24 ॥ इति श्रीब्रह्माण्डे महापुराणे वायुप्रोक्ते मध्यमभागे तृतीय उपोद्धातपादेर्ऽजुनोपाख्याने एकोनत्रिंशत्तमो ऽध्यायः ॥ 29॥ वासिष्ठ उवाच श्रुस्वैतत्सकलं राजा जमदग्निवधादिकम् । उद्विग्नचेताः सुभृशं चिन्तयामास नैकधा
24 // iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāder'junopākhyāne ekonatriṃśattamo 'dhyāyaḥ // 29// vāsiṣṭha uvāca śrusvaitatsakalaṃ rājā jamadagnivadhādikam / udvignacetāḥ subhṛśaṃ cintayāmāsa naikadhā
1 ॥ अहो मे सुनृसंसस्य लोकयोरुभयोरपि । ब्रह्मस्वहरणे वाञ्छा तद्धत्या चातिगर्हिता
1 // aho me sunṛsaṃsasya lokayorubhayorapi / brahmasvaharaṇe vāñchā taddhatyā cātigarhitā
2 ॥ अहो नाश्रौषमस्याहं ब्राह्मणस्य विजानतः । वचनं तर्हि तां जह्यां विमूढात्मा गतत्रपः
2 // aho nāśrauṣamasyāhaṃ brāhmaṇasya vijānataḥ / vacanaṃ tarhi tāṃ jahyāṃ vimūḍhātmā gatatrapaḥ
3 ॥ इति संचितयन्नंव हृदयेन विदूयता । स्वपुरं प्रतिचक्राम सबलः सानुगस्ततः
3 // iti saṃcitayannaṃva hṛdayena vidūyatā / svapuraṃ praticakrāma sabalaḥ sānugastataḥ
4 ॥ पुरीं प्रतिगते राज्ञि तस्मिन्सपरिवारके । आश्रमात्सहसा राजन्विनिश्चक्राम रेणुका
4 // purīṃ pratigate rājñi tasminsaparivārake / āśramātsahasā rājanviniścakrāma reṇukā
5 ॥ अथ सक्षतसर्वाङ्गं रुधिरेण परिप्लुतम् । निश्चेष्टं परितं भूमौ ददर्श पतिमात्मनः
5 // atha sakṣatasarvāṅgaṃ rudhireṇa pariplutam / niśceṣṭaṃ paritaṃ bhūmau dadarśa patimātmanaḥ
6 ॥ ततः सा विहतं मत्वा भर्त्तारं गतचेतनम् । अन्वाहतेवाशनिना मूर्छितान्यपतद्भुवि
6 // tataḥ sā vihataṃ matvā bharttāraṃ gatacetanam / anvāhatevāśaninā mūrchitānyapatadbhuvi
7 ॥ चिरादिव पुनर्भूमेरुत्थायातीव दुःखिता । पतित्वोत्थाय सा भूयः सुस्वरं प्ररुरोद ह
7 // cirādiva punarbhūmerutthāyātīva duḥkhitā / patitvotthāya sā bhūyaḥ susvaraṃ praruroda ha
8 ॥ विललाप च सात्यर्थं धरणीधूलिधूसरा । अश्रुपूर्ममुखी दीना पतिता शोकसागरे
8 // vilalāpa ca sātyarthaṃ dharaṇīdhūlidhūsarā / aśrupūrmamukhī dīnā patitā śokasāgare
9 ॥ हा नाथ पिय धर्मज्ञ दाक्षिण्यामृतसागर । हा धिगत्यन्तशान्त त्वं नैव काङ्क्षेत चेदृशम्
9 // hā nātha piya dharmajña dākṣiṇyāmṛtasāgara / hā dhigatyantaśānta tvaṃ naiva kāṅkṣeta cedṛśam
10 ॥ आश्रमादभिनिष्क्रान्तः सहसा व्यसानर्णवे । क्षिप्त्वानाथामगाधे मां क्व च यातो ऽसि मानद
