Chapter 302

यदा जन्मर्क्षगश् चन्द्रो भानुः सप्तसराशिगः

yadā janmarkṣagaś candro bhānuḥ saptasarāśigaḥ

पौष्णः कालः स विज्ञेयस्तदा ग्रासं परीक्षयेत्

pauṣṇaḥ kālaḥ sa vijñeyastadā grāsaṃ parīkṣayet

कण्टोष्ठौ चलतःस्थानाद्यस्य वक्रा च नासिका

kaṇṭoṣṭhau calataḥsthānādyasya vakrā ca nāsikā

कृष्णा च जिह्वा सप्ताहं जीवितं तस्य वै भवेत्

kṛṣṇā ca jihvā saptāhaṃ jīvitaṃ tasya vai bhavet

तारो मेषो विषं दन्ती नरो दीर्घो वणा रसः

tāro meṣo viṣaṃ dantī naro dīrgho vaṇā rasaḥ

क्रूद्धोल्काय महोल्काय वीरोल्काय शिखा भवेत्

krūddholkāya maholkāya vīrolkāya śikhā bhavet

ह्यल्काय राहसोल्काय वैष्णवोष्टाक्षरो मनुः

hyalkāya rāhasolkāya vaiṣṇavoṣṭākṣaro manuḥ

कनिष्ठादितदष्टानामङ्गुलीनाञ्च पर्वसु

kaniṣṭhāditadaṣṭānāmaṅgulīnāñca parvasu

ज्येष्ठाग्रेण क्रमात्तावन् मूर्धन्यष्टाक्षरं न्यसेत्

jyeṣṭhāgreṇa kramāttāvan mūrdhanyaṣṭākṣaraṃ nyaset

तर्जन्यान्तारमङ्गुष्ठे लग्ने मध्यमया च तत्

tarjanyāntāramaṅguṣṭhe lagne madhyamayā ca tat

तलेङ्गुष्ठे तदुत्तारं वीजोत्तारं ततो न्यसेत्

taleṅguṣṭhe taduttāraṃ vījottāraṃ tato nyaset

रक्तगौरधूम्रहरिज्जातरूपाः सितास्त्रयः

raktagauradhūmraharijjātarūpāḥ sitāstrayaḥ

एवं रूपानिमान् वर्णान् भावबुद्धान्न्यसेत् क्रमात्

evaṃ rūpānimān varṇān bhāvabuddhānnyaset kramāt

हृदास्यनेत्रमूर्धाङ्घ्रितालुगुह्यकरादिषु

hṛdāsyanetramūrdhāṅghritāluguhyakarādiṣu

अङ्गानि च न्यसेद्वीजान्न्यस्याथ करदेहयोः

aṅgāni ca nyasedvījānnyasyātha karadehayoḥ

यथात्मनि तथा देवे न्यासः कार्यः करं विना

yathātmani tathā deve nyāsaḥ kāryaḥ karaṃ vinā

हृदादिस्थानगान् वर्णान् गन्धपुष्पै समर्चयेत्

hṛdādisthānagān varṇān gandhapuṣpai samarcayet

धर्माद्यग्न्याद्यधर्मादि गात्रे पीठे ऽम्बुजे न्यसेत्

dharmādyagnyādyadharmādi gātre pīṭhe 'mbuje nyaset

यत्र केशरकिञ्जल्कव्यापिसूर्येन्दुदाहिनां

yatra keśarakiñjalkavyāpisūryendudāhināṃ

मण्डलन्त्रितयन्तावद् भेदैस्तत्र न्यसेत् क्रमात्

maṇḍalantritayantāvad bhedaistatra nyaset kramāt

गुणाश् च तन्त्रसत्वाद्याः केशरस्थाश् च शक्तयः

guṇāś ca tantrasatvādyāḥ keśarasthāś ca śaktayaḥ

विमलोत्कर्षणीज्ञानक्रियायोगाश् च वै क्रमात्

vimalotkarṣaṇījñānakriyāyogāś ca vai kramāt

प्रह्वी सत्या तथेशानानुग्रहा मध्यतस्ततः

prahvī satyā tatheśānānugrahā madhyatastataḥ

योगपीठं समभ्यर्च्य समावह्य हरिं यजेत्

yogapīṭhaṃ samabhyarcya samāvahya hariṃ yajet

पाद्यार्घ्याचमनीयञ्च पीतवस्त्रविभूषणं

pādyārghyācamanīyañca pītavastravibhūṣaṇaṃ

एतत् पञ्चोपचारञ्च सर्वं मूलेन दीयते

etat pañcopacārañca sarvaṃ mūlena dīyate

वासुदेवादयः पूज्याश् चत्वारो दिक्षु मूर्तयः

vāsudevādayaḥ pūjyāś catvāro dikṣu mūrtayaḥ

विदिक्षु श्रीसरस्वत्यै रतिशान्त्यै च पूजयेत्

vidikṣu śrīsarasvatyai ratiśāntyai ca pūjayet

शङ्खं चक्रं गदां पद्मं मुषलं खड्गशार्ङ्गिके

śaṅkhaṃ cakraṃ gadāṃ padmaṃ muṣalaṃ khaḍgaśārṅgike

वनमालान्वितं दिक्षु विदिक्षु च यजेत् क्रमात्

vanamālānvitaṃ dikṣu vidikṣu ca yajet kramāt

अभ्यर्च्य च वहिस्तार्क्ष्यं देवस्य पुरतो ऽर्चयेत्

abhyarcya ca vahistārkṣyaṃ devasya purato 'rcayet

विश्वक्सेनञ्च सोमेशं मध्ये आवरणाद्वहिः

viśvaksenañca someśaṃ madhye āvaraṇādvahiḥ

इन्द्रादिपरिचारेण पूज्य सर्वमवाप्नुयात्

indrādiparicāreṇa pūjya sarvamavāpnuyāt