स निष्क्रम्योदरात् तस्य बालस्य मुनिसत्तमाः पुनश् चैकार्णवाम् उर्वीम् अपश्यज् जनवर्जिताम् ॥
sa niṣkramyodarāt tasya bālasya munisattamāḥ punaś caikārṇavām urvīm apaśyaj janavarjitām //
पूर्वदृष्टं च तं देवं ददर्श शिशुरूपिणम् शाखायां वटवृक्षस्य पर्यङ्कोपरि संस्थितम् ॥
pūrvadṛṣṭaṃ ca taṃ devaṃ dadarśa śiśurūpiṇam śākhāyāṃ vaṭavṛkṣasya paryaṅkopari saṃsthitam //
श्रीवत्सवक्षसं देवं पीतवस्त्रं चतुर्भुजम् जगद् आदाय तिष्ठन्तं पद्मपत्त्रायतेक्षणम् ॥
śrīvatsavakṣasaṃ devaṃ pītavastraṃ caturbhujam jagad ādāya tiṣṭhantaṃ padmapattrāyatekṣaṇam //
सो ऽपि तं मुनिम् आयान्तं प्लवमानम् अचेतनम् दृष्ट्वा मुखाद् विनिष्क्रान्तं प्रोवाच प्रहसन्न् इव ॥
so 'pi taṃ munim āyāntaṃ plavamānam acetanam dṛṣṭvā mukhād viniṣkrāntaṃ provāca prahasann iva //
कच्चित् त्वयोषितं वत्स विश्रान्तं च ममोदरे भ्रममाणश् च किं तत्र आश्चर्यं दृष्टवान् असि ॥
kaccit tvayoṣitaṃ vatsa viśrāntaṃ ca mamodare bhramamāṇaś ca kiṃ tatra āścaryaṃ dṛṣṭavān asi //
भक्तो ऽसि मे मुनिश्रेष्ठ श्रान्तो ऽसि च ममाश्रितः तेन त्वाम् उपकाराय संभाषे पश्य माम् इह ॥
bhakto 'si me muniśreṣṭha śrānto 'si ca mamāśritaḥ tena tvām upakārāya saṃbhāṣe paśya mām iha //
श्रुत्वा स वचनं तस्य संप्रहृष्टतनूरुहः ददर्श तं सुदुष्प्रेक्षं रत्नैर् दिव्यैर् अलंकृतम् ॥
śrutvā sa vacanaṃ tasya saṃprahṛṣṭatanūruhaḥ dadarśa taṃ suduṣprekṣaṃ ratnair divyair alaṃkṛtam //
प्रसन्ना निर्मला दृष्टिर् मुहूर्तात् तस्य भो द्विजाः प्रसादात् तस्य देवस्य प्रादुर्भूता पुनर् नवा ॥
prasannā nirmalā dṛṣṭir muhūrtāt tasya bho dvijāḥ prasādāt tasya devasya prādurbhūtā punar navā //
रक्ताङ्गुलितलौ पादौ ततस् तस्य सुरार्चितौ प्रणम्य शिरसा विप्रा हर्षगद्गदया गिरा ॥
raktāṅgulitalau pādau tatas tasya surārcitau praṇamya śirasā viprā harṣagadgadayā girā //
कृताञ्जलिस् तदा हृष्टो विस्मितश् च पुनः पुनः दृष्ट्वा तं परमात्मानं संस्तोतुम् उपचक्रमे ॥
kṛtāñjalis tadā hṛṣṭo vismitaś ca punaḥ punaḥ dṛṣṭvā taṃ paramātmānaṃ saṃstotum upacakrame //
देवदेव जगन्नाथ मायाबालवपुर्धर त्राहि मां चारुपद्माक्ष दुःखितं शरणागतम् ॥
devadeva jagannātha māyābālavapurdhara trāhi māṃ cārupadmākṣa duḥkhitaṃ śaraṇāgatam //
संतप्तो ऽस्मि सुरश्रेष्ठ संवर्ताख्येन वह्निना अङ्गारवर्षभीतं च त्राहि मां पुरुषोत्तम ॥
saṃtapto 'smi suraśreṣṭha saṃvartākhyena vahninā aṅgāravarṣabhītaṃ ca trāhi māṃ puruṣottama //