10 // āśramādabhiniṣkrāntaḥ sahasā vyasānarṇave / kṣiptvānāthāmagādhe māṃ kva ca yāto 'si mānada
11 ॥ सतां साप्तपदे मैत्रे मुषिताहं त्वया सह । यासि यत्र त्वमेकाकी तत्र मां नेतुमर्हसि
11 // satāṃ sāptapade maitre muṣitāhaṃ tvayā saha / yāsi yatra tvamekākī tatra māṃ netumarhasi
12 ॥ दृष्ट्वा त्वामीदृशावस्थमचिराद्धृदयं मम । न दीर्यते महाभाग कठिनाः खलु योषितः
12 // dṛṣṭvā tvāmīdṛśāvasthamacirāddhṛdayaṃ mama / na dīryate mahābhāga kaṭhināḥ khalu yoṣitaḥ
13 ॥ इत्येवं विलपन्ती सा रुदती च मुहुर्मुहुः । चुक्रोश रामरामेति भृशं दुःखपरिप्लुता
13 // ityevaṃ vilapantī sā rudatī ca muhurmuhuḥ / cukrośa rāmarāmeti bhṛśaṃ duḥkhapariplutā
14 ॥ तावद्रामो ऽपि स वनात्समिद्भारसमन्वितः । अकृतव्रणसंयुक्तः स्वाश्रमाय न्यवर्त्तत
14 // tāvadrāmo 'pi sa vanātsamidbhārasamanvitaḥ / akṛtavraṇasaṃyuktaḥ svāśramāya nyavarttata
15 ॥ अपश्यद्भयशंसीनि निमित्तानि बहूनि सः । पश्यन्नुद्विग्नहृदयस्तूर्णं प्रापाश्रमं विभुः
15 // apaśyadbhayaśaṃsīni nimittāni bahūni saḥ / paśyannudvignahṛdayastūrṇaṃ prāpāśramaṃ vibhuḥ
16 ॥ तमायान्तमभिप्रेक्ष्य रुदती सा भृशातुरा । नविभूतेव शोकेन प्रारुदद्रेणुका पुनः
16 // tamāyāntamabhiprekṣya rudatī sā bhṛśāturā / navibhūteva śokena prārudadreṇukā punaḥ
17 ॥ रामस्य पुरतो राजन्भर्तृव्यसनपीडिता । उभाभ्यामपि हस्ताभ्यामुदरं समताडयत्
17 // rāmasya purato rājanbhartṛvyasanapīḍitā / ubhābhyāmapi hastābhyāmudaraṃ samatāḍayat
18 ॥ मार्गे विदितवृत्तान्तः सम्यग्रामो ऽपि मातरम् । कुररीमिव शोकार्त्ता दृष्ट्वा दुःखमुपेयिवान्
18 // mārge viditavṛttāntaḥ samyagrāmo 'pi mātaram / kurarīmiva śokārttā dṛṣṭvā duḥkhamupeyivān
19 ॥ धैर्यमारोप्य मेधावी दुःशशोकपरिप्लुतः । नेत्राभ्यामश्रुपूर्णाभ्यां तस्थौ भूमावर्धोमुखः
19 // dhairyamāropya medhāvī duḥśaśokapariplutaḥ / netrābhyāmaśrupūrṇābhyāṃ tasthau bhūmāvardhomukhaḥ
20 ॥ तं तथागतमालोक्य रामं प्राहाकृतव्रणः । किमिदं भृगुशार्दूल नैतत्वय्युपपाद्यते
20 // taṃ tathāgatamālokya rāmaṃ prāhākṛtavraṇaḥ / kimidaṃ bhṛguśārdūla naitatvayyupapādyate
21 ॥ न त्वादृशा महाभाग भृशं शोचन्ति कुत्रचित् । धृतिमन्तो महान्तस्तु दुःखं कुर्वति न व्यये
