एवं स पृथिवीपालश् चिन्तयित्वा द्विजोत्तमाः प्रासादार्थं हरेस् तत्र प्रारम्भम् अकरोत् तदा ॥
evaṃ sa pṛthivīpālaś cintayitvā dvijottamāḥ prāsādārthaṃ hares tatra prārambham akarot tadā //
आनाय्य गणकान् सर्वान् आचार्याञ् शास्त्रपारगान् भूमिं संशोध्य यत्नेन राजा तु परया मुदा ॥
ānāyya gaṇakān sarvān ācāryāñ śāstrapāragān bhūmiṃ saṃśodhya yatnena rājā tu parayā mudā //
ब्राह्मणैर् ज्ञानसंपन्नैर् वेदशास्त्रार्थपारगैः अमात्यैर् मन्त्रिभिश् चैव वास्तुविद्याविशारदैः ॥
brāhmaṇair jñānasaṃpannair vedaśāstrārthapāragaiḥ amātyair mantribhiś caiva vāstuvidyāviśāradaiḥ //
तैः सार्धं स समालोच्य सुमुहूर्ते शुभे दिने सुचन्द्रतारासंयोगे ग्रहानुकूल्यसंयुते ॥
taiḥ sārdhaṃ sa samālocya sumuhūrte śubhe dine sucandratārāsaṃyoge grahānukūlyasaṃyute //
जयमङ्गलशब्दैश् च नानावाद्यैर् मनोहरैः वेदाध्ययननिर्घोषैर् गीतैः सुमधुरस्वरैः ॥
jayamaṅgalaśabdaiś ca nānāvādyair manoharaiḥ vedādhyayananirghoṣair gītaiḥ sumadhurasvaraiḥ //
पुष्पलाजाक्षतैर् गन्धैः पूर्णकुम्भैः सदीपकैः ददाव् अर्घ्यं ततो राजा श्रद्धया सुसमाहितः ॥
puṣpalājākṣatair gandhaiḥ pūrṇakumbhaiḥ sadīpakaiḥ dadāv arghyaṃ tato rājā śraddhayā susamāhitaḥ //
दत्त्वैवम् अर्घ्यं विधिवद् आनाय्य स महीपतिः कलिङ्गाधिपतिं शूरम् उत्कलाधिपतिं तथा कोशलाधिपतिं चैव तान् उवाच तदा नृपः ॥
dattvaivam arghyaṃ vidhivad ānāyya sa mahīpatiḥ kaliṅgādhipatiṃ śūram utkalādhipatiṃ tathā kośalādhipatiṃ caiva tān uvāca tadā nṛpaḥ //
गच्छध्वं सहिताः सर्वे शिलार्थे सुसमाहिताः गृहीत्वा शिल्पिमुख्यांश् च शिलाकर्मविशारदान् ॥
gacchadhvaṃ sahitāḥ sarve śilārthe susamāhitāḥ gṛhītvā śilpimukhyāṃś ca śilākarmaviśāradān //
विन्ध्याचलं सुविस्तीर्णं बहुकन्दरशोभितम् निरूप्य सर्वसानूनि च्छेदयित्वा शिलाः शुभाः संवाह्यन्तां च शकटैर् नौकाभिर् मा विलम्बथ ॥
vindhyācalaṃ suvistīrṇaṃ bahukandaraśobhitam nirūpya sarvasānūni cchedayitvā śilāḥ śubhāḥ saṃvāhyantāṃ ca śakaṭair naukābhir mā vilambatha //
एवं गन्तुं समादिश्य तान् नृपान् स महीपतिः पुनर् एवाब्रवीद् वाक्यं सामात्यान् सपुरोहितान् ॥
evaṃ gantuṃ samādiśya tān nṛpān sa mahīpatiḥ punar evābravīd vākyaṃ sāmātyān sapurohitān //
गच्छन्तु दूताः सर्वत्र ममाज्ञां प्रवदन्तु वै यत्र तिष्ठन्ति राजानः पृथिव्यां तान् सुशीघ्रगाः ॥
gacchantu dūtāḥ sarvatra mamājñāṃ pravadantu vai yatra tiṣṭhanti rājānaḥ pṛthivyāṃ tān suśīghragāḥ //
हस्त्यश्वरथपादातैः सामात्यैः सपुरोहितैः गच्छत सहिताः सर्व इन्द्रद्युम्नस्य शासनात् ॥
