विरजे विरजा माता ब्रह्माणी संप्रतिष्ठिता यस्याः संदर्शनान् मर्त्यः पुनात्य् आसप्तमं कुलम् ॥
viraje virajā mātā brahmāṇī saṃpratiṣṭhitā yasyāḥ saṃdarśanān martyaḥ punāty āsaptamaṃ kulam //
सकृद् दृष्ट्वा तु तां देवीं भक्त्यापूज्य प्रणम्य च नरः स्ववंशम् उद्धृत्य मम लोकं स गच्छति ॥
sakṛd dṛṣṭvā tu tāṃ devīṃ bhaktyāpūjya praṇamya ca naraḥ svavaṃśam uddhṛtya mama lokaṃ sa gacchati //
अन्याश् च तत्र तिष्ठन्ति विरजे लोकमातरः सर्वपापहरा देव्यो वरदा भक्तिवत्सलाः ॥
anyāś ca tatra tiṣṭhanti viraje lokamātaraḥ sarvapāpaharā devyo varadā bhaktivatsalāḥ //
आस्ते वैतरणी तत्र सर्वपापहरा नदी यस्यां स्नात्वा नरश्रेष्ठः सर्वपापैः प्रमुच्यते ॥
āste vaitaraṇī tatra sarvapāpaharā nadī yasyāṃ snātvā naraśreṣṭhaḥ sarvapāpaiḥ pramucyate //
आस्ते स्वयंभूस् तत्रैव क्रोडरूपी हरिः स्वयम् दृष्ट्वा प्रणम्य तं भक्त्या परं विष्णुं व्रजन्ति ते ॥
āste svayaṃbhūs tatraiva kroḍarūpī hariḥ svayam dṛṣṭvā praṇamya taṃ bhaktyā paraṃ viṣṇuṃ vrajanti te //
कापिले गोग्रहे सोमे तीर्थे चालाबुसंज्ञिते मृत्युंजये क्रोडतीर्थे वासुके सिद्धकेश्वरे ॥
kāpile gograhe some tīrthe cālābusaṃjñite mṛtyuṃjaye kroḍatīrthe vāsuke siddhakeśvare //
तीर्थेष्व् एतेषु मतिमान् विरजे संयतेन्द्रियः गत्वाष्टतीर्थं विधिवत् स्नात्वा देवान् प्रणम्य च ॥
tīrtheṣv eteṣu matimān viraje saṃyatendriyaḥ gatvāṣṭatīrthaṃ vidhivat snātvā devān praṇamya ca //
सर्वपापविनिर्मुक्तो विमानवरम् आस्थितः उपगीयमानो गन्धर्वैर् मम लोके महीयते ॥
sarvapāpavinirmukto vimānavaram āsthitaḥ upagīyamāno gandharvair mama loke mahīyate //
विरजे यो मम क्षेत्रे पिण्डदानं करोति वै स करोत्य् अक्षयां तृप्तिं पितॄणां नात्र संशयः ॥
viraje yo mama kṣetre piṇḍadānaṃ karoti vai sa karoty akṣayāṃ tṛptiṃ pitṝṇāṃ nātra saṃśayaḥ //
मम क्षेत्रे मुनिश्रेष्ठा विरजे ये कलेवरम् परित्यजन्ति पुरुषास् ते मोक्षं प्राप्नुवन्ति वै ॥
mama kṣetre muniśreṣṭhā viraje ye kalevaram parityajanti puruṣās te mokṣaṃ prāpnuvanti vai //
स्नात्वा यः सागरे मर्त्यो दृष्ट्वा च कपिलं हरिम् पश्येद् देवीं च वाराहीं स याति त्रिदशालयम् ॥
snātvā yaḥ sāgare martyo dṛṣṭvā ca kapilaṃ harim paśyed devīṃ ca vārāhīṃ sa yāti tridaśālayam //
सन्ति चान्यानि तीर्थानि पुण्यान्य् आयतनानि च तत्काले तु मुनिश्रेष्ठा वेदितव्यानि तानि वै ॥
santi cānyāni tīrthāni puṇyāny āyatanāni ca tatkāle tu muniśreṣṭhā veditavyāni tāni vai //