21 // na tvādṛśā mahābhāga bhṛśaṃ śocanti kutracit / dhṛtimanto mahāntastu duḥkhaṃ kurvati na vyaye
22 ॥ शोकः सर्वेन्द्रियाणां हि परिशोषप्रदायकः । त्यज शोकं महाबाहो न तत्पात्रं भवदृशाः
22 // śokaḥ sarvendriyāṇāṃ hi pariśoṣapradāyakaḥ / tyaja śokaṃ mahābāho na tatpātraṃ bhavadṛśāḥ
23 ॥ एहिकामुष्मिकार्थानां नूनमेकान्तरोधकः । शोकस्तस्यावकाशं त्वं कथं त्दृदि नियच्छसि
23 // ehikāmuṣmikārthānāṃ nūnamekāntarodhakaḥ / śokastasyāvakāśaṃ tvaṃ kathaṃ tdṛdi niyacchasi
24 ॥ तत्त्वं धैर्यधनो भूत्वा परिसांत्वय मातरम् । रुदतीं बत वैधव्यशं कापहतचेतनाम्
24 // tattvaṃ dhairyadhano bhūtvā parisāṃtvaya mātaram / rudatīṃ bata vaidhavyaśaṃ kāpahatacetanām
25 ॥ नैवागमनमस्तीह व्यतिक्रान्तस्य वस्तुनः । तस्मादतीतमखिलं त्यक्त्वा कृत्यं विचिन्तय
25 // naivāgamanamastīha vyatikrāntasya vastunaḥ / tasmādatītamakhilaṃ tyaktvā kṛtyaṃ vicintaya
26 ॥ इत्येवं सांत्वमानश्च तेन दुःशसमन्वितः । रामः संस्तंभयामास शनैरात्मानमात्मना
26 // ityevaṃ sāṃtvamānaśca tena duḥśasamanvitaḥ / rāmaḥ saṃstaṃbhayāmāsa śanairātmānamātmanā
27 ॥ दुःखशोकपरीता हि रेणुका त्वरुदन्मुहः । त्रिःसप्तकृत्वो हस्ताभ्यामुदरं समताडयत्
27 // duḥkhaśokaparītā hi reṇukā tvarudanmuhaḥ / triḥsaptakṛtvo hastābhyāmudaraṃ samatāḍayat
28 ॥ तावत्तदन्तिकं रामः समभ्येत्याश्रुलोचनः । रुदतीमलमंबेति सांत्वयामास मातरम्
28 // tāvattadantikaṃ rāmaḥ samabhyetyāśrulocanaḥ / rudatīmalamaṃbeti sāṃtvayāmāsa mātaram
29 ॥ उवाचापनयन्दुःखाद्भर्तृशोकपरायणाम् । त्रिःसप्तकृत्वो यदिदं त्वया वक्षः समाहतम्
29 // uvācāpanayanduḥkhādbhartṛśokaparāyaṇām / triḥsaptakṛtvo yadidaṃ tvayā vakṣaḥ samāhatam
30 ॥ तावतसंख्यमहं तस्मात्क्षत्त्रजारमशेषतः । हनिष्ये भुवि सर्वत्र सत्यमेतद्ब्रविमि ते
30 // tāvatasaṃkhyamahaṃ tasmātkṣattrajāramaśeṣataḥ / haniṣye bhuvi sarvatra satyametadbravimi te
31 ॥ तस्मात्त्वं शोकमुत्सृज्य धैर्यमातिष्ट सांप्रतम् । नास्त्येव नूनमायातमतिक्रान्तस्य वस्तुनः
31 // tasmāttvaṃ śokamutsṛjya dhairyamātiṣṭa sāṃpratam / nāstyeva nūnamāyātamatikrāntasya vastunaḥ
32 ॥ इत्युक्ता रेणुका तेन भृशं दुःखान्वितापि सा । कृच्छ्राद्धैर्यं समालंब्य तथेति प्रत्यभाषत
32 // ityuktā reṇukā tena bhṛśaṃ duḥkhānvitāpi sā / kṛcchrāddhairyaṃ samālaṃbya tatheti pratyabhāṣata