hastyaśvarathapādātaiḥ sāmātyaiḥ sapurohitaiḥ gacchata sahitāḥ sarva indradyumnasya śāsanāt //
एवं दूताः समाज्ञाता राज्ञा तेन महात्मना गत्वा तदा नृपान् ऊचुर् वचनं तस्य भूपतेः ॥
evaṃ dūtāḥ samājñātā rājñā tena mahātmanā gatvā tadā nṛpān ūcur vacanaṃ tasya bhūpateḥ //
श्रुत्वा तु ते तथा सर्वे दूतानां वचनं नृपाः आजग्मुस् त्वरिताः सर्वे स्वसैन्यैः परिवारिताः ॥
śrutvā tu te tathā sarve dūtānāṃ vacanaṃ nṛpāḥ ājagmus tvaritāḥ sarve svasainyaiḥ parivāritāḥ //
ये नृपाः सर्वदिग्भागे ये च दक्षिणतः स्थिताः पश्चिमायां स्थिता ये च उत्तरापथसंस्थिताः ॥
ye nṛpāḥ sarvadigbhāge ye ca dakṣiṇataḥ sthitāḥ paścimāyāṃ sthitā ye ca uttarāpathasaṃsthitāḥ //
प्रत्यन्तवासिनो ये ऽपि ये च संनिधिवासिनः पार्वतीयाश् च ये केचित् तथा द्वीपनिवासिनः ॥
pratyantavāsino ye 'pi ye ca saṃnidhivāsinaḥ pārvatīyāś ca ye kecit tathā dvīpanivāsinaḥ //
रथैर् नागैः पदातैश् च वाजिभिर् धनविस्तरैः संप्राप्ता बहुशो विप्राः श्रुत्वेन्द्रद्युम्नशासनम् ॥
rathair nāgaiḥ padātaiś ca vājibhir dhanavistaraiḥ saṃprāptā bahuśo viprāḥ śrutvendradyumnaśāsanam //
तान् आगतान् नृपान् दृष्ट्वा सामात्यान् सपुरोहितान् प्रोवाच राजा हृष्टात्मा कार्यम् उद्दिश्य सादरम् ॥
tān āgatān nṛpān dṛṣṭvā sāmātyān sapurohitān provāca rājā hṛṣṭātmā kāryam uddiśya sādaram //
शृणुध्वं नृपशार्दूला यथा किंचिद् ब्रवीम्य् अहम् अस्मिन् क्षेत्रवरे पुण्ये भुक्तिमुक्तिप्रदे शिवे ॥
śṛṇudhvaṃ nṛpaśārdūlā yathā kiṃcid bravīmy aham asmin kṣetravare puṇye bhuktimuktiprade śive //
हयमेधं महायज्ञं प्रासादं चैव वैष्णवम् कथं शक्नोम्य् अहं कर्तुम् इति चिन्ताकुलं मनः ॥
hayamedhaṃ mahāyajñaṃ prāsādaṃ caiva vaiṣṇavam kathaṃ śaknomy ahaṃ kartum iti cintākulaṃ manaḥ //
भवद्भिः सुसहायैस् तु सर्वम् एतत् करोम्य् अहम् यदि यूयं सहाया मे भवध्वं नृपसत्तमाः ॥
bhavadbhiḥ susahāyais tu sarvam etat karomy aham yadi yūyaṃ sahāyā me bhavadhvaṃ nṛpasattamāḥ //
इत्य् एवं वदमानस्य राजराजस्य धीमतः सर्वे प्रमुदिता हृष्टा भूपास् ते तस्य शासनात् ॥
ity evaṃ vadamānasya rājarājasya dhīmataḥ sarve pramuditā hṛṣṭā bhūpās te tasya śāsanāt //
ववृषुर् धनरत्नैश् च सुवर्णमणिमौक्तिकैः कम्बलाजिनरत्नैश् च राङ्कवास्तरणैः शुभैः ॥
vavṛṣur dhanaratnaiś ca suvarṇamaṇimauktikaiḥ kambalājinaratnaiś ca rāṅkavāstaraṇaiḥ śubhaiḥ //
वज्रवैदूर्यमाणिक्यैः पद्मरागेन्द्रनीलकैः गजैर् अश्वैर् धनैश् चान्यै रथैश् चैव करेणुभिः ॥
