Chapter 76

ततः शिवान्तिकङ्गत्वा पूजाहोमादिकं मम

tataḥ śivāntikaṅgatvā pūjāhomādikaṃ mama

गृहाण भगवन् पुण्यफलमित्यभिधाय च

gṛhāṇa bhagavan puṇyaphalamityabhidhāya ca

अर्घ्योदकेन देवाय मुद्रयोद्भवसञ्ज्ञया

arghyodakena devāya mudrayodbhavasañjñayā

हृद्वीजपूर्वमूलेन स्थिरचित्तो निवेदयेत्

hṛdvījapūrvamūlena sthiracitto nivedayet

ततः पूर्ववदभ्यर्च्य स्तुत्वा स्तोत्रैः प्रणम्य च

tataḥ pūrvavadabhyarcya stutvā stotraiḥ praṇamya ca

अर्घ्यं पराङ्मुखं दत्वा क्षमस्वेत्यभिधाय च

arghyaṃ parāṅmukhaṃ datvā kṣamasvetyabhidhāya ca

नाराचमुद्रयास्त्रेण फडन्तेनात्मसञ्चयं

nārācamudrayāstreṇa phaḍantenātmasañcayaṃ

संहृत्य दिव्यया लिङ्गं मूर्तिमन्त्रेण योजयेत्

saṃhṛtya divyayā liṅgaṃ mūrtimantreṇa yojayet

स्थण्डिले त्वर्चिते देवे मन्त्रसङ्घातमात्मनि

sthaṇḍile tvarcite deve mantrasaṅghātamātmani

नियोज्य विधिनोक्तेन विदध्याच्चण्डपूजनं

niyojya vidhinoktena vidadhyāccaṇḍapūjanaṃ

ओं चण्डेशानाय नमो मध्यतश् चण्डमूर्तये

oṃ caṇḍeśānāya namo madhyataś caṇḍamūrtaye

ओं धूलिचण्डेश्वराय हूं फट् स्वाहा तमाह्णयेत्

oṃ dhūlicaṇḍeśvarāya hūṃ phaṭ svāhā tamāhṇayet

चण्डहृदयाय हूं फट् ओं चण्डशिरसे तथा

caṇḍahṛdayāya hūṃ phaṭ oṃ caṇḍaśirase tathā

ओं चण्डशिखायै हूं फट् चण्डायुः कवचाय च

oṃ caṇḍaśikhāyai hūṃ phaṭ caṇḍāyuḥ kavacāya ca

चण्डस्त्राय तथा हूं फट् चण्डं रुद्राग्निजं स्मरेत्

caṇḍastrāya tathā hūṃ phaṭ caṇḍaṃ rudrāgnijaṃ smaret

शूलटङ्कधरं कृष्णं साक्षसूत्रकण्डलुं

śūlaṭaṅkadharaṃ kṛṣṇaṃ sākṣasūtrakaṇḍaluṃ

टङ्काकरे ऽर्धचन्द्रे वा चतुर्वक्त्रं प्रपूजयेत्

ṭaṅkākare 'rdhacandre vā caturvaktraṃ prapūjayet

यथाशक्ति जपं कुर्यादङ्गानान्तु दशांशतः

yathāśakti japaṃ kuryādaṅgānāntu daśāṃśataḥ

गोभूहिरण्यवस्त्रादिमणिहेमादिभूषणं

gobhūhiraṇyavastrādimaṇihemādibhūṣaṇaṃ

विहाय शेसनिर्माल्यं चण्डेशाय निवेदयेत्

vihāya śesanirmālyaṃ caṇḍeśāya nivedayet

लेह्यचोष्याद्यनुवरं ताम्बूलं स्रग्विलेपनं

lehyacoṣyādyanuvaraṃ tāmbūlaṃ sragvilepanaṃ

निर्माल्यं भोजनं तुभ्यं प्रदत्तन्तु शिवाज्ञया

nirmālyaṃ bhojanaṃ tubhyaṃ pradattantu śivājñayā

सर्वमेतत् क्रियाकाण्डं मया चण्ड तवाज्ञया

sarvametat kriyākāṇḍaṃ mayā caṇḍa tavājñayā

न्यूनाधिकं कृतं मोहात् परिपूर्णं सदास्तु मे

nyūnādhikaṃ kṛtaṃ mohāt paripūrṇaṃ sadāstu me

इति विज्ञाप्य देवेशं दत्वार्घ्यं तस्य संस्मरन्

iti vijñāpya deveśaṃ datvārghyaṃ tasya saṃsmaran

संहारमूर्तिमन्त्रेण शनैः संहारमुद्रया

saṃhāramūrtimantreṇa śanaiḥ saṃhāramudrayā

पूरकान्वितमूलेन मन्त्रानात्मनि योजयेत्

pūrakānvitamūlena mantrānātmani yojayet

निर्माल्यापनयस्थानं लिम्पेद्गोमयवारिणा

nirmālyāpanayasthānaṃ limpedgomayavāriṇā

प्रोक्ष्यार्घ्यादि विसृज्याथ आचान्तो ऽन्यत्समाचरेत्

prokṣyārghyādi visṛjyātha ācānto 'nyatsamācaret