समुद्रस्योत्तरे तीरे तस्मिन् देशे द्विजोत्तमाः आस्ते गुह्यं परं क्षेत्रं मुक्तिदं पापनाशनम् ॥
samudrasyottare tīre tasmin deśe dvijottamāḥ āste guhyaṃ paraṃ kṣetraṃ muktidaṃ pāpanāśanam //
सर्वत्र वालुकाकीर्णं पवित्रं सर्वकामदम् दशयोजनविस्तीर्णं क्षेत्रं परमदुर्लभम् ॥
sarvatra vālukākīrṇaṃ pavitraṃ sarvakāmadam daśayojanavistīrṇaṃ kṣetraṃ paramadurlabham //
अशोकार्जुनपुंनागैर् बकुलैः सरलद्रुमैः पनसैर् नारिकेलैश् च शालैस् तालैः कपित्थकैः ॥
aśokārjunapuṃnāgair bakulaiḥ saraladrumaiḥ panasair nārikelaiś ca śālais tālaiḥ kapitthakaiḥ //
चम्पकैः कर्णिकारैश् च चूतबिल्वैः सपाटलैः कदम्बैः कोविदारैश् च लकुचैर् नागकेसरैः ॥
campakaiḥ karṇikāraiś ca cūtabilvaiḥ sapāṭalaiḥ kadambaiḥ kovidāraiś ca lakucair nāgakesaraiḥ //
प्राचीनामलकैर् लोध्रैर् नारङ्गैर् धवखादिरैः सर्जभूर्जाश्वकर्णैश् च तमालैर् देवदारुभिः ॥
prācīnāmalakair lodhrair nāraṅgair dhavakhādiraiḥ sarjabhūrjāśvakarṇaiś ca tamālair devadārubhiḥ //
मन्दारैः पारिजातैश् च न्यग्रोधागुरुचन्दनैः खर्जूराम्रातकैः सिद्धैर् मुचुकुन्दैः सकिंशुकैः ॥
mandāraiḥ pārijātaiś ca nyagrodhāgurucandanaiḥ kharjūrāmrātakaiḥ siddhair mucukundaiḥ sakiṃśukaiḥ //
अश्वत्थैः सप्तपर्णैश् च मधुधारशुभाञ्जनैः शिंशपामलकैर् नीपैर् निम्बतिन्दुविभीतकैः ॥
aśvatthaiḥ saptaparṇaiś ca madhudhāraśubhāñjanaiḥ śiṃśapāmalakair nīpair nimbatinduvibhītakaiḥ //
सर्वर्तुफलगन्धाढ्यैः सर्वर्तुकुसुमोज्ज्वलैः मनोह्लादकरैः शुभ्रैर् नानाविहगनादितैः ॥
sarvartuphalagandhāḍhyaiḥ sarvartukusumojjvalaiḥ manohlādakaraiḥ śubhrair nānāvihaganāditaiḥ //
श्रोत्ररम्यैः सुमधुरैर् बलनिर्मदनेरितैः मनसः प्रीतिजनकैः शब्दैः खगमुखेरितैः ॥
śrotraramyaiḥ sumadhurair balanirmadaneritaiḥ manasaḥ prītijanakaiḥ śabdaiḥ khagamukheritaiḥ //
चकोरैः शतपत्त्रैश् च भृङ्गराजैस् तथा शुकैः कोकिलैः कलविङ्कैश् च हारीतैर् जीवजीवकैः ॥
cakoraiḥ śatapattraiś ca bhṛṅgarājais tathā śukaiḥ kokilaiḥ kalaviṅkaiś ca hārītair jīvajīvakaiḥ //
प्रियपुत्रैश् चातकैश् च तथान्यैर् मधुरस्वरैः श्रोत्ररम्यैः प्रियकरैः कूजद्भिश् चार्वधिष्ठितैः ॥
priyaputraiś cātakaiś ca tathānyair madhurasvaraiḥ śrotraramyaiḥ priyakaraiḥ kūjadbhiś cārvadhiṣṭhitaiḥ //
केतकीवनखण्डैश् च अतिमुक्तैः सकुब्जकैः मालतीकुन्दबाणैश् च करवीरैः सितेतरैः ॥
ketakīvanakhaṇḍaiś ca atimuktaiḥ sakubjakaiḥ mālatīkundabāṇaiś ca karavīraiḥ sitetaraiḥ //