vajravaidūryamāṇikyaiḥ padmarāgendranīlakaiḥ gajair aśvair dhanaiś cānyai rathaiś caiva kareṇubhiḥ //
असंख्येयैर् बहुविधैर् द्रव्यैर् उच्चावचैस् तथा शालिव्रीहियवैश् चैव माषमुद्गतिलैस् तथा ॥
asaṃkhyeyair bahuvidhair dravyair uccāvacais tathā śālivrīhiyavaiś caiva māṣamudgatilais tathā //
सिद्धार्थचणकैश् चैव गोधूमैर् मसुरादिभिः श्यामाकैर् मधुकैश् चैव नीवारैः सकुलत्थकैः ॥
siddhārthacaṇakaiś caiva godhūmair masurādibhiḥ śyāmākair madhukaiś caiva nīvāraiḥ sakulatthakaiḥ //
अन्यैश् च विविधैर् धान्यैर् ग्राम्यारण्यैः सहस्रशः बहुधान्यसहस्राणां तण्डुलानां च राशिभिः ॥
anyaiś ca vividhair dhānyair grāmyāraṇyaiḥ sahasraśaḥ bahudhānyasahasrāṇāṃ taṇḍulānāṃ ca rāśibhiḥ //
गव्यस्य हविषः कुम्भैः शतशो ऽथ सहस्रशः तथान्यैर् विविधैर् द्रव्यैर् भक्ष्यभोज्यानुलेपनैः ॥
gavyasya haviṣaḥ kumbhaiḥ śataśo 'tha sahasraśaḥ tathānyair vividhair dravyair bhakṣyabhojyānulepanaiḥ //
राजानः पूरयाम् आसुर् यत् किंचिद् द्रव्यसंभवैः तान् दृष्ट्वा यज्ञसंभारान् सर्वसंपत्समन्वितान् ॥
rājānaḥ pūrayām āsur yat kiṃcid dravyasaṃbhavaiḥ tān dṛṣṭvā yajñasaṃbhārān sarvasaṃpatsamanvitān //
यज्ञकर्मविदो विप्रान् वेदवेदाङ्गपारगान् शास्त्रेषु निपुणान् दक्षान् कुशलान् सर्वकर्मसु ॥
yajñakarmavido viprān vedavedāṅgapāragān śāstreṣu nipuṇān dakṣān kuśalān sarvakarmasu //
ऋषींश् चैव महर्षींश् च देवर्षींश् चैव तापसान् ब्रह्मचारिगृहस्थांश् च वानप्रस्थान् यतींस् तथा ॥
ṛṣīṃś caiva maharṣīṃś ca devarṣīṃś caiva tāpasān brahmacārigṛhasthāṃś ca vānaprasthān yatīṃs tathā //
स्नातकान् ब्राह्मणांश् चान्यान् अग्निहोत्रे सदा स्थितान् आचार्योपाध्यायवरान् स्वाध्यायतपसान्वितान् ॥
snātakān brāhmaṇāṃś cānyān agnihotre sadā sthitān ācāryopādhyāyavarān svādhyāyatapasānvitān //
सदस्याञ् शास्त्रकुशलांस् तथान्यान् पावकान् बहून् दृष्ट्वा तान् नृपतिः श्रीमान् उवाच स्वं पुरोहितम् ॥
sadasyāñ śāstrakuśalāṃs tathānyān pāvakān bahūn dṛṣṭvā tān nṛpatiḥ śrīmān uvāca svaṃ purohitam //
ततः प्रयान्तु विद्वांसो ब्राह्मणा वेदपारगाः वाजिमेधार्थसिद्ध्यर्थं देशं पश्यन्तु यज्ञियम् ॥
tataḥ prayāntu vidvāṃso brāhmaṇā vedapāragāḥ vājimedhārthasiddhyarthaṃ deśaṃ paśyantu yajñiyam //
इत्य् उक्तः स तथा चक्रे वचनं तस्य भूपतेः हृष्टः स मन्त्रिभिः सार्धं तदा राजपुरोहितः ॥
ity uktaḥ sa tathā cakre vacanaṃ tasya bhūpateḥ hṛṣṭaḥ sa mantribhiḥ sārdhaṃ tadā rājapurohitaḥ //
ततो ययौ पुरोधाश् च प्राज्ञः स्थपतिभिः सह ब्राह्मणान् अग्रतः कृत्वा कुशलान् यज्ञकर्मणि ॥