33 ॥ ततो रामो महाबाहुः पितुः सह सहोदरैः । अग्नौ सत्कर्त्तुमारेभे देहं राजन्यथविधि
33 // tato rāmo mahābāhuḥ pituḥ saha sahodaraiḥ / agnau satkarttumārebhe dehaṃ rājanyathavidhi
34 ॥ भर्तृशोकपरिताङ्गी रेणुकापि दृढव्रता । पुत्रान्सर्वान्समाहूय त्विदं वचनमब्रवीत्
34 // bhartṛśokaparitāṅgī reṇukāpi dṛḍhavratā / putrānsarvānsamāhūya tvidaṃ vacanamabravīt
35 ॥ रेणुकोवाच । अहं व-पितरं पुत्राः स्वर्गतं पुण्यशीलिनम् । अनुगन्तुमिहेच्छामि तन्मे ऽनुज्ञातुमर्हथ
35 // reṇukovāca / ahaṃ va-pitaraṃ putrāḥ svargataṃ puṇyaśīlinam / anugantumihecchāmi tanme 'nujñātumarhatha
36 ॥ असह्यदुःशं वैधव्यं सहमाना कथं पुनः । भर्त्रा विरहिता तेन प्रवर्त्तिष्ये विनिन्दिता
36 // asahyaduḥśaṃ vaidhavyaṃ sahamānā kathaṃ punaḥ / bhartrā virahitā tena pravarttiṣye vininditā
37 ॥ तस्मादनुगमिष्यामि भर्त्तारं दयितं मम । यथा तेन प्रवर्त्तिष्ये परत्रापि सहानिशम्
37 // tasmādanugamiṣyāmi bharttāraṃ dayitaṃ mama / yathā tena pravarttiṣye paratrāpi sahāniśam
38 ॥ ज्वलन्तमिममेवाग्निं संप्रविश्य चिरादिव । भर्तुर्मम भविष्यामि पितृलोकप्रियातिथिः
38 // jvalantamimamevāgniṃ saṃpraviśya cirādiva / bharturmama bhaviṣyāmi pitṛlokapriyātithiḥ
39 ॥ अनुवादमृते पुत्रा भवद्भिस्तत्र कर्मणि । प्रतिभूय न वक्तव्यं यदि मत्प्रियमिच्छथ
39 // anuvādamṛte putrā bhavadbhistatra karmaṇi / pratibhūya na vaktavyaṃ yadi matpriyamicchatha
40 ॥ इत्येवमुक्त्वा वचनं रेणुका दृढनिश्चया । अग्निं प्रविश्य भर्त्तारमनुगन्तुं मनोदधे
40 // ityevamuktvā vacanaṃ reṇukā dṛḍhaniścayā / agniṃ praviśya bharttāramanugantuṃ manodadhe
41 ॥ एतस्मिन्नेव काले तु रेणुकां तनयैः सह । समाभाष्यातिगंभीरा वागुवाचाशरीरीणी
41 // etasminneva kāle tu reṇukāṃ tanayaiḥ saha / samābhāṣyātigaṃbhīrā vāguvācāśarīrīṇī
42 ॥ हे रेणुके स्वतनयैर्गिरं मे ऽवहिता शृणु । मा कार्षीः साहसं भद्रे प्रवक्ष्यामि प्रियं तव
42 // he reṇuke svatanayairgiraṃ me 'vahitā śṛṇu / mā kārṣīḥ sāhasaṃ bhadre pravakṣyāmi priyaṃ tava
43 ॥ साहसो नैव कर्त्तव्यः केनाप्यात्महितैषिणा । न मर्त्तव्यन्त्वया सर्वो जीवन्भद्राणि पश्यति
43 // sāhaso naiva karttavyaḥ kenāpyātmahitaiṣiṇā / na marttavyantvayā sarvo jīvanbhadrāṇi paśyati