जम्बीरकरुणाङ्कोलैर् दाडिमैर् बीजपूरकैः मातुलुङ्गैः पूगफलैर् हिन्तालैः कदलीवनैः ॥
jambīrakaruṇāṅkolair dāḍimair bījapūrakaiḥ mātuluṅgaiḥ pūgaphalair hintālaiḥ kadalīvanaiḥ //
अन्यैश् च विविधैर् वृक्षैः पुष्पैश् चान्यैर् मनोहरैः लतावितानगुल्मैश् च विविधैश् च जलाशयैः ॥
anyaiś ca vividhair vṛkṣaiḥ puṣpaiś cānyair manoharaiḥ latāvitānagulmaiś ca vividhaiś ca jalāśayaiḥ //
दीर्घिकाभिस् तडागैश् च पुष्करिणीभिश् च वापिभिः नानाजलाशयैः पुण्यैः पद्मिनीखण्डमण्डितैः ॥
dīrghikābhis taḍāgaiś ca puṣkariṇībhiś ca vāpibhiḥ nānājalāśayaiḥ puṇyaiḥ padminīkhaṇḍamaṇḍitaiḥ //
सरांसि च मनोज्ञानि प्रसन्नसलिलानि च कुमुदैः पुण्डरीकैश् च तथा नीलोत्पलैः शुभैः ॥
sarāṃsi ca manojñāni prasannasalilāni ca kumudaiḥ puṇḍarīkaiś ca tathā nīlotpalaiḥ śubhaiḥ //
कह्लारैः कमलैश् चापि आचितानि समन्ततः कादम्बैश् चक्रवाकैश् च तथैव जलकुक्कुटैः ॥
kahlāraiḥ kamalaiś cāpi ācitāni samantataḥ kādambaiś cakravākaiś ca tathaiva jalakukkuṭaiḥ //
कारण्डवैः प्लवैर् हंसैः कूर्मैर् मत्स्यैश् च मद्गुभिः दात्यूहसारसाकीर्णैः कोयष्टिबकशोभितैः ॥
kāraṇḍavaiḥ plavair haṃsaiḥ kūrmair matsyaiś ca madgubhiḥ dātyūhasārasākīrṇaiḥ koyaṣṭibakaśobhitaiḥ //
एतैश् चान्यैश् च कूजद्भिः समन्ताज् जलचारिभिः खगैर् जलचरैश् चान्यैः कुसुमैश् च जलोद्भवैः ॥
etaiś cānyaiś ca kūjadbhiḥ samantāj jalacāribhiḥ khagair jalacaraiś cānyaiḥ kusumaiś ca jalodbhavaiḥ //
एवं नानाविधैर् वृक्षैः पुष्पैः स्थलजलोद्भवैः ब्रह्मचारिगृहस्थैश् च वानप्रस्थैश् च भिक्षुभिः ॥
evaṃ nānāvidhair vṛkṣaiḥ puṣpaiḥ sthalajalodbhavaiḥ brahmacārigṛhasthaiś ca vānaprasthaiś ca bhikṣubhiḥ //
स्वधर्मनिरतैर् वर्णैस् तथान्यैः समलंकृतम् हृष्टपुष्टजनाकीर्णं नरनारीसमाकुलम् ॥
svadharmaniratair varṇais tathānyaiḥ samalaṃkṛtam hṛṣṭapuṣṭajanākīrṇaṃ naranārīsamākulam //
अशेषविद्यानिलयं सर्वधर्मगुणाकरम् एवं सर्वगुणोपेतं क्षेत्रं परमदुर्लभम् ॥
aśeṣavidyānilayaṃ sarvadharmaguṇākaram evaṃ sarvaguṇopetaṃ kṣetraṃ paramadurlabham //
आस्ते तत्र मुनिश्रेष्ठा विख्यातः पुरुषोत्तमः यावद् उत्कलमर्यादा दिक् क्रमेण प्रकीर्तिता ॥
āste tatra muniśreṣṭhā vikhyātaḥ puruṣottamaḥ yāvad utkalamaryādā dik krameṇa prakīrtitā //
तावत् कृष्णप्रसादेन देशः पुण्यतमो हि सः यत्र तिष्ठति विश्वात्मा देशे स पुरुषोत्तमः ॥
tāvat kṛṣṇaprasādena deśaḥ puṇyatamo hi saḥ yatra tiṣṭhati viśvātmā deśe sa puruṣottamaḥ //