tato yayau purodhāś ca prājñaḥ sthapatibhiḥ saha brāhmaṇān agrataḥ kṛtvā kuśalān yajñakarmaṇi //
तं देशं धीवरग्रामं सप्रतोलिविटङ्किनम् कारयाम् आस विप्रो ऽसौ यज्ञवाटं यथाविधि ॥
taṃ deśaṃ dhīvaragrāmaṃ sapratoliviṭaṅkinam kārayām āsa vipro 'sau yajñavāṭaṃ yathāvidhi //
प्रासादशतसंबाधं मणिप्रवरशोभितम् इन्द्रसद्मनिभं रम्यं हेमरत्नविभूषितम् ॥
prāsādaśatasaṃbādhaṃ maṇipravaraśobhitam indrasadmanibhaṃ ramyaṃ hemaratnavibhūṣitam //
स्तम्भान् कनकचित्रांश् च तोरणानि बृहन्ति च यज्ञायतनदेशेषु दत्त्वा शुद्धं च काञ्चनम् ॥
stambhān kanakacitrāṃś ca toraṇāni bṛhanti ca yajñāyatanadeśeṣu dattvā śuddhaṃ ca kāñcanam //
अन्तःपुराणि राज्ञां च नानादेशनिवासिनाम् कारयाम् आस धर्मात्मा तत्र तत्र यथाविधि ॥
antaḥpurāṇi rājñāṃ ca nānādeśanivāsinām kārayām āsa dharmātmā tatra tatra yathāvidhi //
ब्राह्मणानां च वैश्यानां नानादेशसमीयुषाम् कारयाम् आस विधिवच् छालास् तत्राप्य् अनेकशः ॥
brāhmaṇānāṃ ca vaiśyānāṃ nānādeśasamīyuṣām kārayām āsa vidhivac chālās tatrāpy anekaśaḥ //
प्रियार्थं तस्य नृपतेर् आययुर् नृपसत्तमाः रत्नान्य् अनेकान्य् आदाय स्त्रियश् चाययुर् उत्सवे ॥
priyārthaṃ tasya nṛpater āyayur nṛpasattamāḥ ratnāny anekāny ādāya striyaś cāyayur utsave //
तेषां निर्विशतां स्वेषु शिबिरेषु महात्मनाम् नदतः सागरस्येव दिविस्पृग् अभवद् ध्वनिः ॥
teṣāṃ nirviśatāṃ sveṣu śibireṣu mahātmanām nadataḥ sāgarasyeva divispṛg abhavad dhvaniḥ //
तेषाम् अभ्यागतानां च स राजा मुनिसत्तमाः व्यादिदेशायतनानि शय्याश् चाप्य् उपचारतः ॥
teṣām abhyāgatānāṃ ca sa rājā munisattamāḥ vyādideśāyatanāni śayyāś cāpy upacārataḥ //
भोजनानि विचित्राणि शालीक्षुयवगोरसैः उपेत्य नृपतिश्रेष्ठो व्यादिदेश स्वयं तदा ॥
bhojanāni vicitrāṇi śālīkṣuyavagorasaiḥ upetya nṛpatiśreṣṭho vyādideśa svayaṃ tadā //
तथा तस्मिन् महायज्ञे बहवो ब्रह्मवादिनः ये च द्विजातिप्रवरास् तत्रासन् द्विजसत्तमाः ॥
tathā tasmin mahāyajñe bahavo brahmavādinaḥ ye ca dvijātipravarās tatrāsan dvijasattamāḥ //
समाजग्मुः सशिष्यास् तान् प्रतिजग्राह पार्थिवः सर्वांश् च तान् अनुययौ यावद् आवसथान् इति ॥
samājagmuḥ saśiṣyās tān pratijagrāha pārthivaḥ sarvāṃś ca tān anuyayau yāvad āvasathān iti //
स्वयम् एव महातेजा दम्भं त्यक्त्वा नृपोत्तमः ततः कृत्वा स्वशिल्पं च शिल्पिनो ऽन्ये च ये तदा ॥
svayam eva mahātejā dambhaṃ tyaktvā nṛpottamaḥ tataḥ kṛtvā svaśilpaṃ ca śilpino 'nye ca ye tadā //
