyānapathe nṛpeṇa
45 ॥ तदातिदुः खेन विदूयमानः शोकेन मोहेन युतो बभूव । तं शोकमग्नं नृपतिं महात्मा रामो जगादाखिलचित्तदर्शी
45 // tadātiduḥ khena vidūyamānaḥ śokena mohena yuto babhūva / taṃ śokamagnaṃ nṛpatiṃ mahātmā rāmo jagādākhilacittadarśī
46 ॥ मा शोकभावं नृपते प्रयाहि नैवानुशोचन्ति महानुभावाः । यस्ते वरायाभवमादिसर्गे स एव चाहं तंव सादनाय
46 // mā śokabhāvaṃ nṛpate prayāhi naivānuśocanti mahānubhāvāḥ / yaste varāyābhavamādisarge sa eva cāhaṃ taṃva sādanāya
47 ॥ समागतस्त्वं भवधीरचित्तः संग्रामकाले न विषादचर्चा । सर्वो हि लोकः स्वकृतं भुनक्ति शुभाशुभं दैवकृतं विपाके
47 // samāgatastvaṃ bhavadhīracittaḥ saṃgrāmakāle na viṣādacarcā / sarvo hi lokaḥ svakṛtaṃ bhunakti śubhāśubhaṃ daivakṛtaṃ vipāke
48 ॥ अन्योनको ऽप्यस्य शुभाशुभस्य विपर्ययं कर्तुमलं नरेश । यत्ते सुपुण्यं बहुजन्मसंचितं तेनेह दत्तस्य वरार्हपात्रम्
48 // anyonako 'pyasya śubhāśubhasya viparyayaṃ kartumalaṃ nareśa / yatte supuṇyaṃ bahujanmasaṃcitaṃ teneha dattasya varārhapātram
49 ॥ जातो भवानद्य तु दुष्कृतस्य फलं प्रभुङ्क्ष्व त्वमिहार्जितस्य । गुरुर्विमत्यापकृतस्त्वया मे यतस्ततः कर्णनिकृन्तनं ते
49 // jāto bhavānadya tu duṣkṛtasya phalaṃ prabhuṅkṣva tvamihārjitasya / gururvimatyāpakṛtastvayā me yatastataḥ karṇanikṛntanaṃ te
50 ॥ कृतं मया पश्य हरन्तमोजसा चूडामणिं मामपत्दृत्य ते यशः । इत्येवमुक्त्वा स भृगुर्महात्मा नियोज्य बाणं च विकृष्य चापम्
50 // kṛtaṃ mayā paśya harantamojasā cūḍāmaṇiṃ māmapatdṛtya te yaśaḥ / ityevamuktvā sa bhṛgurmahātmā niyojya bāṇaṃ ca vikṛṣya cāpam
51 ॥ चिक्षेप राज्ञः स तु लाघवेन च्छित्त्वा मणिं रामममुपाजगाम । तद्वीक्ष्य कर्मास्य मुनेः सुतस्य स चार्जुनो हैहयवंशधर्त्ता
51 // cikṣepa rājñaḥ sa tu lāghavena cchittvā maṇiṃ rāmamamupājagāma / tadvīkṣya karmāsya muneḥ sutasya sa cārjuno haihayavaṃśadharttā
52 ॥ समुद्यतो ऽभूत्पुनरप्युदायुधस्तं हन्तुमाजौ द्विजमात्मशत्रुम् । शूलशक्तिगदाचक्रखढ्गपट्टिशतोमरैः
52 // samudyato 'bhūtpunarapyudāyudhastaṃ hantumājau dvijamātmaśatrum / śūlaśaktigadācakrakhaḍhgapaṭṭiśatomaraiḥ
53 ॥ नानाप्रहरणैश्चान्यैराजघान द्विजात्मजम् । स रामो लाघवेनैव संप्रक्षिप्तान्यनेन च
53 // nānāpraharaṇaiścānyairājaghāna dvijātmajam / sa rāmo lāghavenaiva saṃprakṣiptānyanena ca
54 ॥ शूलादीनि चकर्त्ताशु मध्य एव निजाशुगैः । स राजा वार्युपस्पृश्य ससर्जाग्नेयमुत्तमम्
