इत्थं स्तुतस् तदा तेन मुचुकुन्देन धीमता प्राहेशः सर्वभूतानाम् अनादिनिधनो हरिः ॥
itthaṃ stutas tadā tena mucukundena dhīmatā prāheśaḥ sarvabhūtānām anādinidhano hariḥ //
यथाभिवाञ्छितांल् लोकान् दिव्यान् गच्छ नरेश्वर अव्याहतपरैश्वर्यो मत्प्रसादोपबृंहितः ॥
yathābhivāñchitāṃl lokān divyān gaccha nareśvara avyāhataparaiśvaryo matprasādopabṛṃhitaḥ //
भुक्त्वा दिव्यान् महाभोगान् भविष्यसि महाकुले जातिस्मरो मत्प्रसादात् ततो मोक्षम् अवाप्स्यसि ॥
bhuktvā divyān mahābhogān bhaviṣyasi mahākule jātismaro matprasādāt tato mokṣam avāpsyasi //
इत्य् उक्तः प्रणिपत्येशं जगताम् अच्युतं नृपः गुहामुखाद् विनिष्क्रान्तो ददृशे सो ऽल्पकान् नरान् ॥
ity uktaḥ praṇipatyeśaṃ jagatām acyutaṃ nṛpaḥ guhāmukhād viniṣkrānto dadṛśe so 'lpakān narān //
ततः कलियुगं ज्ञात्वा प्राप्तं तप्तुं ततो नृपः नरनारायणस्थानं प्रययौ गन्धमादनम् ॥
tataḥ kaliyugaṃ jñātvā prāptaṃ taptuṃ tato nṛpaḥ naranārāyaṇasthānaṃ prayayau gandhamādanam //
कृष्णो ऽपि घातयित्वारिम् उपायेन हि तद्बलम् जग्राह मथुराम् एत्य हस्त्यश्वस्यन्दनोज्ज्वलम् ॥
kṛṣṇo 'pi ghātayitvārim upāyena hi tadbalam jagrāha mathurām etya hastyaśvasyandanojjvalam //
आनीय चोग्रसेनाय द्वारवत्यां न्यवेदयत् पराभिभवनिःशङ्कं बभूव च यदोः कुलम् ॥
ānīya cograsenāya dvāravatyāṃ nyavedayat parābhibhavaniḥśaṅkaṃ babhūva ca yadoḥ kulam //
बलदेवो ऽपि विप्रेन्द्राः प्रशान्ताखिलविग्रहः ज्ञातिदर्शनसोत्कण्ठः प्रययौ नन्दगोकुलम् ॥
baladevo 'pi viprendrāḥ praśāntākhilavigrahaḥ jñātidarśanasotkaṇṭhaḥ prayayau nandagokulam //
ततो गोपाश् च गोप्यश् च यथापूर्वम् अमित्रजित् तथैवाभ्यवदत् प्रेम्णा बहुमानपुरःसरम् ॥
tato gopāś ca gopyaś ca yathāpūrvam amitrajit tathaivābhyavadat premṇā bahumānapuraḥsaram //
कैश् चापि संपरिष्वक्तः कांश्चित् स परिषस्वजे हासं चक्रे समं कैश्चिद् गोपगोपीजनैस् तथा ॥
kaiś cāpi saṃpariṣvaktaḥ kāṃścit sa pariṣasvaje hāsaṃ cakre samaṃ kaiścid gopagopījanais tathā //
प्रियाण्य् अनेकान्य् अवदन् गोपास् तत्र हलायुधम् गोप्यश् च प्रेममुदिताः प्रोचुः सेर्ष्यम् अथापराः ॥
priyāṇy anekāny avadan gopās tatra halāyudham gopyaś ca premamuditāḥ procuḥ serṣyam athāparāḥ //
गोप्यः पप्रच्छुर् अपरा नागरीजनवल्लभः कच्चिद् आस्ते सुखं कृष्णश् चलत्प्रेमरसाकुलः ॥
gopyaḥ papracchur aparā nāgarījanavallabhaḥ kaccid āste sukhaṃ kṛṣṇaś calatpremarasākulaḥ //
अस्मच्चेष्टोपहसनं न कच्चित् पुरयोषिताम् सौभाग्यमानम् अधिकं करोति क्षणसौहृदः ॥
asmacceṣṭopahasanaṃ na kaccit purayoṣitām saubhāgyamānam adhikaṃ karoti kṣaṇasauhṛdaḥ //
कच्चित् स्मरति नः कृष्णो गीतानुगमनं कृतम् अप्य् असौ मातरं द्रष्टुं सकृद् अप्य् आगमिष्यति ॥
kaccit smarati naḥ kṛṣṇo gītānugamanaṃ kṛtam apy asau mātaraṃ draṣṭuṃ sakṛd apy āgamiṣyati //
अथवा किं तदालापैः क्रियन्ताम् अपराः कथाः यद् अस्माभिर् विना तेन विनास्माकं भविष्यति ॥
athavā kiṃ tadālāpaiḥ kriyantām aparāḥ kathāḥ yad asmābhir vinā tena vināsmākaṃ bhaviṣyati //
पिता माता तथा भ्राता भर्ता बन्धुजनश् च कः न त्यक्तस् तत्कृते श्माभिर् अकृतज्ञस् ततो हि सः ॥
pitā mātā tathā bhrātā bhartā bandhujanaś ca kaḥ na tyaktas tatkṛte śmābhir akṛtajñas tato hi saḥ //
तथापि कच्चिद् आत्मीयम् इहागमनसंश्रयम् करोति कृष्णो वक्तव्यं भवता वचनामृतम् ॥
tathāpi kaccid ātmīyam ihāgamanasaṃśrayam karoti kṛṣṇo vaktavyaṃ bhavatā vacanāmṛtam //
दामोदरो ऽसौ गोविन्दः पुरस्त्रीसक्तमानसः अपेतप्रीतिर् अस्मासु दुर्दर्शः प्रतिभाति नः ॥
dāmodaro 'sau govindaḥ purastrīsaktamānasaḥ apetaprītir asmāsu durdarśaḥ pratibhāti naḥ //
आमन्त्रितः स कृष्णेति पुनर् दामोदरेति च जहसुः सुस्वरं गोप्यो हरिणा कृष्टचेतसः ॥
āmantritaḥ sa kṛṣṇeti punar dāmodareti ca jahasuḥ susvaraṃ gopyo hariṇā kṛṣṭacetasaḥ //
संदेशैः सौम्यमधुरैः प्रेमगर्भैर् अगर्वितैः रामेणाश्वासिता गोप्यः कृष्णस्यातिमधुस्वरैः ॥
saṃdeśaiḥ saumyamadhuraiḥ premagarbhair agarvitaiḥ rāmeṇāśvāsitā gopyaḥ kṛṣṇasyātimadhusvaraiḥ //
गोपैश् च पूर्ववद् रामः परिहासमनोहरैः कथाश् चकार प्रेम्णा च सह तैर् व्रजभूमिषु ॥
gopaiś ca pūrvavad rāmaḥ parihāsamanoharaiḥ kathāś cakāra premṇā ca saha tair vrajabhūmiṣu //