सोमतीर्थम् इति ख्यातं तद् अप्य् उक्तं महात्मभिः तत्र स्नानेन दानेन सोमपानफलं लभेत् ॥
somatīrtham iti khyātaṃ tad apy uktaṃ mahātmabhiḥ tatra snānena dānena somapānaphalaṃ labhet //
जगतां मातरः पूर्वम् ओषध्यो जीवसंमताः ममापि मातरो देव्यः पूर्वासां पूर्ववत्तराः ॥
jagatāṃ mātaraḥ pūrvam oṣadhyo jīvasaṃmatāḥ mamāpi mātaro devyaḥ pūrvāsāṃ pūrvavattarāḥ //
आसु प्रतिष्ठितो धर्मः स्वाध्यायो यज्ञकर्म च आभिर् एव धृतं सर्वं त्रैलोक्यं सचराचरम् ॥
āsu pratiṣṭhito dharmaḥ svādhyāyo yajñakarma ca ābhir eva dhṛtaṃ sarvaṃ trailokyaṃ sacarācaram //
अशेषरोगोपशमो भवत्य् आभिर् असंशयम् अन्नम् एताभिर् एव स्याद् अशेषप्राणरक्षणम् अत्रौषध्यो जगद्वन्द्या माम् ऊचुर् अनहंकृताः ॥
aśeṣarogopaśamo bhavaty ābhir asaṃśayam annam etābhir eva syād aśeṣaprāṇarakṣaṇam atrauṣadhyo jagadvandyā mām ūcur anahaṃkṛtāḥ //
अस्माकं त्वं पतिं देहि राजानं सुरसत्तम ॥
asmākaṃ tvaṃ patiṃ dehi rājānaṃ surasattama //
तच् छ्रुत्वा वचनं तासां मयोक्ता ओषधीर् इदम् पतिं प्राप्स्यथ सर्वाश् च राजानं प्रीतिवर्धनम् ॥
tac chrutvā vacanaṃ tāsāṃ mayoktā oṣadhīr idam patiṃ prāpsyatha sarvāś ca rājānaṃ prītivardhanam //
राजानम् इति तच् छ्रुत्वा ता माम् ऊचुः पुनर् मुने गन्तव्यं क्व पुनश् चोक्ता गौतमीं यान्तु मातरः ॥
rājānam iti tac chrutvā tā mām ūcuḥ punar mune gantavyaṃ kva punaś coktā gautamīṃ yāntu mātaraḥ //
तुष्टायाम् अथ तस्यां वो राजा स्याल् लोकपूजितः ताश् च गत्वा मुनिश्रेष्ठ तुष्टुवुर् गौतमीं नदीम् ॥
tuṣṭāyām atha tasyāṃ vo rājā syāl lokapūjitaḥ tāś ca gatvā muniśreṣṭha tuṣṭuvur gautamīṃ nadīm //
किं वाकरिष्यन् भववर्तिनो जना नानाघसंघाभिभवाच् च दुःखिताः न चागमिष्यद् भवती भुवं चेत् पुण्योदके गौतमि शंभुकान्ते
kiṃ vākariṣyan bhavavartino janā nānāghasaṃghābhibhavāc ca duḥkhitāḥ na cāgamiṣyad bhavatī bhuvaṃ cet puṇyodake gautami śaṃbhukānte
को वेत्ति भाग्यं नरदेहभाजां महीगतानां सरिताम् अधीशे एषां महापातकसंघहन्त्री त्वम् अम्ब गङ्गे सुलभा सदैव
ko vetti bhāgyaṃ naradehabhājāṃ mahīgatānāṃ saritām adhīśe eṣāṃ mahāpātakasaṃghahantrī tvam amba gaṅge sulabhā sadaiva
न ते विभूतिं ननु वेत्ति को ऽपि त्रैलोक्यवन्द्ये जगदम्ब गङ्गे गौरीसमालिङ्गितविग्रहो ऽपि धत्ते स्मरारिः शिरसापि यत् त्वाम्
na te vibhūtiṃ nanu vetti ko 'pi trailokyavandye jagadamba gaṅge gaurīsamāliṅgitavigraho 'pi dhatte smarāriḥ śirasāpi yat tvām
नमो ऽस्तु ते मातर् अभीष्टदायिनि नमो ऽस्तु ते ब्रह्ममये ऽघनाशिनि नमो ऽस्तु ते विष्णुपदाब्जनिःसृते नमो ऽस्तु ते शंभुजटाविनिःसृते
namo 'stu te mātar abhīṣṭadāyini namo 'stu te brahmamaye 'ghanāśini namo 'stu te viṣṇupadābjaniḥsṛte namo 'stu te śaṃbhujaṭāviniḥsṛte
इत्य् एवं स्तुवताम् ईशा किं ददामीत्य् अवोचत ॥
ity evaṃ stuvatām īśā kiṃ dadāmīty avocata //
पतिं देहि जगन्माता राजानम् अतितेजसम् ॥
patiṃ dehi jaganmātā rājānam atitejasam //
तदोवाच नदी गङ्गा ओषधीस् ता इदं वचः ॥
tadovāca nadī gaṅgā oṣadhīs tā idaṃ vacaḥ //
अहं चामृतरूपास्मि ओषध्यो मातरो ऽमृताः तादृशं चामृतात्मानं पतिं सोमं ददामि वः ॥
ahaṃ cāmṛtarūpāsmi oṣadhyo mātaro 'mṛtāḥ tādṛśaṃ cāmṛtātmānaṃ patiṃ somaṃ dadāmi vaḥ //
देवाश् च ऋषयो वाक्यं मेनिरे सोम एव च ओषध्यश् चापि तद् वाक्यं ततो जग्मुः स्वम् आलयम् ॥
devāś ca ṛṣayo vākyaṃ menire soma eva ca oṣadhyaś cāpi tad vākyaṃ tato jagmuḥ svam ālayam //
यत्र चापुर् महौषध्यो राजानम् अमृतात्मकम् सोमं समस्तसंतापपापसंघनिवारकम् ॥
yatra cāpur mahauṣadhyo rājānam amṛtātmakam somaṃ samastasaṃtāpapāpasaṃghanivārakam //
सोमतीर्थं तु तत् ख्यातं सोमपानफलप्रदम् तत्र स्नानेन दानेन पितरः स्वर्गम् आप्नुयुः ॥
somatīrthaṃ tu tat khyātaṃ somapānaphalapradam tatra snānena dānena pitaraḥ svargam āpnuyuḥ //
य इदं शृणुयान् नित्यं पठेद् वा भक्तितः स्मरेत् दीर्घम् आयुर् अवाप्नोति स पुत्री धनवान् भवेत् ॥
ya idaṃ śṛṇuyān nityaṃ paṭhed vā bhaktitaḥ smaret dīrgham āyur avāpnoti sa putrī dhanavān bhavet //