भूयो ऽपि कथयास्माकं कथां सूर्यसमाश्रिताम् न तृप्तिम् अधिगच्छामः शृण्वन्तस् तां कथां शुभाम् ॥
bhūyo 'pi kathayāsmākaṃ kathāṃ sūryasamāśritām na tṛptim adhigacchāmaḥ śṛṇvantas tāṃ kathāṃ śubhām //
यो ऽयं दीप्तो महातेजा वह्निराशिसमप्रभः एतद् वेदितुम् इच्छामः प्रभावो ऽस्य कुतः प्रभो ॥
yo 'yaṃ dīpto mahātejā vahnirāśisamaprabhaḥ etad veditum icchāmaḥ prabhāvo 'sya kutaḥ prabho //
तमोभूतेषु लोकेषु नष्टे स्थावरजङ्गमे प्रकृतेर् गुणहेतुस् तु पूर्वं बुद्धिर् अजायत ॥
tamobhūteṣu lokeṣu naṣṭe sthāvarajaṅgame prakṛter guṇahetus tu pūrvaṃ buddhir ajāyata //
अहंकारस् ततो जातो महाभूतप्रवर्तकः वाय्वग्निर् आपः खं भूमिस् ततस् त्व् अण्डम् अजायत ॥
ahaṃkāras tato jāto mahābhūtapravartakaḥ vāyvagnir āpaḥ khaṃ bhūmis tatas tv aṇḍam ajāyata //
तस्मिन्न् अण्डे त्व् इमे लोकाः सप्त चैव प्रतिष्ठिताः पृथिवी सप्तभिर् द्वीपैः समुद्रैश् चैव सप्तभिः ॥
tasminn aṇḍe tv ime lokāḥ sapta caiva pratiṣṭhitāḥ pṛthivī saptabhir dvīpaiḥ samudraiś caiva saptabhiḥ //
तत्रैवावस्थितो ह्य् आसीद् अहं विष्णुर् महेश्वरः विमूढास् तामसाः सर्वे प्रध्यायन्ति तम् ईश्वरम् ॥
tatraivāvasthito hy āsīd ahaṃ viṣṇur maheśvaraḥ vimūḍhās tāmasāḥ sarve pradhyāyanti tam īśvaram //
ततो वै सुमहातेजाः प्रादुर्भूतस् तमोनुदः ध्यानयोगेन चास्माभिर् विज्ञातः सविता तदा ॥
tato vai sumahātejāḥ prādurbhūtas tamonudaḥ dhyānayogena cāsmābhir vijñātaḥ savitā tadā //
ज्ञात्वा च परमात्मानं सर्व एव पृथक् पृथक् दिव्याभिः स्तुतिभिर् देवः स्तुतो ऽस्माभिस् तदेश्वरः ॥
jñātvā ca paramātmānaṃ sarva eva pṛthak pṛthak divyābhiḥ stutibhir devaḥ stuto 'smābhis tadeśvaraḥ //
आदिदेवो ऽसि देवानाम् ऐश्वर्याच् च त्वम् ईश्वरः आदिकर्तासि भूतानां देवदेवो दिवाकरः ॥
ādidevo 'si devānām aiśvaryāc ca tvam īśvaraḥ ādikartāsi bhūtānāṃ devadevo divākaraḥ //
जीवनः सर्वभूतानां देवगन्धर्वरक्षसाम् मुनिकिंनरसिद्धानां तथैवोरगपक्षिणाम् ॥
jīvanaḥ sarvabhūtānāṃ devagandharvarakṣasām munikiṃnarasiddhānāṃ tathaivoragapakṣiṇām //
त्वं ब्रह्मा त्वं महादेवस् त्वं विष्णुस् त्वं प्रजापतिः वायुर् इन्द्रश् च सोमश् च विवस्वान् वरुणस् तथा ॥
tvaṃ brahmā tvaṃ mahādevas tvaṃ viṣṇus tvaṃ prajāpatiḥ vāyur indraś ca somaś ca vivasvān varuṇas tathā //
त्वं कालः सृष्टिकर्ता च हर्ता भर्ता तथा प्रभुः सरितः सागराः शैला विद्युदिन्द्रधनूंषि च ॥
tvaṃ kālaḥ sṛṣṭikartā ca hartā bhartā tathā prabhuḥ saritaḥ sāgarāḥ śailā vidyudindradhanūṃṣi ca //
प्रलयः प्रभवश् चैव व्यक्ताव्यक्तः सनातनः ईश्वरात् परतो विद्या विद्यायाः परतः शिवः ॥