44 ॥ तस्माद्धैर्यधना भूत्वा भव त्वं कालकाङ्क्षिणी । निमित्तमन्तरीकृत्य किञ्चिदेव शुचिस्मिते
44 // tasmāddhairyadhanā bhūtvā bhava tvaṃ kālakāṅkṣiṇī / nimittamantarīkṛtya kiñcideva śucismite
45 ॥ अचिरेणैव भर्त्ता ते भविष्यति सचेतनः । उत्पन्नजीवितेन त्वं कामं प्राप्स्यसि शोभने । भवित्री चिररात्राय बहुकल्याण भाजनम्
45 // acireṇaiva bharttā te bhaviṣyati sacetanaḥ / utpannajīvitena tvaṃ kāmaṃ prāpsyasi śobhane / bhavitrī cirarātrāya bahukalyāṇa bhājanam
46 ॥ वसिष्ठ उवाच इति तद्वचनं श्रुत्वा धृतिमालंब्य रेणुका । तद्वाक्यगौरवाद्धर्षमवापुस्तनयाश्च ते
46 // vasiṣṭha uvāca iti tadvacanaṃ śrutvā dhṛtimālaṃbya reṇukā / tadvākyagauravāddharṣamavāpustanayāśca te
47 ॥ ततोनीत्वा पितुर्देहमाश्रमाभ्यन्तरं मुनेः । शाययित्वा निवाते तु परितः समुपाविशन्
47 // tatonītvā piturdehamāśramābhyantaraṃ muneḥ / śāyayitvā nivāte tu paritaḥ samupāviśan
48 ॥ तेषां तत्रोपविष्टानामप्रहृष्टात्मचेतसाम् । निमत्तानि शुभान्यासन्ननेकानि महान्ति च
48 // teṣāṃ tatropaviṣṭānāmaprahṛṣṭātmacetasām / nimattāni śubhānyāsannanekāni mahānti ca
49 ॥ तेन ते किञ्चिदाश्वस्तचेतसो मुनिपुङ्गवाः । निषेदुः सहिता मात्रा काङ्क्षन्तो जीवितं पितुः
49 // tena te kiñcidāśvastacetaso munipuṅgavāḥ / niṣeduḥ sahitā mātrā kāṅkṣanto jīvitaṃ pituḥ
50 ॥ एतस्मिन्नन्तरे राजन्भृगुवंशधरो मुनिः । विधेर्बलेन मतिमांस्तत्रागच्छद्यदृच्छया
50 // etasminnantare rājanbhṛguvaṃśadharo muniḥ / vidherbalena matimāṃstatrāgacchadyadṛcchayā
51 ॥ अथर्वणां विधिः सा क्षाद्वेदवेदाङ्गपारगः । सर्वशास्त्रार्थवित्प्राज्ञः सकलासुरवन्दितः
51 // atharvaṇāṃ vidhiḥ sā kṣādvedavedāṅgapāragaḥ / sarvaśāstrārthavitprājñaḥ sakalāsuravanditaḥ
52 ॥ मृतसंजीविनीं विद्यां यो वेद मुनिदुर्लभाम् । यथाहतान्मृतान्देवैरुत्थापयति दानवान्
52 // mṛtasaṃjīvinīṃ vidyāṃ yo veda munidurlabhām / yathāhatānmṛtāndevairutthāpayati dānavān
53 ॥ शास्त्रमोशनसं येन राज्ञां राज्यफलप्रदम् । प्रणीतमनुजीवन्ति सर्वे ऽद्यापीह पार्थिवाः
53 // śāstramośanasaṃ yena rājñāṃ rājyaphalapradam / praṇītamanujīvanti sarve 'dyāpīha pārthivāḥ
54 ॥ स तदाश्रममासाद्य प्रविष्टो ऽन्तर्महामुनिः । ददर्श तदवस्थांस्तान्सर्वान्दुःखपरिप्लुतान्
