श्रीबादरायणिरुवाच यः पुरूरवसः पुत्र आयुस्तस्याभवन् सुताः । नहुषः क्षत्रवृद्धश्च रजी राभश्च वीर्यवान् ॥
śrībādarāyaṇiruvāca yaḥ purūravasaḥ putra āyustasyābhavan sutāḥ / nahuṣaḥ kṣatravṛddhaśca rajī rābhaśca vīryavān //
अनेना इति राजेन्द्र शृणु क्षत्रवृधो ऽन्वयम् । क्षत्रवृद्धसुतस्यासन् सुहोत्रस्यात्मजास्त्रयः ॥
anenā iti rājendra śṛṇu kṣatravṛdho 'nvayam / kṣatravṛddhasutasyāsan suhotrasyātmajāstrayaḥ //
काश्यः कुशो गृत्समद इति गृत्समदादभूत् । शुनकः शौनको यस्य बह्वृचप्रवरो मुनिः ॥
kāśyaḥ kuśo gṛtsamada iti gṛtsamadādabhūt / śunakaḥ śaunako yasya bahvṛcapravaro muniḥ //
काश्यस्य काशिस्तत्पुत्रो राष्ट्रो दीर्घतमःपिता । धन्वन्तरिर्दीर्घतमस आयुर्वेदप्रवर्तकः ॥
kāśyasya kāśistatputro rāṣṭro dīrghatamaḥpitā / dhanvantarirdīrghatamasa āyurvedapravartakaḥ //
यज्ञभुग् वासुदेवांशः स्मृतमात्रार्तिनाशनः । तत्पुत्रः केतुमान् अस्य जज्ञे भीमरथस्ततः ॥
yajñabhug vāsudevāṃśaḥ smṛtamātrārtināśanaḥ / tatputraḥ ketumān asya jajñe bhīmarathastataḥ //
दिवोदासो द्युमांस्तस्मात् प्रतर्दन इति स्मृतः । स एव शत्रुजिद्वत्स ऋतध्वज इतीरितः । तथा कुवलयाश्वेति प्रोक्तो ऽलर्कादयस्ततः ॥
divodāso dyumāṃstasmāt pratardana iti smṛtaḥ / sa eva śatrujidvatsa ṛtadhvaja itīritaḥ / tathā kuvalayāśveti prokto 'larkādayastataḥ //
षष्टिं वर्षसहस्राणि षष्टिं वर्षशतानि च । नालर्कादपरो राजन् बुभुजे मेदिनीं युवा ॥
ṣaṣṭiṃ varṣasahasrāṇi ṣaṣṭiṃ varṣaśatāni ca / nālarkādaparo rājan bubhuje medinīṃ yuvā //
अलर्कात् सन्ततिस्तस्मात् सुनीथो ऽथ निकेतनः । धर्मकेतुः सुतस्तस्मात् सत्यकेतुरजायत ॥
alarkāt santatistasmāt sunītho 'tha niketanaḥ / dharmaketuḥ sutastasmāt satyaketurajāyata //
धृष्टकेतुस्ततस्तस्मात् सुकुमारः क्षितीश्वरः । वीतिहोत्रो ऽस्य भर्गो ऽतो भार्गभूमिरभून् नृप ॥
dhṛṣṭaketustatastasmāt sukumāraḥ kṣitīśvaraḥ / vītihotro 'sya bhargo 'to bhārgabhūmirabhūn nṛpa //
इतीमे काशयो भूपाः क्षत्रवृद्धान्वयायिनः । राभस्य रभसः पुत्रो गम्भीरश्चाक्रियस्ततः ॥
itīme kāśayo bhūpāḥ kṣatravṛddhānvayāyinaḥ / rābhasya rabhasaḥ putro gambhīraścākriyastataḥ //
तद्गोत्रं ब्रह्मविज् जज्ञे शृणु वंशमनेनसः । शुद्धस्ततः शुचिस्तस्माच् चित्रकृद्धर्मसारथिः ॥
tadgotraṃ brahmavij jajñe śṛṇu vaṃśamanenasaḥ / śuddhastataḥ śucistasmāc citrakṛddharmasārathiḥ //
ततः शान्तरजो जज्ञे कृतकृत्यः स आत्मवान् । रजेः पञ्चशतान्यासन् पुत्राणाममितौजसाम् ॥
tataḥ śāntarajo jajñe kṛtakṛtyaḥ sa ātmavān / rajeḥ pañcaśatānyāsan putrāṇāmamitaujasām //
देवैरभ्यर्थितो दैत्यान् हत्वेन्द्रायाददाद्दिवम् । इन्द्रस्तस्मै पुनर्दत्त्वा गृहीत्वा चरणौ रजेः ॥
devairabhyarthito daityān hatvendrāyādadāddivam / indrastasmai punardattvā gṛhītvā caraṇau rajeḥ //
आत्मानमर्पयामास प्रह्रादाद्यरिशङ्कितः । पितर्युपरते पुत्रा याचमानाय नो ददुः ॥
ātmānamarpayāmāsa prahrādādyariśaṅkitaḥ / pitaryuparate putrā yācamānāya no daduḥ //
त्रिविष्टपं महेन्द्राय यज्ञभागान् समाददुः । गुरुणा हूयमाने ऽग्नौ बलभित् तनयान् रजेः ॥
triviṣṭapaṃ mahendrāya yajñabhāgān samādaduḥ / guruṇā hūyamāne 'gnau balabhit tanayān rajeḥ //
अवधीद्भ्रंशितान् मार्गान् न कश्चिदवशेषितः । कुशात् प्रतिः क्षात्रवृद्धात् सञ्जयस्तत्सुतो जयः ॥
avadhīdbhraṃśitān mārgān na kaścidavaśeṣitaḥ / kuśāt pratiḥ kṣātravṛddhāt sañjayastatsuto jayaḥ //
ततः कृतः कृतस्यापि जज्ञे हर्यबलो नृपः । सहदेवस्ततो हीनो जयसेनस्तु तत्सुतः ॥
tataḥ kṛtaḥ kṛtasyāpi jajñe haryabalo nṛpaḥ / sahadevastato hīno jayasenastu tatsutaḥ //
सङ्कृतिस्तस्य च जयः क्षत्रधर्मा महारथः । क्षत्रवृद्धान्वया भूपा इमे शृण्व् अथ नाहुषान् ॥
saṅkṛtistasya ca jayaḥ kṣatradharmā mahārathaḥ / kṣatravṛddhānvayā bhūpā ime śṛṇv atha nāhuṣān //