कृत्स्नं यज्ञविधिं राज्ञे तदा तस्मै न्यवेदयन् ततः श्रुत्वा नृपश्रेष्ठः कृतं सर्वम् अतन्द्रितः हृष्टरोमाभवद् राजा सह मन्त्रिभिर् अच्युतः ॥
kṛtsnaṃ yajñavidhiṃ rājñe tadā tasmai nyavedayan tataḥ śrutvā nṛpaśreṣṭhaḥ kṛtaṃ sarvam atandritaḥ hṛṣṭaromābhavad rājā saha mantribhir acyutaḥ //
तस्मिन् यज्ञे प्रवृत्ते तु वाग्मिनो हेतुवादिभिः हेतुवादान् बहून् आहुः परस्परजिगीषवः ॥
tasmin yajñe pravṛtte tu vāgmino hetuvādibhiḥ hetuvādān bahūn āhuḥ parasparajigīṣavaḥ //
देवेन्द्रस्येव विहितं राजसिंहेन भो द्विजाः ददृशुस् तोरणान्य् अत्र शातकुम्भमयानि च ॥
devendrasyeva vihitaṃ rājasiṃhena bho dvijāḥ dadṛśus toraṇāny atra śātakumbhamayāni ca //
शय्यासनविकारांश् च सुबहून् रत्नसंचयान् घटपात्रीकटाहानि कलशान् वर्धमानकान् ॥
śayyāsanavikārāṃś ca subahūn ratnasaṃcayān ghaṭapātrīkaṭāhāni kalaśān vardhamānakān //
नहि कश्चिद् असौवर्णम् अपश्यद् वसुधाधिपः यूपांश् च शास्त्रपठितान् दारवान् हेमभूषितान् ॥
nahi kaścid asauvarṇam apaśyad vasudhādhipaḥ yūpāṃś ca śāstrapaṭhitān dāravān hemabhūṣitān //
उपक्षिप्तान् यथाकालं विधिवद् भूरिवर्चसः स्थलजा जलजा ये च पशवः केचन द्विजाः ॥
upakṣiptān yathākālaṃ vidhivad bhūrivarcasaḥ sthalajā jalajā ye ca paśavaḥ kecana dvijāḥ //
सर्वान् एव समानीतान् अपश्यंस् तत्र ते नृपाः गाश् चैव महिषीश् चैव तथा वृद्धस्त्रियो ऽपि च ॥
sarvān eva samānītān apaśyaṃs tatra te nṛpāḥ gāś caiva mahiṣīś caiva tathā vṛddhastriyo 'pi ca //
औदकानि च सत्त्वानि श्वापदानि वयांसि च जरायुजाण्डजातानि स्वेदजान्य् उद्भिदानि च ॥
audakāni ca sattvāni śvāpadāni vayāṃsi ca jarāyujāṇḍajātāni svedajāny udbhidāni ca //
पर्वतान्य् उपधान्यानि भूतानि ददृशुश् च ते एवं प्रमुदितं सर्वं पशुतो धनधान्यतः ॥
parvatāny upadhānyāni bhūtāni dadṛśuś ca te evaṃ pramuditaṃ sarvaṃ paśuto dhanadhānyataḥ //
यज्ञवाटं नृपा दृष्ट्वा विस्मयं परमं गताः ब्राह्मणानां विशां चैव बहुमिष्टान्नम् ऋद्धिमत् ॥
yajñavāṭaṃ nṛpā dṛṣṭvā vismayaṃ paramaṃ gatāḥ brāhmaṇānāṃ viśāṃ caiva bahumiṣṭānnam ṛddhimat //
पूर्णे शतसहस्रे तु विप्राणां तत्र भुञ्जताम् दुन्दुभिर् मेघनिर्घोषान् मुहुर्मुहुर् अथाकरोत् ॥
pūrṇe śatasahasre tu viprāṇāṃ tatra bhuñjatām dundubhir meghanirghoṣān muhurmuhur athākarot //
विननादासकृच् चापि दिवसे दिवसे गते एवं स ववृधे यज्ञस् तस्य राज्ञस् तु धीमतः ॥
vinanādāsakṛc cāpi divase divase gate evaṃ sa vavṛdhe yajñas tasya rājñas tu dhīmataḥ //
अन्नस्य सुबहून् विप्रा उत्सर्गान् निर्गतोपमान् दधिकुल्याश् च ददृशुः पयसश् च ह्रदांस् तथा ॥
