Chapter 5

रामायणमहं वक्ष्ये नारदेनोदितं पुरा

rāmāyaṇamahaṃ vakṣye nāradenoditaṃ purā

वाल्मीकये यथा तद्वत् पठितं भुक्तिमुक्तिदम्

vālmīkaye yathā tadvat paṭhitaṃ bhuktimuktidam

विष्णुनाभ्यब्जजो ब्रह्मा मरीचिर्ब्रह्मणः सुतः

viṣṇunābhyabjajo brahmā marīcirbrahmaṇaḥ sutaḥ

मरीचेः कश्यपस्तस्मात् सूर्यो वैवस्वतो मनुः

marīceḥ kaśyapastasmāt sūryo vaivasvato manuḥ

ततस्तस्मात्तथेक्ष्वाकुस् तस्य वंशे ककुत्स्थकः

tatastasmāttathekṣvākus tasya vaṃśe kakutsthakaḥ

ककुत्स्थस्य रघुस्तस्माद् अजो दशरथस्ततः

kakutsthasya raghustasmād ajo daśarathastataḥ

रावणादेर्बधार्थाय चतुर्धाभूत् स्वयं हरिः

rāvaṇāderbadhārthāya caturdhābhūt svayaṃ hariḥ

राज्ञो दशरथाद्रामः कौशल्यायां बभूव ह

rājño daśarathādrāmaḥ kauśalyāyāṃ babhūva ha

कैकेय्यां भरतः पुत्रः सुमित्रायाञ्च लक्ष्मणः

kaikeyyāṃ bharataḥ putraḥ sumitrāyāñca lakṣmaṇaḥ

शत्रुघ्न ऋष्यशृङ्गेण तासु सन्दत्तपायसात्

śatrughna ṛṣyaśṛṅgeṇa tāsu sandattapāyasāt

प्राशिताद्यज्ञसंसिद्धाद् रामाद्याश् च समाः पितुः

prāśitādyajñasaṃsiddhād rāmādyāś ca samāḥ pituḥ

यज्ञविघ्नविनाशाय विश्वामित्रार्थितो नृपः

yajñavighnavināśāya viśvāmitrārthito nṛpaḥ

रामं सम्प्रेषयामास लक्ष्मणं मुनिना सह

rāmaṃ sampreṣayāmāsa lakṣmaṇaṃ muninā saha

रामो गतो ऽस्त्रशस्त्राणि शिक्षितस्ताडकान्तकृत्

rāmo gato 'straśastrāṇi śikṣitastāḍakāntakṛt

मारीचं मानवास्त्रेण मोहितं दूरतो ऽनयत्

mārīcaṃ mānavāstreṇa mohitaṃ dūrato 'nayat

सुबाहुं यज्ञहन्तारं सबलञ्चावधीत् बली

subāhuṃ yajñahantāraṃ sabalañcāvadhīt balī

सिद्धाश्रमनिवासी च विश्वामित्रादिभिः सह

siddhāśramanivāsī ca viśvāmitrādibhiḥ saha

गतः क्रतुं मैथिलस्य द्रष्टुञ्चापं सहानुजः

gataḥ kratuṃ maithilasya draṣṭuñcāpaṃ sahānujaḥ

शतानन्दनिमित्तेन विश्वामित्रप्रभावितः

śatānandanimittena viśvāmitraprabhāvitaḥ

रामाय कथितो राज्ञा समुनिः पूजितः क्रतौ

rāmāya kathito rājñā samuniḥ pūjitaḥ kratau

धनुरापूरयामास लीलया स बभञ्ज तत्

dhanurāpūrayāmāsa līlayā sa babhañja tat

वीर्यशुक्लाञ्च जनकः सीतां कन्यान्त्वयोनिजाम्

vīryaśuklāñca janakaḥ sītāṃ kanyāntvayonijām

ददौ रामाय रामो ऽपि पित्रादौ हि समागते

dadau rāmāya rāmo 'pi pitrādau hi samāgate

उपयेमे जानकीन्ताम् उर्मिलां लक्ष्मणस् तथा

upayeme jānakīntām urmilāṃ lakṣmaṇas tathā

श्रुतकीर्तिं माण्डवीञ्च कुशध्वजसुते तथा

śrutakīrtiṃ māṇḍavīñca kuśadhvajasute tathā

जनकस्यानुजस्यैते शत्रुघ्नभरतावुभौ

janakasyānujasyaite śatrughnabharatāvubhau

कन्ये द्वे उपयेमाते जनकेन सुपूजितः

kanye dve upayemāte janakena supūjitaḥ

रामो ऽगात्सवशिष्ठाद्यैर् जामदग्न्यं विजित्य च

rāmo 'gātsavaśiṣṭhādyair jāmadagnyaṃ vijitya ca

अयोध्यां भरतोभ्यागात् सशत्रुघ्नो युधाजितः

ayodhyāṃ bharatobhyāgāt saśatrughno yudhājitaḥ