54 // śūlādīni cakarttāśu madhya eva nijāśugaiḥ / sa rājā vāryupaspṛśya sasarjāgneyamuttamam
55 ॥ अस्त्रं रामो वारुणेन शमयामास सत्वरम् । गान्धर्वं विदधे राजा वायव्येनाहनद्विभुम्
55 // astraṃ rāmo vāruṇena śamayāmāsa satvaram / gāndharvaṃ vidadhe rājā vāyavyenāhanadvibhum
56 ॥ नागास्त्रं गारुडेनापि रामश्चिच्छेद भूपते । दत्तेन दत्तं यच्छूलमव्यर्थं मन्त्रपूर्वकम्
56 // nāgāstraṃ gāruḍenāpi rāmaściccheda bhūpate / dattena dattaṃ yacchūlamavyarthaṃ mantrapūrvakam
57 ॥ जग्राह समरे राजा भार्गवस्य वधाय च । तच्छूलं शतसूर्याभमनिवार्यं सुरासुरैः
57 // jagrāha samare rājā bhārgavasya vadhāya ca / tacchūlaṃ śatasūryābhamanivāryaṃ surāsuraiḥ
58 ॥ चिक्षेप राममुद्दिश्य समग्रेण बलेन सः । मूर्ध्नि तद्भार्गवस्याथ निपपात महीपते
58 // cikṣepa rāmamuddiśya samagreṇa balena saḥ / mūrdhni tadbhārgavasyātha nipapāta mahīpate
59 ॥ तेन शूलप्रहारेण व्यथितो भार्गवस्तदा । मूर्च्छामवाप राजेन्द्र पपात च हरिं स्मरन्
59 // tena śūlaprahāreṇa vyathito bhārgavastadā / mūrcchāmavāpa rājendra papāta ca hariṃ smaran
60 ॥ पतिते भार्गवे तत्र सर्वे देवा भयाकुलाः । समाजग्मुः पुरस्कृत्य ब्रह्मविष्णुमहेश्वरान्
60 // patite bhārgave tatra sarve devā bhayākulāḥ / samājagmuḥ puraskṛtya brahmaviṣṇumaheśvarān
61 ॥ शङ्करस्तु महाज्ञानी साक्षान्मृत्युञ्जयः प्रभुः । भार्गवं जीवयामास संजीवन्या स विद्यया
61 // śaṅkarastu mahājñānī sākṣānmṛtyuñjayaḥ prabhuḥ / bhārgavaṃ jīvayāmāsa saṃjīvanyā sa vidyayā
62 ॥ रामस्तु चेतनां प्राप्य ददर्श पुरतः सुरान् । प्रणनाम च राजेन्द्र भक्त्या ब्रह्मादिकांस्तु तान्
62 // rāmastu cetanāṃ prāpya dadarśa purataḥ surān / praṇanāma ca rājendra bhaktyā brahmādikāṃstu tān
63 ॥ ते स्तुता भार्गवेन्द्रेण सद्यो ऽदर्शनमागताः । स रामो वार्युस्पृश्य जजाप कवचं तु तत्
63 // te stutā bhārgavendreṇa sadyo 'darśanamāgatāḥ / sa rāmo vāryuspṛśya jajāpa kavacaṃ tu tat
64 ॥ उत्थितश्च सुसंरब्धो निर्दहन्निव चक्षुषा । स्मृत्वा पाशुपतं चास्त्रं शिवदत्तं स भार्गवः
64 // utthitaśca susaṃrabdho nirdahanniva cakṣuṣā / smṛtvā pāśupataṃ cāstraṃ śivadattaṃ sa bhārgavaḥ
65 ॥ सद्यः संहृतवांस्तत्तु कार्त्तवीर्यं महाबलम् । स राजा दत्तभक्तस्तु विष्णोश्चक्रं सुदर्शनम् । प्रविष्टो भस्मसाज्जातं शरीरं बाहुनन्दन
65 // sadyaḥ saṃhṛtavāṃstattu kārttavīryaṃ mahābalam / sa rājā dattabhaktastu viṣṇoścakraṃ sudarśanam / praviṣṭo bhasmasājjātaṃ śarīraṃ bāhunandana