शोषितश् च प्रचण्डेन वायुना जगदायुना विह्वलो ऽहं तथा श्रान्तस् त्राहि मां पुरुषोत्तम ॥
śoṣitaś ca pracaṇḍena vāyunā jagadāyunā vihvalo 'haṃ tathā śrāntas trāhi māṃ puruṣottama //
तापितश् च तशामात्यैः प्रलयावर्तकादिभिः न शान्तिम् अधिगच्छामि त्राहि मां पुरुषोत्तम ॥
tāpitaś ca taśāmātyaiḥ pralayāvartakādibhiḥ na śāntim adhigacchāmi trāhi māṃ puruṣottama //
तृषितश् च क्षुधाविष्टो दुःखितश् च जगत्पते त्रातारं नात्र पश्यामि त्राहि मां पुरुषोत्तम ॥
tṛṣitaś ca kṣudhāviṣṭo duḥkhitaś ca jagatpate trātāraṃ nātra paśyāmi trāhi māṃ puruṣottama //
अस्मिन्न् एकार्णवे घोरे विनष्टे सचराचरे न चान्तम् अधिगच्छामि त्राहि मां पुरुषोत्तम ॥
asminn ekārṇave ghore vinaṣṭe sacarācare na cāntam adhigacchāmi trāhi māṃ puruṣottama //
तवोदरे च देवेश मया दृष्टं चराचरम् विस्मितो ऽहं विषण्णश् च त्राहि मां पुरुषोत्तम ॥
tavodare ca deveśa mayā dṛṣṭaṃ carācaram vismito 'haṃ viṣaṇṇaś ca trāhi māṃ puruṣottama //
संसारे ऽस्मिन् निरालम्बे प्रसीद पुरुषोत्तम प्रसीद विबुधश्रेष्ठ प्रसीद विबुधप्रिय ॥
saṃsāre 'smin nirālambe prasīda puruṣottama prasīda vibudhaśreṣṭha prasīda vibudhapriya //
प्रसीद विबुधां नाथ प्रसीद विबुधालय प्रसीद सर्वलोकेश जगत्कारणकारण ॥
prasīda vibudhāṃ nātha prasīda vibudhālaya prasīda sarvalokeśa jagatkāraṇakāraṇa //
प्रसीद सर्वकृद् देव प्रसीद मम भूधर प्रसीद सलिलावास प्रसीद मधुसूदन ॥
prasīda sarvakṛd deva prasīda mama bhūdhara prasīda salilāvāsa prasīda madhusūdana //
प्रसीद कमलाकान्त प्रसीद त्रिदशेश्वर प्रसीद कंसकेशीघ्न प्रसीदारिष्टनाशन ॥
prasīda kamalākānta prasīda tridaśeśvara prasīda kaṃsakeśīghna prasīdāriṣṭanāśana //
प्रसीद कृष्ण दैत्यघ्न प्रसीद दनुजान्तक प्रसीद मथुरावास प्रसीद यदुनन्दन ॥
prasīda kṛṣṇa daityaghna prasīda danujāntaka prasīda mathurāvāsa prasīda yadunandana //
प्रसीद शक्रावरज प्रसीद वरदाव्यय त्वं मही त्वं जलं देव त्वम् अग्निस् त्वं समीरणः ॥
prasīda śakrāvaraja prasīda varadāvyaya tvaṃ mahī tvaṃ jalaṃ deva tvam agnis tvaṃ samīraṇaḥ //
त्वं नभस् त्वं मनश् चैव त्वम् अहंकार एव च त्वं बुद्धिः प्रकृतिश् चैव सत्त्वाद्यास् त्वं जगत्पते ॥
tvaṃ nabhas tvaṃ manaś caiva tvam ahaṃkāra eva ca tvaṃ buddhiḥ prakṛtiś caiva sattvādyās tvaṃ jagatpate //
पुरुषस् त्वं जगद्व्यापी पुरुषाद् अपि चोत्तमः त्वम् इन्द्रियाणि सर्वाणि शब्दाद्या विषयाः प्रभो ॥