annasya subahūn viprā utsargān nirgatopamān dadhikulyāś ca dadṛśuḥ payasaś ca hradāṃs tathā //
जम्बूद्वीपो हि सकलो नानाजनपदैर् युतः द्विजाश् च तत्र दृश्यन्ते राज्ञस् तस्य महामखे ॥
jambūdvīpo hi sakalo nānājanapadair yutaḥ dvijāś ca tatra dṛśyante rājñas tasya mahāmakhe //
तत्र यानि सहस्राणि पुरुषाणां ततस् ततः गृहीत्वा भाजनं जग्मुर् बहूनि द्विजसत्तमाः ॥
tatra yāni sahasrāṇi puruṣāṇāṃ tatas tataḥ gṛhītvā bhājanaṃ jagmur bahūni dvijasattamāḥ //
श्राविणश् चापि ते सर्वे सुमृष्टमणिकुण्डलाः पर्यवेषयन् द्विजातीञ् शतशो ऽथ सहस्रशः ॥
śrāviṇaś cāpi te sarve sumṛṣṭamaṇikuṇḍalāḥ paryaveṣayan dvijātīñ śataśo 'tha sahasraśaḥ //
विविधान्य् अनुपानानि पुरुषा ये ऽनुयायिनः ते वै नृपोपभोज्यानि ब्राह्मणेभ्यो ददुः सह ॥
vividhāny anupānāni puruṣā ye 'nuyāyinaḥ te vai nṛpopabhojyāni brāhmaṇebhyo daduḥ saha //
समागतान् वेदविदो राज्ञश् च पृथिवीश्वरान् पूजां चक्रे तदा तेषां विधिवद् भूरिदक्षिणः ॥
samāgatān vedavido rājñaś ca pṛthivīśvarān pūjāṃ cakre tadā teṣāṃ vidhivad bhūridakṣiṇaḥ //
दिग्देशाद् आगतान् राज्ञो महासंग्रामशालिनः नटनर्तककादींश् च गीतस्तुतिविशारदान् ॥
digdeśād āgatān rājño mahāsaṃgrāmaśālinaḥ naṭanartakakādīṃś ca gītastutiviśāradān //
पत्न्यो मनोरमास् तस्य पीनोन्नतपयोधराः इन्दीवरपलाशाक्ष्यः शरच्चन्द्रनिभाननाः ॥
patnyo manoramās tasya pīnonnatapayodharāḥ indīvarapalāśākṣyaḥ śaraccandranibhānanāḥ //
कुलशीलगुणोपेताः सहस्रैकं शताधिकम् एवं तद्भूपपरमपत्नीगणसमन्वितम् ॥
kulaśīlaguṇopetāḥ sahasraikaṃ śatādhikam evaṃ tadbhūpaparamapatnīgaṇasamanvitam //
रत्नमालाकुलं दिव्यं पताकाध्वजसेवितम् रत्नहारयुतं रम्यं चन्द्रकान्तिसमप्रभम् ॥
ratnamālākulaṃ divyaṃ patākādhvajasevitam ratnahārayutaṃ ramyaṃ candrakāntisamaprabham //
करिणः पर्वताकारान् मदसिक्तान् महाबलान् शतशः कोटिसंघातैर् दन्तिभिर् दन्तभूषणैः ॥
kariṇaḥ parvatākārān madasiktān mahābalān śataśaḥ koṭisaṃghātair dantibhir dantabhūṣaṇaiḥ //
वातवेगजवैर् अश्वैः सिन्धुजातैः सुशोभनैः श्वेताश्वैः श्यामकर्णैश् च कोट्यनेकैर् जवान्वितैः ॥
vātavegajavair aśvaiḥ sindhujātaiḥ suśobhanaiḥ śvetāśvaiḥ śyāmakarṇaiś ca koṭyanekair javānvitaiḥ //
संनद्धबद्धकक्षैश् च नानाप्रहरणोद्यतैः असंख्येयैः पदातैश् च देवपुत्रोपमैस् तथा ॥
saṃnaddhabaddhakakṣaiś ca nānāpraharaṇodyataiḥ asaṃkhyeyaiḥ padātaiś ca devaputropamais tathā //
इत्य् एवं ददृशे राजा यज्ञसंभारविस्तरम् मुदं लेभे तदा राजा संहृष्टो वाक्यम् अब्रवीत् ॥