pralayaḥ prabhavaś caiva vyaktāvyaktaḥ sanātanaḥ īśvarāt parato vidyā vidyāyāḥ parataḥ śivaḥ //
शिवात् परतरो देवस् त्वम् एव परमेश्वरः सर्वतःपाणिपादान्तः सर्वतोक्षिशिरोमुखः ॥
śivāt parataro devas tvam eva parameśvaraḥ sarvataḥpāṇipādāntaḥ sarvatokṣiśiromukhaḥ //
सहस्रांशुः सहस्रास्यः सहस्रचरणेक्षणः भूतादिर् भूर् भुवः स्वश् च महः सत्यं तपो जनः ॥
sahasrāṃśuḥ sahasrāsyaḥ sahasracaraṇekṣaṇaḥ bhūtādir bhūr bhuvaḥ svaś ca mahaḥ satyaṃ tapo janaḥ //
प्रदीप्तं दीपनं दिव्यं सर्वलोकप्रकाशकम् दुर्निरीक्षं सुरेन्द्राणां यद् रूपं तस्य ते नमः ॥
pradīptaṃ dīpanaṃ divyaṃ sarvalokaprakāśakam durnirīkṣaṃ surendrāṇāṃ yad rūpaṃ tasya te namaḥ //
सुरसिद्धगणैर् जुष्टं भृग्वत्रिपुलहादिभिः स्तुतं परमम् अव्यक्तं यद् रूपं तस्य ते नमः ॥
surasiddhagaṇair juṣṭaṃ bhṛgvatripulahādibhiḥ stutaṃ paramam avyaktaṃ yad rūpaṃ tasya te namaḥ //
वेद्यं वेदविदां नित्यं सर्वज्ञानसमन्वितम् सर्वदेवातिदेवस्य यद् रूपं तस्य ते नमः ॥
vedyaṃ vedavidāṃ nityaṃ sarvajñānasamanvitam sarvadevātidevasya yad rūpaṃ tasya te namaḥ //
विश्वकृद् विश्वभूतं च वैश्वानरसुरार्चितम् विश्वस्थितम् अचिन्त्यं च यद् रूपं तस्य ते नमः ॥
viśvakṛd viśvabhūtaṃ ca vaiśvānarasurārcitam viśvasthitam acintyaṃ ca yad rūpaṃ tasya te namaḥ //
परं यज्ञात् परं वेदात् परं लोकात् परं दिवः परमात्मेत्य् अभिख्यातं यद् रूपं तस्य ते नमः ॥
paraṃ yajñāt paraṃ vedāt paraṃ lokāt paraṃ divaḥ paramātmety abhikhyātaṃ yad rūpaṃ tasya te namaḥ //
अविज्ञेयम् अनालक्ष्यम् अध्यानगतम् अव्ययम् अनादिनिधनं चैव यद् रूपं तस्य ते नमः ॥
avijñeyam anālakṣyam adhyānagatam avyayam anādinidhanaṃ caiva yad rūpaṃ tasya te namaḥ //
नमो नमः कारणकारणाय नमो नमः पापविमोचनाय नमो नमस् ते दितिजार्दनाय नमो नमो रोगविमोचनाय
namo namaḥ kāraṇakāraṇāya namo namaḥ pāpavimocanāya namo namas te ditijārdanāya namo namo rogavimocanāya
नमो नमः सर्ववरप्रदाय नमो नमः सर्वसुखप्रदाय नमो नमः सर्वधनप्रदाय नमो नमः सर्वमतिप्रदाय
namo namaḥ sarvavarapradāya namo namaḥ sarvasukhapradāya namo namaḥ sarvadhanapradāya namo namaḥ sarvamatipradāya
स्तुतः स भगवान् एवं तैजसं रूपम् आस्थितः उवाच वाचा कल्याण्या को वरो वः प्रदीयताम् ॥
stutaḥ sa bhagavān evaṃ taijasaṃ rūpam āsthitaḥ uvāca vācā kalyāṇyā ko varo vaḥ pradīyatām //
तवातितैजसं रूपं न कश्चित् सोढुम् उत्सहेत् सहनीयं तद् भवतु हिताय जगतः प्रभो ॥
tavātitaijasaṃ rūpaṃ na kaścit soḍhum utsahet sahanīyaṃ tad bhavatu hitāya jagataḥ prabho //
