Chapter 51

ससप्ताश्वे सैकचक्रे रथे सूर्यो द्विपद्मधृक्

sasaptāśve saikacakre rathe sūryo dvipadmadhṛk

मसीभाजनलेखन्यौ बिभ्रत्कुण्डी तु दक्षिणे

masībhājanalekhanyau bibhratkuṇḍī tu dakṣiṇe

वामे तु पिङ्गलो द्वारि दण्डभृत् स रवेर्गणः

vāme tu piṅgalo dvāri daṇḍabhṛt sa ravergaṇaḥ

बालव्यजनधारिण्यौ पार्श्वे राज्ञी च निष्प्रभा

bālavyajanadhāriṇyau pārśve rājñī ca niṣprabhā

अथवाश्वारूढः कार्य एकस्तु भास्करः

athavāśvārūḍhaḥ kārya ekastu bhāskaraḥ

वरदा द्व्यब्जनः सर्वे दिक्पालास्त्रकराः क्रमात्

varadā dvyabjanaḥ sarve dikpālāstrakarāḥ kramāt

मुद्गरशूलचक्राब्जभृतोग्न्यादिविदिक्स्थिताः

mudgaraśūlacakrābjabhṛtognyādividiksthitāḥ

सूर्यार्यमादिरक्षोन्ताश् चतुर्हस्ता द्विषड्दले

sūryāryamādirakṣontāś caturhastā dviṣaḍdale

वरुणः सूर्यनामा च सहस्रांशुस् तथापरः

varuṇaḥ sūryanāmā ca sahasrāṃśus tathāparaḥ

धाता तपनसञ्ज्ञश् च सविताथ गभस्तिकः

dhātā tapanasañjñaś ca savitātha gabhastikaḥ

रविश् चैवाथ पर्जन्यस्त्वष्टा मित्रोथ विष्णुकः

raviś caivātha parjanyastvaṣṭā mitrotha viṣṇukaḥ

मेषादिराशिसंस्थाश् च मार्गादिकार्त्तिकान्तकाः

meṣādirāśisaṃsthāś ca mārgādikārttikāntakāḥ

कृष्णो रक्तो मनाग्रक्तः पीतः पाण्डरकः सितः

kṛṣṇo rakto manāgraktaḥ pītaḥ pāṇḍarakaḥ sitaḥ

कपिलः पीतवर्णश् च शुकाभो धवलस् तथा

kapilaḥ pītavarṇaś ca śukābho dhavalas tathā

धूम्रो नीलः क्रमाद्वर्णाः शक्तयः केशराग्रगाः

dhūmro nīlaḥ kramādvarṇāḥ śaktayaḥ keśarāgragāḥ

इडा सुषुम्ना विश्वार्चिरिन्दुसञ्ज्ञा प्रमर्दिनी

iḍā suṣumnā viśvārcirindusañjñā pramardinī

प्रहर्षिणी महाकाली कपिला च प्रबोधनी

praharṣiṇī mahākālī kapilā ca prabodhanī

नीलाम्बरा घनान्तस्था अमृताख्या च शक्तयः

nīlāmbarā ghanāntasthā amṛtākhyā ca śaktayaḥ

वरुणादेश् च तद्वर्णाः केशराग्रेषु विन्यसेत्

varuṇādeś ca tadvarṇāḥ keśarāgreṣu vinyaset

तेजश् चण्डो महावक्रो द्विभुजः पद्मखद्गभृत्

tejaś caṇḍo mahāvakro dvibhujaḥ padmakhadgabhṛt

कुण्डिकाजप्यामालीन्दुः कुजः शक्त्यक्षमालिकः

kuṇḍikājapyāmālīnduḥ kujaḥ śaktyakṣamālikaḥ

बुधश्चापाक्षपाणिः स्याज्जीवः कुण्ड्यक्षमालिकः

budhaścāpākṣapāṇiḥ syājjīvaḥ kuṇḍyakṣamālikaḥ

शुक्रः कुण्ड्यक्षमाली स्यात् किण्किणीसूत्रवाञ्छनिः

śukraḥ kuṇḍyakṣamālī syāt kiṇkiṇīsūtravāñchaniḥ

अर्धचन्द्रधरो राहुः केतुः खड्गी च दीपभृत्

ardhacandradharo rāhuḥ ketuḥ khaḍgī ca dīpabhṛt

अनन्तस्तक्षकः कर्कः पद्मो महाब्जः शङ्खकः

anantastakṣakaḥ karkaḥ padmo mahābjaḥ śaṅkhakaḥ

कुलिकः सूत्रिणः सर्वे फणवक्त्रा महाप्रभाः

kulikaḥ sūtriṇaḥ sarve phaṇavaktrā mahāprabhāḥ

इन्द्रो वज्री गजारूढश्छागगोग्निश् च शक्तिमान्

indro vajrī gajārūḍhaśchāgagogniś ca śaktimān

यमो दण्डी च महिषे नैरृतः खड्गवान् करे

yamo daṇḍī ca mahiṣe nairṛtaḥ khaḍgavān kare

मकरे वरुणः पाशी वायुर्ध्वजधरो मृगे

makare varuṇaḥ pāśī vāyurdhvajadharo mṛge

गदी कुवेरो मेषस्थ ईशानश् च जटी वृषे

gadī kuvero meṣastha īśānaś ca jaṭī vṛṣe

द्विबाहवो लोकपाला विश्वकर्माक्षसूत्रभृत्

dvibāhavo lokapālā viśvakarmākṣasūtrabhṛt

हनूमान् वज्रहस्तः स्यात् पद्भ्यां सम्पीडिताश्रयः

hanūmān vajrahastaḥ syāt padbhyāṃ sampīḍitāśrayaḥ

वीणाहस्ताः किन्नराः स्युर्मालाविद्याधराश् च खे

vīṇāhastāḥ kinnarāḥ syurmālāvidyādharāś ca khe

दुर्बलाङ्गाः पिशाचाः स्युर्वेताला विकृताननाः

durbalāṅgāḥ piśācāḥ syurvetālā vikṛtānanāḥ

क्षेत्रपालाः शूलवन्तः प्रेता महोदराः कृशाः

kṣetrapālāḥ śūlavantaḥ pretā mahodarāḥ kṛśāḥ