Chapter 68

वक्ष्ये विधिं चोत्सवस्य स्थापिते तु सुरे चरेत्

vakṣye vidhiṃ cotsavasya sthāpite tu sure caret

तस्मिन्नब्दे चैकरात्रं त्रिरात्रञ्चाष्टरात्रकं

tasminnabde caikarātraṃ trirātrañcāṣṭarātrakaṃ

उत्सवेन विना यस्मात् स्थापनं निष्फलं भवेत्

utsavena vinā yasmāt sthāpanaṃ niṣphalaṃ bhavet

अयने विषुवे चापि शयनोपवने गृहे

ayane viṣuve cāpi śayanopavane gṛhe

कारकस्यानुकूले वा यात्रान्देवस्य कारयेत्

kārakasyānukūle vā yātrāndevasya kārayet

मङ्गलाङ्कुररोपैस्तु गीतनृत्यादिवाद्यकैः

maṅgalāṅkuraropaistu gītanṛtyādivādyakaiḥ

शरावघटिकापालीस्त्वङ्कुरारोहणे हिताः

śarāvaghaṭikāpālīstvaṅkurārohaṇe hitāḥ

यवाञ्छालींस्तिलान् मुद्गान् गोधूमान् सितसर्षपान्

yavāñchālīṃstilān mudgān godhūmān sitasarṣapān

कुलत्थमाषनिष्पावान् क्षालयित्वा तु वापयेत्

kulatthamāṣaniṣpāvān kṣālayitvā tu vāpayet

पूर्वादौ च बलिं दद्यात् भ्रमन् दीपैः पुरं निशि

pūrvādau ca baliṃ dadyāt bhraman dīpaiḥ puraṃ niśi

इन्द्रादेः कुमुदादेश् च सर्वभूतेभ्य एव च

indrādeḥ kumudādeś ca sarvabhūtebhya eva ca

अनुगच्छन्ति ते तत्र प्रतिरूपधराः पुनः

anugacchanti te tatra pratirūpadharāḥ punaḥ

पदे पदे ऽश्वमेधस्य फलं तेषां न संशयः

pade pade 'śvamedhasya phalaṃ teṣāṃ na saṃśayaḥ

आगत्य देवतागारं देवं विज्ञापयेद् गुरुः

āgatya devatāgāraṃ devaṃ vijñāpayed guruḥ

तीर्थयात्रा तु या देव श्वः कर्तव्या सुरोत्तम

tīrthayātrā tu yā deva śvaḥ kartavyā surottama

तस्यारम्भमनुज्ञातुमर्हसे देव सर्वथा

tasyārambhamanujñātumarhase deva sarvathā

देवमेवन्तु विज्ञाप्य ततः कर्म समारभेत्

devamevantu vijñāpya tataḥ karma samārabhet

प्ररोहघटिकाभ्यान्तु वेदिकां भूषितां व्रजेत्

prarohaghaṭikābhyāntu vedikāṃ bhūṣitāṃ vrajet

चतुःस्तम्भान्तु तन्मध्ये स्वस्तिके प्रतिमां न्यसेत्

catuḥstambhāntu tanmadhye svastike pratimāṃ nyaset

काम्यार्थां लेख्यचित्रेषु स्थाप्य तत्राधिवासयेत्

kāmyārthāṃ lekhyacitreṣu sthāpya tatrādhivāsayet

वैष्णवैः सह कुर्वीत घृताभ्यङ्गन्तु मूलतः

vaiṣṇavaiḥ saha kurvīta ghṛtābhyaṅgantu mūlataḥ

घृतधाराभिषेकं वा सकलां शर्वरीं बुधः

ghṛtadhārābhiṣekaṃ vā sakalāṃ śarvarīṃ budhaḥ

दर्पणं दर्श्य नीराजं गीतवाद्यैश् च मङ्गलं

darpaṇaṃ darśya nīrājaṃ gītavādyaiś ca maṅgalaṃ

व्यजनं पूजनं दीपं गन्धपुष्पादिभिर्यजेत्

vyajanaṃ pūjanaṃ dīpaṃ gandhapuṣpādibhiryajet

हरिद्रामुद्गकाश्मीरशुक्लचूर्णादि मूर्ध्नि

haridrāmudgakāśmīraśuklacūrṇādi mūrdhni

प्रतिमायाश् च भक्तानां सर्वतीर्थफलं धृते

pratimāyāś ca bhaktānāṃ sarvatīrthaphalaṃ dhṛte

स्नापयित्वा समभ्यर्च्य यात्राविम्बं रथे स्थितं

snāpayitvā samabhyarcya yātrāvimbaṃ rathe sthitaṃ

नयेद्गुरुर् नदीर्नादैश्छत्राद्यै राष्ट्रपालिकाः

nayedgurur nadīrnādaiśchatrādyai rāṣṭrapālikāḥ

निम्नगायोजनादर्वाक् तत्र वेदीन्तु कारयेत्

nimnagāyojanādarvāk tatra vedīntu kārayet

वाहनादवतार्यैनं तस्यां वेद्यान्निवेशयेत्

vāhanādavatāryainaṃ tasyāṃ vedyānniveśayet

चरुं वै श्रपयेत् तत्र पायसं होमयेत्ततः

caruṃ vai śrapayet tatra pāyasaṃ homayettataḥ

अब्लिङ्गैः वैदिकैर् मन्त्रैस्तीर्थानावाहयेत्ततः

abliṅgaiḥ vaidikair mantraistīrthānāvāhayettataḥ

आपो हिष्ठोपनिषदैः पूजयेदर्घ्यमुख्यकैः

āpo hiṣṭhopaniṣadaiḥ pūjayedarghyamukhyakaiḥ

पुनर्देवं समादाय तोये कृत्वाघमर्षणं

punardevaṃ samādāya toye kṛtvāghamarṣaṇaṃ

स्नायान्महाजनैर् विप्रैर् वेद्यामुत्तार्य तं न्यसेत्

snāyānmahājanair viprair vedyāmuttārya taṃ nyaset

पूजयित्वा तदह्ना च प्रासादं तु नयेत्ततः

pūjayitvā tadahnā ca prāsādaṃ tu nayettataḥ

पूजयेत् पावकस्थन्तु गुरुः स्याद्भुक्तिमुक्तिकृत्

pūjayet pāvakasthantu guruḥ syādbhuktimuktikṛt