ity evaṃ dadṛśe rājā yajñasaṃbhāravistaram mudaṃ lebhe tadā rājā saṃhṛṣṭo vākyam abravīt //
आनयध्वं हयश्रेष्ठं सर्वलक्षणलक्षितम् चारयध्वं पृथिव्यां वै राजपुत्राः सुसंयताः ॥
ānayadhvaṃ hayaśreṣṭhaṃ sarvalakṣaṇalakṣitam cārayadhvaṃ pṛthivyāṃ vai rājaputrāḥ susaṃyatāḥ //
विद्वद्भिर् धर्मविद्भिश् च अत्र होमो विधीयताम् कृष्णच्छागं च महिषं कृष्णसारमृगं द्विजान् ॥
vidvadbhir dharmavidbhiś ca atra homo vidhīyatām kṛṣṇacchāgaṃ ca mahiṣaṃ kṛṣṇasāramṛgaṃ dvijān //
अनड्वाहं च गाश् चैव सर्वांश् च पशुपालकान् इष्टयश् च प्रवर्तन्तां प्रासादं वैष्णवं ततः ॥
anaḍvāhaṃ ca gāś caiva sarvāṃś ca paśupālakān iṣṭayaś ca pravartantāṃ prāsādaṃ vaiṣṇavaṃ tataḥ //
सर्वम् एतच् च विप्रेभ्यो दीयतां मनसेप्सितम् स्त्रियश् च रत्नकोट्यश् च ग्रामाश् च नगराणि च ॥
sarvam etac ca viprebhyo dīyatāṃ manasepsitam striyaś ca ratnakoṭyaś ca grāmāś ca nagarāṇi ca //
सम्यक् समृद्धभूम्यश् च विषयाश् चैवम् अर्थिनाम् अन्यानि द्रव्यजातानि मनोज्ञानि बहूनि च ॥
samyak samṛddhabhūmyaś ca viṣayāś caivam arthinām anyāni dravyajātāni manojñāni bahūni ca //
सर्वेषां याचमानानां नास्ति ह्य् एतन् न भाषयेत् तावत् प्रवर्ततां यज्ञो यावद् देवः पुरा त्व् इह प्रत्यक्षं मम चाभ्येति यज्ञस्यास्य समीपतः ॥
sarveṣāṃ yācamānānāṃ nāsti hy etan na bhāṣayet tāvat pravartatāṃ yajño yāvad devaḥ purā tv iha pratyakṣaṃ mama cābhyeti yajñasyāsya samīpataḥ //
एवम् उक्त्वा तदा विप्रा राजसिंहो महाभुजः ददौ सुवर्णसंघातं कोटीनां चैव भूषणम् ॥
evam uktvā tadā viprā rājasiṃho mahābhujaḥ dadau suvarṇasaṃghātaṃ koṭīnāṃ caiva bhūṣaṇam //
करेणुशतसाहस्रं वाजिनो नियुतानि च अर्बुदं चैव वृषभं स्वर्णशृङ्गीश् च धेनुकाः ॥
kareṇuśatasāhasraṃ vājino niyutāni ca arbudaṃ caiva vṛṣabhaṃ svarṇaśṛṅgīś ca dhenukāḥ //
सुरूपाः सुरभीश् चैव कांस्यदोहाः पयस्विनीः प्रायच्छत् स तु विप्रेभ्यो वेदविद्भ्यो मुदा युतः ॥
surūpāḥ surabhīś caiva kāṃsyadohāḥ payasvinīḥ prāyacchat sa tu viprebhyo vedavidbhyo mudā yutaḥ //
वासांसि च महार्हाणि राङ्कवास्तरणानि च सुशुक्लानि च शुभ्राणि प्रवालमणिम् उत्तमम् ॥
vāsāṃsi ca mahārhāṇi rāṅkavāstaraṇāni ca suśuklāni ca śubhrāṇi pravālamaṇim uttamam //
अददात् स महायज्ञे रत्नानि विविधानि च ॥
adadāt sa mahāyajñe ratnāni vividhāni ca //
वज्रवैदूर्यमाणिक्यमुक्तिकाद्यानि यानि च अलंकारवतीः शुभ्राः कन्या राजीवलोचनाः ॥
vajravaidūryamāṇikyamuktikādyāni yāni ca alaṃkāravatīḥ śubhrāḥ kanyā rājīvalocanāḥ //