एवम् अस्त्व् इति सो ऽप्य् उक्त्वा भगवान् आदिकृत् प्रभुः लोकानां कार्यसिद्ध्यर्थं घर्मवर्षहिमप्रदः ॥
evam astv iti so 'py uktvā bhagavān ādikṛt prabhuḥ lokānāṃ kāryasiddhyarthaṃ gharmavarṣahimapradaḥ //
ततः सांख्याश् च योगाश् च ये चान्ये मोक्षकाङ्क्षिणः ध्यायन्ति ध्यायिनो देवं हृदयस्थं दिवाकरम् ॥
tataḥ sāṃkhyāś ca yogāś ca ye cānye mokṣakāṅkṣiṇaḥ dhyāyanti dhyāyino devaṃ hṛdayasthaṃ divākaram //
सर्वलक्षणहीनो ऽपि युक्तो वा सर्वपातकैः सर्वं च तरते पापं देवम् अर्कं समाश्रितः ॥
sarvalakṣaṇahīno 'pi yukto vā sarvapātakaiḥ sarvaṃ ca tarate pāpaṃ devam arkaṃ samāśritaḥ //
अग्निहोत्रं च वेदाश् च यज्ञाश् च बहुदक्षिणाः भानोर् भक्तिनमस्कारकलां नार्हन्ति षोडशीम् ॥
agnihotraṃ ca vedāś ca yajñāś ca bahudakṣiṇāḥ bhānor bhaktinamaskārakalāṃ nārhanti ṣoḍaśīm //
तीर्थानां परमं तीर्थं मङ्गलानां च मङ्गलम् पवित्रं च पवित्राणां प्रपद्यन्ते दिवाकरम् ॥
tīrthānāṃ paramaṃ tīrthaṃ maṅgalānāṃ ca maṅgalam pavitraṃ ca pavitrāṇāṃ prapadyante divākaram //
शक्राद्यैः संस्तुतं देवं ये नमस्यन्ति भास्करम् सर्वकिल्बिषनिर्मुक्ताः सूर्यलोकं व्रजन्ति ते ॥
śakrādyaiḥ saṃstutaṃ devaṃ ye namasyanti bhāskaram sarvakilbiṣanirmuktāḥ sūryalokaṃ vrajanti te //
चिरात् प्रभृति नो ब्रह्मञ् श्रोतुम् इच्छा प्रवर्तते नाम्नाम् अष्टशतं ब्रूहि यत् त्वयोक्तं पुरा रवेः ॥
cirāt prabhṛti no brahmañ śrotum icchā pravartate nāmnām aṣṭaśataṃ brūhi yat tvayoktaṃ purā raveḥ //
अष्टोत्तरशतं नाम्नां शृणुध्वं गदतो मम भास्करस्य परं गुह्यं स्वर्गमोक्षप्रदं द्विजाः ॥
aṣṭottaraśataṃ nāmnāṃ śṛṇudhvaṃ gadato mama bhāskarasya paraṃ guhyaṃ svargamokṣapradaṃ dvijāḥ //
ओं सूर्यो ऽर्यमा भगस् त्वष्टा पूषार्कः सविता रविः गभस्तिमान् अजः कालो मृत्युर् धाता प्रभाकरः ॥
oṃ sūryo 'ryamā bhagas tvaṣṭā pūṣārkaḥ savitā raviḥ gabhastimān ajaḥ kālo mṛtyur dhātā prabhākaraḥ //
पृथिव्य् आपश् च तेजश् च खं वायुश् च परायणम् सोमो बृहस्पतिः शुक्रो बुधो ऽङ्गारक एव च ॥
pṛthivy āpaś ca tejaś ca khaṃ vāyuś ca parāyaṇam somo bṛhaspatiḥ śukro budho 'ṅgāraka eva ca //
इन्द्रो विवस्वान् दीप्तांशुः शुचिः शौरिः शनैश्चरः ब्रह्मा विष्णुश् च रुद्रश् च स्कन्दो वैश्रवणो यमः ॥
indro vivasvān dīptāṃśuḥ śuciḥ śauriḥ śanaiścaraḥ brahmā viṣṇuś ca rudraś ca skando vaiśravaṇo yamaḥ //
वैद्युतो जाठरश् चाग्निर् ऐन्धनस् तेजसां पतिः धर्मध्वजो वेदकर्ता वेदाङ्गो वेदवाहनः ॥
vaidyuto jāṭharaś cāgnir aindhanas tejasāṃ patiḥ dharmadhvajo vedakartā vedāṅgo vedavāhanaḥ //