54 // sa tadāśramamāsādya praviṣṭo 'ntarmahāmuniḥ / dadarśa tadavasthāṃstānsarvānduḥkhapariplutān
55 ॥ अथ ते तु भृगुं दृष्ट्वा वंशम्य पितरं मुदा । उत्थायास्मै ददुश्चापि सत्कृत्य परमासनम्
55 // atha te tu bhṛguṃ dṛṣṭvā vaṃśamya pitaraṃ mudā / utthāyāsmai daduścāpi satkṛtya paramāsanam
56 ॥ स चाशीर्भिस्तु तान्सर्वानभिनन्द्य महामुनिः । पप्रच्छ किमिदं वृत्तं तत्सर्वं ते न्यवेदयन्
56 // sa cāśīrbhistu tānsarvānabhinandya mahāmuniḥ / papraccha kimidaṃ vṛttaṃ tatsarvaṃ te nyavedayan
57 ॥ तच्छ्रुत्वा स भृगुः शीघ्रं जलमादाय मन्त्रवित् । संजीविन्या विनया तं सिषेच प्रोच्चरन्निदम्
57 // tacchrutvā sa bhṛguḥ śīghraṃ jalamādāya mantravit / saṃjīvinyā vinayā taṃ siṣeca proccarannidam
58 ॥ यज्ञस्य तपसो वीय ममापि शुभमस्ति चेत् । तेनासौ जीवताच्छीघ्रं प्रसुप्त इवचोत्थितः
58 // yajñasya tapaso vīya mamāpi śubhamasti cet / tenāsau jīvatācchīghraṃ prasupta ivacotthitaḥ
59 ॥ एवमुक्ते शुभे वाक्ये भृगुणा साधुकारिणा । समुत्तस्थावथार्चीकः साक्षाद्ग्ररुरिवापरः
59 // evamukte śubhe vākye bhṛguṇā sādhukāriṇā / samuttasthāvathārcīkaḥ sākṣādgrarurivāparaḥ
60 ॥ दृष्ट्वा तत्र स्थितं वन्द्यं भृगुं स्वस्य पितामहम् । ननाम भक्त्या नृपते कृताञ्जलिरुवाच ह
60 // dṛṣṭvā tatra sthitaṃ vandyaṃ bhṛguṃ svasya pitāmaham / nanāma bhaktyā nṛpate kṛtāñjaliruvāca ha
61 ॥ जमदग्निरुवाच धन्यो ऽहं कृतकृत्यो ऽहं सफलं जीवितं च मे
61 // jamadagniruvāca dhanyo 'haṃ kṛtakṛtyo 'haṃ saphalaṃ jīvitaṃ ca me
62 ॥ यत्पश्ये चरणौ ते ऽद्य सुरासुरनमस्कृतौ । भगवन्किं करोम्यद्य शुश्रूषां तव मानद
62 // yatpaśye caraṇau te 'dya surāsuranamaskṛtau / bhagavankiṃ karomyadya śuśrūṣāṃ tava mānada
63 ॥ पुनीह्यात्मकुलं स्वस्य चरणांबुकणैर्विभो । इत्युक्त्वा सहसाऽनीतं रामेणार्ध्यं मुदान्वितः
63 // punīhyātmakulaṃ svasya caraṇāṃbukaṇairvibho / ityuktvā sahasā'nītaṃ rāmeṇārdhyaṃ mudānvitaḥ
64 ॥ प्रददौ पादयोस्तस्य भक्त्यान मितकन्धरः । तज्जलं शिरसाधत्त सकुटुंबो महामनाः
64 // pradadau pādayostasya bhaktyāna mitakandharaḥ / tajjalaṃ śirasādhatta sakuṭuṃbo mahāmanāḥ
65 ॥ अथ सत्कृत्य स भृगुं पप्रच्छ विनयान्वितः । भगवन् किं कृतं तेन राज्ञा दुष्टेन पातकम्