शतानि पञ्च विप्रेभ्यो राजा हृष्टः प्रदत्तवान् स्त्रियः पीनपयोभाराः कञ्चुकैः स्वस्तनावृताः ॥
śatāni pañca viprebhyo rājā hṛṣṭaḥ pradattavān striyaḥ pīnapayobhārāḥ kañcukaiḥ svastanāvṛtāḥ //
मध्यहीनाश् च सुश्रोण्यः पद्मपत्त्रायतेक्षणाः हावभावान्वितग्रीवा बह्व्यो वलयभूषिताः ॥
madhyahīnāś ca suśroṇyaḥ padmapattrāyatekṣaṇāḥ hāvabhāvānvitagrīvā bahvyo valayabhūṣitāḥ //
पादनूपुरसंयुक्ताः पट्टदुकूलवाससः एकैकशो ऽददात् तस्मिन् काम्याश् च कामिनीर् बहूः ॥
pādanūpurasaṃyuktāḥ paṭṭadukūlavāsasaḥ ekaikaśo 'dadāt tasmin kāmyāś ca kāminīr bahūḥ //
अर्थिभ्यो ब्राह्मणादिभ्यो हयमेधे द्विजोत्तमाः भक्ष्यं भोज्यं च संपूर्णं नानासंभारसंयुतम् ॥
arthibhyo brāhmaṇādibhyo hayamedhe dvijottamāḥ bhakṣyaṃ bhojyaṃ ca saṃpūrṇaṃ nānāsaṃbhārasaṃyutam //
खण्डकाद्यान्य् अनेकानि स्विन्नपक्वांश् च पिष्टकान् अन्नान्य् अन्यानि मेध्यांश् च घृतपूरांश् च खाण्डवान् ॥
khaṇḍakādyāny anekāni svinnapakvāṃś ca piṣṭakān annāny anyāni medhyāṃś ca ghṛtapūrāṃś ca khāṇḍavān //
मधुरांस् तर्जितान् पूपान् अन्नं मृष्टं सुपाकिकम् प्रीत्यर्थं सर्वसत्त्वानां दीयते ऽन्नं पुनः पुनः ॥
madhurāṃs tarjitān pūpān annaṃ mṛṣṭaṃ supākikam prītyarthaṃ sarvasattvānāṃ dīyate 'nnaṃ punaḥ punaḥ //
दत्तस्य दीयमानस्य धनस्यान्तो न विद्यते एवं दृष्ट्वा महायज्ञं देवदैत्याः सवारणाः ॥
dattasya dīyamānasya dhanasyānto na vidyate evaṃ dṛṣṭvā mahāyajñaṃ devadaityāḥ savāraṇāḥ //
गन्धर्वाप्सरसः सिद्धा ऋषयश् च प्रजेश्वराः विस्मयं परमं याता दृष्ट्वा क्रतुवरं शुभम् ॥
gandharvāpsarasaḥ siddhā ṛṣayaś ca prajeśvarāḥ vismayaṃ paramaṃ yātā dṛṣṭvā kratuvaraṃ śubham //
पुरोधा मन्त्रिणो राजा हृष्टास् तत्रैव सर्वशः न तत्र मलिनः कश्चिन् न दीनो न क्षुधान्वितः ॥
purodhā mantriṇo rājā hṛṣṭās tatraiva sarvaśaḥ na tatra malinaḥ kaścin na dīno na kṣudhānvitaḥ //
न वोपसर्गो न ग्लानिर् नाधयो व्याधयस् तथा नाकालमरणं तत्र न दंशो न ग्रहा विषम् ॥
na vopasargo na glānir nādhayo vyādhayas tathā nākālamaraṇaṃ tatra na daṃśo na grahā viṣam //
हृष्टपुष्टजनाः सर्वे तस्मिन् राज्ञो महोत्सवे ये च तत्र तपःसिद्धा मुनयश् चिरजीविनः ॥
hṛṣṭapuṣṭajanāḥ sarve tasmin rājño mahotsave ye ca tatra tapaḥsiddhā munayaś cirajīvinaḥ //
न जातं तादृशं यज्ञं धनधान्यसमन्वितम् एवं स राजा विधिवद् वाजिमेधं द्विजोत्तमाः क्रतुं समापयाम् आस प्रासादं वैष्णवं तथा ॥
na jātaṃ tādṛśaṃ yajñaṃ dhanadhānyasamanvitam evaṃ sa rājā vidhivad vājimedhaṃ dvijottamāḥ kratuṃ samāpayām āsa prāsādaṃ vaiṣṇavaṃ tathā //