ततो गोवर्धनं तीर्थं सर्वपापप्रणाशनम् पितॄणां पुण्यजननं स्मरणाद् अपि पापनुत् ॥
tato govardhanaṃ tīrthaṃ sarvapāpapraṇāśanam pitṝṇāṃ puṇyajananaṃ smaraṇād api pāpanut //
तस्य प्रभाव एष स्यान् मया दृष्टस् तु नारद ब्राह्मणः कर्षकः कश्चिज् जाबालिर् इति विश्रुतः ॥
tasya prabhāva eṣa syān mayā dṛṣṭas tu nārada brāhmaṇaḥ karṣakaḥ kaścij jābālir iti viśrutaḥ //
न विमुञ्चत्य् अनड्वाहौ मध्यं याते ऽपि भास्करे प्रतोदेन प्रतुदति पृष्ठतो ऽपि च पार्श्वयोः ॥
na vimuñcaty anaḍvāhau madhyaṃ yāte 'pi bhāskare pratodena pratudati pṛṣṭhato 'pi ca pārśvayoḥ //
तौ गावाव् अश्रुपूर्णाक्षौ दृष्ट्वा गौः कामदोहिनी सुरभिर् जगतां माता नन्दिने सर्वम् अब्रवीत् ॥
tau gāvāv aśrupūrṇākṣau dṛṣṭvā gauḥ kāmadohinī surabhir jagatāṃ mātā nandine sarvam abravīt //
स चापि व्यथितो भूत्वा शंभवे तन् न्यवेदयत् शंभुश् च वृषभं प्राह सर्वं सिध्यतु ते वचः ॥
sa cāpi vyathito bhūtvā śaṃbhave tan nyavedayat śaṃbhuś ca vṛṣabhaṃ prāha sarvaṃ sidhyatu te vacaḥ //
शिवाज्ञासहितो नन्दी गोजातं सर्वम् आहरत् नष्टेषु गोषु सर्वेषु स्वर्गे मर्त्ये ततस् त्वरा ॥
śivājñāsahito nandī gojātaṃ sarvam āharat naṣṭeṣu goṣu sarveṣu svarge martye tatas tvarā //
माम् अवोचन् सुरगणा विना गोभिर् न जीव्यते तान् अवोचं सुरान् सर्वाञ् शंकरं यात याचत ॥
mām avocan suragaṇā vinā gobhir na jīvyate tān avocaṃ surān sarvāñ śaṃkaraṃ yāta yācata //
तथैवेशं तु ते सर्वे स्तुत्वा कार्यं न्यवेदयन् ईशो ऽपि विबुधान् आह जानाति वृषभो मम ॥
tathaiveśaṃ tu te sarve stutvā kāryaṃ nyavedayan īśo 'pi vibudhān āha jānāti vṛṣabho mama //
ते वृषं प्रोचुर् अमरा देहि गा उपकारिणः वृषो ऽपि विबुधान् आह गोसवः क्रियतां क्रतुः ॥
te vṛṣaṃ procur amarā dehi gā upakāriṇaḥ vṛṣo 'pi vibudhān āha gosavaḥ kriyatāṃ kratuḥ //
ततः प्राप्स्यथ गाः सर्वा या दिव्या याश् च मानुषाः ततः प्रवर्तते यज्ञो गोसवो देवनिर्मितः ॥
tataḥ prāpsyatha gāḥ sarvā yā divyā yāś ca mānuṣāḥ tataḥ pravartate yajño gosavo devanirmitaḥ //
गौतम्याश् च शुभे पार्श्वे गावो ववृधिरे ततः गोवर्धनं तु तत् तीर्थं देवानां प्रीतिवर्धनम् ॥
gautamyāś ca śubhe pārśve gāvo vavṛdhire tataḥ govardhanaṃ tu tat tīrthaṃ devānāṃ prītivardhanam //
तत्र स्नानं मुनिश्रेष्ठ गोसहस्रफलप्रदम् किंचिद् दानादिना यत् स्यात् फलं तत् तु न विद्महे ॥
tatra snānaṃ muniśreṣṭha gosahasraphalapradam kiṃcid dānādinā yat syāt phalaṃ tat tu na vidmahe //