कृतं त्रेता द्वापरश् च कलिः सर्वामराश्रयः कलाकाष्ठामुहूर्ताश् च क्षपा यामास् तथा क्षणाः ॥
kṛtaṃ tretā dvāparaś ca kaliḥ sarvāmarāśrayaḥ kalākāṣṭhāmuhūrtāś ca kṣapā yāmās tathā kṣaṇāḥ //
संवत्सरकरो ऽश्वत्थः कालचक्रो विभावसुः पुरुषः शाश्वतो योगी व्यक्ताव्यक्तः सनातनः ॥
saṃvatsarakaro 'śvatthaḥ kālacakro vibhāvasuḥ puruṣaḥ śāśvato yogī vyaktāvyaktaḥ sanātanaḥ //
कालाध्यक्षः प्रजाध्यक्षो विश्वकर्मा तमोनुदः वरुणः सागरो ऽंशश् च जीमूतो जिवनो ऽरिहा ॥
kālādhyakṣaḥ prajādhyakṣo viśvakarmā tamonudaḥ varuṇaḥ sāgaro 'ṃśaś ca jīmūto jivano 'rihā //
भूताश्रयो भूतपतिः सर्वलोकनमस्कृतः स्रष्टा संवर्तको वह्निः सर्वस्यादिर् अलोलुपः ॥
bhūtāśrayo bhūtapatiḥ sarvalokanamaskṛtaḥ sraṣṭā saṃvartako vahniḥ sarvasyādir alolupaḥ //
अनन्तः कपिलो भानुः कामदः सर्वतोमुखः जयो विशालो वरदः सर्वभूतनिषेवितः ॥
anantaḥ kapilo bhānuḥ kāmadaḥ sarvatomukhaḥ jayo viśālo varadaḥ sarvabhūtaniṣevitaḥ //
मनः सुपर्णो भूतादिः शीघ्रगः प्राणधारणः धन्वन्तरिर् धूमकेतुर् आदिदेवो ऽदितेः सुतः ॥
manaḥ suparṇo bhūtādiḥ śīghragaḥ prāṇadhāraṇaḥ dhanvantarir dhūmaketur ādidevo 'diteḥ sutaḥ //
द्वादशात्मा रविर् दक्षः पिता माता पितामहः स्वर्गद्वारं प्रजाद्वारं मोक्षद्वारं त्रिविष्टपम् ॥
dvādaśātmā ravir dakṣaḥ pitā mātā pitāmahaḥ svargadvāraṃ prajādvāraṃ mokṣadvāraṃ triviṣṭapam //
देहकर्ता प्रशान्तात्मा विश्वात्मा विश्वतोमुखः चराचरात्मा सूक्ष्मात्मा मैत्रेयः करुणान्वितः ॥
dehakartā praśāntātmā viśvātmā viśvatomukhaḥ carācarātmā sūkṣmātmā maitreyaḥ karuṇānvitaḥ //
एतद् वै कीर्तनीयस्य सूर्यस्यामिततेजसः नाम्नाम् अष्टशतं रम्यं मया प्रोक्तं द्विजोत्तमाः ॥
etad vai kīrtanīyasya sūryasyāmitatejasaḥ nāmnām aṣṭaśataṃ ramyaṃ mayā proktaṃ dvijottamāḥ //
सुरगणपितृयक्षसेवितं ह्य् असुरनिशाकरसिद्धवन्दितम् वरकनकहुताशनप्रभं प्रणिपतितो ऽस्मि हिताय भास्करम्
suragaṇapitṛyakṣasevitaṃ hy asuraniśākarasiddhavanditam varakanakahutāśanaprabhaṃ praṇipatito 'smi hitāya bhāskaram
सूर्योदये यः सुसमाहितः पठेत् स पुत्रदारान् धनरत्नसंचयान् लभेत जातिस्मरतां नरः स तु स्मृतिं च मेधां च स विन्दते पराम्
sūryodaye yaḥ susamāhitaḥ paṭhet sa putradārān dhanaratnasaṃcayān labheta jātismaratāṃ naraḥ sa tu smṛtiṃ ca medhāṃ ca sa vindate parām
इमं स्तवं देववरस्य यो नरः प्रकीर्तयेच् छुद्धमनाः समाहितः विमुच्यते शोकदवाग्निसागराल् लभेत कामान् मनसा यथेप्सितान्
imaṃ stavaṃ devavarasya yo naraḥ prakīrtayec chuddhamanāḥ samāhitaḥ vimucyate śokadavāgnisāgarāl labheta kāmān manasā yathepsitān