puruṣas tvaṃ jagadvyāpī puruṣād api cottamaḥ tvam indriyāṇi sarvāṇi śabdādyā viṣayāḥ prabho //
त्वं दिक्पालाश् च धर्माश् च वेदा यज्ञाः सदक्षिणाः त्वम् इन्द्रस् त्वं शिवो देवस् त्वं हविस् त्वं हुताशनः ॥
tvaṃ dikpālāś ca dharmāś ca vedā yajñāḥ sadakṣiṇāḥ tvam indras tvaṃ śivo devas tvaṃ havis tvaṃ hutāśanaḥ //
त्वं यमः पितृराट् देव त्वं रक्षोधिपतिः स्वयम् वरुणस् त्वम् अपां नाथ त्वं वायुस् त्वं धनेश्वरः ॥
tvaṃ yamaḥ pitṛrāṭ deva tvaṃ rakṣodhipatiḥ svayam varuṇas tvam apāṃ nātha tvaṃ vāyus tvaṃ dhaneśvaraḥ //
त्वम् ईशानस् त्वम् अनन्तस् त्वं गणेशश् च षण्मुखः वसवस् त्वं तथा रुद्रास् त्वम् आदित्याश् च खेचराः ॥
tvam īśānas tvam anantas tvaṃ gaṇeśaś ca ṣaṇmukhaḥ vasavas tvaṃ tathā rudrās tvam ādityāś ca khecarāḥ //
दानवास् त्वं तथा यक्षास् त्वं दैत्याः समरुद्गणाः सिद्धाश् चाप्सरसो नागा गन्धर्वास् त्वं सचारणाः ॥
dānavās tvaṃ tathā yakṣās tvaṃ daityāḥ samarudgaṇāḥ siddhāś cāpsaraso nāgā gandharvās tvaṃ sacāraṇāḥ //
पितरो वालखिल्याश् च प्रजानां पतयो ऽच्युत मुनयस् त्वम् ऋषिगणास् त्वम् अश्विनौ निशाचराः ॥
pitaro vālakhilyāś ca prajānāṃ patayo 'cyuta munayas tvam ṛṣigaṇās tvam aśvinau niśācarāḥ //
अन्याश् च जातयस् त्वं हि यत् किंचिज् जीवसंज्ञितम् किं चात्र बहुनोक्तेन ब्रह्मादिस्तम्बगोचरम् ॥
anyāś ca jātayas tvaṃ hi yat kiṃcij jīvasaṃjñitam kiṃ cātra bahunoktena brahmādistambagocaram //
भूतं भव्यं भविष्यं च त्वं जगत् सचराचरम् यत् ते रूपं परं देव कूटस्थम् अचलं ध्रुवम् ॥
bhūtaṃ bhavyaṃ bhaviṣyaṃ ca tvaṃ jagat sacarācaram yat te rūpaṃ paraṃ deva kūṭastham acalaṃ dhruvam //
ब्रह्माद्यास् तन् न जानन्ति कथम् अन्ये ऽल्पमेधसः देव शुद्धस्वभावो ऽसि नित्यस् त्वं प्रकृतेः परः ॥
brahmādyās tan na jānanti katham anye 'lpamedhasaḥ deva śuddhasvabhāvo 'si nityas tvaṃ prakṛteḥ paraḥ //
अव्यक्तः शाश्वतो ऽनन्तः सर्वव्यापी महेश्वरः त्वम् आकाशः परः शान्तो अजस् त्वं विभुर् अव्ययः ॥
avyaktaḥ śāśvato 'nantaḥ sarvavyāpī maheśvaraḥ tvam ākāśaḥ paraḥ śānto ajas tvaṃ vibhur avyayaḥ //
एवं त्वां निर्गुणं स्तोतुं कः शक्नोति निरञ्जनम् स्तुतो ऽसि यन् मया देव विकलेनाल्पचेतसा तत् सर्वं देवदेवेश क्षन्तुम् अर्हसि चाव्यय ॥
evaṃ tvāṃ nirguṇaṃ stotuṃ kaḥ śaknoti nirañjanam stuto 'si yan mayā deva vikalenālpacetasā tat sarvaṃ devadeveśa kṣantum arhasi cāvyaya //