जगद्व्यापी जगन्नाथस् तत्र सर्वं प्रतिष्ठितम् अहं रुद्रश् च शक्रश् च देवाश् चाग्निपुरोगमाः ॥
jagadvyāpī jagannāthas tatra sarvaṃ pratiṣṭhitam ahaṃ rudraś ca śakraś ca devāś cāgnipurogamāḥ //
निवसामो मुनिश्रेष्ठास् तस्मिन् देशे सदा वयम् गन्धर्वाप्सरसः सर्वाः पितरो देवमानुषाः ॥
nivasāmo muniśreṣṭhās tasmin deśe sadā vayam gandharvāpsarasaḥ sarvāḥ pitaro devamānuṣāḥ //
यक्षा विद्याधराः सिद्धा मुनयः संशितव्रताः ऋषयो वालखिल्याश् च कश्यपाद्याः प्रजेश्वराः ॥
yakṣā vidyādharāḥ siddhā munayaḥ saṃśitavratāḥ ṛṣayo vālakhilyāś ca kaśyapādyāḥ prajeśvarāḥ //
सुपर्णाः किंनरा नागास् तथान्ये स्वर्गवासिनः साङ्गाश् च चतुरो वेदाः शास्त्राणि विविधानि च ॥
suparṇāḥ kiṃnarā nāgās tathānye svargavāsinaḥ sāṅgāś ca caturo vedāḥ śāstrāṇi vividhāni ca //
इतिहासपुराणानि यज्ञाश् च वरदक्षिणाः नद्यश् च विविधाः पुण्यास् तीर्थान्य् आयतनानि च ॥
itihāsapurāṇāni yajñāś ca varadakṣiṇāḥ nadyaś ca vividhāḥ puṇyās tīrthāny āyatanāni ca //
सागराश् च तथा शैलास् तस्मिन् देशे व्यवस्थिताः एवं पुण्यतमे देशे देवर्षिपितृसेविते ॥
sāgarāś ca tathā śailās tasmin deśe vyavasthitāḥ evaṃ puṇyatame deśe devarṣipitṛsevite //
सर्वोपभोगसहिते वासः कस्य न रोचते श्रेष्ठत्वं कस्य देशस्य किं चान्यद् अधिकं ततः ॥
sarvopabhogasahite vāsaḥ kasya na rocate śreṣṭhatvaṃ kasya deśasya kiṃ cānyad adhikaṃ tataḥ //
आस्ते यत्र स्वयं देवो मुक्तिदः पुरुषोत्तमः धन्यास् ते विबुधप्रख्या ये वसन्त्य् उत्कले नराः ॥
āste yatra svayaṃ devo muktidaḥ puruṣottamaḥ dhanyās te vibudhaprakhyā ye vasanty utkale narāḥ //
तीर्थराजजले स्नात्वा पश्यन्ति पुरुषोत्तमम् स्वर्गे वसन्ति ते मर्त्या न ते यान्ति यमालये ॥
tīrtharājajale snātvā paśyanti puruṣottamam svarge vasanti te martyā na te yānti yamālaye //
ये वसन्त्य् उत्कले क्षेत्रे पुण्ये श्रीपुरुषोत्तमे सफलं जीवितं तेषाम् उत्कलानां सुमेधसाम् ॥
ye vasanty utkale kṣetre puṇye śrīpuruṣottame saphalaṃ jīvitaṃ teṣām utkalānāṃ sumedhasām //
ये पश्यन्ति सुरश्रेष्ठं प्रसन्नायतलोचनम् चारुभ्रूकेशमुकुटं चारुकर्णावतंसकम् ॥
ye paśyanti suraśreṣṭhaṃ prasannāyatalocanam cārubhrūkeśamukuṭaṃ cārukarṇāvataṃsakam //
चारुस्मितं चारुदन्तं चारुकुण्डलमण्डितम् सुनासं सुकपोलं च सुललाटं सुलक्षणम् ॥
cārusmitaṃ cārudantaṃ cārukuṇḍalamaṇḍitam sunāsaṃ sukapolaṃ ca sulalāṭaṃ sulakṣaṇam //
त्रैलोक्यानन्दजननं कृष्णस्य मुखपङ्कजम् ॥
trailokyānandajananaṃ kṛṣṇasya mukhapaṅkajam //