65 // atha satkṛtya sa bhṛguṃ papraccha vinayānvitaḥ / bhagavan kiṃ kṛtaṃ tena rājñā duṣṭena pātakam
66 ॥ यस्यातिथ्यं हि कृतवानहं सम्यग्विधानतः । साधुबुद्ध्यास दुष्टात्मा किं चकार महामते
66 // yasyātithyaṃ hi kṛtavānahaṃ samyagvidhānataḥ / sādhubuddhyāsa duṣṭātmā kiṃ cakāra mahāmate
67 ॥ वसिष्ठ उवाच एवं स पृष्टो मतिमान्भृगुः सर्वविदीश्वरः । चिरं ध्यात्वा समालोच्य कारणं प्राह भूपते
67 // vasiṣṭha uvāca evaṃ sa pṛṣṭo matimānbhṛguḥ sarvavidīśvaraḥ / ciraṃ dhyātvā samālocya kāraṇaṃ prāha bhūpate
68 ॥ भृगुरुवाच शृणु तात महाभाग बीजमस्य हि कर्मणः । यश्च वै कृतवान्पापं सर्वज्ञस्य तवानघ
68 // bhṛguruvāca śṛṇu tāta mahābhāga bījamasya hi karmaṇaḥ / yaśca vai kṛtavānpāpaṃ sarvajñasya tavānagha
69 ॥ शप्तः पुरा वसिष्ठेन नाशार्थं स महीपतिः । द्विजापराधतो मूढ वीर्यं ते विनशिष्यते
69 // śaptaḥ purā vasiṣṭhena nāśārthaṃ sa mahīpatiḥ / dvijāparādhato mūḍha vīryaṃ te vinaśiṣyate
70 ॥ तत्कथं वचनं तस्य भविष्यत्यन्यथा मुनेः । अयं रामो महावीर्यं प्रसह्यनृपपुङ्गवम्
70 // tatkathaṃ vacanaṃ tasya bhaviṣyatyanyathā muneḥ / ayaṃ rāmo mahāvīryaṃ prasahyanṛpapuṅgavam
71 ॥ हनिष्यति महाबाहो प्रतिज्ञां कृतवान्पुरा । यस्मादुरः प्रतिहतं त्वया मातर्ममाग्रतः
71 // haniṣyati mahābāho pratijñāṃ kṛtavānpurā / yasmāduraḥ pratihataṃ tvayā mātarmamāgrataḥ
72 ॥ एकविंशतिवारं हि भृशं दुःखपरीतया । त्रिः सप्तकृत्वो निःक्षत्रां करिष्ये पृथिवीमिमाम्
72 // ekaviṃśativāraṃ hi bhṛśaṃ duḥkhaparītayā / triḥ saptakṛtvo niḥkṣatrāṃ kariṣye pṛthivīmimām
73 ॥ अतो ऽयं वार्यमाणो ऽपि त्वाया पित्रा निरन्तरम् । भाविनोर्ऽथस्य च बलात्करिष्यत्येव मानद
73 // ato 'yaṃ vāryamāṇo 'pi tvāyā pitrā nirantaram / bhāvinor'thasya ca balātkariṣyatyeva mānada
74 ॥ स तु राजा महाभागो वृद्धानां पर्युपासिता । दत्तात्रेयाद्धरेरंशाल्लब्धबोधो महामतिः
74 // sa tu rājā mahābhāgo vṛddhānāṃ paryupāsitā / dattātreyāddhareraṃśāllabdhabodho mahāmatiḥ
75 ॥ साक्षाद्भक्तो महात्मा च तद्वधे पातकं भवेत् । एवमुक्त्वा महाराज स भृगुर्ब्रह्मणः सुतः । यथागतं ययौ विद्वान्भविष्यत्कालपर्ययात्
75 // sākṣādbhakto mahātmā ca tadvadhe pātakaṃ bhavet / evamuktvā mahārāja sa bhṛgurbrahmaṇaḥ sutaḥ / yathāgataṃ yayau vidvānbhaviṣyatkālaparyayāt