Chapter 70

प्रतिष्ठां पादपानाञ्च वक्ष्ये ऽहं भुक्तिमुक्तिदां

pratiṣṭhāṃ pādapānāñca vakṣye 'haṃ bhuktimuktidāṃ

सर्वौषध्युदकैर् लिप्तान् पिष्टातकविभूषितान्

sarvauṣadhyudakair liptān piṣṭātakavibhūṣitān

वृक्षान्माल्यैर् अलङ्कृत्य वासोभिरभिवेष्टयेत्

vṛkṣānmālyair alaṅkṛtya vāsobhirabhiveṣṭayet

सूच्या सौवर्णया कार्यं सर्वेषां कर्णवेधनम्

sūcyā sauvarṇayā kāryaṃ sarveṣāṃ karṇavedhanam

हेमशलाकयाञ्जनञ्च वेद्यान्तु फलसप्तकम्

hemaśalākayāñjanañca vedyāntu phalasaptakam

अधिवासयेच्च प्रत्येकं घटान् बलिनिवेदनं

adhivāsayecca pratyekaṃ ghaṭān balinivedanaṃ

इन्द्रादेरधिवासो ऽथ होमः कार्यो वनस्पतेः

indrāderadhivāso 'tha homaḥ kāryo vanaspateḥ

वृक्षमध्यादुत्सृजेद्गां ततो ऽभिषेकमन्त्रतः

vṛkṣamadhyādutsṛjedgāṃ tato 'bhiṣekamantrataḥ

ऋग्यजुःसाममन्त्रैश् च वारुणैर् मङ्गलै रवैः

ṛgyajuḥsāmamantraiś ca vāruṇair maṅgalai ravaiḥ

वृक्षवेदिककुम्भकैश् च स्नपनं द्विजपुङ्गवाः

vṛkṣavedikakumbhakaiś ca snapanaṃ dvijapuṅgavāḥ

तरूणां यजमानस्य कुर्युश् च यजमानकः

tarūṇāṃ yajamānasya kuryuś ca yajamānakaḥ

भूषितो दक्षिणां दद्याद्गोभूभूषणवस्त्रकं

bhūṣito dakṣiṇāṃ dadyādgobhūbhūṣaṇavastrakaṃ

क्षीरेण भोजनं दद्याद्यावद्दिनचतुष्टयं

kṣīreṇa bhojanaṃ dadyādyāvaddinacatuṣṭayaṃ

होमस्तिलाद्यैः कार्यस्तु पलाशसमिधैस् तथा

homastilādyaiḥ kāryastu palāśasamidhais tathā

आचार्ये द्विगुणं दद्यात् पूर्ववन् मण्डपादिकम्

ācārye dviguṇaṃ dadyāt pūrvavan maṇḍapādikam

पापनाशः परा सिद्धिर्वृक्षारामप्रतिष्ठया

pāpanāśaḥ parā siddhirvṛkṣārāmapratiṣṭhayā

स्कन्दायेशो यथा प्राह प्रतिष्ठाद्यं तथा शृणु

skandāyeśo yathā prāha pratiṣṭhādyaṃ tathā śṛṇu

सूर्येशगणशक्त्यादेः परिवारस्य वै हरेः

sūryeśagaṇaśaktyādeḥ parivārasya vai hareḥ